Whenue mí jlo na basi nudide titengbe de, mí dona mọnukunnujẹ “nuhe ojlo Jehovah tọn yin” mẹ, bo wá yinuwa sọgbe hẹ ẹ. (Efe. 5:17) Eyin mí mọ nunọwhinnusẹ́n Biblu tọn he gando ninọmẹ mítọn go lẹ, na taun tọn, pọndohlan Jiwheyẹwhe tọn gando whẹho lọ go dín wẹ mí te. Enẹgodo, dile mí to nunọwhinnusẹ́n etọn lẹ yido-yizan mẹ, e yọnbasi dogọ dọ mí ni basi nudide dagbe lẹ. Ojlo “mẹylankan lọ,” enẹ wẹ kẹntọ mítọn Satani tọn wẹ nado yí nuhe aihọn ehe nọ zedaga lẹ do hẹn alọnu mítọn ján, na mí nikaa mọ whenu na sinsẹ̀nzọn mítọn na Jiwheyẹwhe. (1 Joh. 5:19) Klistiani de gán jẹ ayidonugo na akuẹ, wepinplọn kavi agbasazọ́n etọn ji, kakati ni yin dotẹnmẹ he e tindo nado sẹ̀n Jehovah lẹ. Eyin enẹ jọ, ohia lọ niyẹn dọ pọndohlan aihọn lọ tọn ko to nuyiwadeji. Na nugbo tọn, onú ehelẹ ma ylan to yede mẹ, amọ́ yé ma dona tin to otẹn tintan mẹ gbede to gbẹzan mítọn mẹ. w24.03 24 huk. 16-17

Doayi nuagokun awe delẹ go to Salmu he to aga mẹ: (1) Gbẹtọ dodonọ lẹ nọ pehẹ nuhahun lẹ. (2) Jehovah nọ whlẹn mí sọn whlepọn mítọn lẹ mẹ. Nawẹ Jehovah nọ whlẹn mí gbọn? Aliho dopo wẹ yindọ e nọ gọalọna mí nado do pọndohlan jlẹkaji tọn gando gbẹninọ to titonu ehe mẹ go. Dile etlẹ yindọ Jehovah dopà dọ mí na do ayajẹ to sinsẹ̀nzọn emitọn mẹ, e ma na mí nujikudo lọ dọ nuhahun lẹ na hán to gbẹzan mítọn mẹ todin. (Isa. 66:14) E dotuhomẹna mí nado ze ayiha do sọgodo mítọn ji, enẹ wẹ do whenue mí na zan gbẹzan he ewọ jlo dọ mí ni duvivi etọn kakadoi lọ ji. (2 Kọl. 4:16-18) Todin whẹ́, e nọ gọalọna mí nado to ewọ sẹ̀n egbesọegbesọ. (Avi. 3:22-24) Etẹwẹ mí gán plọn sọn apajlẹ sinsẹ̀n-basitọ Jehovah tọn nugbonọ he nọgbẹ̀ to ojlẹ Biblu tọn lẹ po egbezangbe po tọn mẹ lẹ mẹ? Mílọsu gán pehẹ nuhahun madonukun lẹ. Amọ́, eyin mí ganjẹ Jehovah go, ewọ ma na gboawupo gbede nado nọgodona mí.—Salm. 55:22. w23.04 14-15 huk. 3-4

Mí gán plọnnu sọn apajlẹ Josẹfu po Malia po tọn mẹ, mẹhe wleawufo nado setonuna aṣẹpipa daho lẹ etlẹ yin to whenue mọwiwà ma bọawu. (Luku 2:1-6) Whenue ohò Malia tọn ko dibla pé osun ṣinẹnẹ, tonusise ewọ po Josẹfu po tọn yin whiwhlepọn. Ahọluigbagán Lomu tọn Augusti biọ to tòvi etọn lẹ si nado yì ze yinkọ dai. Josẹfu po Malia po dona yì Bẹtlẹhẹm, yèdọ gbejizọnlin de he dẹn na nudi kilomẹtlu 150 gbọn lẹdo osó lẹ tọn de mẹ. Gbejizọnlin enẹ ma na ko bọawu paali, titengbe na Malia. Asu po asi po lọ gán ko hanú gando hihọ́ Malia gọna viyẹyẹ he ma ko yin jiji lọ tọn go. Bọ eyin vinú ka jẹ wiwà ẹ ji whenue yé to aliji lo? Mẹsia dopagbe lọ wẹ to ohò etọn mẹ. Be ehe na glọnalina yé nado setonuna osẹ́n gandudu lọ tọn wẹ ya? Josẹfu po Malia po ma dike na depope to ahunmẹdunamẹnu enẹlẹ mẹ ni magbe eyin vlavo yé na setonuna osẹ́n lọ kavi lala. Jehovah dona tonusise yetọn. Malia jẹ Bẹtlẹhẹm awuyẹyẹ afọyẹyẹ, e ji viyẹyẹ he to jogún-jogún de bo tlẹ sọ yí adà de wà nado hẹn dọdai Biblu tọn de di!—Mika 5:2. w23.10 8 huk. 9; 9 huk. 11-12