Kanbiọ lẹ sọn Wehiatọ lẹ Dè

To whenuena apọsteli Johanu wlan dọ “owanyi pipé nọ yàn obu jẹgbonu,” etẹwẹ e to alọdlẹndo taidi “owanyi pipé,” podọ obu nankọtọn wẹ nọ yin yinyan jẹgbonu?

“Obu ma tin to owanyi mẹ gba,” wẹ apọsteli Johanu wlan, “ṣigba owanyi pipé nọ yàn obu jẹgbonu, na obu nọ hẹnalọdotenamẹ. Na nugbo tọn, ewọ he to budi ma ko yin hinhẹn zun pipé to owanyi mẹ gba.”—1 Johanu 4:18, NW.

Lẹdo hodidọ lọ tọn dohia dọ Johanu to hodọ gando awuvivo hodidọ tọn go—yèdọ kanṣiṣa he tin to owanyi tintindo na Jiwheyẹwhe po awuvivo hodidọ tọn tintindo to nukọn Etọn po ṣẹnṣẹn. Nuhe mí hia to wefọ 17 mẹ do ehe hia dọmọ: ‘Ehe mẹ wẹ yè hẹn owanyi mítọn zun pipé te, na mí nido tindo awuvivo hodidọ tọn to azán whẹdida tọn gbè.’ Obá he mẹ Klistiani de yiwanna Jiwheyẹwhe bo nọ mọ owanyi he Jiwheyẹwhe tindo na ẹn jẹ nọ yinuwa do awuvivo hodidọ tọn etọn ji tlọlọ—kavi do awugbopo nado tindo awuvivo mọnkọtọn ji—to whenuena e to dindọnsẹpọ Jiwheyẹwhe to odẹ̀ mẹ.

Hodidọ lọ “owanyi pipé” tindo zẹẹmẹ susu. Dile hogbe lọ “pipé” yin yiyizan to Biblu mẹ do, e ma nọ zẹẹmẹdo pipé-yinyin mlẹnmlẹn, kavi jẹ obá godo tọn mẹ to whepoponu gba, ṣigba e nọ saba yin to linlẹn he tindo dogbó de mẹ. Di apajlẹ, Jesu dọ to Yẹwhehodidọ Osó ji tọn etọn mẹ dọmọ: “Enẹwutu mìwlẹ ni yin mẹpipe, dile Otọ́ mìtọn he tin to olọn mẹ yin mẹpipe do.” Jesu to didọna hodotọ etọn lẹ dọ eyin yé nọ yiwanna mẹhe yiwanna yé lẹ kẹdẹ, owanyi yetọn na yin agbòte, na tindo oblọ bo ma na sọgbe. Yé dona hẹn owanyi yetọn zun pipé, kavi hẹn ẹn gbloada gbọn dido e hia mẹhe tlẹ yin kẹntọ yetọn lẹ dali. Mọdopolọ, to whenuena Johanu wlanwe dogbọn “owanyi pipé” dali, e to alọdlẹndo owanyi tintindo na Jiwheyẹwhe po ahun lẹpo po he yin awuwlena to gigọ́mẹ, bosọ bẹ adà gbẹzan tọn lẹpo hẹn.—Matiu 5:46-48; 19:20, 21.

To whenuena Klistiani de to dindọnsẹpọ Jehovah to odẹ̀ mẹ, e nọ yọnẹn ganji dọ emi yin ylandonọ podọ mapenọ. Etomọṣo, eyin e ko wleawuna owanyi na Jiwheyẹwhe bo nọ mọ owanyi Jiwheyẹwhe tọn to gigọ́mẹ, obu whẹgbledomẹ kavi mẹgbẹdai tọn ma na glọnalina ẹn gba. Kakatimọ, e nọ duvivi awuvivo hodidọ tọn nado dọ nuhe tin to ahun etọn mẹ tọ́n bo biọ jona to dodonu avọ́sinsan ofligọ tọn he Jiwheyẹwhe ko yí owanyi do wleawuna gbọn Jesu Klisti gblamẹ ji. E nọ deji dọ Jiwheyẹwhe na sè obiọ vivẹvivẹ emitọn lẹ bo na gblọndo.

Nawẹ mẹde sọgan yin “hinhẹn zun pipé to owanyi mẹ” bo gbọnmọ dali “yàn” obu whẹgbledomẹ kavi mẹgbẹdai tọn jẹgbonu gbọn? “Mẹdepope he yìn ohó etọn [Jiwheyẹwhe tọn], e go wẹ owanyi Jiwheyẹwhe tọn sọgbe [kavi yin hinhẹn zun pipé] te nugbonugbo,” wẹ apọsteli Johanu dọ. (1 Johanu 2:5) Saa lẹnnupọndo ehe ji: Eyin Jiwheyẹwhe yiwanna mí to whenuena mí gbẹ́ to ylandonọ yin, be e ma nasọ yiwanna mí humọ eyin mí lẹnvọjọ nugbonugbo bo yí sọwhiwhe do “yìn ohó etọn” ya? (Lomunu lẹ 5:8; 1 Johanu 4:10) Na nugbo tọn, dile e na dẹnsọ bọ mí na gbẹ́ pò to nugbonọ yin, mí sọgan tindo jidide dopolọ he apọsteli Paulu tindo to whenuena e dọ gando Jiwheyẹwhe go dọmọ: “Ewọ he ma hla Ovi etọn titi do ogbẹ̀, ṣigba bo jo e na mímẹpo wutu, na e ma na na onú popo mí vọnu hẹ ẹ ga do?”—Lomunu lẹ 8:32.