Odẹ̀

7 Be Jiwheyẹwhe Nọ Sè Bosọ Nọ Na Gblọndo Ya?

KANBIỌ ehe fọnjlodotenamẹ taun bosọ fọ́n kanbiọ susu devo lẹ dote. Biblu dohia nugbonugbo dọ Jehovah nọ dotoaina odẹ̀ lẹ to egbehe. Amọ́, eyin ewọ na sè odẹ̀ mítọn lẹ kavi lala, mílọsu lẹ dona yí adà susu wà.

Jesu de sinsẹ̀ngán azán etọn gbè tọn he nọ wayẹnu to whenue yé to dẹ̀ho lẹ gbà; nuhe nọ duahunmẹna yé hugan wẹ nado nọ jla yede di dodonọ. E dọ dọ sunnu enẹlẹ na mọ “ale yetọn yí to gigọ́ mẹ,” ehe zẹẹmẹdo dọ yé na mọ nuhe dín yé te hugan lọ yí, yèdọ ayidonugo gbẹtọ lẹ tọn kẹdẹ, ṣigba bo na ba nuhe sin hudo yé do lọ pò, enẹ wẹ yindọ Jiwheyẹwhe ma na dotoaina yé. (Matiu 6:5) Mọdopolọ to egbehe, mẹsusu nọ hodẹ̀ sọgbe hẹ ojlo yedetiti tọn kakati ni yin sọgbe hẹ Jiwheyẹwhe tọn. Na yé nọ dovọ́na nunọwhinnusẹ́n Biblu tọn he ji mí dọhodo wayi lẹ wutu, Jiwheyẹwhe ma nọ dotoaina yé.

Bọ hiẹ lo? Be Jiwheyẹwhe na dotoaina odẹ̀ towe lẹ bosọ na gblọndo yetọn ya? Ewọ ma nọ pọ́n do sinmẹ agbasa mẹtọn tọn, otò he mẹ yè wá sọn kavi ninọmẹ mẹtọn go do na gblọndo na odẹ̀ lẹ. Biblu na mí jide dọ: “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.” (Owalọ lẹ 10:34, 35) Be a nọ yinuwa sọgbe hẹ hogbe enẹlẹ ya? Eyin a nọ dibusi Jiwheyẹwhe, e dohia dọ a nọ na ẹn sisi sisosiso bo ma nọ jlo gbede nado hẹn homẹgble e. Podọ, eyin a nọ wà dodo, e dohia dọ a nọ dovivẹnu nado wà nuhe sọgbe to nukun Jiwheyẹwhe tọn mẹ lẹ, kakati nado wà ojlo towe titi kavi gbẹtọ hatọ towe lẹ tọn. Be a jlo nugbo dọ Jiwheyẹwhe ni nọ sè odẹ̀ towe lẹ ya? Biblu do lehe enẹ sọgan pà we do hia.a

Na nugbo tọn, mẹsusu wẹ nọ jlo dọ Jiwheyẹwhe ni na gblọndo na odẹ̀ yetọn lẹ gbọn azọ́njiawu gblamẹ. Ṣigba, etlẹ yin to ojlẹ he mẹ Biblu yin kinkan te lẹ, Jiwheyẹwhe ma nọ wà azọ́njiawu mọnkọ lẹ gbọzangbọzan. Sọgbe hẹ Owe-wiwe lẹ, eyin azọ́njiawu de wá aimẹ, owhe kanweko susu lẹ sọgan juwayi to whedelẹnu whẹpo devo nido jọ. Humọ, Biblu dohia dọ azọ́njiawu lẹ wiwà doalọte to ojlẹ apọsteli lẹ tọn godo. (1 Kọlintinu lẹ 13:8-10) Be e zẹẹmẹdo dọ Jiwheyẹwhe masọ nọ na gblọndo na odẹ̀ lẹ to egbehe ba wẹ ya? Paali! Pọ́n odẹ̀ delẹ he e nọ na gblọndo na.

Jiwheyẹwhe nọ namẹ nuyọnẹn. Jehovah wẹ Asisa nuyọnẹn nugbo tọn dopo gee he tin lọ. E sọ nọ yí alọtútlú do namẹ nuyọnẹn susugege, podọ e nọ má ẹn vọnu hẹ mẹhe to anademẹ etọn dín bo jlo na yí i do yizan mẹ to gbẹzan yetọn mẹ lẹ.—Jakọbu 1:5.

Jiwheyẹwhe nọ namẹ gbigbọ wiwe etọn po ale he nọ zọnpọ hẹ ẹ lẹpo po. Huhlọn he Jiwheyẹwhe nọ yí do wazọ́n wẹ gbigbọ wiwe yin. Huhlọn devo ma sinyẹn sọ huhlọn ehe. E sọgan gọalọna mí nado doakọnna whlepọn lẹ. E gán na mí jijọho ahun mẹ tọn to whenue mí to lẹnpọn mẹ. E sọgan gọalọna mí nado wleawuna jẹhẹnu dagbedagbe devo he nọ dọnmẹ lẹ. (Galatianu lẹ 5:22, 23) Jesu hẹn hodotọ etọn lẹ deji dọ Jiwheyẹwhe nọ yí alọtútlú do namẹ nunina ehe.—Luku 11:13.

Jiwheyẹwhe nọ na oyọnẹn mẹhe nọ dín ewọ vẹkuvẹku lẹ. (Owalọ lẹ 17:26, 27) Lẹdo aihọn pé, gbẹtọ susu wẹ yí ahundopo do to nugbo lọ dín. Yé nọ jlo na plọnnu gando Jiwheyẹwhe go—enẹ wẹ oyín etọn, nuhewutu e do dá aigba po gbẹtọvi lẹ po gọna lehe yè gán dọnsẹpọ ewọ do. (Jakọbu 4:8) Kunnudetọ Jehovah tọn lẹ nọ saba dukosọna omẹ mọnkọ lẹ, bosọ nọ yí homẹhunhun do dó gblọndo he Biblu na na kanbiọ enẹlẹ hia yé.

Be enẹwutu wẹ a do yí linlinwe ehe ya? Be a to dindin na yọ́n Jiwheyẹwhe wẹ ya? Vlavo ehe wẹ gblọndo etọn na odẹ̀ towe.

[Nudọnamẹ tangan lẹ]