Luku 1:37—“Na Nuhe Ko Yin Didọ Depope Ma Glo Jiwheyẹwhe”

“Na ohó de sọn Jiwheyẹwhe dè ma na gbọ̀vọ́ huhlọn tọn gba.”—Luku 1:37, Biblu wiwe lọ Gun Alada.

Zẹẹmẹ Luku 1:37 Tọn

Jiwheyẹwhe Ganhunupotọ lọ gán wà nususu lẹ he ma yọnbasi to pọndohlan gbẹtọvi tọn mẹ. Nudepope ma gán glọnalina ẹn nado wà nuhe e dọ kavi dopà etọn.

Hogbe dowhenu tọn lọ he yin lilẹdo “nuhe ko yin didọ” gán sọ dlẹnalọdo “hodidọ de,” kavi tofi “hodidọ” de he wá sọn Jiwheyẹwhe dè. E gán sọ yin kọdetọn nuhe Jehovaha Jiwheyẹwhe ko dọ de tọn. Na ohó Jiwheyẹwhe tọn nọ mọ hẹndi to whelẹponu wutu, Luku 1:37 gán sọ yin lilẹdo, “na opagbe Jiwheyẹwhe tọn lẹ ma gán gboawupo gbede,” kavi “na nudepope ma gán glo Jiwheyẹwhe.” Aliho he mẹ hogbe Glẹkigbe tọn dowhenu tọn lọ yin lilẹdogbedevomẹ te ehelẹ do nugbo titengbe dopolọ hia, enẹ wẹ yindọ: Nuhe Jiwheyẹwhe dọ kavi dopà etọn lẹpo wẹ nọ mọ hẹndi, na nudepope ma gán glo e.—Isaia 55:10, 11.

Hodidọ mọnkọ lẹ gando opagbe Jiwheyẹwhe tọn lẹ go sọawuhia to fisusu to Biblu mẹ. Di apajlẹ, Jehovah dopà gbọn angẹli etọn de gblamẹ dọ Sala, yèdọ asi Ablaham tọn he yin wẹnsinọ na mọhò to yọnhowhe etọn mẹ. Jiwheyẹwhe yidogọ dọ: “Be nudepope glo Jehovah wẹ ya?” (Jenẹsisi 18:13, 14) Whenue tọgbo Jobu ko lẹnayihamẹpọn do nudida Jiwheyẹwhe tọn lẹ ji godo, e yigbe dọmọ: “Nuhe hiẹ tindo to ayiha mẹ nado wà depope ma nọ glo we.” (Jobu 42:2) Podọ whenue hodotọ Jesu tọn lẹ do ayihaawe eyin e na pà yé nado nọgbẹ̀ sọgbe hẹ nujinọtedo Jiwheyẹwhe tọn lẹ bo mọ whlẹngán, Jesu flinnu yé dọ, “nulẹpo wẹ yọnbasi na Jiwheyẹwhe.”—Matiu 19:25, 26.b

Nujijọ He Lẹdo Luku 1:37 Lẹ

Angẹli de he nọ yin Gabliẹli wẹ yí hogbe he to Luku 1:37 mẹ lẹ zan na Malia, yèdọ awhli Ju de he to alọji. Gabliẹli ṣẹṣẹ dọna ẹn dọ ewọ na ji “Visunnu Gigogán lọ tọn” bo nasọ “ylọ oyín etọn dọ Jesu.” Ewọ na lẹzun Ahọlu Ahọluduta Jiwheyẹwhe tọn, yèdọ Ahọluduta de he na dugán kakadoi.—Luku 1:26-33; Osọhia 11:15.

Malia kanse dọ nawẹ onú mọnkọ gán yọnbasi gbọn, to whenuena e yindọ e ma ko wlealọ podọ e “ma ko tindo kọndopọ zanhẹmẹ tọn hẹ sunnu de” pọ́n. (Luku 1:34, 35) Gabliẹli gblọn dọ gbigbọ wiwe Jiwheyẹwhe tọn kavi huhlọn yido wazọ́n etọn wẹ e na yizan nado wàmọ. To ojlẹ lọ mẹ, Jesu yin visunnu gbigbọmẹ tọn Jiwheyẹwhe tọn de to olọn mẹ. Enẹwutu, Jehovah yí gbigbọ wiwe etọn zan nado diọtẹnna ogbẹ̀ Visunnu etọn tọn sọn olọn mẹ wá vidọ̀ Malia tọn mẹ. (Johanu 1:14; Filipinu lẹ 2:5-7) Gbọnmọ dali, Malia mọhò to azọ́njiawu-liho. Nado hẹn yise Malia tọn lodo gando huhlọn Jiwheyẹwhe tọn go, angẹli lọ dọna ẹn dọ, hẹnnumẹ etọn Elizabẹti lọsu ṣẹṣẹ mọhò visunnu de tọn “to yọnhowhe etọn mẹ.” Zekalia po asi etọn Elizabẹti po ma ko jivi de, na ewọ yin wẹnsinọ wutu. (Luku 1:36) Visunnu yetọn wá lẹzun Johanu Baptizitọ lọ, yèdọ mẹhe Jehovah ko sọ dọdai gando lizọnyizọn etọn go.—Luku 1:10-16; 3:1-6.

To enẹgodo wẹ angẹli Gabliẹli dọ hogbe he to Luku 1:37 mẹ lẹ, vlavo na e tindo Malia po Elizabẹti po to ayiha mẹ wutu. To egbehe, hogbe enẹlẹ dopolọ nọ na jide sinsẹ̀n-basitọ Jehovah tọn lẹ dọ, ewọ na zindonukọn nado to nugbonọ yin na opagbe etọn lẹ. Dopo to yé mẹ wẹ opagbe etọn nado yí Visunnu etọn Jesu Klisti, yèdọ Ahọlu Ahọluduta Jiwheyẹwhe tọn to olọn mẹ do diọtẹnna gandudu gbẹtọvi tọn lẹ.—Daniẹli 2:44; 7:13, 14.

Pọ́n video kleun ehe nado mọ nue to owe Luku tọn mẹ delẹ.