Jọja de to todohukanji ojlẹ he mẹ nujijọ Biblu tọn lẹ wá aimẹ te, Biblu nupinplọn tọn jw.org tọn, yẹdide otò tọn de po yẹdide he ewọ lọsu de po yizan nado hẹn Biblu hihia etọn pọnte dogọ

KANBIỌ HE JỌJA LẸ NỌ KANSE

Nawẹ Biblu Sọgan Gọalọna Mi Gbọn?—Adà 2tọ: Nọ Mọ Awuvivi to Biblu Hihia Towe Mẹ

“Biblu hihia gán ṣiapọmẹ, . . . eyin a ma yọ́n aliho he mẹ e jẹ dọ a ni hia ẹ te,” wẹ jọja de he nọ yin Will dọ.

Be a jlo na yọ́n aṣli lehe a sọgan nọ mọ awuvivi to Biblu hihia mẹ do tọn ya? Hosọ ehe na gọalọna we.

Nọ hẹn kandai Owe-wiwe lẹ tọn tin togbẹ̀

Nọ mọ dewe to nujijọ lọ lẹ mẹ. A sọgan hodo afọdide he bọdego lẹ:

De kandai Biblu tọn he jlo we nado gbadopọnna. A gán de nujijọ Biblu tọn de kavi adà de sọn owe Wẹndagbe tọn lẹ mẹ, kavi a sọgan de kandai de sọn hoyidokanji nujijọ he go Biblu donù lẹ tọn he to jw.org ji lẹ mẹ.
Hia kandai lọ. A gán hia ẹ na dewe, kavi a gán hia ẹ daga to pọmẹ hẹ họntọn lẹ kavi hagbẹ whẹndo tọn lẹ. Mẹdopo sọgan hia adà zẹẹmẹ-basitọ tọn bọ mẹhe pò lẹ na hia adà mẹhe to kandai lọ mẹ lẹ tọn.
Tẹ́n dopo kavi delẹ to ayinamẹ he bọdego lẹ mẹ pọ́n:
- De yẹdide lẹ nado hẹn kandai lọ họnwun. Kavi de yẹdide nujijọ dopodopo tọn—enẹ wẹ yẹdide kleunkleun debọdo-dego he do aliho he mẹ nujijọ lọ wá aimẹ te lẹ hia. Nọ kannu do odò na yẹdide dopodopo nado basi zẹẹmẹ etọn.
- De yẹdide nuyijlẹdonugo tọn lẹ. Di apajlẹ, eyin a to wehia gando mẹhe yin nugbonọ de go, nọ basi nuyijlẹdonugo kanṣiṣa he tin to jẹhẹnu, nuyiwa mẹlọ tọn po dona he e mọyi lẹ po ṣẹnṣẹn tọn.
- Hẹn kandai lọ sọawuhia di otàn yọyọ de. Na linlin nujijọ lọ tọn sọn pọndohlan voovo mẹ, bo yí “hokansemẹ” omẹ tangan he yin nùdego to nujijọ lọ mẹ po kunnudetọ he yinukundomọ nujijọ lọ lẹ po tọn dogọ.
- Eyin mẹhe yin nùdego to kandai lọ mẹ de basi nudide nulú tọn, lẹnnupọn do aliho devo he mẹ e gán ko yinuwa te ji. Di apajlẹ, gbadopọnna nuyiwa Pita tọn to whenue e mọ́n Jesu. (Malku 14:66-72) Nawẹ Pita sọgan ko duto kọgbidinamẹ lọ ji to aliho dagbe mẹ gbọn?
- Eyin a mọdọ linlẹn devo lẹ sọ to ayiha mẹ wá na we dogọ gando kandai lọ go, a gán gbọ bo yí i do basi nupinpọn-do-plọnnu sinai do Biblu ji de na dewe. Yí nuplọnmẹ he yè sọgan mọyi sọn kandai lọ mẹ lẹ dogọ.—Lomunu lẹ 15:4.
  
  A sọgan hẹn Biblu hihia towe tin togbẹ̀!

Nọ dindonanu!

Eyin a nọ na ayidonugo nuhe kandai de bẹhẹn lẹ to gigọ́ mẹ, a gán wá tọ́n jẹ nuhọakuẹ he whlá demẹ lẹ ji. Na nugbo tọn, hogbe dopo kavi awe nọ yọ́n-na-yizan taun to kandai Biblu tọn de mẹ to whedelẹnu.

Di apajlẹ, yí Matiu 28:7 jlẹdo Malku 16:7 go.

Naegbọn Malku do yidogọ to kandai etọn mẹ dọ to madẹnmẹ Jesu na sọawuhia devi etọn lẹ “po Pita po”?
Nudọnamẹ: Malku ma yinukundomọ nujijọ lọ lẹ; e họnwun dọ Pita dè wẹ e na ko mọ nudọnamẹ he e kàn lẹ yí sọn.
Nuhọakuẹ he whlá: Naegbọn Pita na ko mọ tuli yí nado sè dọ Jesu jlo na mọ ẹn whladopo dogọ? (Malku 14:66-72) Nawẹ Jesu do ede hia taidi họntọn dagbe de na Pita gbọn? Nawẹ a sọgan hodo apajlẹ Jesu tọn bo yin họntọn dagbe de na mẹdevo lẹ gbọn?

Eyin a nọ hẹn kandai Owe-wiwe lẹ tọn tin togbẹ̀ bo nọ dindona nuhe e bẹhẹn lẹ to gigọ́ mẹ, Biblu hihia na lẹzun awuvivinu na we dogọ!

Nuhe ogbẹ́ towe lẹ nọ dọ

“To whedelẹnu n’nọ de weta dopo bo nọ gbadopọnna ẹn kakajẹ whenue n’mọnukunnujẹemẹ. Mọwiwà nọ zọ́n bọ e nọ di na mi dọ n’mọ onú titengbe de he n’ma ko yọnẹn kavi he mẹ n’ma ko mọnukunnujẹ dai. E nọ paṣa mi taun bosọ nọ yin awuvivinu de na mi to whelẹponu.”—Bonnie.

“N’plọnnu gando owe Luti tọn go bo basi dodinnanu devo lẹ deji dogọ to Watchtower Library mẹ nado mọnukunnujẹ nuhe owe lọ bẹhẹn lẹ mẹ to gigọ́ mẹ. E nọ yọ́n taun nado yí azọ́nwanu ọdinatẹẹ ji tọn enẹ zan. E nọ gọalọna mi nado mọ lehe Biblu hihia gán yin awuvivinu do sọ.”—Timothy.

“Biblu hihia to pọmẹ nọ hẹn awuvivi wá taun, na mẹdopodopo nọ hia adà mẹhe yin nùdego to kandai lọ mẹ de tọn taidi wadohia de. N’sọ nọ duvivi hoyidokanji nujijọ he go Biblu donù lẹ tọn he to jw.org ji lẹ tọn. Yé nọ hẹn nujijọ Biblu tọn lẹ zun nujijọ jọnun de!”—Isabel.