Matiu 6:34—“Mì Hanú Na Osọ He Ja Blo”

“Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.”—Matiu 6:34, Lẹdogbedevomẹ Aihọn Yọyọ Tọn.

“Mì hanú na osọ he ja blo, do osọ lọsu ko yọ́n onú he e na hẹnwa. Mì penukundo egbehe go bo jo osọ he ja do.”—Matiu 6:34, Alẹnu Yọyọ Do Gungbe Mẹ.

Zẹẹmẹ Matiu 6:34 Tọn

Jesu, yèdọ mẹhe yí hogbe ehelẹ zan hẹn hosetọ etọn lẹ deji dọ yé ma dona nọ hànu zẹjlẹgo kavi tindo magbọjẹ he ma yin dandan tọn lẹ gando nuhahun sọgodo tọn lẹ go. Kakatimọ, e na wà dagbe na yé eyin yé nọ dọ nuhahun azán dopodopo tọn.

Jesu ma to didọ dọ mí ni ma lẹnnupọn gando osọ he ja go kavi dọ mí ni ma basi tito lẹ hlan sọgodo blo. (Howhinwhẹn lẹ 21:5) Kakatimọ, e to alọgọna mí ma nado nọ hànu kavi do magbọjẹ na míde zẹjlẹgo gando nuhe gán wá jọ to osọ lẹ go. Magbọjẹ didona míde to aliho enẹ mẹ gán hò ayajẹ mítọn yí bọ mí ma na penugo nado wà azọ́n he mí dona wà lẹ. Mí ma gán didẹ nuhahun sọgodo tọn lẹ eyin mí nọ hanú gando yé go to egbé. Podọ nuhe go mí nọ hanú gando lẹ ma nọ saba jọ kavi wá ylan dile mí lẹn do.

Nujijọ He Lẹdo Matiu 6:34 Lẹ

Hogbe Jesu tọn ehelẹ yin apadewhe Yẹwhehodidọ Osó ji tọn etọn he diyin hugan lọ tọn, ehe to Matiu weta 5-7 mẹ. To yẹwhehodidọ Jesu tọn mẹ, e basi zẹẹmẹ dọ eyin mí nọ to nuhà na nuhe ma yin dandan tọn lẹ, enẹ ma sọgan hẹn gbẹzan mítọn pọnte kavi yidogọna tedidi gbẹzan mítọn tọn. (Matiu 6:27) E sọ dọ dọ eyin mí nọ ze Jiwheyẹwhe do otẹn tintan mẹ to gbẹzan mítọn mẹ, e ma yin dandan dọ mí ni nọ to nuhà zẹjlẹgo gando osọ go. Eyin Jiwheyẹwhe nọ penukundo atin lẹ po kanlin lẹ po go, nẹmunẹmu wẹ e ma na penukundo mẹhe to sinsẹ̀n ẹn lẹ go.—Matiu 6:25, 26, 28-33.