Ohàn He Nọ Dọ̀n Mí Sẹpọ Jiwheyẹwhe Dogọ Lẹ

Nunina dagbedagbe de wẹ ohàn yin sọn Jehovah dè. E gán yinuwado linlẹn, numọtolanmẹ po mẹwhinwhàn mítọn po ji. E họnwun dọ nue ohàn sunmẹsunmẹ tọn mítọn lẹ nọ wà niyẹn. Nado dọ hójọhó, ohàn ehelẹ tlẹ gán wà nususu humọ: yé gán dọ̀n mí sẹpọ Jehovah dogọ.

Sọn 2014 gbọ́n, ohàn sunmẹsunmẹ tọn 70 linlán wẹ ko yin didetọn, podọ e whè gbau dopo to ohàn ehelẹ mẹ tin to ogbè 500 linlán mẹ! Amọ́, a gán nọ kanse dewe dọ, ‘Mẹnu lẹ wẹ nọ wazọ́n do ohàn ehelẹ ji, podọ nawẹ yè nọ wleawuna yé gbọn?’

Lehe Ohàn lọ lẹ Nọ Yin Awuwlena Do

Pipli he nọ penukundo ohàn go bo to Azọ́nwatẹn Hoyidokanji po Video po tọn he to anademẹ Wedegbẹ́ Mẹpinplọn tọn Hagbẹ Anademẹtọ lọ tọn glọ wẹ nọ wleawuna ohàn sunmẹsunmẹ tọn lọ lẹ. Mẹ’sunnu po mẹ’yọnnu 13 po wẹ pipli he nọ penukundo ohàn go lọ bẹhẹn, yé nọ gọalọ nado pà ohàn lọ, wleawuna nuhiho he na nọ e mẹ lẹ, yé sọ nọ wleawuna tito-to-whinnu he yé na zan lẹ po onú dandan tọn devo lẹ po. Podọ, Wedegbẹ́ Mẹpinplọn tọn ko kẹalọyi mẹdezejotọ he nọ wazọ́n sọn olá lẹ lẹdo aihọn pé nado gọalọ to azọ́n ehe mẹ, omẹ ehelẹ bẹ mẹhe nọ pà ohàn lẹ, nuhotọ lẹ po mẹhe nọ jihàn lẹ po hẹn. Mẹ’sunnu po mẹ’yọnnu ehelẹ po nọ yí whiwhẹ do yí nunina yetọn lẹ zan matin ayidonugo dindọn wá yede ji.

Nawẹ ohàn sunmẹsunmẹ tọn lọ nọ yin awuwlena gbọn? Tintan whẹ́, Wedegbẹ́ Mẹpinplọn tọn nọ magbe wefọ he ji ohàn lọ na sinai do tọn po numọtolanmẹ he yé jlo dọ mẹhe na sè ohàn lọ lẹ ni do po. Enẹgodo, pipli he nọ penukundo ohàn go lọ nọ de azọ́n namẹ nado pà ohàn lọ bosọ kàn hàngbe lọ lẹ dai. Apajlẹ lehe yè na jihàn lọ do tọn de nọ yin yíyí do kanji. Wedegbẹ́ Mẹpinplọn tọn nọ dotó hoyidokanji ehe ganji bosọ nọ na ayinamẹ devo lẹ. Enẹgodo, pipli he nọ penukundo ohàn go lọ nọ hodo ayinamẹ lọ lẹ bo nọ bayi hoyidokanji he yè na zan tlọlọ lọ. Ofi voovo lẹ wẹ hoyidokanji ehe nọ yin bibayi te, yèdọ to alahọ lẹ mẹ podọ to owhé he gbè nuyizan hoyidokanji tọn lẹ te.

Mẹ’sunnu mítọn lẹ nọ yí tito ọdinatẹẹ ji tọn voovo lẹ zan nado pà ohàn lọ lẹ bosọ yí yé do kanji. Yé sọ nọ zan nuhònu lẹ, azọ́nwanu he nọ jla nuhiho lọ lẹ do, zomọ gbèzeyiaga tọn po miklo po. Miklo dopo tata gán họ̀ dọla Amelika tọn 100 (nudi 56 000F CFA) jẹ nue hugan dọla Amelika tọn 1 000 (nudi 568 900F CFA). To 2020, mí zan dọla Amelika tọn 116 000 (nudi 65 900 400F CFA) do họ̀ nuyizan hoyidokanji tọn lẹ.

Vivẹnu tẹlẹ wẹ nọ yin dido ma nado zankuẹ do apà mẹ? Kakati pipli he nọ penukundo ohàn go lọ nido bẹ mẹsusu hẹn to Bẹtẹli, mẹdezejotọ he nọ wazọ́n sọn olá lẹ susu wẹ mí nọ zan. Gbọnvona enẹ, kakati mẹhe na yí nuhiho lọ lẹ do kanji ni pli do fide nado wazọ́n lọ, mẹmẹsunnu mítọn lẹ nọ saba yí tito ọdinatẹẹ ji tọn lẹ zan nado wleawuna nudidọ nuhònu voovo lẹ tọn.

‘E Nọ Hẹn Yise Lodo’

Mẹ’sunnu po mẹ’yọnnu mítọn lẹ po nọ yiwanna nado dotó ohàn sunmẹsunmẹ tọn lọ lẹ taun. Tara he nọ nọ̀ Allemagne dọ dọ: “Eyin n’to nuhà, ohàn lọ lẹ nọ gọalọna mi nado vò sọn ayiha mẹ. Eyin n’dotó yé to anọ́nù-gbè ṣie mẹ, e nọ taidi na mi dọ Jehovah gbò mi fán wẹ nkọ.” Mẹmẹsunnu de he nọ yin Dmitry bo nọ nọ̀ Kazakhstan dọ dọ: “E nọ vivi na mi nado dotó ohàn lọ lẹ, na n’ma nọ hanú vlavo eyin yé sọgbe hẹ nunọwhinnusẹ́n Biblu tọn lẹ. Gbọnvona enẹ, ohàn lọ lẹ nọ zọ́n bọ n’nọ ze ayiha do gbigbọnu lẹ ji.”

Delia he nọ nọ̀ Afrique du Sud dọ lehe ohàn sunmẹsunmẹ tọn lọ lẹ nọ ṣí na ẹn, e dọ: “E nọ hẹn yise ṣie lodo. Eyin n’to awubla, kavi n’to pipehẹ nuhahun lẹ, n’nọ saba mọ ohàn de he sọgbe hẹ ninọmẹ ṣie janwẹ. To ninọmẹ susu mẹ, nudidọ ohàn lọ lẹ tọn sisè poun ko nọ pé nado diọ numọtolanmẹ he do n’te!”

Ohàn sunmẹsunmẹ tọn delẹ ko wá jẹ mẹdelẹ tọn ji taun. Lerato he uwọ lọsu wá sọn Afrique du Sud dọ dọ: “Ohàn lọ lẹ he hosọ yetọn yin ‘E to Yakẹ’ po ‘Aihọn Yọyọ He Ja’ po nọ zọ́n bọ n’nọ yawu mọ aihọn yọyọ lọ hlan whenue n’na dokuavọna onọ̀ yiwanna ṣie. Whedepopenu he n’dotó ohàn enẹlẹ, n’nọ mọdọ e họnwezun ja dee bo kẹ̀ awà etọn lẹ nado gbò mi fán.”

Dopo to ohàn sunmẹsunmẹ tọn lọ lẹ mẹ gọalọna jọja yọnnu aflanmẹ de taun to Sri Lanka. E dọ dọ: “Mẹplọntọ he nọ plọnnu mí gando lẹnunnuyọnẹn go yinuwa hẹ mi to aliho agọ̀ mẹ to klasi, na n’yin Kunnudetọ Jehovah tọn wutu. Obu di mi bọ n’ma yọ́n nue n’gán dọ. Whenue n’jẹ whégbè, iya ṣie dọna mi dọ ma dotó ohàn lọ ‘Nupinplọn Nọ Namẹ Huhlọn.’ Ohàn lọ zọ́n bọ n’mọdọ n’dona bayi dodinnanu bo wleawu nado na gblọndo. To wunkẹngbe, n’dọho hẹ mẹplọntọ lọ. E dotoaina mi bo dohia dọ emi mọnukunnujẹ nuyise Kunnudetọ Jehovah tọn lẹ tọn mẹ todin. N’dopẹna titobasinanu Jehovah tọn he nọ wleawuna ohàn tulinamẹ tọn mọnkọ lẹ.”

Fie wẹ mí nọ hẹn akuẹ sọn nado wleawuna ohàn ehelẹ? Nunina he mí nọ bayi do azọ́n lẹdo aihọn pé tọn lọ tamẹ wẹ, ehe susu etọn nọ yin bibayi gbọn aliho he yin nùdego to donate.jw.org ji lẹ gblamẹ. Mí dọnudo mì na nunina alọtútlú tọn mìtọn lẹ.