LEHE NUNINA MÌTỌN LẸ NỌ YIN YIYIZAN DO

Awuwiwlena Kọgbọ to “Awhàn Zingidi po Awhàn Linlin lẹ po” Whenu

27 MAI 2022

To azán godo tọn ehelẹ mẹ, mí na nọ “sè awhàn zingidi po awhàn linlin lẹ po.” (Matiu 24:6) Etomọṣo, mẹmẹsunnu mítọn lẹ nọ mọ alọgọ he sin hudo yé do whenue yé pehẹ nuhahun lẹ na awhàn wutu. Linlin Hagbẹ Anademẹtọ Tọn #3 2022 tọn ko na mí nudọnamẹ tulinamẹ tọn lẹ gando azọ́n kọgbọ tọn he to yìyì to alọnu to Whèzẹtẹn Europe tọn go, nado gọalọna mẹhe awhàn he to núgbà to Ukraine hẹnnugblena lẹ. Amọ́, nawẹ alọgọ kọgbọ tọn ehe to yinyin nina gbọn, mahopọnna awhàn lọ? Podọ, ale tẹwẹ azọ́n kọgbọ tọn ehelẹ ko hẹnwa na mẹmẹsunnu he to Ukraine lẹ?

Etẹ Sin Hudo Wẹ Mẹlẹ Do? Nawẹ Yé Nọ Mọ Nulọ lẹ Yí Gbọn?

To 24 février 2022 he awhàn jẹ núgbà ji to Ukraine, Wedegbẹ́ Anadenanutọ tọn yigbe dọ akuẹ sọha de ni yin yiyizan nado gọalọna mẹmẹsunnu mítọn he to Ukraine lẹ. Alahọ Ukraine tọn yawu jẹ nulẹ họ̀ ji to lẹdo lọ mẹ, podọ Wedegbẹ́ Kọgbọ tọn 27 he e doai lẹ jẹ nue yé họ̀ lọ lẹ má ji.

Nado yidogọna vivẹnudido ehelẹ, Tatọ́-Tẹnnọ Kunnudetọ Jehovah tọn lẹ tọn lọsu jẹ nulẹnpọn ji to afọdopolọji nado yọ́n aliho dagbe devo he mẹ yé gán gọalọ te lẹ. Wedegbẹ́ Anadenanutọ tọn po Wedegbẹ́ Wezinjẹgbonu Tọn Hagbẹ Anademẹtọ lọ tọn po biọ to Azọ́nwatẹn Nuhihọ̀ tọn he to tatọ́-tẹnnọ si nado wazọ́n hẹ afọzedaitọ lẹ sọn alahọ Ukraine po Pologne po tọn lẹ mẹ nado dindona nuhudo alọnu tọn lẹ bosọ ze afọdide lẹ nado penukundo yé go. Egbesọegbesọ, mẹmẹsunnu delẹ sọn Azọ́nwatẹn Nuhihọ̀ Tọn, Azọ́nwatẹn Agbànbẹdohlan tọn po azọ́nwatẹn he nọ penukundo Whẹho Osẹ́n Tọn lẹ go to alahọ awe lọ lẹ mẹ po, gọna hagbẹ Wedegbẹ́ Alahọ Ukraine tọn de po mẹmẹsunnu delẹ po sọn Azọ́nwatẹn Nuhihọ̀ Tọn Tatọ́-Tẹnnọ Tọn nọ pli dopọ nado dọhodo lehe azọ́n lọ na yin wiwà do ji.

Nunina kọgbọ tọn lọ bẹ núdùdù, nuzinzan wiwejininọ tọn lẹ gọna kalti he ji yè yí alọ do kàn hogbe tulinamẹ tọn lẹ do de hẹn

Mẹmẹsunnu Jay Swinney he nọ wazọ́n to Azọ́nwatẹn Nuhihọ̀ Tọn Tatọ́-Tẹnnọ Tọn dọ dọ: “Jẹnukọn whẹ́, mí dona yọ́n nue sin hudo mẹlẹ do. Mí jlo na basi tito na núdùdù po nuyizan wiwejininọ tọn he mẹmẹsunnu he to lẹdo lọ mẹ lẹ na jẹakọ hẹ lẹ po nido jẹ yé si. Amọ́, onú dopo wẹ e yin nado yọ́n nue sin hudo mẹlẹ do. Podọ nudevo pete wẹ e sọ yin nado yọ́n lehe mí na yawu bẹ agbàn lọ lẹ biọ Ukraine to hihọ́ glọ to awhàn lọ whenu do.”

To 9 mars 2022, mẹmẹsunnu lẹ ko yọ́n nue sin hudo mẹlẹ do. Pali he mẹ núdùdù tangan delẹ taidi olàn po whèvi panu mẹ tọn po, jinukun lẹ, lẹsi po ayivi po tin te lẹ wẹ na yin nina yé gọna nuyizan wiwejininọ tọn lẹ taidi adí po wema he nọ yin zinzan to afọdaitẹn lẹ po. To ojlẹ lọ mẹ, yè mọdọ akuẹ he na pé nado họ̀ nuhe mẹdopo na do hudo etọn na osẹ ẹnẹ wẹ dọla Amelika tọn 65 nkọ (yèdọ nudi 39 650 F CFA). Na e yọnbasi dọ mẹmẹsunnu mítọn fọtọ́n susu wẹ na to hudo mẹ wutu, Wedegbẹ́ Anadenanutọ tọn yigbe dọ akuẹ he yinukunkẹ pẹẹde ni yin yiyizan. Amọ́, nawẹ agbàn lọ lẹ gán yin didohlan gbọn bọ ogbẹ̀ mẹmẹsunnu mítọn lẹ tọn ma na yin zizedo owù mẹ?

To 13 mars, mẹmẹsunnu awe delẹ sọn Pologne bayi tẹnpọn de bo bẹ agbàn lẹ sọn alahọ Pologne tọn mẹ yì agbànhọ de mẹ sẹpọ Lviv to Ukraine. Azán delẹ jẹnukọnna yìyì yetọn, hagbẹ whẹndo Bẹtẹli tọn Pologne po Ukraine po tọn delẹ gọalọna mẹdezejotọ awe lọ lẹ nado wleawudai na gbejizọnlin yetọn. Alahọ wleawuna wema he yé do hudo etọn nado dasá dogbó sọgbe hẹ osẹ́n nado hẹn alọgọ kọgbọ tọn yì lẹ, bo hẹn ẹn diun dọ yè dohiagona mọto yetọn to aliho he họnwun mẹ dọ alọgọ kọgbọ tọn wẹ yé to nina, bosọ dọhodopọ hẹ mẹmẹsunnu he to Ukraine lẹ nado yọ́n ali he na yá na yé hugan tlolo he yé dasa dogbó. Awuwiwle dagbe ehe gọna godonọnamẹ Jehovah tọn zọ́n bọ nunina kọgbọ tọn lọ lẹ jẹ Wedegbẹ́ Kọgbọ tọn lọ lẹ si nudi gànhiho 24 to whenue agbàn lọ lẹ ko jẹ Lviv godo, podọ mẹmẹsunnu mítọn lẹ lẹkọyi Pologne awuyẹyẹ afọyẹyẹ.

Dile etlẹ yindọ gbejizọnlin tintan lọ yì ganji, agbàn he mẹmẹsunnu lọ lẹ bẹ yì ma pé tọnu dopo. Nuhudo agbàn tọnu 200 tọn nkọ gbẹ́ tin! Enẹwutu, nawẹ agbàn planplan enẹ na yawu yin didohlan bosọ yin mimá pé gbọn?

“Omẹ Towe lẹ Na Ze Yede Jo sọn Ojlo Mẹ Wá”

Whenue mẹlẹ hia linlin lẹ to jw.org ji gando lehe nue to jijọ to Ukraine ko hẹnnugble na mẹmẹsunnu mítọn lẹ do go, mẹsusu lẹ lẹdo aihọn pé wẹ jlo na gọalọ. Susu mẹhe to fie to olá lẹ tọn wẹ bayi nunina akuẹ tọn nado nọgodona azọ́n lẹdo aihọn pé tọn Kunnudetọ Jehovah tọn lẹ tọn, na yé deji dọ nunina lọ lẹ na yin yiyizan dile e jẹ do. Mẹdevo lẹ he nọ nọ̀ otò he pé dogbó hẹ yé lẹ mẹ, wẹ penugo nado yí whenu, huhlọn po nutindo yetọn lẹ po do gọalọ. Apajlẹ kleun delẹ die.

To Pologne, mẹdezejotọ lẹ bẹ agbàn he na yin didohlan lẹ pli bọ yọpọvu lẹ de yẹdide lẹ do kalti lẹ ji. Bartosz Kościelniak he nọ wazọ́n to Azọ́nwatẹn Nuhihọ̀ tọn Alahọ Pologne tọn dọmọ: “Whlasusu wẹ n’ko hia Salmu lẹ 110:3 he dọ omẹ Jehovah tọn lẹ ‘na ze yede jo sọn ojlo mẹ wá.’ Amọ́, na n’yinukun ṣie do mọ lehe alọgọ to wiwá sọn adusi po amiyọ́n po do, gọna lehe mẹdezejotọ kanweko susu lẹ to wiwọ̀ wá bosọ to gbesisọmẹ nado gọalọ do, e họnwun na mi dọ nugbo wẹ hogbe ehelẹ.”

Kunnudetọ Jehovah tọn de he tindo azọ́nwhe he nọ bẹ agbàn yì otò susu mẹ lẹdo aihọn pé de ze agbànbẹhun etọn lẹ jo bosọ jẹ amì do yé mẹ nado do agbàn lọ lẹ hlan. E dọmọ: “Dotẹnmẹ hundote de wẹ e yin na mi nado do owanyi ṣie hia mẹmẹsunnu ṣie lẹ po Jehovah po. Homẹ ṣie hùn taun nado gọalọ.” Amì litli 7 700 linlán wẹ mẹmẹsunnu lọ na, podọ mẹmẹsunnu lẹ yí whenu po huhlọn yetọn po do kùnhún na nudi kilomẹtlu 48 000 nado má agbàn lọ lẹ!

Ojlo gọna azọ́n dagbe mẹmẹsunnu po mẹmẹyọnnu mítọn lẹ po tọn zọ́n bọ to 28 mars, enẹ wẹ azán 15 poun to tẹnpọn agbànbẹdohlan tọn tintan he yin bibasi lọ godo, núdùdù, nuzinzan wiwejininọ tọn lẹ gọna amasin tọnu 100 wẹ yin didohlan Ukraine! Podọ na mẹmẹsunnu mítọn lẹ po ajọwatọ lẹ po yí alọtútlú do basi nunina wutu, akuẹ vude poun wẹ yin yiyizan sọn akuẹ he yin didedovo na azọ́n kọgbọ tọn lọ mẹ. To alọnu din, Kunnudetọ Jehovah tọn lẹ ko do nunina kọgbọ tọn tọnu 190 linlán hlan Ukraine. Nawẹ nunina ehelẹ ko yinuwado mẹmẹsunnu mítọn lẹ ji gbọn?

“Owanyi Mìtọn Lọsu to E mẹ Ga!”

Tlolo he agbàn lọ lẹ jẹ Lviv, Wedegbẹ́ Kọgbọ tọn lẹ má yé pé gbọn Ukraine na mẹhe to hudo mẹ lẹ. Agbàn lọ lẹ ko yin mimá gbọn tòdaho voovo lẹ mẹ, etlẹ yin to fihe dẹn do Lviv na kilomẹtlu 1 300 linlán lẹ. Azọ́n ehe yí whenu susu, dile etlẹ yindọ e yin nukunpedego dile e jẹ do.a

Markus Reinhardt he yin hagbẹ Wedegbẹ́ Alaho Ukraine tọn de dọ dọ: “To nugbajẹmẹji ehe whenu, mẹmẹsunnu susu wẹ ko mọ owanyi Jehovah tọn tlọlọ gọna ale anademẹ titobasinanu lọ tọn lẹ hihodo pẹkipẹki nọ hẹnwa lẹ, etlẹ yin whẹpo nugbajẹmẹji de nido wá aimẹ. Di apajlẹ, mẹlẹpo wẹ yin tulina nado nọ sẹ̀ núdùdù po osin he yé gán zan na osẹ susu po do. Mẹho agun tọn de he nọ yin Anton bo to sinsẹ̀n to Kyiv dọ gando anademẹ ehe go dọ: ‘Mí dopẹ dọ titobasinanu Jehovah tọn ko gọalọna mí nado wleawudai na ojlẹ sinsinyẹn ehelẹ. Núdùdù po osin po he mí sẹ̀do gọna ladio he mí tindo whlẹn ogbẹ̀ mítọn.’ Homẹ mítọn hùn dọ mẹmẹsunnu lẹ setonuna anademẹ ehe, enẹ zọ́n bọ alahọ mọ whenu he pé nado bayi tito na azọ́n kọgbọ tọn lọ.”

Numọtolanmẹ tẹwẹ mẹmẹsunnu mítọn lẹ do tlolo he yé mọ nunina kọgbọ tọn lọ? Mykola po Zinaida po he nọ nọ̀ Kharkiv dọ dọ: “Mẹtọnhopọn mìtọn yinuwado mí ji taun. Mì wanu taun na núdùdù po amasin he mì dohlan lọ lẹ po. E họnwun dọ mí mọ alọ Jehovah tọn to whẹho ehe mẹ.” Lẹdo dopolọ mẹ wẹ Valentyna nọ nọ̀. E dọ dọ: “Sọn whenue gbọ́n awhàn lọ bẹ, mẹsusu wẹ nọ tò whẹpo do mọ núdùdù họ̀. E ma yin whelẹponu wẹ yè nọ saba mọ nue sin hudo yè do lẹ họ̀. Amọ́, Jehovah yọnẹn dọ nuhahun mọnkọ tin. E sọ de mẹmẹsunnu lẹ nado na alọgọ kọgbọ tọn, pọdo nue sin hudo mí do pẹẹ wẹ to agbàn lọ lẹ mẹ! To ninọmẹ sinsinyẹn enẹ mẹ, whenue e taidi dọ todido de ma tin wẹ nkọ, mí mọdọ Jehovah po titobasinanu etọn po penukundo mí go to aliho vonọtaun de mẹ. . . . Homẹhunnu wẹ e nọ yin nado mọdọ alọgọ po godonọnamẹ etọn po he mí do hudo etọn hugan yin nina mí do gànmẹ.”

Yevhen, Iryna, po Mykyta po he họ̀n sọn Marioupol dọ dọ: “Whẹndo mítọn yọ́n pinpẹn nukunpedomẹgo po godonọnamẹ mìtọn po tọn taun. Nugbo lọ wẹ yindọ, alọgọ lọ wá do gànmẹ. To bẹjẹeji, mí lẹndọ nuzinzan lẹ kẹdẹ wẹ to agbàn lọ lẹ mẹ, amọ́ whenue mí hùn yé godo, mí sọ mọdọ owanyi mìtọn lọsu to e mẹ ga!”

Dile mì gán ko mọ do, ayihaawe matin dọ gbigbọ Jehovah tọn po anademẹ etọn po wẹ gọalọ taun nado yí owanyi do má nunina kọgbọ tọn ehe to “awhàn zingidi po awhàn linlin lẹ po” whenu. Nunina he mì nọ yí homẹdagbe do bayi do azọ́n lẹdo aihọn pé tọn lọ tamẹ, ehe susu yetọn nọ yin didohlan gbọn donate.jw.org ji lẹ yí adà titengbe de wà ga. Mí yọ́n pinpẹn alọtútlú mìtọn tọn taun!

Awuwiwlena Nunina Kọgbọ Tọn lẹ to Niyaniya mẹ Podọ to Hihọ́ Glọ

24 février 2022: Wedegbẹ́ Anadenanutọ tọn magbe akuẹ he na yin yiyizan nado na alọgọ kọgbọ tọn mẹmẹsunnu he to Ukraine lẹ tọn, bọ alahọ jẹ tito basina azọ́n kọgbọ tọn lọ ji
24 février–8 mars 2022: Alahọ Ukraine tọn họ̀ nuzinzan delẹ to lẹdo lọ mẹ bọ Wedegbẹ́ kọgbọ tọn lẹ jẹ yé má ji. Wekantẹn alahọ tọn lọ sọ wleawufo nado mọ nuzinzan delẹ yí sọn Pologne bosọ má yé pé
9 mars 2022: Wedegbẹ́ Anadenanutọ tọn nagbè dọ nunina kọgbọ tọn lọ lẹ ni yin didohlan Ukraine
10–12 mars, 2022: Tito tẹnpọn de tọn yin bibayi nado bẹ núdùdù po nuzinzan lẹ po sọn Pologne yì Lviv to Ukraine
13 mars 2022: Núdùdù po nuzinzan lọ lẹ po yin bibẹ sọn Pologne yì Lviv to Ukraine
14–16 mars 2022: Tito yin bibasi na medezejotọ he nọ gọalọ to Azọ́nwatẹn Họ̀gbigbá tọn mẹ lẹ nido blá agbàn núdùdù po nuzinzan wiwejininọ tọn he na yin didohlan lẹ po tọn dopọ to Plitẹnhọ Plidopọ tọn de mẹ sẹpo Poznan to Pologne
17 mars 2022: Azán ẹnẹ whenue tẹnpọn agbànbẹdohlan tọn lọ ko yin bibayi po kọdetọn dagbe po godo, yè jẹ nunina kọgbọ tọn tọnu 13 bẹ yì dogbó Ukraine tọn ji
21–27 mars 2022: Alọgọ kọgbọ tọn he pò lẹ yin bibẹpli to aliho dopolọ mẹ to Pologne bo yin didohlan Ukraine bosọ yin mimá pé gbọn lẹdo he mẹ nuhudo tin te lẹ to gànhiho 24 gblamẹ
28 mars 2022: Tlolo he ogbè yin nina, núdùdù, nuzinzan wiwejininọ tọn lẹ po amasin tọnu 100 po wẹ yin didohlan Ukraine, to azán 20 gblamẹ

To alọnu, Kunnudetọ Jehovah tọn lẹ ko do alọgọ kọgbọ tọn tọnu 190 linlán hlan Ukraine.

a Nado hia nususu dogọ gando lehe alọgọ kọgbọ tọn ehelẹ yin didohlan do go, jaale pọ́n hosọ lọ “Des frères mènent des opérations de secours et d’évacuation dans les zones de conflit en Ukraine.”