Gbigbọ Ojlo Tintindo Tọn Nọ Hẹn Gbẹtọ lẹ Wá Giliadi — WESẸDOTẸN INTẸNẸT JI TỌN Watchtower Tọn

Gbigbọ Ojlo Tintindo Tọn Nọ Hẹn Gbẹtọ lẹ Wá Giliadi

WEHỌMẸ Biblu Pinplọn Watchtower Giliadi tọn tin-to-aimẹ nado plọnazọn sunnu po yọnnu po klandowiwe lẹ na sinsẹ̀nzọn mẹdehlan tògodo tọn. Mẹnu wẹ nọ pegan nado wá Giliadi? Mẹhe tindo gbigbọ ojlo tọn lẹ wẹ. (Psalm 110:3) Ehe họnwun na taun tọn to 8 septembre 2001, to whenuena klasi 111tọ mọ gbedewema yí.

Wehọmẹvi klasi lọ tọn delẹ ko de sọn ojlo mẹ bo jo whẹndo, họntọn, po otò yetọn po dó nado sẹ̀n to fie nuhudo sù te. To mọwiwà mẹ, yé to yedelẹ tẹnpọn eyin yé sọgan basi vọjlado lẹ nado nọ̀ lẹdo he gbọnvo de mẹ. Di apajlẹ, Richer po Nathalie po basi titona yede nado sẹtẹn yì Bolivie, Todd po Michelle po yì République Dominicaine, bọ David po Monique po yì otò Asia tọn de mẹ nado hẹn wẹndagbe Ahọluduta Jiwheyẹwhe tọn gbayipe. Wehọmẹvi devo lẹ ko sẹ̀n to Nicaragua, Equateur, po Albanie po.

Christy yin tulina nado plọn Espagnol-gbè to wehọmẹ-daho, he gọalọ bo wleawuna ẹn nado yí owhe awe zan to Equateur whẹpo do wlealọ. Devo lẹ kọnawudopọ hẹ agun he nọ dó jonọgbè to otò yetọn mẹ lẹ. To pinpannukọn avùnnukundiọsọmẹ he gbọnvo de mẹ, Saul po Priscilla po dó gbigbọ ojlo tintindo tọn hia gbọn azọ́n sinsinyẹn wiwà nado hẹn Glẹnsigbe yetọn pọnte dali whẹpo do wá wehọmẹ lọ.

Osẹ 20 azọ́nplọnmẹ mẹdehlan tọn juwayi po awuyiya po. Azán gbedewema-yíyí tọn wá, bọ wehọmẹvi lọ lẹ tin hẹ họntọn po whẹndo yetọn lẹ po, bo to todoai na ayinamẹ nuyọnẹn tọn lẹ po hodidọ tulinamẹ mẹjijodo tọn lẹ po.

Azinponọ tito-to-whinnu lọ tọn wẹ Theodore Jaracz, he yí gbedewema sọn klasi ṣinawetọ Wehọmẹ Giliadi tọn, bosọ to sinsẹ̀nzọnwà todin taidi dopo to Hagbẹ Anademẹtọ Kunnudetọ Jehovah tọn lẹ tọn mẹ. Hodidọ bẹjẹeji tọn etọn lẹ zinnudo nugbo lọ ji dọ taidi titobasinanu de, mí ma ko gbọ yanwle mítọn go pọ́n gbede heyin azọnpinplọn wehọmẹvi lẹ to Giliadi, nado dọyẹwheho wẹndagbe Ahọluduta tọn to aigba fininọ lẹpo ji. (Malku 13:10) Giliadi nọ hẹn wehọmẹvi he pegan lẹ sọgbe nado zindonukọn to nuwiwa yẹwhehodidọ tọn mẹ to obá he gblo hugan lehe yé nọ basi do dai lẹ mẹ podọ to adà aihọn lọ tọn mẹ fie nuhudo tin na mẹdehlan heyin azọ́nplọn lẹ te taun. Mẹmẹsunnu Jaracz dotuhomẹna wehọmẹvi lọ lẹ nado yí azọ́nplọnmẹ Giliadi tọn yetọn zan ganji dile yé to awukọndopọ hẹ mẹdehlan he to sinsẹ̀nzọnwà to otò 19 he mẹ yé yin azọ́ndena yì todin lẹ.

Ayinamẹ He Wá do Ganmẹ lẹ na Gbedewema-Yítọ Lẹ

Homádọ debọdo-dego de bọdego. William Van De Wall, heyin dopo to Wedegbẹ́ Alahọ États-unis tọn mẹ, dọho do hosọ lọ “Zohunhun Mẹdehlan Tọn—Ohia Klistiani Nugbo lẹ Tọn” ji. E ze ayidonugo do azọ́ndenamẹ ‘gbẹtọ lẹ hinhẹnzun devi’ tọn, heyin kinkàndai to Matiu 28:19, 20 mẹ ji, bosọ dotuhomẹna wehọmẹvi lọ lẹ dọmọ: “Mì hodo apajlẹ Jesu, he yí zohunhun do hẹn azọ́ndenamẹ mẹdehlan etọn tọn di.” Nado gọalọna mẹdehlan sọgodo tọn lọ lẹ nado hẹn zohunhun yetọn go na azọ́n mẹdehlan tọn, e na tuli yé dọmọ: “Mì tẹdo todohukanji dagbe de go; mì tindo walọ dagbe oplọn mẹdetiti tọn, mì to yìyì afọsu-afọsi hẹ whẹho gbigbọmẹ tọn lẹ; bo hẹn nuhewutu mì tin to azọ́ndenamẹ mìtọn mẹ do ayiha mẹ tẹgbẹ̀.”

Mẹhe bọdego to tito-to-whinnu lọ ji wẹ Guy Pierce, heyin dopo to Hagbẹ Anademẹtọ lọ mẹ. E dọhodo hosọ lọ “Mì to Awuwlena ‘Huhlọn Nulẹnpọn Tọn Mìtọn’ Zọnmii” ji. (Lomunu lẹ 12:1) E na ayinamẹ yọn-na-yizan mẹhe to gbedewema yí lẹ, bo na tuli yé nado yí nugopipe he Jiwheyẹwhe na yé zan nado lẹnnupọn bo lẹnayihamẹpọn. “Mì nọ lẹnayihamẹpọn sisosiso do nuhe Jehovah to didọna mì gbọn Ohó etọn gblamẹ lẹ ji. Ehe na whlá mì,” wẹ e dọ. (Howhinwhẹn lẹ 2:11) Mẹmẹsunnu Pierce sọ dotuhomẹna wehọmẹvi lọ lẹ ma nado yin hẹngogonọ to pọndohlan yetọn lẹ mẹ na yé ma do glọnalina ‘huhlọn nulẹnpọn tọn’ yetọn. E họnwun dọ, nuflinmẹ he wá do ganmẹ ehelẹ na gọalọ taun dile gbedewema-yitọ lẹ to sinsẹ̀nzọnwà taidi mẹdehlan lẹ.

Enẹgodo azinponọ lọ ylọ dopo to nuplọnmẹtọ Giliadi tọn lẹ mẹ, yèdọ Lawrence Bowen, he dọhodo hosọ “Mì Magbe Ma Nado Yọ́n Nudepope” ji. E dlẹnalọdo dọ to kọndopọmẹ hẹ azọ́n mẹdehlan tọn etọn to Kọlinti, apọsteli Paulu ko ‘magbe ma nado yọ́n nudepope . . . adavo Jesu Klisti, podọ ewọ mẹhe yin whiwhè do atin go.’ (1Kọlintinu lẹ 2:2) Paulu yọnẹn dọ huhlọn he hugan to wẹkẹ lọ mẹ, yèdọ gbigbọ wiwe, tin to godo na owẹ̀n he tin to Biblu lọ blebu mẹ lẹpo: yèdọ whẹsuna nupojipetọ-yinyin Jehovah tọn gbọn Okún dopagbe lọ gblamẹ. (Gẹnẹsisi 3:15) Wehọmẹvi 48 he to gbedewema yí lẹ yin tulina nado taidi Paulu po Timoti po podọ nado tindo kọdetọn dagbe taidi mẹdehlan lẹ, bo tẹdo “ohia ohó tọn he pegan lọ go.”—2 Timoti 1:13.

“Mì Yọ́n Pinpẹn Lẹblanulọkẹyi Mìtọn Tọn, Heyin Nunina de Sọn Jiwheyẹwhe Dè,” wẹ yin hosọ hodidọ godo tọn to homádọ debọdo-dego bẹjẹeji tọn lẹ mẹ. Wallace Liverance, heyin kandai-hẹntọ Wehọmẹ Giliadi tọn, gọalọna wehọmẹvi lọ lẹ nado mọnukunnujẹemẹ dọ lẹblanulọkẹyi sinsẹ̀nzọn tọn lẹ yin dohia homẹdagbe Jiwheyẹwhe tọn, dọ e mayin jlọjẹ kavi nuhe yé wazọ́n na gba. To apajlẹ apọsteli Paulu tọn yiyizan mẹ, Mẹmẹsunnu Liverance dọmọ: “E mayin azọ́n wutu wẹ Jehovah de Paulu nado yin apọsteli etọn hlan akọta lẹ, bọ e nado sọawuhia taidi dọ jlọjẹ Paulu tọn wẹ azọ́ndenamẹ enẹ yin kavi nuhe e jẹna gba. E ma sinai do owhe susu yiyizan kavi numimọ tintindo etọn ji gba. Sọn pọndohlan gbẹtọvi tọn mẹ, e na ko sọawuhia dọ Balnaba na yin mẹhe sọgbe hugan lọ. E mayin zize sinai do nugopipe mẹdetiti tọn ji gba; e họnwun dọ Apọlo didẹ́ taun hugan Paulu. Dohia homẹdagbe Jiwheyẹwhe tọn wẹ e yin.” (Efesunu lẹ 3:7, 8) Mẹmẹsunnu Liverance na tuli gbedewema-yitọ lẹ nado yí nunina, kavi lẹblanulọkẹyi sinsẹ̀nzọn tọn yetọn zan, nado gọalọna mẹdevo lẹ nado lẹzun họntọn Jiwheyẹwhe tọn podọ nado yin mẹhe na mọ ‘nunina Jiwheyẹwhe tọn heyin ogbẹ̀ madopodo to Jesu Klisti Oklunọ mítọn mẹ’ yí.—Lomunu lẹ 6:23.

Bọdo ehe go, Mark Noumair, heyin nuplọnmẹtọ Giliadi tọn devo, deanana hodọdopọ zohunhunnọ de hẹ wehọmẹvi delẹ do hosọ lọ “Awuwiwle Nọ Tindo Kọdetọn Dagbe Lẹ” ji. (Howhinwhẹn lẹ 21:5) Numimọ lẹ dohia dọ to whenuena lizọnyizọnwatọ de wleawuna lizọnyizọn etọn ganji, na taun tọn gbọn awuwiwlena ahun etọn dali, e na tindo ojlo nujọnu tọn to gbẹtọ lẹ mẹ. Nuhe e na dọ ma na bú do e gba. Kakatimọ, e na dọ bosọ wà onú lẹ nado gọalọna yé to gbigbọ-liho. “Ehe wẹ yin họnhungan lọ na kọdetọn dagbe tintindo taidi mẹdehlan de,” wẹ Mẹmẹsunnu Noumair dọ, to numimọ edetiti tọn taidi mẹdehlan de to Aflika yiyizan mẹ.

Sinsẹ̀nzọn Mẹdehlan Tọn —Yanwle Pekọnọ De

Ralph Walls po Charles Woody po kanhose mẹdehlan numimọnọ delẹ, he tin to Ahọ́nkan Weplọntẹn Petterson tọn na azọ́nplọnmẹ vonọtaun de. Hokansemẹ lọ lẹ zinnudeji dọ owanyi tintindo na gbẹtọ lẹ wẹ nọ hẹn ayajẹ wá to sinsẹ̀nzọn mẹdehlan tọn mẹ. E yin jidenamẹnu na wehọmẹvi lọ lẹ gọna hagbẹ whẹndo tọn po họntọn yetọn he pli dopọ lọ lẹ po nado dotoaina mẹdehlan numimọnọ ehelẹ dile yé to zẹẹmẹ nuhewutu sinsẹ̀nzọn mẹdehlan tọn yin yanwle pekọ tọn de basi tlọlọ.

John E. Barr, heyin dopo to Hagbẹ Anademẹtọ mẹ, dọ hodidọ titengbe azán lọ tọn, he hosọ etọn yin “Mì Jihàn Yọyọ Hlan Jehovah.” (Isaia 42:10) Mẹmẹsunnu Barr dọ dọ hodidọ lọ “ohàn yọyọ” sọawuhia whla ṣinẹnẹ to Biblu mẹ. E kanse dọ, “Etẹwẹ ohàn yọyọ ehe lọ bẹhẹn?” Enẹgodo e na gblọndo dọmọ: “Lẹdo hodidọ lọ tọn dohia dọ ohàn yọyọ de nọ yin jiji na nujijọ yọyọ de to nupojipetọ-yinyin Jehovah tọn didohia mẹ.” E dotuhomẹna wehọmẹvi lọ lẹ nado to ogbè yetọn kọndopọ zọnmii to ohàn pipà Ahọluduta awhàngbatọ Jiwheyẹwhe tọn to alọ Ahọlu Mẹssia, heyin Klisti Jesu tọn lẹ tọn jiji mẹ. Mẹmẹsunnu Barr dọ dọ azọ́nplọnmẹ he yé ko mọyi to Giliadi ko gọalọna yé nado mọnukunnujẹ adà voovo “ohàn yọyọ” ehe tọn mẹ sisosiso dogọ hugan gbede pọ́n. “Wehọmẹ lọ ko zinnudo nuhudo lọ ji na mì nado ‘jihàn’ pipà Jehovah tọn to kọndopọmẹ hẹ mẹmẹsunnu po mẹmẹyọnnu mìtọn lẹ po to fidepope he mì yì; bo wleawuna kọndopọ hẹ mẹdevo lẹ to azọ́ndenamẹ mìtọn mẹ whepoponu.”

To whenuena wehọmẹvi lẹ ko yí gbedewema yetọn lẹ godo, afọzedaitọ klasi lọ tọn dopo hia wekanhlanmẹ pinpẹn-nutọn-yinyọnẹn ahundoponọ tọn na azọ́nplọnmẹ he yé ko mọyi to Giliadi.

Be hiẹ sọgan gbloada na sinsẹ̀nzọn towe hlan Jiwheyẹwhe dogọ bo hẹn ẹn yin sinsẹ́nnọ dogọ ya? Eyin mọwẹ, dovivẹnu dile wehọmẹvi he to gbedewema yí ehelẹ ko wà do. Ehe wẹ hẹn yé pegan na azọ́n mẹdehlan tọn. Ayajẹ susu wẹ nọ yin mimọ eyin mẹde yí homẹhunhun do jo ede sọn ojlo mẹ na sinsẹ̀nzọn Jiwheyẹwhe tọn.—Isaia 6:8.

[Apotin to weda 25]

SỌHA NULINLẸN KLASI TỌN

Sọha otò he mẹ yé wá sọn tọn: 10

Sọha otò he mẹ yé yin didohlan: 19

Sọha wehọmẹvi lẹ tọn: 48

Madozẹnzẹn owhe mẹhodido tọn: 33,2

Madozẹnzẹn owhe to nugbo mẹ tọn: 16,8

Madozẹnzẹn owhe lizọnyizọn whenu-gigọ́ tọn: 12,6

[Yẹdide to weda 26]

Gbedewema-Yíyí 111tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.