Nunina Kọgbọ Tọn to 2021—Mí Ma Wọn Mẹmẹsunnu Mítọn Lẹ

To owhe sinsẹ̀nzọn tọn 2021 tọn mẹ,a azọ̀n bẹplamẹ COVID-19 tọn gbẹ́ doyana gbẹtọ lẹ lẹdo aihọn pé. Dile hosọ lọ, “Nunina Kọgbọ Tọn to Ojlẹ Azọ̀nylankan Lẹdo Aihọn Pé Tọn Mẹ” dohia do, mí ko zan dọlab livi susu lẹ nado wleawuna nunina kọgbọ tọn na azọ̀nylankan lẹdo aihọn pé lọ wutu, podọ mí ko sọ do Wedegbẹ́ Kọgbọ tọn 950 linlán ai.

Dile azọ̀nylankan lẹdo aihọn pé lọ to yinylan deji, nugbajẹmẹji jọwamọ tọn gọna dehe gbẹtọ hẹnwa lẹ sọ hẹnnugble na mẹ’sunnu po mẹ’yọnnu mítọn lẹ po lẹdo aihọn pé. Nado gọalọna mẹhe nugbajẹmẹji 200 linlán hẹnnugble na lẹ, Wedegbẹ́ Anadenanutọ tọn Hagbẹ Anademẹtọ lọ tọn yigbe nado zan dọla livi 8 gbọnvona dehe yé zan do wleawuna nunina kọgbọ tọn na azọ̀n COVID-19 tọn wutu. Pọ́n lehe nunina towe lẹ yin yiyizan nado gọalọna mẹhe go nugbajẹmẹji awe he jọ to agọe gando lẹ do.

Osó Nyiragongo Wujẹgbonu

To 22 mai 2021, Osó Nyiragongo he yin osó miyọnnọ de to République démocratique du Congo, jẹ wuwujẹgbonu ji. Nuhe tọ́n sọn osó lọ mẹ lẹ hẹn owhé lẹ, wehọmẹ lẹ po agbá he mẹ yè nọ yí osin do lẹ po gble. E ma yin nuhe tọ́n sọn osó lọ mẹ lẹ kẹdẹ wẹ hẹnnugble. Azán delẹ whenue osó lọ wujẹgbonu godo, ozì adinọ he tọ́n sọn osó lọ mẹ lẹ gbàpe gbọn tòdaho Goma tọn mẹ bọ aigba sisọ to fisusu. Hugan odaa mẹhe to tòdaho lọ mẹ lẹ tọn wẹ dona tọ́n sọn owhé yetọn lẹ gbè. Gbẹtọ fọtọ́n susu lẹ wẹ họ̀n, mẹdelẹ dasá dogbó yì Rwanda.

Nudi Kunnudetọ Jehovah tọn 5 000 wẹ to mẹhe tọ́n sọn owhé yetọn gbè lẹ mẹ. Osó he wujẹgbonu lọ zọ́n bọ mẹdelẹ masọ do owhé ba, podọ yè fìnnú to owhé mẹdelẹ tọn gbè whenue yé ko tọ́n sọn owhé lọ gbè godo. Wedegbẹ́ kọgbọ tọn he to Rwanda po République démocratique du Congo po wẹ penukundo azọ́n kọgbọ tọn lọ go. Alahọ Congo (Kinshasa) tọn dọ gando wedegbẹ́ kọgbọ tọn de go dọ: “Dile etlẹ yindọ tòdaho lọ to bẹwlu mẹ, whẹpo yè tlẹ do nagbè dọ mẹlẹ ni sẹtẹn wẹ wedegbẹ́ kogbọ tọn lọ ko jẹ núdùdù, osin, nuhe ji yè na mlọnai do po avọ̀ po má ji.” To tòpẹvi de he mẹ mẹ’sunnu 2 000 linlán pli do, wedegbẹ́ kọgbọ tọn de bayi azava lẹ na yé bo na yé nuhe yé na ṣinyọn do awọ̀nnù bosọ plọn yé nuhe yé na wà ma nado bẹ COVID-19 kavi oslú po oslá po.

To osun atọ̀n gblamẹ he nugbajẹmẹji lọ wá aimẹ, mẹ’sunnu mítọn lẹ ko má lẹsi tọnu ṣidopo, gbàdo-linfin tọnu ṣidopo, amì he yè na do dànú litli 8 000 po osin litli 8 000 linlán po. Nado dowéna akuẹ, alahọ họ̀ núdùdù susu dopọ ji to lẹdo lọ mẹ kakati nado họ̀nú he vẹahi sọn tògodo.

Osó he wujẹgbonu lọ hẹn owhé yọyọ mẹ’yọnnu de tọn gble, mẹ’yọnnu lọ dọ dọ: “Mí jẹflumẹ taun.” Amọ́, whẹndo etọn mọ alọgọ kọgbọ tọn to agbasa-liho podọ to gbigbọ-liho. E wá dọ dọ: “Po alọgọ Jehovah tọn po, mí mọ nuhe sin hudo mí do. Mí ko mọdọ Jehovah hẹn agbàn mítọn lẹ hẹ mí bosọ gọalọna mí nado doakọnnanu.”

Vénézuela Jai to Akuẹzinzan-liho

Na owhe susu, Vénézuela ko to yaji to akuẹzinzan-liho taun. Mẹ’sunnu mítọn he to finẹ lẹ to akọndona ninọmẹ he kàn dẹpẹ biọ lẹ, núdùdù whèdomẹ po jideji sẹ́nhẹngba tọn po. Amọ́, titobasinanu Jehovah tọn ma wọn yé.

To owhe sinsẹ̀nzọn tọn he wayi mẹ, mí zan dọla livi dopo daa linlán do họ̀ núdùdù po adí po bosọ bẹ agbàn lọ lẹ yì na mẹhe do hudo etọn lẹ. Alahọ Vénézuela tọn na linlin dọ: “E ma nọ bọawu paali nado bẹ agbàn núdùdù tọn tọnu 130 yì adà otò lọ tọn lẹpo mẹ to sunmẹsunmẹ, podọ nado má ẹn na mẹ’sunnu he to hudo mẹ lẹ. Na núdùdù lọ lẹ nikaa gble, mẹ’sunnu lẹ nọ saba do núdùdù he nọ dẹn-to-aimẹ lẹ hlan.” Alahọ lọ yidogọ dọ: “Mí nọ họ̀ núdùdù susu dopọ ji to jibẹwawhé whenu, na e ma nọ vẹahi to ojlẹ enẹ mẹ. Enẹgodo, mí nọ do agbàn lọ lẹ hlan fihe yé dona yì lẹ matin akuẹ susu zinzan.”

Leonel he yin hagbẹ Wedegbẹ́ Kọgbọ tọn de to Vénézuela yiwanna azọ́ndenamẹ etọn taun. E dọ dọ, “Azọ́n vonọtaun de wẹ azọ́n kọgbọ tọn yin. Lẹblanulọkẹyi ehe ko gọalọna mi taun sọn whenue gbọ́n azọ̀n COVID-19 tọn ko hù asi vivẹ́ ṣie. N’nọ hẹn alọnu ṣie ján, podọ n’mọdọ n’gán gọalọna mẹ’sunnu he to hudo mẹ lẹ. N’ko mọ lehe Jehovah hẹn opà etọn di do bo ma jo omẹ etọn he to hudo mẹ lẹ do.”

Mẹ’sunnu de he ko sẹ̀n to wedegbẹ́ kọgbọ tọn mẹ pọ́n lọsu mọ nunina kọgbọ tọn yí. E dọ dọ, “Todin yẹn wẹ do hudo alọgọ tọn. E ma yin agbasanu lẹ kẹdẹ wẹ mí mọyi. Amọ́, mẹ’sunnu lẹ sọ gọalọna yẹn po asi e po bọ ayiha mítọn jai. Yé penukudo mí go bo miọnhomẹna mí bosọ na tuli mí.”

Nugbajẹmẹji delẹ nọ jọ bọ yè ma nọ sè avase kaka de jẹnukọn, podọ delẹ nọ jọ matin avase depope. Amọ́, nunina he mì nọ basi do azọ́n lẹdo aihọn pé tọn lọ tamẹ wẹ nọ zọ́n bọ titobasinanu Jehovah tọn nọ penugo nado yawu wleawuna nunina kọgbọ tọn lẹ bosọ má yé. Delẹ to aliho he mẹ nunina lẹ sọgan yin bibasi te tin to donate.jw.org ji. Mí yọ́n pinpẹn alọtútlú mìtọn tọn taun.