Awhàngbigba Sinsẹ̀n Nugbo Tọn Sẹpọ
“Oklunọ nasọ yin ahọlu to aigba lẹpo ta.”—ZEKALIA 14:9.
1. Etẹwẹ yin numimọ Klistiani mẹyiamisisadode lẹ tọn to Wẹkẹ Whàn I whenu, podọ nawẹ ehe yin didọdai gbọn?
TO WẸKẸ whàn tintan whenu, Klistiani yiamisisadode lẹ jiya awufiẹsa susu lẹ po ganpamẹninọ lẹ po to alọ akọta he to awhànfun lẹ tọn mẹ. Avọ́sinsan pipa yetọn tọn lẹ hlan Jehovah yin alọhẹndotena sinsinyẹn, bọ yé sọ jai biọ ninọmẹ kanlinmọgbenu gbigbọmẹ tọn de mẹ. Ehe lẹpo yin dọdai etọn dọ to Zekalia 14:2 mẹ, ehe basi zẹẹmẹ mẹgbeyinyan akọjọpli tọn do Jelusalẹm ji. Tòdaho dọdai ehe tọn wẹ “Jelusalẹm olọn tọn,” Ahọluduta olọn mẹ tọn Jiwheyẹwhe tọn gọna nọtẹn “ofin Jiwheyẹwhe tọn po Lẹngbọvu lọ po tọn.” (Heblu lẹ 12:22, 28; 13:14; Osọhia 22:3) Mẹyiamisisadode Jiwheyẹwhe tọn lẹ to aigba ji nọtena tòdaho enẹ. Nugbonọ he tin to yé ṣẹnṣẹn lẹ lùn mẹgbeyinyan lọ tọ́n, bo gbẹ́ ma nado jó yedelẹ do nado yin hinhẹn sọyì kanlinmọgbenu “sọn tòdaho lọ mẹ.”a
2, 3. (a) Nawẹ sinsẹ̀n-bibasi Jehovah tọn gbawhàn sọn 1919 gbọ́n gbọn? (b) Sọn 1935 gbọ́n, awuwle tẹlẹ wẹ ko wá aimẹ?
2 To 1919 mẹyiamisisadode nugbonọ lẹ yin hinhẹn jẹ mẹdekannu sọn ninọmẹ kanlinmọgbenu ninọ yetọn mẹ, podọ yé yí dotẹnmẹ ojlẹ jijọho tọn he bọdo awhàn lọ go zan to afọdopolọji. Taidi afọzedaitọ Jelusalẹm olọn tọn lẹ, yé yí dotẹnmẹ hundote daho lọ zan nado dọyẹwheho wẹndagbe Ahọluduta Jiwheyẹwhe Tọn podọ nado gọalọ to bẹplidopọ hagbẹ 144 000 godo tọn lẹ mẹ. (Matiu 24:14; 2 Kọlintinu lẹ 5:20) To 1931 yé kẹalọyi yinkọ he sọgbe hẹ Owe wiwe lọ Kunnudetọ Jehovah Tọn lẹ.—Isaia 43:10, 12.
3 Sọn whenẹnu gbọ́n, Kunnudetọ yiamisisadode Jiwheyẹwhe tọn lẹ ma ko pọ́n godo gbede pọ́n gba. Yèdọ Hitler po awhàngọnu Nazi tọn lẹ po ma tlẹ pé yé go gba. Mahopọnna homẹkẹndomẹ lẹdo aihọn pe, azọ́n yetọn ko tindo sinsẹ́n to aigba lẹpo ji. Titengbe sọn owhe 1935, “gbẹtọ susugege” akọjọpli tọn he yin dọdai etọn dọ to owe Osọhia tọn mẹ, ko kọnawudopọ hẹ yé. Omẹ ehelẹ lọsu yin Klistiani klandowiwe, he yin bibaptizi lẹ bo ko sọ “yan aṣọ́vọ̀ yetọn bo sọ hẹn yé zun wewe to ohùn Lẹngbọvu lọ tọn mẹ,” yèdọ Jesu Klisti. (Osọhia 7:9, 14) Ṣigba, yé ma yin mẹyiamisisadode, he tindo todido olọn mẹ tọn gba. Todido yetọn wẹ nado dugu nuhe Adam po Evi po hẹnbu tọn, enẹ wẹ yin, ogbẹ̀ gbẹtọvi pipé tọn de to paladisi aigba ji tọn de mẹ. (Psalm 37:29; Matiu 25:34) To egbehe, sọha gbẹtọ susugege lọ tọn hugan alindọn livi atọ́n. Sinsẹ̀n-bibasi nugbo Jehovah tọn to awhàngba, ṣigba awhàngbigba etọn godo tọn gbẹsọ ja to nukọn.
Jonọ lẹ to Tẹmpli Gbigbọmẹ Jiwheyẹwhe Tọn Mẹ
4, 5. (a) Fie wẹ gbẹtọ susugege lọ nọ basi sinsẹ̀n hlan Jehovah te? (b) Lẹblanulọkẹyi tẹlẹ wẹ yé nọ duvivi etọn, podọ to hẹndi dọdai tẹ tọn mẹ?
4 Dile e yin didọdai do, gbẹtọ susugege lọ “to sinsẹ̀n [Jiwheyẹwhe] to okle po ozán po to tẹmpli etọn mẹ.” (Osọhia 7:15) To whenuena e yindọ yé ma yin yẹwhenọ, Islaelivi gbigbọmẹ tọn lẹ, vlavo Johanu mọ yé ṣite to tẹmpli lọ mẹ to gbonu awánu Kosi lẹ tọn mẹ. (1 Pita 2:5) Lehe tẹmpli gbigbọmẹ Jehovah tọn lẹzun gigonọ do sọ, he lẹdo etọn lẹ yin gigọ́ po gbẹtọgun daho ehe po he, to pọmẹ po pipotọ Islaeli gbigbọmẹ tọn po, to gigopana ẹn!
5 Gbẹtọ susugege lọ ma nọ wà sinsẹ̀nzọn hlan Jiwheyẹwhe to ninọmẹ he yin yẹdena gbọn awánu họhòmẹ yẹwhenọ tọn lẹ dali gba. Yé ma yin lilá di dodonọ na lẹndai nado yin sọdodovi, ovi gbigbọmẹ Jiwheyẹwhe tọn lẹ gba. (Lomunu lẹ 8:1, 15) Etomọṣo, gbọn yise tintindo to ofligọ Jesu tọn mẹ dali, yé tindo teninọ wiwe de to Jehovah nukọn. Yé yin lilá di dodonọ po lẹndai họntọn etọn lẹ yinyin tọn po. (Yijlẹdo Jakobu 2:21, 23 go.) Yé lọsu tindo lẹblanulọkẹyi nado ze avọ́sinsan kẹalọyi de do agbà gbigbọmẹ Jiwheyẹwhe tọn ji. Gbọnmọ dali, gando gbẹtọgun daho ehe go, dọdai Isaia 56:6, 7 tọn to hẹndi gigonọ de mọyi he dọmọ: “Ovi ojonọ tọn lẹ ga, he kọ̀n yede dopọ hẹ Oklunọ nado sẹ̀n ẹn, podọ nado yiwanna oyín Oklunọ tọn, . . . Yé wẹ yẹn na hẹn wá osó wiwe ṣie ji, bosọ hẹn yé jaya to ohọ̀ odẹ̀ tọn ṣie mẹ: avọ́ mimẹ̀ yetọn po avọ́ yetọn lẹ po na yin [kikẹalọyi] to agbà ṣie ji; na ohọ̀ odẹ̀ tọn wẹ yè na nọ ylọ ohọ̀ ṣie dọ na gbẹtọ lẹpo.”
6. (a) Wunmẹ avọ́sinsan tẹlẹ tọn wẹ jonọ lọ lẹ nọ basi? (b) Etẹwẹ bàsía osìn tọn he tin to kọho yẹwhenọ lẹ tọn flinnu yé gando?
6 To avọ́sinsan he jonọ helẹ nọ basi mẹ wẹ “sinsẹ́n nùflo . . . tọn [taidi avọ́sinsan likun dagbedagbe tọn lẹ], he basi ogbèyiyi hlan oyín [Jiwheyẹwhe tọn]” gọna “nado nọ wadagbe podọ nado nọ mánamẹ” tin te. (Heblu lẹ 13:15, 16) Bàsía daho osìn tọn he yẹwhenọ lẹ dona yizan nado lawú sọ yin nuflinmẹ titengbe de na jonọ ehelẹ. Yé lọsu dona litaina nuklọwe gbigbọmẹ po agbasa tọn po dile Ohó Jiwheyẹwhe Tọn to yinyin hinhẹn zun nuhe họnwun yinukọn dogọ hlan yé.
Fiwiwe lọ po Aṣọ́donu Etọn lẹ Po
7. (a) Nukun tẹwẹ gbẹtọ susugege lọ do nọ pọ́n lẹblanulọkẹyi yẹwhenọduta wiwe lọ tọn? (b) Lẹblanulọkẹyi dogọ tẹlẹ wẹ jonọ delẹ ko mọyi?
7 Be Fiwiwe lọ po aṣọ́donu etọn lẹ po tindo zẹẹmẹ depope na gbẹtọ susugege jonọ ehelẹ ya? Eyọn, yé ma na tin to ninọmẹ he yin yẹdena gbọn Fiwiwe lọ dali mẹ gbede pọ́n gba. Yé ma yin vivọji taidi visunnu gbigbọmẹ Jiwheyẹwhe tọn lẹ po tovi-yinyin olọn mẹ tọn po gba. Be ehe nọ hẹn yé tindo numọtolanmẹ “nuvẹun” kavi “nukundonumẹ” tọn wẹ ya? Lala. Kakatimọ, yé nọ jaya to lẹblanulọkẹyi godonọna pipotọ 144 000 lẹ tọn mẹ, podọ yé nọ do pinpẹn nutọn he siso hia na lẹndai Jiwheyẹwhe tọn to hinhẹn visunnu gbigbọmẹ tọn ehelẹ zun ovi etọn lẹ, he na tindo mahẹ po Klisti po to hinhẹn gbẹtọvi lẹ jẹ pipé kọ̀n dali. Humọ, gbẹtọ susugege jonọ lẹ tọn nọ duvivi nukundagbe majẹhẹ Jiwheyẹwhe tọn na nina yé todido ogbẹ̀ madopodo to Paladisi aigba ji tọn de mẹ. Delẹ to jonọ ehelẹ mẹ, taidi Nẹtinimi hohowhenu tọn lẹ, ko yin nina lẹblanulọkẹyi nukunpedonugo tọn lọ lẹ nado nọ gọalọna yẹwhenọduta wiwe lọ.b (Isaia 61:5) Sọn omẹ ehelẹ mẹ wẹ Jesu dè ‘ahọvi lẹ sọn to aigba lẹpo ji.’—Psalm 45:16.
8, 9. Alemọyinu tẹwẹ gbẹtọ susugege lọ nọ mọyi sọn nulẹnpọndo aṣọ́donu Fiwiwe lọ tọn mẹ?
8 Dile e tlẹ yindọ yé ma sọgan biọ nuhe nọtena Fiwiwe lọ mẹ pọ́n gbede, gbẹtọ susugege heyin jonọ lọ lẹ nọ plọn nuplọnmẹ họakuẹ lẹ sọn aṣọ́donanu etọn lẹ mẹ. Kẹdẹdile mìyọngbán de tindo nuhudo amì tọn whẹwhẹ do, mọdopolọ wẹ jonọ lọ lẹ tindo nuhudo gbigbọ wiwe tọn nado gọalọna yé nado tindo nukunnumọjẹnumẹ nugbo he to nukọnzindo lẹ tọn sọn asisa Ohó Jiwheyẹwhe Tọn mẹ, gbọn “afanumẹ nugbonọ, nuyọnẹntọ” lọ dali. (Matiu 24:45-47) Yinukọn dogọ, gbigbọ Jiwheyẹwhe tọn nọ gọalọna yé nado na gblọndo oylọ-basinamẹ ehe tọn dọmọ: “Gbigbọ po asiyọyọ [pipotọ mẹyiamisisadode lọ tọn] po dọmọ, Wá. Ewọ he to sise ni dọmọ, Wá. Podọ mẹhe nugbla hù gbọ e ni wá. Ewọ he jlo, gbọ e ni yí osin ogbẹ̀ tọn lọ vọnu.” (Osọhia 22:17) Gbọnmọ dali, mìyọngbán lọ yin nuflinmẹ de hlan gbẹtọ susugege gando azọngban yetọn go nado sẹ́ taidi Klistiani lẹ podọ nado dapana nudepope to walọyizan, linlẹn, hodidọ, kavi to nuyiwa liho he na hẹn homẹgble gbigbọ wiwe Jiwheyẹwhe tọn.—Efesunu lẹ 4:30.
9 Tafo he ji akla madotọ́n tin te nọ flinnu gbẹtọ susugege lọ dọ nado gbọṣi agbasalilo mẹ to gbigbọ liho, yé dona nọ tindo mahẹ to núdùdù gbigbọmẹ tọn mẹ sọn Biblu mẹ podọ sọn owe “afanumẹ nugbonọ, nuyọnẹntọ” lọ tọn lẹ mẹ to gbesisọmẹ. (Matiu 4:4) Agbà nuwhẹ́nwán tọn nọ flinnu yé dogbọn nujọnu-yinyin dẹ̀hiho vẹkuvẹku hlan Jehovah na alọgọ nado sọgan hẹn tenọgli yetọn go. (Luku 21:36) Dẹ̀hiho yetọn lẹ dona gọna hogbe mẹpipa tọn po pẹdido sọn ahún mẹ wá tọn lẹ po. (Psalm 106:1) Nuwhẹ́nwán he tin to agbà lọ ji sọ nọ flinnu yé gando nuhudo lọ go nado pagigona Jiwheyẹwhe to aliho devo lẹ mẹ, taidi gbọn ohàn Ahọluduta lọ tọn yetọn jiji sọn ahún mẹ wa to opli Klistiani tọn lẹ tẹnmẹ podọ gbọn awuwiwle ganji yetọn nado basi ‘ogbèyí gbangba whlẹngán yetọn tọn’ po kọdetọn dagbe po dali.—Lomunu lẹ 10:10.
Awhàngbigba Pete Sinsẹ̀n-Bibasi Nugbo Tọn
10. (a) Hlan nukundido jiawu tẹwẹ mí sọgan pọ́n nukọn hlan? (b) Awuwle tẹwẹ dona wá aimẹ jẹnukọn?
10 To egbehe “gbẹtọ susu” sọn akọta lẹpo mẹ to wiwọ̀ wá ohọ sinsẹ̀n-bibasi Jehovah tọn mẹ. (Isaia 2:2, 3) To nugbo ehe tọn didohia mẹ, Osọhia 15:4 dọmọ: “Mẹnu wẹ ma na dibusi we, Oklunọ E, bo ma na pagigona oyín towe? Na hiẹ dopokẹdẹ wẹ wiwe; na akọta lẹpo wẹ na wá bo litai to nukọn towe; na yè ko do whẹdida towe lẹ hia.” Zekalia weta 14 basi zẹẹmẹ nuhe bọdego tọn. To sọgodo madẹnmẹ, walọ ylankan suhugan gbẹtọ aigba ji tọn lẹ na jẹ opodo de kọ̀n dile yé na plidopọ na ojlẹ godo tọn nado fùnawhàn sọta Jelusalẹm—yèdọ nukunmọnu Jelusalẹm olọn mẹ tọn to aigba ji. Enẹgodo Jehovah na yinuwa. Taidi Jiwheyẹwhe Awhànfuntọ de, ewọ na “jẹgbonu yì, bo hoavun hẹ akọta nẹlẹ” mẹhe wleawu fó nado basi mẹgbeyinyan mọnkọtọn.—Zekalia 14:2, 3.
11, 12. (a) Nawẹ Jehovah na yinuwa hlan mẹgbeyinyan lẹdo aihọn pe tọn do sinsẹ̀n-basitọ lẹ ji to tẹmpli etọn mẹ gbọn? (b) Etẹwẹ na yin kọdetọn awhàn Jiwheyẹwhe tọn?
11 “Ehe nasọ yin azọ̀nylankan he Oklunọ na do hò gbẹtọ he ko fùnawhàn hẹ Jelusalẹm lẹpo: Agbasalan yetọn na dusúdo sẹ̀ whenuena yé ṣite to afọ yetọn lẹ ji, podọ nukun yetọn lẹ nasọ dusúdo sẹ̀ to oslo yetọn lẹ mẹ, podọ odẹ́ yetọn nasọ dusúdo sẹ̀ to onù yetọn mẹ. E nasọ wá jọ to azán nẹ mẹ, wẹ gbigbàdo daho de sọn Oklunọ dè na tin to yé ṣẹnṣẹn; yé nasọ hẹn omẹ dopodopo alọ kọmẹnu etọn tọn go, alọ etọn nasọ fọ́n daga do alọ kọmẹnu etọn tọn ji.”—Zekalia 14:12, 13.
12 Vlavo azọ̀nylankan ehe na yin nujọnu tọn kavi yẹhiadonu tọn wẹo, mí dona nọte pọ́n nuhe na jọ lọ. Ṣigba, onú dopo họnwun. To whenuena kẹntọ Jiwheyẹwhe tọn lẹ na to awuwle nado basi mẹgbeyinyan lẹdo aihọn pe yetọn sọta devizọnwatọ Jehovah tọn lẹ, yé na yin alọhẹndotena gbọn gufinfọn dobunamẹ huhlọn Jiwheyẹwhe ganhunupo lọ tọn tọn dali. Onù yetọn lẹ na bọdo. E na taidi dọ odẹ́ avùnnukundiọsọmẹ yetọn tọn ko jìwé nkọtọn. Yanwle pọmẹ yetọn tọn ma na họnwun hlan nukun yetọn tọn gba, taidi dọ nukun yetọn lẹ ko jìwé nkọtọn. Huhlọn jọwamọ yetọn tọn, he nọ dozolanmẹna yé nado basi mẹgbeyinyan mọnkọtọn lẹ, na busẹ. To bẹwlu mẹ, yé na jẹ ode awetọ yetọn lẹ hù badabada. Gbọnmọ kẹntọ lẹ po na sinsẹ̀n-bibasi hlan Jiwheyẹwhe to aigba ji na yin zizàsẹ sọn aimẹ. To godo mẹ, akọta lẹpo na ko yin hinhẹn po huhlọn po nado yọ́n nupojipetọ-yinyin wẹkẹ tọn Jehovah tọn. Dọdai lọ na yin hinhẹndi he dọmọ: “Oklunọ bo nasọ yin ahọlu to aigba lẹpo ta.” (Zekalia 14:9) Enẹgodo, Satani po aovi etọn lẹ po na yin zizedo ogàn mẹ dile Gandudu Owhe Fọtọ́n Klisti tọn na bẹjẹeji po dona susugege he tin to sẹdotẹnmẹ na gbẹtọvi lẹ po.—Osọhia 20:1, 2; 21:3, 4.
Fọnsọnku Aigba Ji Tọn
13. Mẹnu lẹ wẹ yin mẹhe “yè . . . jódai sọn akọta” mẹ lẹ?
13 Dọdai Zekalia tọn zindonukọn to weta 14, wefọ 16 mẹ dọmọ: “E nasọ wá jọ, dọ omẹ dopodopo he yè na jódai sọn akọta he wá Jelusalẹm ji lẹpo mẹ, na nọ hẹji yì sọn owhè mẹ jẹ owhè mẹ nado litaina Ahọlu lọ, Oklunọ awhànpa lẹ tọn, podọ nado nọ payi ohùnwhẹ̀ gòhọtúntún lẹ tọn go.” Sọgbe hẹ Biblu, mẹhe tin to ogbẹ̀ to egbehe lẹpo he gbẹ́ pò to ogbẹ̀ kakajẹ vivọnu titonu ylankan ehe tọn podọ he gbọṣi kẹntọ sinsẹ̀n-bibasi nugbo tọn yinyin mẹ wẹ yè na “yí viva madopodo do sayana.” (2 Tẹsalonikanu lẹ 1:7-9; sọ pọ́n Matiu 25:31-33, 46 ga.) Yé ma na tindo fọnsọnku gba. Eyọnbasi, to whelọnu lo, dọ ‘mẹhe pò lẹ’ gọna hagbẹ akọta he kú jẹnukọnna awhàn Jiwheyẹwhe tọn godo tọn lẹ podọ na mẹhe todido fọnsọnku he sinai do Biblu ji de matin na lẹ. Jesu dopagbe dọmọ: “Ojlẹ lọ ja, to ehe mẹ omẹ he tin to yọ̀do mẹ lẹpo na sè ogbè etọn, bo na tọnjẹgbonu; mẹhe wà dagbe lẹ hlan fọnsọnku ogbẹ̀ tọn; mẹhe wà oylan lẹ hlan fọnsọnku whẹdida tọn.”—Johanu 5:28, 29.
14. (a) Etẹwẹ mẹhe fọnsọnku lẹ dona wà nado duale ogbẹ̀ madopodo tọn? (b) Etẹwẹ na jọ do mẹdepope he gbẹ́ nado klan yedelẹ do wiwe hlan Jehovah bo basi sinsẹ̀n nugbo lọ go?
14 Mẹhe fọnsọnku ehe lẹpo dona wà nude na fọnsọnku yetọn nido sọgan tọ́nkọ do dehe yin ogbẹ̀ tọn bo ma nado yin whẹdida okú tọn. Yé dona wá kọho tẹmpli aigba ji Jehovah tọn ji bo litai to klandowiwe mẹ hlan Jiwheyẹwhe gbọn Jesu Klisti dali. Mẹhe fọnsọnku depope he gbẹ́ nado wà ehe na jiya azọ̀nylankan dopolọ tọn he jẹ akọta egbezangbe tọn lẹ ji. (Zekalia 14:18) Mẹnu wẹ yọ́n sọha mẹhe na fọnsọnku he na yí homẹhunhun do kọnawudopọ po gbẹtọ susugege lọ po to nuhe nọtena Hùnwhẹ Gòhọtúntún tọn lọ bibasi mẹ? Matin ayihaawe, mẹsusu wẹ na tin, podọ taidi kọdetọn de tẹmpli daho gbigbọmẹ Jehovah tọn na lẹzun nuhe na tlẹ tindo gigo hugan!
Nuhe Nọtena Hùnwhẹ Gòhọtúntún Tọn Lọ
15. (a) Etẹwẹ yin ada titengbe delẹ to Hùnwhẹ Gòhọtúntún Islaelivi hohowhenu tọn lẹ mẹ? (b) Naegbọn oyinsu 70 do nọ yin yiyi do sanvọ́ to hùnwhẹ lọ whenu?
15 To owhe dopodopo mẹ, e yin bibiọ to Islaeli hohowhenu tọn si nado basi Hùnwhẹ Gòhọtúntún tọn. E nọ dẹn-to-aimẹ na osẹ dopo bo nọ wá vivọnu to jibẹwawhé yetọn whenu. Ojlẹ pẹdido ayajẹ tọn de wẹ e nọ yin. To osẹ dopo lọ gblamẹ, yé dona nọ azàvà he yè yí amà atín tọn lẹ do ṣinyọ́n glọ, titengbe odéma lẹ. Hùnwhẹ ehe nọ flin Islaelivi lẹ lehe Jiwheyẹwhe whlẹn tọgbó yetọn lẹ sọn Egipti do podọ lehe e penukundo yé go dile yé nọ gòhọtúntún lẹ mẹ to whenuena yé to fuflupe na owhe 40 to zungbo mẹ kakajẹ whenuena yé jẹ Aigba Pagbe tọn lọ ji. (Levitiku 23:39-43) To hùnwhẹ lọ whenu, oyinsu 70 nọ yin yiyi do sanvọ́ to agbà tẹmpli tọn lọ ji. Po kunnudenu po, adà hùnwhẹ ehe tọn yin dọdai azọ́n pipé gbẹwhlẹngán mlẹnmlẹn tọn he yin bibasi gbọn Jesu Klisti dali. Alemọyinu avọ́sinsan ofligọ etọn tọn lẹ na wá sà to godomẹ jẹ madosọha —heyin ovivi whẹndo 70 gbẹtọvi tọn he wá sọn Noa dè.—Gẹnẹsisi 10:1-29; Osọha lẹ 29:12-34; Matiu 20:28.
16, 17. (a) Whetẹnu wẹ nuhe nọtena Hùnwhẹ Gòhọtúntún tọn lọ bẹjẹeji, podọ nawẹ e zindonukọn gbọn? (b) Nawẹ gbẹtọ susugege lọ nọ tindo mahẹ to hùnwhẹ lọ mẹ gbọn?
16 Gbọnmọ dali Hùnwhẹ Gòhọtúntún hohowhenu tọn lọ dlẹnalọdo bẹplidopọ ayajẹnọ ylandonọ he yin fifligọ lẹ tọn wá tẹmpli daho Jehovah tọn tọn mẹ. Hẹndi hùnwhẹ ehe tọn bẹjẹeji to Pẹntikọsti owhe 33 W.M. po bẹjẹeji bẹplidopọ ayajẹnọ Islaelivi gbigbọmẹ tọn lẹ po wá agun Klistiani tọn mẹ. (Owalọ lẹ 2:41, 46, 47) Mẹyiamisisadode ehelẹ yọ́n pinpẹn etọn dọ “waṣinu” wẹ yé yin to aihọn Satani tọn mẹ na ‘tovi-yinyin yetọn tin to olọn mẹ’ wutu. (1 Pita 2:11; Filippinu lẹ 3:20) Hùnwhẹ ayajẹnọ lọ yin yẹṣinyọ́nna na whenu-gli de gbọn atẹṣiṣi he dekọtọn na didoai Mẹylọhodotọklisti tọn wutu. (2 Tẹsalonikanu lẹ 2:1-3) Nalete, hùnwhẹ lọ bẹjẹeji whladopo dogọ to 1919 po bẹplidopọ ayajẹnọ hagbẹ 144 000 Islaeli gbigbọmẹ tọn godo tọn lẹ po, heyin bibọdego gbọn enẹ he yin gbẹtọ susugege akọjọpli tọn lọ heyin Osọhia 7:9 tọn dali.
17 Gbẹtọ susugege lọ yin didohia nado tindo odéma to alọ yetọn lẹ mẹ, ehe dohia dọ yé lọsu yin basitọ ayajẹnọ nuhe nọtena Hùnwhẹ Gòhọtúntún lọ tọn. Taidi Klistiani klandowiwe lẹ, yé nọ yí ayajẹ do nọ tindo mahẹ to azọ́n bibẹ sinsẹ̀n-basitọ susu dogọ lẹ pli do tẹmpli Jehovah tọn mẹ. Yinukọn dogọ, taidi ylandonọ lẹ, yé yọ́n pinpẹn etọn dọ yé ma tindo jlọjẹ fininọ aigba ji tọn tẹgbẹ̀ tọn gba. Yewlẹ, to pọmẹ po mẹhe na fọnsọnku to sọgodo lẹ po, dona to yise tindo to avọ́sinsan ofligọ Klisti tọn mẹ kaka yé nado jẹ pipé-yinyin gbẹtọvi tọn kọ̀n to vivọnu Gandudu Owhe Fọtọ́n Klisti tọn whenu.—Osọhia 20:5.
18. (a) Etẹwẹ na jọ to vivọnu Gandudu Owhe Fọtọ́n Jesu Klisti tọn whenu? (b) Nawẹ sinsẹ̀n-bibasi nugbo Jehovah tọn na gbawhàn to godomẹ gbọn?
18 Enẹgodo, sinsẹ̀n-basitọ Jiwheyẹwhe tọn lẹ to aigba ji na nọte to nukọn etọn to pipé-yinyin gbẹtọvi tọn mẹ matin nuhudo yẹwhenọduta olọn mẹ tọn de. Ojlẹ lọ na ko wá to whenuena Jesu Klisti “na jó ahọludu hlan Jiwheyẹwhe [etọn], yèdọ Otọ́.” (1 Kọlintinu lẹ 15:24) Satani na yin tuntundote ‘na whenu pẹẹde’ nado whle gbẹtọvi he ko yin hinhẹn jẹ pipé lẹ pọ́n. Depope to mẹhe ma yin nugbonọ lẹ mẹ na yin vivasudo kakadoi, to pọmẹ po Satani po gọna aovi etọn lẹ. Mẹhe gbọṣi nugbonọ-yinyin mẹ lẹ na yin nina ogbẹ̀ madopodo. Yé na lẹzun mẹhe na nọ Paladisi aigba ji tọn mẹ tẹgbẹ̀ lẹ. Gbọnmọ dali nuhe nọtena Hùnwhẹ Gòhọtúntún tọn lọ na ko wá tadona gigonọ kọdetọn dagbe tọn de kọ̀n. Sinsẹ̀n-bibasi nugbo na ko gbawhàn hlan gigo madopodo Jehovah tọn po ayajẹ madopodo gbẹtọvi lẹ tọn po.—Osọhia 20:3, 7-10, 14, 15.
[Nudọnamẹ odò tọn lẹ]
a Na zẹẹmẹ wefọ debọdo-dego tọn do Zekalia weta 14 ji, pọ́n owe lọ Le Paradis Rétabli Parmi Les Hommes—grâce à la Théocratie!, he yin zinzinjẹgbonu to 1977 gbọn Watchtower Bible and Tract Society of New York, Inc. dali, weta 21 po 22 po.
b Na nudọnamẹ dogọ do Nẹtinimi egbezangbe tọn ji, pọ́n Atọ̀họ̀-Nuhihọ́ Lọ Tọn, heyin 1er décembre 1992 weda 21.
Kanbiọ Dogbapọn Tọn Lẹ
◻ Nawẹ “Jelusalẹm” tin to mẹgbeyinyan glọ to wẹkẹ-whan tintan whenu gbọn?—Zekalia 14:2.
◻ Etẹwẹ ko jọ do omẹ Jiwheyẹwhe tọn lẹ go sọn 1919 gbọ́n?
◻ Mẹnu lẹ wẹ nọ tindo mahẹ to nuhe nọtena Hùnwhẹ Gòhọtúntún lọ bibasi mẹ to egbehe?
◻ Nawẹ sinsẹ̀n-bibasi nugbo lọ na gbawhàn mlẹnmlẹn gbọn?
[Yẹdide to weda 29]
Odema lẹ yin yiyizan to Hunwhẹ Gohọtúntún lọ tọn bibasi mẹ