Avùnlọyiyi Na Mẹdekannujẹ Sinsẹ̀n-Bibasi Tọn to Ainọ̀ lẹ Ṣẹnṣẹn

To omẹ livi kanweko susu he to Amérique Latine tọn lẹ mẹ, gbẹtọ livi susu lẹ wẹ do akọgbè po aṣa yetọn titi lẹ po. Susu ainọ̀ enẹlẹ tọn yin mẹmẹsunnu po mẹmẹyọnnu gbigbọmẹ tọn mítọn lẹ po, he yiwanna aṣa yetọn lẹ. Nado gọalọna mẹlẹ to gbigbọ-liho, yé nọ basi lẹdogbedevomẹ owe Kunnudetọ Jehovah tọn lẹ tọn bo nọ má yé to akọgbè Amérique Latine tọn 130 linlán mẹ.a Etomọṣo, delẹ to yé mẹ pehẹ homẹkẹn na yé de nado sẹ̀n Jehovah bo gbẹ́ nado do mahẹ to aṣa he ma sọgbe hẹ Owe-wiwe bo ka gbayipe to lẹdo yetọn mẹ lẹ mẹ wutu. Nawẹ nunina mìtọn lẹ ko yin yiyizan nado gọalọna yé gbọn?

Alọgọ Nado Lẹkọyi Whé

To Mexique, mẹmẹsunnu po mẹmẹyọnnu mítọn lẹ po he wá sọn akọ̀ Huichol tọn mẹ, bo nọ nọ̀ lẹdo osó tọn Jalisco tọn mẹ yí sisi do gbẹ́ nado do mahẹ to nuyiwa sinsẹ̀n tọn he jẹagọdo ayihadawhẹnamẹnu yetọn lẹ mẹ.b Amọ́, enẹ gblehomẹna mẹdelẹ to akọ̀ lọ mẹ. To 4 décembre 2017, gbẹtọgun he to zingidi ji de tọ́navùn pipli Kunnudetọ lẹ tọn de po mẹdevo he tin to yé dè lẹ po. Gbẹtọgun lọ yàn yé dogbé, gbá owhé yetọn lẹ kija, bosọ sìn-adán na yé dọ yé na hù mẹdepope he tẹnpọn nado lẹkọwa whé.

Kunnudetọ he to gbétatò he sẹpọ yé lẹ mẹ penukundo nuhudo mẹmẹsunnu po mẹmẹyọnnu mítọn lẹ po tọn go to afọdopolọji. Amọ́, etẹwẹ gán yin wiwà na yé nido penugo nado lẹkọyi whé? Mẹmẹsunnu de he nọ yin Agustín basi zẹẹmẹ dọmọ: “Mí ma do akuẹ he pé nado yí whẹ̀yidọtọ de, podọ mí ma yọ́n mẹhe dè mí na yì nado mọ ayinamẹ gando whẹho osẹ́n tọn lẹ go.”

Na mẹmẹsunnu mítọn lẹ masọ tindo mẹdekannujẹ nado basi sinsẹ̀n ba wutu, alahọ Amérique Centrale tọn yinuwa to afọdopolọji. Tintan, yé biọ to ahọluzọnwatọ lẹdo lọ tọn lẹ si nado basi dodinnanu gando danuwiwa enẹlẹ go. Enẹgodo, Wedegbẹ́ Anadenanutọ tọn Hagbẹ Anademẹtọ lọ tọn kẹalọyi dọ alahọ Amérique Centrale tọn ni wazọ́n dopọ hẹ Azọ́nwatẹn he nọ penukundo whẹho osẹ́n tọn go to tatọ́-tẹnnọ nado ylọwhẹ dota mẹmẹsunnu po mẹmẹyọnnu mítọn Huichol lẹ tọn po mẹ. To godo mẹ, owhẹ̀ lọ yì Whẹdatẹn Daho Hugan Mexique tọn.

Pipli whẹ̀yidọtọ he wá sọn otò voovo mẹ lẹ tọn de wleawuna avùnlọyiyi he họnwun de bo basi zẹẹmẹ dọ kẹdẹdile mẹdevo lẹ dona na sisi aṣa ainọ̀ lẹ tọn do, mọjanwẹ ainọ̀ lẹ lọsu dona na sisi bosọ nọ basi-hihọ́na mẹdekannujẹ hagbẹ akọ̀ yetọn lẹ tọn lẹpo do. Gbẹtọvi lẹpo wẹ do jlọjẹ dodonu tọn delẹ mahopọnna fie yé nọ nọ̀.

To 8 juillet 2020, Whẹdatẹn Daho lọ kọngbedopọ dọ owhẹ̀ Kunnudetọ Jehovah tọn lẹ tọn wẹ whẹ́n. Yé degbe dọ mẹhe yin yinyan dogbé lẹpo wẹ gán lẹkọyi whé. Agustín, he go mí donù wayi, do pinpẹn-nutọn etọn po mẹdevo lẹ po tọn hia bo dọmọ: “Onù mítọn ma sù pẹ́, podọ nuhe mẹmẹsunnu lẹ wà do ota mítọn mẹ vivi na mí taun. Eyin alọgọ yetọn dẹ́n, e ma na’o pà mí paali.”

“Jẹtukla Susu Do Omẹ Pẹvide Tamẹ”

To jlẹ dopolọ mẹ, mẹmẹsunnu mítọn lẹ to San Juan de Ilumán, yèdọ glètoho de to Équateur fie ainọ̀ Otavalo-nu susu nọ nọ̀ pehẹ nukundiọsọmẹ mọnkọ. To 2014, whenue yé ko mọ gbedewema lẹpo yí godo, yé jẹ Plitẹnhọ Ahọluduta tọn de gbá ji. Amọ́, sinsẹ̀ngán de yin nukọntọ na gbẹtọgun de he bẹ omẹ 100 linlán hẹn bo wá doalọtena họ̀gbigbá lọ. Enẹgodo, aṣẹpatọ lẹdo lọ tọn lẹ dosẹ́n na Kunnudetọ Jehovah tọn lẹ ma nado nọ plidopọ na sinsẹ̀n-bibasi ba.

Azọ́nwatẹn he nọ penukundo whẹho osẹ́n tọn lẹ go to alahọ Équateur tọn po tatọ́-tẹnnọ mítọn po mẹ lẹ wazọ́n dopọ nado yiavùnlọna agun lọ na mẹdekannujẹ sinsẹ̀n-bibasi tọn yetọn he yé hòyí sọn yé si. Mẹmẹsunnu mítọn lẹ hẹn whẹho lọ yì whẹdatẹn. Enẹ zọ́n bọ mẹlọ lẹ masọ diọnukunsọ mẹmẹsunnu lẹ ba, bo na yé dotẹnmẹ nado vọ́ opli yetọn lẹ bẹ, podọ nado fó Plitẹnhọ Ahọluduta tọn lọ gbigbá. Amọ́ nado basi-hihọ́na jlọjẹ mẹmẹsunnu mítọn lẹ tọn to sọgodo, afọzedaitọ mítọn lẹ biọ dọ whẹdatẹn daho hugan lẹ ni basi nudide do whẹho titengbe de ji: Be ainọ̀ lẹ to dandannu glọ nado nọ na sisi jlọjẹ gbẹtọvi tọn he yin alọkẹyi lẹdo aihọn pé lẹ ya?

To 16 juillet 2020, Whẹdatẹn Daho Hugan Équateur tọn dotó whẹ̀yiylọ lọ. Mẹmẹsunnu he yin whẹ̀yidọtọ to Équateur lẹ wẹ yin afọzedaitọ agun lọ tọn. Humọ, omẹ ẹnẹ to mẹmẹsunnu mítọn he wá sọn otò voovo mẹ lẹ mẹ bo yin whẹ̀yidọtọ numimọnọ lẹ wẹ dọho to whẹdatẹn lọ. Na ninọmẹ he to aimẹ na COVID-19 wutu lẹ, Intẹnẹt wẹ yé yizan sọn otò voovo lẹ mẹ nado dọho. Whla tintan niyẹn he whẹdatẹn de kẹalọyi dọ pipli whẹ̀yidọtọ lẹ tọn de he yin afọzedaitọ Kunnudetọ Jehovah tọn lẹ tọn ni yiavùnlọna owhẹ̀ de gbọn Intẹnẹt ji.c Pipli lọ yihodọ sọn nuhe whẹdatẹn voovo lẹ ko dọ lẹdo aihọn pé mẹ nado dohia dọ ainọ̀ lẹ ma dona jo jlọjẹ yetọn lẹ do na yé yin apadewhe akọ̀ de tọn poun wutu gba.

Mẹmẹsunnu mítọn he to Otavalo lẹ to jejeji nado sè nudide Whẹdatẹn Daho lọ tọn. Dile etlẹ yindọ yé to tenọpọn nudide enẹ, yé yọ́n pinpẹn alọgọ he yé mọyi tọn. César, he to sinsẹ̀n taidi mẹho agun tọn de to agun Ilumán Quichuatọn tọn mẹ dọ: “Titobasinanu Jehovah tọn kẹdẹ wẹ gán jẹtukla susu do omẹ pẹvide tamẹ.”

Whẹ̀yidọtọ he wazọ́n gando whẹho lọ go lẹpo wẹ yin Kunnudetọ Jehovah tọn lẹ, podọ homẹ yetọn hùn nado yí azọ́nyinyọnẹn yetọn zan vọnu. Etomọṣo, whẹ̀yiylọ lẹ, awuwiwlena yé, po avùnlọyiyi to whẹdatẹn po nọ dù whenu po akuẹ po. Whẹ̀yidọtọ mítọn lẹ po mẹmẹsunnu devo lẹ po zan gànhiho 380 linlán nado wleawuna whẹdidọ lọ, bosọ yí gànhiho 240 zan nado basi lẹdogbedevomẹ wema he yè do hudo etọn na whẹdidọ Mexique tọn lọ. Nudi whẹ̀yidọtọ 40 lẹdo aihọn pé wẹ zan gànhiho kanweko susu lẹ na owhẹ̀ Équateur tọn lọ. Nawẹ mí penugo nado penukundo akuẹzinzan he e biọ nado yiavùnlọna mẹmẹsunnu mítọn lẹ go gbọn? Nunina he mì nọ basi gbọn aliho voovo he yin didohia to donate.jw.org lẹ gblamẹ wẹ hẹn ẹn yọnbasi. Mì wanu na alọtútlú mìtọn.