Kanbiọ lẹ sọn Wehiatọ lẹ Dè

Jesu dọna todoaitọ etọn lẹ dọmọ: “Mì dona yin pipé, kẹdẹdile Otọ́ mìtọn olọn tọn yin pipé do.” Nawẹ gbẹtọvi lẹ sọgan “yin pipé” to egbehe gbọn?—Mat. 5:48.

Nado mọ gblọndo na kanbiọ ehe, mí dona mọnukunnujẹ lehe hogbe lọ lẹ “pipé” po “pipé-yinyin” po nọ yin yiyizan do to Biblu mẹ. E ma yin nuhe Biblu ylọdọ “pipé” lẹpo wẹ nọ yinmọ to gigọ́ mẹ. Na nugbo tọn, Jehovah wẹ yin pipé mlẹnmlẹn. Gbẹtọ kavi nude sọgan yin pipé kiki jẹ obá de mẹ. Hogbe Heblugbe po Glẹkigbe tọn po he yin lilẹdo “pipé” nọ saba zẹẹmẹdo “blebu,” “whèwhín,” kavi “madoblọ” sọgbe hẹ nujinọtedo he aṣẹpipa de zedai. To hodidọ paa mẹ, hogbe lọ nọ saba yin yiyizan to linlẹn he tindo dogbó de mẹ.

Adam po Evi po yin didá to pipé mẹ to walọyizan-liho, to gbigbọ-liho podọ to agbasa-liho. Yé yin pipé sọgbe hẹ nujinọtedo he Mẹdatọ yetọn zedai. Na tolivivẹ yetọn wutu, yé ma jẹ nujinọtedo ehelẹ kọ̀n bo gbọnmọ dali hẹn pipé-yinyin yetọn po kúnkan yetọn lẹ tọn po bu. Enẹwutu, gbọn Adam gblamẹ ylando, mape po okú po dlẹnkan jẹ gbẹtọvi lẹ ji.—Lom. 5:12.

Ṣigba, dile Jesu dohia hezeheze to Yẹwhehodidọ Osò ji tọn lọ mẹ do, gbẹtọvi mapenọ lẹ sọgan yin pipé jẹ obá de mẹ. To hodidọ enẹ mẹ, e ze nujinọtedo lẹ dai gando owanyi pipé go. Ehe wẹ owanyi he taidi dehe Jiwheyẹwhe dohia gbẹtọvi lẹ nkọ. Jesu dọmọ: “Mì zindonukọn nado nọ yiwanna kẹntọ mìtọn lẹ bo nọ hodẹ̀ na mẹhe to homẹkẹndo mì lẹ; na mì nido do mìde hia taidi visunnu Otọ́ mìtọn he tin to olọn mẹ lọ tọn lẹ, na e nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji.” (Mat. 5:44, 45) Eyin devi Jesu tọn lẹ do owanyi hia jẹ obá ehe mẹ, yé na hodo apajlẹ pipé Jiwheyẹwhe tọn.

Lẹdo aihọn pé to egbehe, Kunnudetọ Jehovah tọn lẹ nọ dovivẹnu nado hẹn nujinọtedo yiaga owanyi didohia mẹdevo lẹ tọn enẹ go. Yé jlo na gọalọna gbẹtọ he wá sọn ninọmẹ, akọ̀, po sinsẹ̀n voovo po mẹ lẹpo nado wá oyọnẹn Biblu tọn he pegan lọ kọ̀n. To alọnu din, Kunnudetọ lẹ to anadena plọnmẹ Biblu 7 000 000 linlán hẹ jlodotọ lẹ to otò 236 mẹ.

Jesu kanse dọmọ: “Eyin mì nọ yiwanna mẹhe yiwanna mì lẹ, ale tẹwẹ mì tindo? Be tòkuẹ-ṣinyantọ lẹ ma nọ wà onú dopolọ ga? Podọ eyin mì nọ dọnudo mẹmẹsunnu mìtọn lẹ kẹdẹ, onú vonọtaun tẹwẹ mì to wiwà? Be omẹ akọta lẹ tọn ma nọ wà onú dopolọ ga?” (Mat. 5:46, 47) Klistiani nugbo lẹ ma nọ homẹnukuntapọn na nuhe dù wésise kavi akọ̀ tangan de; mọjanwẹ owanyi yetọn ma nọ nọte do mẹhe sọgan wà nudopolọ na yé lẹ kẹdẹ ji do niyẹn. Kakatimọ, yé nọ gọalọna wamọnọ po awutunọ lẹ po, jọja po mẹho po. To aliho ehe mẹ, Klistiani lẹ sọgan hodo apajlẹ owanyi tọn Jehovah tọn bo gbọnmọ dali yin pipé jẹ obá de mẹ.

Be mí nasọ wá duvivi pipé-yinyin he Adam hẹnbu lọ tọn pọ́n gbede ya? Mọwẹ, gbọn yise didohia to avọ́sinsan Jesu tọn mẹ dali, gbẹtọvi tonusetọ lẹ na jẹ pipé kọ̀n mlẹnmlẹn to Gandudu Owhe Fọtọ́n Klisti tọn whenu, to whenue ‘Visunnu Jiwheyẹwhe tọn na gbà azọ́n Lẹgba tọn lẹ.’—1 Joh. 3:8.