Heblu lẹ 4:12—“Ohó Jiwheyẹwhe Tọn Tin To Ogbẹ̀, E Dohuhlọn”

“Na ohó Jiwheyẹwhe tọn tin to ogbẹ̀ bo tindo huhlọn bosọ dá hú ohí onù awenọ depope bo nọ sọ́ omẹ, yèdọ jẹ obá lọ mẹ nado klan alindọn po gbigbọ po, podọ hupetẹn lẹ sọn ojó lẹ go, e sọ penugo nado yọ́n linlẹn po ojlo ahun mẹ tọn lẹ po.”—Heblu lẹ 4:12, Lẹdogbedevomẹ Aihọn Yọyọ Tọn.

“Na ohó Jiwheyẹwhe tọn tin to ogbẹ̀, e dohuhlọn, bo dá hú ohí nùawenọ, é nọ sọ́ omẹ, yèdọ nado klan ayiha po gbigbọ po do voovo, agómẹ hupetẹn tọn po ojó ohú mẹ tọn po, ewọ sọ wẹ linlẹn ayiha tọn po ojlo ayiha tọn po yọnẹntọ.”—Heblu lẹ 4:12, Biblu Wiwe lọ—Gun Alada.

Zẹẹmẹ Heblu lẹ 4:12 Tọn

Dile e yin kinkandai do to Biblu mẹ, owẹ̀n Jiwheyẹwhe tọn na gbẹtọvi lẹ tindo huhlọn lọ nado de nuhe lẹn mí te na taun tọn po mẹwhinwhàn mítọn lẹ po tọ́n. Owẹ̀n enẹ gán hẹn gbẹzan mítọn pọnte dogọ.

“Ohó Jiwheyẹwhe tọn tin to ogbẹ̀.” Hogbe lọ “ohó Jiwheyẹwhe tọn” to alọdlẹndo opagbe Jiwheyẹwhe tọn kavi lẹndai etọn he yin kinkandai do Biblu mẹ.a Adà titengbe lẹndai enẹ tọn wẹ yindọ gbẹtọvi tonusetọ lẹ ni nọgbẹ̀ kakadoi to aigba ji bo duvivi jijọho po pọninọ nujọnu tọn po tọn.—Jenẹsisi 1:28; Salmu lẹ 37:29; Osọhia 21:3, 4.

Nawẹ ohó Jiwheyẹwhe tọn kavi lẹndai etọn “tin to ogbẹ̀” gbọn? E tin to ogbẹ̀ to linlẹn lọ mẹ dọ, e nọ yinuwado ahun mẹhe tindo yise to e mẹ lẹ tọn ji sisosiso bo nọ na yé todido, bọ gbẹzan yetọn sọ nọ tindo zẹẹmẹ. (Deutelonomi 30:14; 32:47) Ohó Jiwheyẹwhe tọn sọ “tin to ogbẹ̀” na Jiwheyẹwhe ogbẹ̀nọ lọ to azọ́nwa nado hẹn opagbe etọn lẹ di to gigọ́ mẹ wutu. (Johanu 5:17) To vogbingbọn mẹ na gbẹtọvi lẹ, eyin Jiwheyẹwhe dopà, e ma nọ wọnji opà etọn go kavi nọ wá mọ to godo mẹ dọ emi ma gán penugo nado hẹn ẹn di. (Sọha lẹ 23:19) Ohó etọn ‘ma na lẹkọwa e dè yaya.’—Isaia 55:10, 11.

“Ohó Jiwheyẹwhe tọn . . . tindo huhlọn.” Hogbe lọ “tindo huhlọn” sọ sọgan yin lilẹdo “yin huhlọnnọ,” “nọ yinuwa,” kavi “nọ tindo kọdetọn dagbe to nudepope he e dona hẹndi lẹ mẹ.” Enẹwutu, nudepope he Jehovahb Jiwheyẹwhe dọ kavi dopà etọn lẹpo na mọ hẹndi dandan. (Salmu lẹ 135:6; Isaia 46:10) Na nugbo tọn, Jiwheyẹwhe gán hẹn opagbe etọn lẹ di to aliho he zẹ̀ nukundido mítọn lẹpo go.—Efesunu lẹ 3:20.c

Ohó Jiwheyẹwhe tọn sọ “tindo huhlọn” na e nọ gọalọna mẹhe yọ́n pinpẹn etọn lẹ nado basi diọdo lẹ to gbẹzan yetọn mẹ podọ gando gbẹtọ-yinyin yetọn go. Nuplọnmẹ Jiwheyẹwhe tọn lẹ nọ lẹzun apadewhe gbẹzan yetọn tọn bo nọ yinuwado lenpọn, aliho gbẹninọ tọn po yanwle yetọn lẹ po ji. (Lomunu lẹ 12:2; Efesunu lẹ 4:24) To linlẹn de mẹ, “ohó Jiwheyẹwhe tọn . . . sọ to azọ́nwa to” mẹhe kẹalọyi dọ e wá sọn ewọ dè lẹ mẹ.—1 Tẹsalonikanu lẹ 2:13.

“Ohó Jiwheyẹwhe tọn . . . dá hú ohí onù awenọ depope.” To yẹhiadonu-liho, ohó Jiwheyẹwhe tọn dá hú ohí depope he gbẹtọvi de basi na aliho he mẹ e nọ yinuwado gbẹtọvi lẹ ji te wutu. Ohó Jiwheyẹwhe tọn gán yinuwado ahun kavi gbẹtọ-yinyin homẹ tọn mẹde tọn ji hugan lehe nuplọnmẹ gbẹtọ tọn sọgan wà do. Heblu lẹ 4:12 do ehe hia hezeheze.

“Ohó Jiwheyẹwhe tọn . . . nọ sọ́ omẹ, yèdọ jẹ obá lọ mẹ nado klan alindọn po gbigbọ po, podọ hupetẹn lẹ sọn ojó lẹ go.” To Biblu mẹ, “alindọn” sọgan to alọdlẹndo omẹ nankọ he mẹde sọawuhia nado yin, amọ́ “gbigbọ” sọgan to alọdlẹndo gbẹtọ-yinyin homẹ tọn mẹde tọn. (Galatianu lẹ 6:18) To yẹhiadonu-liho, “ohó Jiwheyẹwhe tọn” nọ sọ́ mẹ yì mọ “ojó lẹ,” enẹ wẹ numọtolanmẹ po linlẹn mítọn he siso lẹ po. Nuplọnmẹ Jehovah tọn lẹ nọ do mẹhe mí yin na taun tọn to homẹ hia, yèdọ fie gbẹtọvi depope ma gán mọnú jẹ, bosọ nọ whàn mí nado basi diọdo dagbe lẹ. Ehe nọ hẹn ayajẹ wá na Mẹdatọ mítọn podọ na mílọsu.

“Ohó Jiwheyẹwhe tọn . . . penugo nado yọ́n linlẹn po ojlo ahun mẹ tọn lẹ po.” Nukun he mẹde nọ yí do pọ́n ohó Jiwheyẹwhe tọn sọgan do linlẹn po mẹwhiwhàn nugbo he e tindo po hia, podọ ehe nọ yinuwado walọyizan po nuyiwa etọn lẹ po ji. Di apajlẹ, eyin mẹde nọ yinuwa sọgbe hẹ ohó Jiwheyẹwhe tọn to aliho dagbe mẹ gbọn diọdo he yin dandan tọn lẹ bibasi to gbẹzan etọn mẹ dali, ewọ nọ dohia dọ emi yin whiwhẹnọ podọ ahundoponọ. E nọ jlo na hẹn homẹ Mẹdatọ etọn tọn hùn. To alọ devo mẹ, eyin e ma kẹalọyi ohó Jiwheyẹwhe tọn, e sọgan jẹ walọ ylankan delẹ dohia ji, taidi goyiyi po ṣejannabi po. Vlavo e na to tintẹnpọn nado suwhẹna walọyizan he Jiwheyẹwhe gbẹwanna lẹ.—Jelemia 17:9; Lomunu lẹ 1:24-27.

Owe alọdlẹndonu tọn de dọ dọ “ohó Jiwheyẹwhe tọn nọ do linlẹn mítọn he siso lẹ, numọtolanmẹ po mẹwhinwhàn mítọn lẹ po hia.” Adà gbẹtọ-yinyin homẹ tọn depope matin he Jiwheyẹwhe ma gán mọ kavi he ohó etọn ma gán dehia. Heblu lẹ 4:13 dọmọ: “Nulẹpo wẹ to omẹ́ bo to wedede to nukun ewọ mẹhe mí dona dogbè na lọ tọn lẹ mẹ.”

Nujijọ He Lẹdo Heblu lẹ 4:12 Lẹ

Owe Heblu lẹ tọn yin wekanhlanmẹ gbọdo de he apọsteli Paulu kàn to nudi owhe 61 W.M. hlan Klistiani he to Jelusalẹm po Jude po lẹ.

To weta 3 po 4​tọ po mẹ, Paulu zinnudo lehe apajlẹ Islaelivi hohowhenu tọn lẹ tọn yin avase de na Klistiani lẹ do ji. (Heblu lẹ 3:8-12; 4:11) Jehovah dopà nado whlẹn Islaelivi lẹ sọn kanlinmọgbenu bosọ plan yé yì aigba de ji fie yé “na tin to hihọ́ mẹ” te. (Deutelonomi 12:9, 10) Etomọṣo, whẹndo Islaelivi lẹ tọn he tọ́n sọn Egipti lẹ dohia whlasusu dọ emi ma tindo yise to opagbe Jiwheyẹwhe tọn lẹ mẹ bosọ nọ vẹtolina gbedide Jiwheyẹwhe tọn lẹ. Taidi kọdetọn de, yé “ma biọ gbọjẹ [Jiwheyẹwhe] tọn mẹ” bo masọ duvivi haṣinṣan jijọho tọn de hẹ ewọ. Kakatimọ, yé kú to danfafa ji. Mahopọnna dọ kúnkan yetọn lẹ wá dugu Aigba Pagbe tọn lọ tọn, yelọsu jẹ tolivẹna Jehovah ji. Dile ojlẹ to yìyì, tolivivẹ yetọn hẹn yajiji susu wá akọta lọ ji.—Nẹhemia 9:29, 30; Salmu lẹ 95:9-11; Luku 13:34, 35.

Paulu basi zẹẹmẹ dọ Klistiani lẹ dona plọnnu sọn apajlẹ ylankan Islaelivi he ma yin nugbonọ lẹ tọn mẹ. To vogbingbọn mẹ na yé, mí gán biọ gbọjẹ Jiwheyẹwhe tọn mẹ gbọn tonusisena ohó etọn podọ gbọn yise dolido tintindo to opagbe etọn lẹ mẹ dali.—Heblu lẹ 4:1-3, 11.

Pọ́n video kleun ehe nado mọ nue to owe Heblu lẹ tọn mẹ delẹ.