NUPINPLỌN 26
Naegbọn Nuylankan lẹ Do Nọ Jọ bọ Mí Sọ Nọ Jiya?
Eyin nuylankan de jọ, yè nọ saba kanse to jọwamọ-liho dọ, “Naegbọn?” kavi “Etẹwutu?” Amọ́, e vivi na mí dọ Biblu basi zẹẹmẹ nuhewutu nulẹ nọ yì gbọnmọ tọn na mí!
1. Nawẹ Satani hẹn nuylankan lẹ biọ aihọn lọ mẹ gbọn?
Satani Lẹgba ṣiatẹ sọta Jiwheyẹwhe. Na Satani jlo na paṣẹ do mẹdevo lẹ ji wutu, e doyẹklọ Adam po Evi po he yin gbẹtọvi tintan lẹ, bọ yé hopódona ẹn to atẹṣiṣi etọn mẹ. Satani wà ehe gbọn lalo de dido na Evi dali. (Jenẹsisi 3:1-5) E hẹn yọnnu lọ nado lẹndọ Jehovah yin kanylantọ bo to nudagbe lẹ tẹ̀ yé. To linlẹn de mẹ, nuhe dọ e te wẹ yindọ gbẹtọvi lẹ na do ayajẹ dogọ eyin yé ma setonuna Jiwheyẹwhe. Satani dolalo tintan lọ to whenue e dọna Evi dọ ewọ ma na kú. Abajọ, Biblu ylọ Satani dọ “lalonọ de . . . podọ otọ́ lalo tọn.”—Johanu 8:44.
2. Etẹwẹ Adam po Evi po de nado wà?
Jehovah tlúalọ hlan Adam po Evi po taun. E dọ dọ yé sọgan dù sinsẹ́n atin he to jipa Edẹni tọn mẹ lẹpo tọn, adavo dopo de tọn. (Jenẹsisi 2:15-17) Etomọṣo, yé gbẹ́ de nado dù sinsẹ́n atin dopo gee enẹ lọ tọn. Evi “yí sọn sinsẹ́n etọn mẹ bo dù.” Enẹgodo, Adam “lọsu dù ga.” (Jenẹsisi 3:6) Yé omẹ awe lẹ vẹtolina Jiwheyẹwhe. Na Adam po Evi po yin mẹpipe wutu, ayilinlẹn nudagbe wiwà tọn kẹdẹ wẹ yé tindo. Enẹwutu, ylando wẹ yé wà to whenue yé desọn ojlo mẹ nado vẹtolina Jiwheyẹwhe bosọ gbẹ́ aṣẹpipa etọn dai. Nudide enẹ hẹn yajiji sinsinyẹn wá yé ji.—Jenẹsisi 3:16-19.
3. Kọdetọn tẹwẹ nudide Adam po Evi po tọn hẹnwa mí ji?
Whenue Adam po Evi po waylando, yé lẹzun mapenọ, bọ gbọnmọ dali kúnkan yetọn lẹpo dugu mape enẹ tọn sọn yé dè. Biblu dọ gando Adam go dọmọ: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè.”—Lomunu lẹ 5:12.
Whẹwhinwhẹ́n susu wutu wẹ mí do nọ jiya. To whedelẹnu, mí nọ jiya na mí basi nudide ylankan lẹ wutu. Mí nọ jiya to whedelẹnu ga na nudide ylankan he mẹdevo lẹ basi wutu. Mí sọ nọ jiya to whedelẹnu na mí tin to fie nuylankan de na jọ te to ogàn he mẹ e jọ te pẹẹ wutu.—Hia Yẹwhehodọtọ 9:11.
DINDONANU DOGỌ
Gbadopọnna nuhewutu mí ma dona dowhẹ Jiwheyẹwhe na nuylankan po yajiji he tin to aihọn lọ mẹ lẹ po to egbehe, gọna lehe e nọ ṣí na Jiwheyẹwhe eyin mí to yaji.
4. Mẹhe mí dona dowhẹ oyà he ji mí te lẹ tọn
Mẹsusu yise dọ Jiwheyẹwhe wẹ to anadena aihọn lọ blebu. Be nugbo wẹ ya? Hò VIDEO lọ.
Hia Jakọbu 1:13 gọna 1 Johanu 5:19, enẹgodo dọhodo kanbiọ ehe ji:
Be Jiwheyẹwhe wẹ nọ hẹn yajiji po nuylankan lẹ po wá ya?
5. Gbadopọnna kọdetọn he gandudu Satani tọn ko hẹnwa lẹ
Hia Jenẹsisi 3:1-6, enẹgodo dọhodo kanbiọ ehelẹ ji:
Ajanmán tẹwẹ satani do?—Pọ́n wefọ 4 po 5 po.
Nawẹ Satani dohia gbọn dọ Jehovah to nudagbe lẹ tẹ̀ gbẹtọvi lẹ?
Sọn pọndohlan Satani tọn mẹ, be e biọ dọ gbẹtọvi lẹ ni kẹalọyi Jehovah taidi Gandutọ yetọn whẹpo do dó ayajẹ ya?
Hia Yẹwhehodọtọ 8:9, enẹgodo dọhodo kanbiọ ehe ji:
Na e ma yin Jehovah wẹ to gandu do aihọn lọ ji wutu, etẹlẹ wẹ to jijọ?
Adam po Evi po yin mẹpipe lẹ bo nọgbẹ̀ to Paladisi mẹ. Amọ́ yé wá dotoaina Satani bo ṣiatẹ sọta Jehovah
To atẹṣiṣi lọ godo, aihọn lọ gọ́ na ylando, yajiji po okú po
Jehovah na doalọtena ylando, yajiji po okú po. Gbẹtọvi lẹ na lẹzun mẹpipe bo nasọ nọgbẹ̀ to Paladisi mẹ whladopo dogọ
6. Jehovah nọ hò mítọn pọ́n eyin mí to yaji
Be Jiwheyẹwhe nọ kiyana mí eyin mí to yaji ya? Gbadopọnna nuhe Ahọlu Davidi po apọsteli Pita po wlan. Hia Salmu lẹ 31:7 gọna 1 Pita 5:7, enẹgodo dọhodo kanbiọ ehe ji:
Numọtolanmẹ tẹwẹ a tindo todin he a yọnẹn dọ Jehovah nọ mọ yajiji mítọn lẹ bosọ nọ vẹawu mí?
7. Jiwheyẹwhe na doalọtena yajiji gbẹtọvi tọn lẹpo pete
Hia Isaia 65:17 gọna Osọhia 21:3, 4, enẹgodo dọhodo kanbiọ ehe ji:
Jehovah dopà dọ emi na de awugble he nujijọ ylankan lẹ ko hẹnwa gbẹtọvi lẹ ji lẹpo sẹ̀ bo vọ́ nulẹ jlado. Naegbọn enẹ do yin homẹmiọnnamẹnu?
Be a yọnẹn ya?
Lalo tintan he Satani do lọ kọnmasin do Jehovah go. Enẹ wẹ yindọ, e hẹn yinkọ dagbe Jehovah tọn gble bọ gbẹtọ lẹ masọ nọ mọ ẹn di Gandutọ dodonọ podọ owanyinọ de ba. Whenue Jehovah na doalọtena yajiji gbẹtọvi lẹ tọn to sọgodo he to yakẹ de, e na klọ masin enẹ lẹpo sẹ̀ nado suwhẹna ede. To linlẹn de mẹ, ewọ na dohia to aliho he họnwun mẹ dọ gandudu emitọn wẹ yin dagbe hugan lọ. Whẹsusuna oyín Jehovah tọn yin whẹho de he yè ma gán yí nukunpẹvi do pọ́n paali to wẹkẹ lọ mẹ.—Matiu 6:9, 10.
MẸDELẸ NỌ DỌ DỌ: “Gbẹtọ ma gán gọ̀n oyà ma ji, agbàn he yin mẹtọn wẹ Mawu nọ do namẹ.”
Etẹwẹ a na gblọn?
BLADOPỌ
Eyin nuylankan lẹ to jijọ to aihọn lọ mẹ, owhẹ̀ Satani Lẹgba po gbẹtọvi awe he yin didá jẹnukọn lọ lẹ po tọn wẹ. Onú mítọn nọ duahunmẹna Jehovah taun eyin mí to yaji, podọ to madẹnmẹ e na vọ́ nulẹpo jlado.
Dogbapọn
Lalo tẹwẹ Satani Lẹgba do na Evi?
Etẹwẹ atẹṣiṣi Adam po Evi po tọn hẹn plá mímẹpo?
Nawẹ mí wagbọn do yọnẹn dọ Jehovah nọ hò mítọn pọ́n eyin mí to yaji?
PỌ́N NUDỌNAMẸ DEVO LẸ
Pọ́n nuhe Biblu dọ gando nuhe ylando zẹẹmẹdo go.
Gbadopọnna nususu dogọ gando whẹho he Satani Lẹgba fọndote to jipa Edẹni tọn mẹ lọ go.
“Naegbọn Jiwheyẹwhe Na Dotẹnmẹ Yajiji?” (Atọ̀họ̀-Nuhihọ́ lọ Tọn, janvier-mars 2014 tọn)
Pọ́n gblọndo homẹmiọnnamẹ tọn kanbiọ he vẹawu taun de tọn lẹ.
“Naegbọn Yè Do Hù Mẹsusu Dopọ Ji? Etẹwutu Jiwheyẹwhe Ma Do Doalọtena Aṣa Enẹ?” (Hosọ Intẹnẹt ji tọn)
Pọ́n nuhe dawe de plọn sọn nujijọ ylankan he e nọ yí nukun etọn do mọ lẹ mẹ.