“Afanumẹ” de Heyin Nugbonọ Bosọ Yin Nuyọnẹntọ
“Mẹnu wẹ afanumẹ nugbonọ, nuyọnẹntọ, mẹhe klunọ etọn do basi ogán whédo etọn tọn?”—MATIU 24:45.
1, 2. Naegbọn e yin dandannu dọ mí ni nọ mọ núdùdù gbigbọmẹ tọn yí to gbesisọmẹ to egbehe?
TO MARDI whèmẹ, azán 11 osun Nisan tọn, to owhe 33 W.M., devi Jesu tọn lẹ fọ́n kanbiọ he tindo zẹẹmẹ he siso na mí de dote. Yé kanse e dọ: “Etẹwẹ na yin ohia [tintin tofi, NW] towe tọn, po opodo aihọn tọn po tọn?” Jesu dọ dọdai vonọtaun de to gblọndo etọn mẹ. E dọho gando ojlẹ hunyanhunyan awhàn tọn, huvẹ, aigba sisọsisọ, po azọ̀n lẹ po go. Podọ enẹ na yin “dòdó nukunbibia tọn” poun. Ninọmẹ lọ na wá ylan humọ. Nukundido he hẹnmẹ jọsi nankọ die!—Matiu 24:3, 7, 8, 15-22; Luku 21:10, 11.
2 Sọn 1914, suhugan adà dọdai Jesu tọn lẹ tọn ko mọ hẹndi yí. Gbẹtọvi lẹ ko to oyà “nukunbibia” tọn ji to aliho he sẹhundaga mẹ. Ṣogan, Klistiani nugbo lẹ ma dona dibu gba. Jesu dopagbe dọ emi na penukundo yé go gbọn núdùdù dojo gbigbọmẹ tọn nina yé dali. To whenuena e yindọ Jesu ko tin to olọn mẹ todin, tito tẹwẹ e basi dai na mí to aigba ji nado nọ mọ núdùdù gbigbọmẹ tọn mítọn yí?
3. Tito tẹlẹ wẹ Jesu ko basi dai na mí nado mọ “núdùdù [yí] to osaa sisọ mẹ”?
3 Jesu lọsu na gblọndo kanbiọ enẹ tọn. To dọdai ayidego tọn etọn mẹ, e kanse dọmọ: “Mẹnu wẹ afanumẹ nugbonọ, nuyọnẹntọ, mẹhe klunọ etọn do basi ogán whédo etọn tọn, nado na núdùdù yetọn yé to osaa sisọ mẹ?” Enẹgodo e dọmọ: “Donanọ wẹ afanumẹ nẹ, whenuena klunọ etọn wá, mẹhe e na mọ to mọ wà. Nugbo wẹ yẹn dọ hlan mì dọ, Ewọ na yí ì do basi ogán nuhe e tindo lẹpo tọn.” (Matiu 24:45-47) Mọwẹ, “afanumẹ” de na tin he ko yin azọ́ndena nado wleawuna núdùdù gbigbọmẹ tọn, yèdọ “afanumẹ” de he na yin nugbonọ bo nasọ yin nuyọnẹntọ. Be omẹ tangan dopo, yèdọ omẹ de jẹ devo godo, kavi onú devo de wẹ afanumẹ enẹ yin ya? To whenuena e yindọ afanumẹ nugbonọ lọ wẹ nọ wleawuna núdùdù gbigbọmẹ tọn, alenu de wẹ e na yin nado dindona gblọndo lọ.
Mẹdopo Kavi Pipli De?
4. Nawẹ mí wagbọn do yọnẹn dọ “afanumẹ nugbonọ, nuyọnẹntọ” lọ ma sọgan yin mẹdopo?
4 “Afanumẹ nugbonọ, nuyọnẹntọ” lọ ma sọgan yin mẹdopo gba. Etẹwutu? Na afanumẹ lọ jẹ awuwlena núdùdù gbigbọmẹ tọn ji sọn owhe kanweko tintan whenu gbọ́n, podọ sọgbe hẹ nuhe Jesu dọ, afanumẹ lọ na pò to mọwà to whenuena Klunọ etọn wá to 1914. Enẹ na zẹẹmẹdo dọ mẹdopo na wà sinsẹ̀nzọn po nugbonọ-yinyin po na nudi owhe 1 900. Mẹtusẹla lọsu ma tlẹ nọgbẹ̀ dẹn sọmọ!—Gẹnẹsisi 5:27.
5. Basi zẹẹmẹ nuhewutu hogbe lọ “afanumẹ nugbonọ, nuyọnẹntọ” ma sọgan yin yiyizan na Klistiani dopodopo.
5 Eyọn, be hogbe lọ “afanumẹ nugbonọ, nuyọnẹntọ” sọgan yin yiyizan na Klistiani dopodopo to paa mẹ wẹ ya? Nugbo wẹ dọ Klistiani lẹpo dona yin nugbonọ bosọ yin nuyọnẹntọ; ṣigba, e họnwun dọ nudevo wẹ Jesu tindo to ayiha mẹ to whenuena e donù “afanumẹ nugbonọ, nuyọnẹntọ” lọ go. Nawẹ mí wagbọn do yọnẹn? Na e dọ dọ to “whenuena klunọ [lọ] wá,” e na yí afanumẹ lọ do basi ogán ‘nuhe e tindo lẹpo tọn’ wutu. Nawẹ Klistiani dopodopo sọgan yin dide do onú lẹpo ji—yèdọ do nutindo Oklunọ tọn “lẹpo” ji gbọn? Ehe ma yọnbasi gba!
6. Nawẹ akọta Islaeli tọn yin awuwlena nado yinuwa taidi “devi” kavi “afanumẹ” Jiwheyẹwhe tọn gbọn?
6 Eyin mọwẹ, tadona dagbe dopo akàn he kọ̀n mí sọgan wá wẹ yindọ Jesu to alọdlẹndo pipli Klistiani lẹ tọn de taidi “afanumẹ nugbonọ, nuyọnẹntọ” lọ. Be e yọnbasi dọ pipli afanumẹ tọn de ni tin ya? Mọwẹ. Owhe 700 whẹpo Klisti do wá aigba ji, Jehovah dlẹnalọdo akọta Islaeli tọn blebu taidi “kunnudetọ ṣie” podọ ‘devi ṣie he yẹn ko de.’ (Isaia 43:10) Sọn owhe 1513 J.W.M., to whenuena Osẹ́n Mose tọn yin nina kakajẹ Pẹntikọsti owhe 33 W.M., hagbẹ akọta Islaeli tọn lẹpo wẹ yin apadewhe pipli devi ehe tọn. Suhugan Islaelivi lẹ tọn ma tindo mahẹ tlọlọ to anadidena whẹho akọta lọ tọn lẹ mẹ kavi to nukunpipedo tito-to-whinnu núdùdù gbigbọmẹ tọn etọn go mẹ gba. Jehovah yí ahọlu lẹ, whẹdatọ lẹ, yẹwhegán lẹ, yẹwhenọ lẹ, po Levinu lẹ po zan nado hẹn azọngban enẹlẹ di. Etomọṣo, taidi akọta de, Islaeli dona ze afọ nupojipetọ-yinyin Jehovah tọn dai bo lá pipà etọn to akọta lẹ ṣẹnṣẹn. Islaelivi dopodopo dona yin kunnudetọ Jehovah tọn.—Deutelonomi 26:19; Isaia 43:21; Malaki 2:7; Lomunu lẹ 3:1, 2.
“Devi” de Yin Gbigbẹdai
7. Naegbọn akọta Islaeli hohowhenu tọn ma pegan nado yin “devi” Jiwheyẹwhe tọn ba?
7 To whenuena e yindọ “devi” Jiwheyẹwhe tọn wẹ Islaeli yin to owhe kanweko susu die wayi, be ewọ wẹ sọ yin afanumẹ he go Jesu dọho gando ya? Lala, na e blawu dọ Islaeli hohowhenu tọn ma gbọṣi nugbonọ-yinyin kavi nuyọnẹntọ-yinyin mẹ gba. Paulu blá ninọmẹ lọ dopọ to whenuena e yihodọ sọn nuhe Jehovah dọna akọta lọ mẹ dọmọ: “Oyín Jiwheyẹwhe tọn zun nùzan do ogo na to Kosi lẹ ṣẹnṣẹn na hiẹ tọn wutu.” (Lomunu lẹ 2:24) Na nugbo tọn, jlẹka atẹṣiṣi Islaeli tọn gọ́ to whenuena e gbẹ́ Jesu dai bọ Jehovah lọsu gbẹ́ yé dai to godo mẹ.—Matiu 21:42, 43.
8. Whetẹnu wẹ “devi” de yin dide nado diọtẹnna Islaeli, podọ ninọmẹ tẹlẹ glọ wẹ ehe jọ te?
8 Nugbomadọ “devi” lọ, yèdọ Islaeli tọn ehe, ma zẹẹmẹdo dọ sinsẹ̀n-basitọ nugbonọ lẹ ma na mọ núdùdù gbigbọmẹ tọn yí gbede ba gba. To azán 50 to fọnsọnku Jesu tọn godo, enẹ wẹ to Pẹntikọsti owhe 33 W.M., gbigbọ wiwe yin kinkọ̀n jẹgbonu do nudi devi 120 etọn lẹ ji to abò aga tọn de mẹ to Jelusalẹm. To ojlẹ enẹ mẹ, akọta yọyọ de yin jiji. Po gbesisọ po, jiji etọn yin lilá to whenuena hagbẹ etọn lẹ yí adọgbigbo do jẹ “ohó azọ́n huhlọnnọ Jiwheyẹwhe tọn” lẹ tọn dọ na tòmẹnu Jelusalẹm tọn lẹ ji. (Owalọ lẹ 2:11) Gbọnmọ dali, akọta yọyọ enẹ, yèdọ akọta gbigbọmẹ tọn de, lẹzun “devi” he na lá gigo Jehovah tọn na akọta lẹ bo wleawuna núdùdù to osaa sisọ mẹ. (1 Pita 2:9) To godo mẹ akọta enẹ wá yin yiylọdọ “Islaeli Jiwheyẹwhe tọn.”—Galatianu lẹ 6:16.
9. (a) Mẹnu lẹ wẹ yin “afanumẹ nugbonọ, nuyọnẹntọ” lọ? (b) Mẹnu lẹ wẹ yin “whédo” lọ?
9 Hagbẹ “Islaeli Jiwheyẹwhe tọn” lẹpo wẹ yin Klistiani he ko klan yede do wiwe, yin bibaptizi bo yin yíyí amisisadode po gbigbọ wiwe po bosọ tindo todido olọn mẹ tọn. Enẹwutu, hogbe lọ “afanumẹ nugbonọ, nuyọnẹntọ” dlẹnalọdo hagbẹ yiamisisadode akọta gbigbọmẹ tọn enẹ tọn lẹpo taidi pipli de to aigba ji to ojlẹ depope mẹ sọn owhe 33 W.M. kakajẹ din, kẹdẹdile Islaelivi he nọgbẹ̀ sọn 1513 J.W.M. kakajẹ Pẹntikọsti 33 W.M. lẹpo yin apadewhe pipli devi lọ tọn to hohowhenu do. Ṣigba, mẹnu wẹ “whédo” he nọ mọ núdùdù gbigbọmẹ tọn yí sọn afanumẹ lọ dè? To owhe kanweko tintan W.M., Klistiani lẹpo wẹ tindo todido olọn mẹ tọn. Enẹwutu, whédo lọ sọ yin Klistiani yiamisisadode lẹ ga, bo nọ yin pinpọnhlan taidi mẹdopodopo, e mayin taidi pipli de gba. Yemẹpo, gọna mẹhe tindo azọngban to agun mẹ lẹ, wẹ tindo nuhudo núdùdù gbigbọmẹ tọn sọn afanumẹ lọ dè.—1 Kọlintinu lẹ 12:12, 19-27; Heblu lẹ 5:11-13; 2 Pita 3:15, 16.
‘Mẹdopodopo Tindo Azọ́ndenamẹ Etọn’
10, 11. Nawẹ mí wagbọn do yọnẹn dọ e mayin hagbẹ pipli afanumẹ lọ tọn lẹpo wẹ tindo azọ́ndenamẹ dopolọ?
10 Dile etlẹ yindọ afanumẹ nugbonọ, nuyọnẹntọ lọ wẹ yin “Islaeli Jiwheyẹwhe tọn” bo tindo azọngban de, hagbẹ etọn dopodopo sọ tindo azọngban etọn titi lẹ ga. Nuhe Jesu dọ to Malku 13:34 mẹ lẹ tá hinhọ́n do ehe ji. E dọmọ: ‘E tin taidi whenuena dawe de jẹ gbejizọnlin ji jei otò dindẹn de mẹ, bo jo owhé etọn dai, bosọ naṣẹ afanumẹ etọn lẹ, bo de azọ́n mẹdopodopo tọn na ẹn, bosọ na osẹ́n alihọ́tọ nado to alihọ́.’ Enẹwutu hagbẹ pipli lọ tọn dopodopo ko mọ azọ́ndenamẹ de yí—nado hẹn nutindo Klisti tọn lẹ jideji to aigba ji. E na hẹn azọngban ehe di sọgbe hẹ nugopipe po dotẹnmẹ hundote etọn lẹ po.—Matiu 25:14, 15.
11 Humọ, apọsteli Pita dọna Klistiani yiamisisadode azán etọn gbè tọn lẹ dọmọ: ‘Le omẹ dopodopo mọ nunina yí do, mọwẹ mì ni nọ basi ode hlan awetọ, di họ̀nkọnsi dagbe to ojọmiọn alọpalọpa Jiwheyẹwhe tọn mẹ.’ (1 Pita 4:10) Enẹwutu, mẹyiamisisadode enẹlẹ tindo azọngban lọ nado yí nunina he Jiwheyẹwhe na yé lẹ do yilizọn na ode awetọ yetọn. Podọ, ohó Pita tọn lẹ dohia dọ e mayin Klistiani lẹpo wẹ na tindo nugopipe, azọngban, kavi lẹblanulọkẹyi dopolọ lẹ gba. Etomọṣo, hagbẹ dopodopo pipli afanumẹ lọ tọn sọgan yidogọna nukọnyiyi akọta gbigbọmẹ tọn enẹ tọn to aliho delẹ mẹ. Gbọnna?
12. Nawẹ hagbẹ dopodopo pipli afanumẹ lọ tọn, vlavo e yin sunnu kavi yọnnu, nọ yidogọna nukọnyiyi afanumẹ lọ tọn gbọn?
12 Jẹnukọn whẹ́, dopodopo yetọn dona yin kunnudetọ Jehovah tọn, he nọ dọyẹwheho wẹndagbe Ahọluduta lọ tọn. (Isaia 43:10-12; Matiu 24:14) Ojlẹ vude whẹpo e do hẹji yì olọn mẹ, Jesu degbena devi nugbonọ etọn lẹpo, sunnu po yọnnu po, nado yin mẹplọntọ. E dọmọ: ‘Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po gbigbọ wiwe tọn po mẹ: na mì nisọ nọ plọn yé nado nọ doayi onú lẹpo go, nudepope he yẹn degbena mì: bo pọ́n, yẹn tin to mì dè to whepoponu, kakajẹ opodo aihọn tọn.’—Matiu 28:19, 20.
13. Lẹblanulọkẹyi tẹwẹ mẹyiamisisadode lẹpo nọ duvivi etọn?
13 To whenuena mẹyọyọ lẹ yin hinhẹnzun devi, yé dona yin pinplọn po sọwhiwhe po nado nọ doayi nuhe Klisti ko degbena devi etọn lẹpo go. To nukọn mẹ, mẹyọyọ ehelẹ pegan nado plọn mẹdevo lẹ. Núdùdù dojo gbigbọmẹ tọn yin hinhẹn tin-to-aimẹ na hagbẹ sọgodo afanumẹ lọ tọn lẹ to akọta susu mẹ. Klistiani yiamisisadode lẹpo, yèdọ sunnu po yọnnu po wẹ tindo mahẹ to gbedide lọ nado hẹn gbẹtọ lẹ zun devi lẹ hinhẹndi mẹ. (Owalọ lẹ 2:17, 18) Azọ́n ehe dona zindonukọn sọn whenue afanumẹ lọ bẹ azọ́n etọn jẹeji gbọ́n kakajẹ opodo titonu ehe tọn.
14. Mẹnu lẹ kẹdẹ wẹ tindo lẹblanulọkẹyi lọ nado plọnmẹ to agun mẹ, podọ etẹwẹ yin numọtolanmẹ yọnnu nugbonọ heyin mẹyiamisisadode lẹ tọn gando enẹ go?
14 Mẹhe ṣẹṣẹ yin bibaptizi heyin mẹyiamisisadode lẹ lẹzun apadewhe afanumẹ lọ tọn, podọ mahopọnna mẹhe plọnnu yé jẹnukọn, yé sọ nọ mọ nuplọnmẹ yí sọn hagbẹ agun lọ tọn he jẹ nubiọtomẹsi Owe-wiwe tọn lẹ kọ̀n bo to devizọnwa taidi mẹho agun tọn lẹ si. (1 Timoti 3:1-7; Titu 1:6-9) Gbọnmọ dali, dotẹnmẹ lọ hundote na mẹho dide ehelẹ nado yidogọna nukọnyiyi akọta lọ tọn to aliho vonọtaun de mẹ. Yọnnu Klistiani nugbonọ heyin mẹyiamisisadode lẹ ma gblehomẹ dọ sunnu Klistiani lẹ kẹdẹ wẹ yin dide nado nọ plọnmẹ to agun mẹ gba. (1 Kọlintinu lẹ 14:34, 35) Kakatimọ, homẹ yetọn hùn nado mọaleyi sọn azọ́n sinsinyẹn hagbẹ sunnu agun lọ tọn lẹ tọn mẹ bọ yé sọ yọ́n pinpẹn lẹblanulọkẹyi he yọnnu lẹ tindo lẹ tọn, he bẹ owẹ̀n ayajẹ tọn lilá na mẹdevo lẹ hẹn. To egbehe, mẹmẹyọnnu zohunhunnọ heyin mẹyiamisisadode lẹ nọ do gbigbọ whiwhẹ tọn dopolọ hia, vlavo mẹho dide lẹ yin mẹyiamisisadode lẹ kavi lala.
15. Etẹwẹ yin asisa tangan dopo núdùdù gbigbọmẹ tọn lẹ tọn to owhe kanweko tintan mẹ, podọ mẹnu lẹ wẹ yin nukọntọ to awuwiwlena ẹn mẹ?
15 Wekanhlanmẹ apọsteli lẹ tọn po devi devo heyin nukọntọ lẹ tọn po wẹ yin asisa tangan núdùdù gbigbọmẹ tọn to owhe kanweko tintan mẹ. Wekanhlanmẹ ehelẹ—titengbe dehe yin mimọ to owe gbọdo 27 he Owe-wiwe Glẹki tọn bẹhẹn lẹ mẹ—yin didohlan agun lẹ mẹ podọ ayihaawe matin dọ owe ehelẹ ji wẹ mẹho agun tọn lẹ ze nuplọnmẹ yetọn sinai do. Gbọnmọ dali, afọzedaitọ afanumẹ lọ tọn lẹ yí nugbonọ-yinyin do na núdùdù dojo gbigbọmẹ tọn Klistiani ahundoponọ lẹ. Pipli afanumẹ lọ tọn to owhe kanweko tintan mẹ yin nugbonọ to azọngban heyin nina ẹn lọ mẹ.
“Afanumẹ” lọ to Owhe 1 900 Godo
16, 17. Nawẹ pipli afanumẹ lọ tọn do ede hia nado yin nugbonọ to azọ́ndenamẹ etọn hinhẹndi mẹ sọn whenẹnu kakajẹ 1914 gbọn?
16 To egbehe lo? To whenuena tintin tofi Jesu tọn bẹjẹeji to 1914, be e mọ pipli Klistiani yiamisisadode lẹ tọn he yí nugbonọ-yinyin do to núdùdù má to osaa sisọ mẹ ya? Mọwẹ. Pipli ehe sọgan yin yinyọnẹn hezeheze na sinsẹ́n dagbe he e to didetọ́n lẹ wutu. (Matiu 7:20) Kandai whenuho tọn ko do ehe hia nado yin nugbo.
17 To whenuena Jesu wá, nudi mẹyiamisisadode 5 000 wẹ hẹn alọnu ján to nugbo Biblu tọn hinhẹn gbayipe mẹ. Azọ́nwatọ lẹ whè, ṣigba afanumẹ lọ yí aliho yọyọ voovo zan nado hẹn wẹndagbe lọ gbayipe. (Matiu 9:38) Di apajlẹ, tito lẹ yin bibasi na hodidọ do hosọ Biblu tọn lẹ ji nado yin zinzinjẹgbonu to nudi linlinwe 2 000 mẹ. To aliho ehe mẹ, nugbo Ohó Jiwheyẹwhe tọn jẹ omẹ fọtọ́n ao susu dè to ojlẹ dopolọ mẹ. Humọ, tito-to-whinnu ganhiho ṣinatọ̀n tọn de he bẹ yẹdide adógo tọn sinmẹnọ lẹ po yẹdide devo lẹ po hẹn yin awuwlena. Taidi kọdetọn nuzedonukọnnamẹ yọyọ ehe tọn, owẹ̀n Biblu tọn, sọn bẹjẹeji Nudida tọn kakajẹ vivọnu Owhe Fọtọ́n Gandudu Klisti tọn, yin didọna mẹplidopọ he hugan livi ṣinẹnẹ to ageklo atọ̀n ji. Aliho devo heyin yiyizan wẹ owe zinjẹgbonu lẹ. Di apajlẹ, to 1914, nudi vọkan 50 000 linlinnamẹwe Atọ̀họ̀-Nuhihọ́ Lọ Tọn wẹ yin zinzinjẹgbonu.
18. Whetẹnu wẹ Jesu yí afanumẹ lọ do basi ogán nuhe e tindo lẹpo tọn, podọ etẹwutu wẹ?
18 Mọwẹ, to whenuena Klunọ lọ wá, e mọ afanumẹ nugbonọ etọn to núdùdù na whédo lọ po ahundopo po bosọ to yẹwheho wẹndagbe lọ tọn dọ. Todin, azọngban daho lẹ tin to sẹdotẹnmẹ na afanumẹ enẹ. Jesu dọmọ: “Nugbo wẹ yẹn dọ hlan mì dọ, Ewọ na yí ì do basi ogán nuhe e tindo lẹpo tọn.” (Matiu 24:47) Jesu wà ehe to 1919, to whenuena afanumẹ lọ ko jugbọn ojlẹ mẹtẹnpọn tọn de mẹ godo. Ṣigba, naegbọn “afanumẹ nugbonọ, nuyọnẹntọ” lọ mọ azọngban daho lẹ yí? Na nutindo Klunọ lọ tọn lẹ ko jideji wutu. Jesu mọ huhlọn ahọluduta tọn yí to 1914.
19. Basi zẹẹmẹ lehe nuhudo gbigbọmẹ tọn “gbẹtọ susugege” lọ tọn lẹ ko yin nukunpedego do.
19 Nutindo tẹlẹ ji wẹ Klunọ he ṣẹṣẹ hẹ́ gánzinpo ji lọ de afanumẹ nugbonọ etọn do? Do onú gbigbọmẹ tọn heyin Etọn to aigba ji lẹpo ji wẹ. Di apajlẹ, owhe 20 to gánzinpo ji hihẹ́ Klisti tọn to 1914 godo, “gbẹtọ susugege” “lẹngbọ devo” lẹ tọn yin yinyọnẹn. (Osọhia 7:9; Johanu 10:16) Omẹ ehelẹ mayin hagbẹ yiamisisadode “Islaeli Jiwheyẹwhe tọn” gba, ṣigba yé yin sunnu po yọnnu ahundoponọ lẹ po he tindo todido aigba ji tọn bo yiwanna Jehovah bosọ jlo nado sẹ̀n ẹn dile mẹyiamisisadode lẹ nọ wà do. Na taun tọn, yé dọna “afanumẹ nugbonọ, nuyọnẹntọ” lọ dọmọ: “Míwlẹ na yì hẹ mì, na mí ko sè dọ Jiwheyẹwhe tin to mì dè.” (Zekalia 8:23) Klistiani he ṣẹṣẹ yí baptẹm ehelẹ nọ dù núdùdù dojo gbigbọmẹ tọn dopolọ hẹ mẹyiamisisadode lẹ, podọ hagbẹ awe lọ lẹpo ko to núdùdù gbigbọmẹ tọn ehe dù dopọ sọn whenẹnu gbọ́n. Dona nankọtọn die ehe ko yin na “gbẹtọ susugege” lẹ!
20. Azọngban tẹwẹ “gbẹtọ susugege” lọ ko hẹndi to nutindo Oklunọ lọ tọn lẹ hinhẹn jideji mẹ?
20 “Gbẹtọ susugege” lọ yí homẹhun do kọnawudopọ hẹ pipli afanumẹ yiamisisadode lọ tọn taidi yẹwhehodọtọ wẹndagbe lọ tọn lẹ. Dile yé to yẹwhehodọ, nutindo Klunọ lọ tọn lẹ to aigba ji nọ jideji, bo nọ yidogọna azọngban “afanumẹ nugbonọ, nuyọnẹntọ” lọ tọn. Dile sọha nugbo dintọ lẹ tọn to jijideji, e lẹzun dandan nado hẹn azọ́nwatẹn wezinzin tọn lẹ gbloada dogọ nado sọgan wleawuna owe sinai do Biblu ji he jẹ lẹ. Wekantẹn alahọ Kunnudetọ Jehovah tọn lẹ tọn ko yin didoai to otò susu mẹ. Mẹdehlan lẹ ko yin didohlan “jẹ opodo aigba tọn.” (Owalọ lẹ 1:8) Sọn nudi mẹyiamisisadode fọtọ́n donu atọ́n poun he tin to 1914, sọha gigopana Jiwheyẹwhe tọ́ lẹ tọn ko jideji jẹ nuhe hugan livi ṣidopo todin, bọ suhugan yetọn yin hagbẹ “gbẹtọ susugege” lọ tọn. Mọwẹ, nutindo Ahọlu lọ tọn lẹ ko jideji do donù susu ji sọn whenue e hẹ́ gánzinpo ji to 1914!
21. Oló awe tẹlẹ wẹ mí na gbadopọnna to hosọ he bọdego mẹ?
21 Ehe lẹpo dohia dọ afanumẹ lọ ko yin “nugbonọ [podọ] nuyọnẹntọ.” To hodidọ gando “afanumẹ nugbonọ, nuyọnẹntọ” lọ go tlolo godo, Jesu dó oló awe he zinnudo jẹhẹnu enẹlẹ ji: yèdọ oló awhli nuyọnẹntọ po nulunọ lẹ po tọn gọna oló talẹnti tọn. (Matiu 25:1-30) Ojlofọndotenamẹnu nankọ die! Zẹẹmẹ tẹwẹ oló enẹlẹ tindo na mí to egbehe? Mí na gbadopọnna kanbiọ ehe to hosọ he bọdego mẹ.
Etẹwẹ Hiẹ Lẹn?
• Mẹnu wẹ yin “afanumẹ nugbonọ, nuyọnẹntọ” lọ?
• Mẹnu lẹ wẹ yin “whédo” lọ?
• Whetẹnu wẹ afanumẹ nugbonọ lọ yin dide do nutindo Oklunọ tọn lẹpo ji, podọ naegbọn e do yin to ojlẹ enẹ mẹ?
• Mẹnu lẹ wẹ ko gọalọ to nutindo Oklunọ tọn lẹ hinhẹn jideji to owhe agọe tọn lẹ mẹ, podọ gbọnna?
[Yẹdide to weda 10]
Pipli afanumẹ owhe kanweko tintan tọn hẹn azọ́ndenamẹ etọn di po nugbonọ-yinyin po