Hihọ́-Bibasina Plitẹnhọ Ahọluduta Tọn lẹ to COVID-19 Whenu

“Hagbẹ Anademẹtọ lọ ko basi dide bo to tulina agun lẹpo nado gọjẹ opli lẹ bayi ji nukun sọ nukun bẹsọn osẹ 1^er avril tọn mẹ, adavo osẹ́n aṣẹpatọ lẹdo de tọn lẹ jẹagọdo.” Nulila enẹ he yin zizedo jw.org ji to bẹjẹeji mars tọn to 2022, hẹn homẹ Kunnudetọ Jehovah tọn lẹ tọn hùn lẹdo aihọn pé. Amọ́, azọ̀n bẹplamẹ lọ COVID-19 ma ko vọ̀ sọn aimẹ.a Etẹlẹ wẹ dona yin vivọjlado kavi yin hihọ̀, podọ azọ́nwanu tẹlẹ sin hudo wẹ yè do nado basi hihọ́na pliwatọ lẹ sọn azọ̀n lọ si? Na owhe awe ko juwayi sọn whenue gbọ́n mí basi opli nukun sọ nukun, be e yọnbasi dọ azọ́nwanu enẹlẹ ni sọgbe to Plitẹnhọ Ahọluduta tọn mítọn lẹ mẹ ya?

Na nugbo tọn, mẹmẹsunnu mítọn lẹ ko to awuwle osun susu lẹ jẹnukọn whẹpo opli lẹ nido gọ̀ bẹ to Plitẹnhọ Ahọluduta tọn lẹ mẹ.

Ayiha Voovo Wẹ Yin Kinkàn, Na Nuhudo lẹ Gbọnvo

Osun dopo poun whenue opli lẹ bibayi nukun sọ nukun yin hùzẹdeji to 2020 godo, Azọ́nwatẹn Yẹdide po Họ̀gbigbá Lẹdo Aihọn Pé po Tọn (WDC) to Warwick, New York, jẹ nulẹnpọndo aliho he mẹ COVID-19 na yinuwado lehe mí nọ yí Plitẹnhọ Ahọluduta tọn mítọn lẹ zan te do ji, gọna afọdide he dona yin zize nado basi hihọ́na nọtẹn opli tọn mítọn lẹ.

Nuhe sin hudo mí do to awà aihọn lọ tọn de ji gbọnvona dehe sin hudo mí do to fidevo. Matthew De Sanctis he nọ wazọ́n hẹ WDC dọ dọ: “To otò delẹ mẹ, fie yè sọgan klọ alọ te lẹ ma tin. Eyin osin ma to Plitẹnhọ Ahọluduta tọn de mẹ, e nọ biọ dọ yè ni dà osin sọn tọ̀sisa lẹdo lọ tọn kavi dotọ̀ de mẹ. To otò devo lẹ mẹ, aṣẹpatọ delẹ vọ́ nubiọtomẹsi yetọn lẹ jlado gando zomọ he nọ fá họmẹ, zomọ he nọ diọ jẹhọn gọna ohia he nọ yin yiyizan na whẹho agbasalilo po wiwejininọ po tọn lẹ go.”

Nawẹ mẹmẹsunnu mítọn lẹ penukundo nuhahun ehelẹ go gbọn? Matthew dọmọ to Plitẹnhọ Ahọluduta tọn susu mẹ, “nuzinzan he bọawu bo masọ vẹahi lẹ wẹ yin yiyizan nado didẹ nuhahun ehe.” Di apajlẹ, to Papouasie-Nouvelle-Guinée, bidọn litli 20 tọn ehe go nue mẹ osin gán gbọn tọ́n tin te lẹ wẹ nọ yin yiyizan na alọ kiklọ. Enẹwutu, dọla Amelika tọn 40 poun (nudi 24 480F CFA) ko pé na mẹmẹsunnu lẹ nido wleawuna nuzinzan enẹlẹ do Plitẹnhọ Ahọluduta tọn dopodopo mẹ to gbétatò lẹ mẹ. Na Plitẹnhọ Ahọluduta tọn he to aflika lẹ, nuyizan alọkiklọ tọn he yọ́n taun 6 000 linlán wẹ yin hihọ̀ sọn Asie.

Vọjlado devo lẹ biọ dọ zomọ he nọ fá họmẹ po zomọ he nọ diọ jẹhọn lẹ po ni yin didiọ na jẹhọn dagbe nido tin to Plitẹnhọ Ahọluduta tọn lẹ mẹ. Agun susu wẹ họ̀ opò gaa he go miklo nọ yin biblá do lẹ, ehe zọ́n bọ miklo lẹ masọ nọ gbọn alọ de mẹ jẹ devo mẹ. Vivẹnu yin dido nado flinnu mẹlẹ ma nado nọ doalọ fidelẹ podọ nado sá nuyizan he nọ hù wánvú lẹ do nudelẹ go taidi nuhe nọ hùn ohọ̀n po pọnpi-sin po lẹ, na alọ dido onú enẹlẹ go gán yawu bẹ azọ̀n lọ plamẹ wutu. To afọdaitẹn agun delẹ tọn, yè wleawuna azọ́nwanu he gán namẹ adí kavi nuyizan he nọ hù wánvú lẹ na yede eyin yè ma tlẹ doalọ yé go lẹ. To Chili, to madozẹnzẹn mẹ, dọla amẹlika tọn 1 400 (nudi 856 800F CFA) wẹ yin yiyizan nado basi diọdo enẹlẹ do Plitẹnhọ Ahọluduta tọn dopodopo mẹ.

Dile mẹmẹsunnu lẹ to vivẹnudo nado na ayidonugo hihọ́ bibasina Plitẹnhọ Ahọluduta tọn lẹ, yé sọ dovivẹnu nado dowéna nunina he yin bibasi lẹ ga. Di apajlẹ, to otò delẹ mẹ, yé hodo tito he aṣẹpatọ lẹ zedai nado họ̀ nuyizan alọ kiklọ tọn lẹ po opò gaa he go yè nọ bla miklo do lẹ po, ehe zọ́n bọ yé ma sú takuẹ. Wekantẹn alahọ tọn lẹ họ̀ nuyizan susu lẹ dopọ́ ji, na akuẹ lọ nido depò. Alahọ lẹ po Azọ́nwatẹn Nuhihọ̀ Tọn Tatọ́-Tẹnnọ Tọn po nọ họ̀ nuzinzan lẹ sọn azọ́nwhé lẹ si tlọlọ, ehe zọ́n bọ yé mọ nuhe yé zọ́n lẹ yí domẹwhenu.

“Numọtolanmẹ Hihọ́ Tọn He Sin Hudo N’Do”

Afọdide he yin zize nado basi hihọ́na Plitẹnhọ Ahọluduta tọn lẹ basi hihọ́na mẹhe jẹ opli lẹ wá ji nukun sọ nukun lẹ bosọ vọ́ jidena yé. Dulcine, yèdọ mẹmẹyọnnu de sọn Pérou yigbe dọ emi “dibu vude” whenue emi sè dọ opli lẹ na gọ̀ bẹ to Plitẹnhọ Ahọluduta tọn lẹ mẹ. E dọ: “N’bẹ azọ̀n COVID-19 tọn ojlẹ vude to whenue azọ̀n bẹplamẹ lọ gbajẹgbonu godo. Enẹwutu, linlẹn lọ nado gọ̀ yì Plitẹnhọ Ahọluduta tọn mẹ ma jẹeji na mi, na n’mọdọ n’gán vọ́ bẹ azọ̀n lọ to finẹ. Amọ́, whenue n’jẹ Plitẹnhọ Ahọluduta tọn mẹ, n’doayi e go dọ mẹho lẹ ko ze afọdide hihọ́-basinamẹ tọn susu lẹ taidi nuyizan he nọ hù wánvú lẹ yiyizan, opò gaa he go miklo nọ yin bibla do lẹ, gọna nuyizan he nọ hù wánvú lẹ yíyí do súnsún nulẹ to Plitẹnhọ Ahọluduta tọn lọ mẹ jẹnukọnna opli dopodopo podọ to godo yetọn. Ehe hẹn mí tindo numọtolanmẹ hihọ́ tọn he sin hudo n’do.”b

Avùnnukundiọsọmẹnu devo wẹ mẹmẹyọnnu de he nọ yin Sara pehẹ to Zambie. E basi zẹẹmẹ dọmọ: “COVID-19 hù asu ṣie, to osun delẹ die. N’nọ hànú gando lehe e na ṣì na mi do go eyin yẹn ṣo yì opli nukun sọ nukun whla tintan.” Nawẹ nulẹ wá yì do na ẹn? E dọmọ: “Opli lẹ yìyì nukun sọ nukun ko hẹn mi kudeji dọ Jehovah topọ hẹ mí to azán godo tọn ehelẹ mẹ. Todin, n’nọ mọ tulinamẹ, owanyi po godonọnamẹ he n’do hudo etọn po yí sọn mẹho lẹ gọna mẹmẹsunnu po mẹmẹyọnnu ṣie lẹ po dè hugan gbede pọ́n.”

E vivi na sinsẹ̀n-basitọ hatọ vivẹ́ mítọn lẹpo lẹdo aihọn pé nado gọ̀ yì Plitẹnhọ Ahọluduta tọn yetọn lẹ mẹ, podọ yé sọ yọ́n pinpẹn etọn. Mì wanu na nunina mìtọn lẹ, ehe susu yetọn nọ yin bibasi gbọn donate.jw.org ji. Nunina ehelẹ nọ gọalọna mí nado hẹn ẹn diun dọ nọtẹn sinsẹ̀n-bibasi wiwe-ṣeke tọn lẹ tin to ninọmẹ dagbe mẹ bọ mí gán pli do yé mẹ to hihọ́ glọ.