Wehọmẹ Giliadi Tọn Nọ Plọnazọ́n Mẹlẹ Lẹdo Aihọn Pé

1^er DÉCEMBRE 2020

To whemẹwhemẹ, devizọnwatọ whenu-gigọ́ tọn vonọtaun susu nọ yin oylọ-basina lẹdo aihọn pé nado wá Wehọmẹ Biblu Pinplọn Giliadi tọn he nọ yin bibasi to Nọtẹn Wepinplọn Watchtower tọn to Patterson, New York.a To wehọmẹ ehe, wehọmẹvi lẹ nọ plọn nado hẹn azọ́nyinyọnẹn yetọn pọnte dogọ to azọ́ndenamẹ voovo he yé tindo to titobasinanu Jehovah tọn mẹ lẹ mẹ. Azọ́nplọnmẹ enẹ nọ gọalọna yé nado hẹn agun lẹ po alahọ lẹ po lodo lẹdo aihọn pé.

Lẹdo aihọn pé wẹ wehọmẹvi Giliadi tọn lẹ nọ wá sọn. Di apajlẹ, wehọmẹvi 56, he wá sọn otò 29 mẹ wẹ wá klasi 147tọ he yin bibasi to 2019. Wehọmẹvi he wá Giliadi lẹ’o to sinsẹ̀n na whenu-gigọ́ to Bẹtẹli, kavi taidi nugopọntọ lẹdo tọn, mẹdehlan po gbehosọnalitọ titengbe lẹ po.

Awuwiwlena wehọmẹ lọ’o nọ bẹjẹeji ojlẹ susu lẹ jẹnukọnna azán tintan etọn. Di apajlẹ, Azọ́nwatẹn Gbejizọnlin lẹ tọn to Tatọ́-Tẹnnọ nọ họ̀ ticket agahun tọn lẹ na mẹhẹ yin oylọ-basina wá wehọmẹ lọ lẹ. Na klasi 147tọ Giliadi tọn, madozẹnzẹn akuẹ he yin zinzan na wehọmẹvi dopodopo nido wá Patterson bosọ lẹkọyi whé tọn wẹ dọla Amelika tọn 1 075 kavi nudi 600 000 FCFA. Wehọmẹvi he wá sọn Lopo Salomon tọn ji lẹ dona do agahun whla ẹnẹ nado wá Patterson podọ whla atọ̀n nado lẹkọyi whé—yèdọ gbejizọnlin kilomẹtlu 35 400 tọn! Dọla Amelika tọn 2 300 kavi nudi 1300 000 FCFA wẹ yin zinzan na gbejizọnlin wehọmẹvi enẹlẹ dopodopo tọn. Ma nado hẹn akuẹ gú, Azọ́nwatẹn Gbejizọnlin lẹ tọn nọ yí tito ọdinatẹẹ ji tọn de zan nado dín ticket he pọkuẹ pẹẹde lẹ. Podọ eyin yè tlẹ’o họ̀ ticket de dote, tito lọ gbẹ́ nọ to dindin eyin yè gán mọ ticket devo he akuẹ etọn pọnte hugan, na osẹ kavi etlẹ yin na osun susu lẹ. Azọ́nwatẹn Gbejizọnlin lẹ tọn sọ nọ yí ajọ̀ he azọ́nwhé agahun-dido tọn lẹ nọ namẹ zan nado mọ ticket lẹ yí.

Susu wehọmẹvi lẹ tọn do hudo Visa de tọn nado biọ Etats-Unis. Enẹwutu, Azọ́nwatẹn He Nọ Penukundo Whẹho Osẹ́n Tọn lẹ Go to Tatọ́-Tẹnnọ nọ gọalọ to whẹho ehe mẹ. Dọla Amelika tọn 510 kavi nudi 280 000 FCFA wẹ yin yiyizan nado mọ Visa po nuhe gandego lẹ po na wehọmẹvi dopodopo.

Nawẹ mí nọ mọaleyi sọn azọ́nplọnmẹ he wehọmẹvi enẹlẹ nọ mọyi mẹ gbọn? Hendra Gunawan to sinsẹ̀n taidi mẹho agun tọn to Hùwaji Asie tọn. Asu po asi po he yí gbedewema Giliadi tọn de to agun he mẹ e te. Nuhe e dọ die: “To dai, gbehosọnalitọ whepoponu tọn depope ma to agun mítọn mẹ. Amọ́ to whenue gbedewema-yitọ lọ lẹ wá, zohunhun po gbigbọ mẹdezejo tọn yetọn po yinuwado mẹdevo lẹ ji bọ yé basi dide nado bẹ azọ́n gbehosọnalitọ tọn jẹeji. To enẹgodo, mẹ’yọnnu dopo sọn agun mítọn mẹ tlẹ wá yì Wehọmẹ Wẹndagbe-Jlatọ lẹ tọn!”

Sergio Panjaitan wazọ́n dopọ hẹ gbedewema-yitọ Giliadi tọn lẹ to Bẹtẹli Hùwaji Asie tọn de. E dọ: “Azọ́nplọnmẹ he yé mọyi ma yin dona de na yewlẹ kẹdẹ gba; dona de wẹ e sọ lẹzun na mílọsu. Nue yé plọn lẹ ma whè! Amọ́, kakati nado jlá glòlò, yé nọ má nuhe yé plọn lẹ hẹ mẹdevo lẹ. Enẹ nọ zọ́n bọ mí sọgan to tulina ode awetọ zọnmii.”

Fie wẹ akuẹ he hudo etọn tin na wehọmẹ ehe nọ wá sọn? Nunina lẹ na azọ́n lẹdo aihọn pé tọn lọ, he suhugan etọn nọ yin bibasi gbọn donate.jw.org ji lẹ wẹ nọ yin yiyizan. Mì wanu na nunina alọtútlú tọn mìtọn he nọ hẹn wehọmẹ he nọ plọnazọ́n mẹlẹ lẹdo aihọn pé ehe yọnbasi.

a Tito-to-whinnu wehọmẹ ehe tọn nọ yin awuwlena bo nọ yin vivọjlado gbọn Azọ́nwatẹn Wehọmẹ Yẹwhehọluduta tọn lẹ tọn dali, to anademẹ Wedegbẹ́ Mẹpinplọn tọn Hagbẹ Anademẹtọ Kunnudetọ Jehovah tọn lẹ tọn glọ. Nuplọnmẹtọ he to azọ́nwatẹn enẹ mẹ lẹ gọna nuplọnmẹtọ devo lẹ, ehe bẹ mẹ’sunnu Hagbẹ Anademẹtọ lọ tọn lẹ hẹn wẹ nọ plọnmẹ to wehọmẹ lọ.