Mẹnu lẹ Wẹ to Hinhọ́n Aihọn Tọn Hodo?
‘Mì to hinhọ́nwun di hinhọ́n to aihọn mẹ.’—FILIPPINU LE 2:15.
1. Etẹwẹ Biblu dọ dogbọn hinhọ́n sinsẹ̀n yẹdoklọmẹ tọn lẹ dali?
BIBLU do Jesu hia hezeheze taidi “hinhọ́n daho” de, yèdọ “hihọ́n aihọn tọn.” (Isaia 9:2; Johanu 8:12) Ṣogan, kiki omẹ vude poun wẹ hodo e to whenuena e tin to aigba ji. Omẹ suhugan basi dide nado hodo hinhọ́n yẹdoklọmẹ tọn lẹ, he na taun tọn yin, zinvlù hẹntọ́ lẹ. Ohó Jiwheyẹwhe tọn dọ gando omẹ ehelẹ go dọmọ: “Na apọsteli lalonọ wẹ omẹ mọtọnnkọ lẹ, azọ́nwàtọ oklọnọ, he nọ diọadana yede biọ apọsteli Klisti tọn lẹ mẹ. E ma sọ yin nujawu de; na Satani lọsu nọ diọadazùn angẹli hinhọ́n tọn. Enẹwutu é ma yin onu daho de eyin devizọ́nwatọ etọn lẹ ga yin mẹdiọada di devizọ́nwatọ dódó tọn lẹ; opòdo mẹhe tọn na nọ kẹdẹdi azọ́n yetọn lẹ.”—2 Kọlintinu lẹ 11:13-15.
2. Etẹwẹ Jesu dọ dọ e na yin onu titengbe lọ nado dawhẹna gbẹtọ lẹ?
2 Enẹwutu, dile e yin nujiawu do sọ, e ma yin mẹlẹpo wẹ jlo hinhọ́n lọ gba, Jesu dọmọ: “Ehe wẹ owhẹ̀, dọ hinhọ́n wá aihọn mẹ, bọ gbẹtọ yiwanna zinvlù hú hinhọ́n, na oylan wẹ azọ́n yetọn lẹ wutu. Na mẹdepope he wà danu wẹ nọ gbẹwanna hinhọ́n, e ma sọ nọ wá hinhọ́n nù, yè nikaa wọhẹ azọ́n etọn lẹ.”—Johanu 3:19, 20.
Owanyina Zinvlu Tọ́ Lẹ
3, 4. Nawẹ sinsẹ̀ngan azán Jesu gbè tọn lẹ dohia dọ yé ma jlo nado hodo hinhọ́n lọ gbọn?
3 Lẹnnupọn do lehe enẹ yin whẹho lọ do ji to whenuena Jesu tin to aigba ji. Jiwheyẹwhe ko na huhlọn Jesu nado basi azọ́n jiawu ojlofọndotenamẹ tọn lẹ taidi aliho de nado zé dodonu lọ dai dọ ewọ wẹ Mẹsia lọ. Di apajle, to Gbọjẹzan de gbè, e hùnnukun dawe he yin jìjì po nukun tintọ́n po de tọn. “Walọyizan lẹblanu jiawu nankọ tẹ die! Lehe dawe lọ gọna pinpẹn nutọn yinyọnẹn do sọ! Ewọ sọgan mọnú tintan to gbẹzan etọn mẹ! Ṣigba, etẹwẹ yin nuyiwa sinsẹ̀ngan lọ lẹ tọn? Johanu 9:16 na linlin dọmọ: “Mẹdelẹ to Falesi lẹ mẹ [dọ dogbọn Jesu dali] dọmọ, dawe he ma tin sọn Jiwheyẹwhe dè gba, na é ma yìn azán gbọjẹ tọn wutu.” Lehe ayiha yetọn gblezọ̀n do sọ! Tofi azọ̀nhẹngbọ jiawu de ko jọ, ṣigba kakati nado do ayajẹ hia na dawe he ko yin nukuntọ́nnọ dai lọ po pinpẹn nutọn yinyọnẹn po na azọ̀nhẹngbọnamẹtọ lọ, yé gblewhẹdo Jesu! Matin ayihaawe, gbọnmọ wiwa dali yé waylando do awusọhia gbigbọ wiwe Jiwheyẹwhe tọn go, yèdọ ylando he ma tindo jona de.—Matiu 12:31, 32.
4 To nukọn mẹ, to whenuena sinsẹ̀nnọ yẹnuwatọ helẹ kanhose dawe he ko yin nukuntọ́nnọ dai lọ dogbọn Jesu dali, dawe lọ dọmọ: “Ehemẹ wẹ nujawu te, na mìwlẹ yọ́n ofi he ewọ [Jesu] sọn wá, ṣigba ewọ ko hùn nukun ṣie. Míwlẹ yọnẹn dọ Jiwheyẹwhe ma nọ sè ylandonọ tọn: ṣigba eyin mẹde yin sinsẹ̀ntọ Jiwheyẹwhe tọn, bo sọ wà ojlo etọn, ewọ wẹ é nọ sè etọn. Sọn dodo aihọn tọn yè ma ko sè dọ, mẹde hùn nukun mẹhe yè jì nukuntọ́nnọ de tọn gbede. Eyin dawe he [Jesu] ma tin sọn Jiwheyẹwhe dè gba, é ma sọgan wà nudepope.” Etẹwẹ yin gblọndo sinsẹ̀ngán lọ lẹ tọn? “Yé sọ gblọn bo dọ hlan ẹn, dọ, hiẹ he yè ji patapata to ylando mẹ, hiẹ to míwlẹ plọ́n? Yé sọ yàn ẹn jẹgbonu.” Lehe yé gboawupo to awuvẹmẹ mẹ do sọ! Yé tindo ahún he sinyẹn di osé. Enẹwutu Jesu dọna yé dọ dile etlẹ yindọ yé sọgan mọnú po nukun jọwamọ tọn yetọn lẹ po, yé yin nukuntọ́nnọ to gbigbọ mẹ.—Johanu 9:30-41.
5, 6. Etẹwẹ sinsẹ̀ngan owhe kanweko tintan whenu tọn lẹ wà he dohia dọ yé yiwanna zinvlù?
5 Dọ sinsẹ̀nnọ yẹnuwatọ helẹ to ylanwà do gbigbọ Jiwheyẹwhe tọn go yin mimọ hezeheze to nujijọ devo whenu, yèdọ to whenuena Jesu fọ́n Lazalọsi sọn okú. Na azọ́n jiawu enẹ tọn wutu, susu gbẹtọ paa lẹ tọn yí Jesu sè. Ṣigba, doayi nuhe sinsẹ̀ngán lẹ wà go: “Ogán yẹwhenọ lẹ tọn, po Falesi lẹ po, ylọpli, bo dọmọ, etẹ wà wẹ mí te? Na dawe he to ohia susu basi. Eyin mí jo e do, omẹ po wẹ na yí ì sè: Lomunu lẹ nasọ wá yí otẹn po akọta mítọn po ga.” (Johanu 11:47, 48) Yé to nuhà na otẹ̀n po gbajumọ-yinyin yetọn lẹ po. Mahopọnna nuhe kọdetọn lọ sọgan yin yé jlo nado hẹn homẹ Lomunu lẹ tọn hùn, e mayin Jiwheyẹwhe tọn gba. Enẹwutu, etẹwẹ yé wá? “Sọn azán lọ gbè wẹ yé ko yí hónamẹ na yé nido hù [Jesu].”—Johanu 11:53.
6 Be e vọ̀ do finẹ wẹ? Lala. Nuhe yé wà bọdego do lehe yé yiwanna zinvlù taun do sọ hia: “Ogán yẹwhenọ lẹ tọn, yí hónamẹ na yé nido hù Lazalọsi ga; na ewọ tọn wutu wẹ Ju susu do yì, bo sọ yí Jesu sè.” (Johanu 12:10, 11) Lehe eyin ylanwiwa sinsinyẹn do sọ! Dile e tlẹ yindọ yé wà ehe lẹpo nado basi hihọ́ na otẹ̀n yetọn lẹ, etẹwẹ jọ? To whẹndo enẹ taun mẹ, yé fọ́ngu sọta Lomunu lẹ, mẹhe wá yé ji to 70 W.M. tọn mẹ, bo bẹ́ otẹ̀n yetọn, akọta yetọn, po ogbẹ̀ yetọn ga sọyi!—Isaia 5:20; Luku 19:41-44.
Lẹblanu Jesu Tọn
7. Etẹwutu wẹ owanyina nugbonọ lẹ do wọ̀ wá Jesu dè?
7 Mọdopolọ to ojlẹ mítọn mẹ, e mayin mẹlẹpo wẹ jlo nukunnumọjẹnumẹ gbigbọmẹ tọn gba. Ṣigba mẹhe yiwanna nugbo lẹ, jlo nado wá hinhọ́n kọ̀n. Yé jlo Jiwheyẹwhe taidi Nupojipetọ yetọn, podọ yé yí zohunhun do lẹhlan Jesu dè, mẹhe Jiwheyẹwhe dohlan nado basi zẹẹmẹ nuhe hinhọ́n lọ yin tọn, bo hodo e. Enẹ wẹ yin nuhe omẹ whiwhẹnọ lẹ basi to whenuena Jesu do tin to aigba ji. Yé wọ̀ wá ede. Yèdọ Falẹsi lẹ dona yigbe enẹ tọn. Yé wule dọmọ: “Aihọn lẹpo wẹ to yìyì hodo e.” (Johanu 12:19) Gbẹtọ taidi lẹngbọ lẹ yiwanna Jesu na adà awetọ sinsẹ̀ngán ṣejannabinọ, he huhlọn to zizé lẹ tọn wẹ ewọ yin gando mẹhe go Jesu dọmọ: “Yé do agbàn pinpẹn he sinyẹnawu hinhẹn, bo zé e do abọ́ gbẹtọ lẹ tọn ji: ṣigba yewlọsu ma na yí alọvi yetọn dopo do sẹtẹnna yé gba. Ṣigba azọ́n yetọn lẹpo wẹ yé nọ wà nado yin mimọ to gbẹtọ lẹ dè.”—Matiu 23:4, 5.
8. To vogbingbọn mẹ na sinsẹ̀n yẹnuwatọ lẹ, walọ tẹwẹ Jesu tindo?
8 To vogbingbọn ehe tọn mẹ, doayi walọ awuvẹmẹ Jesu tọn go: “Whenuena é mọ agùndaho lẹ, é [Jesu] wàlẹblanu na yé, na yè hẹn agbọ́pé yé, bo sọ hẹn apọ̀ṣi yé di lẹngbọ he ma tindo lẹngbọhọtọ de.” (Matiu 9:36) Podọ etẹwẹ e wà dogbọn dali etọn? E dọna mẹhe ko yin agbandona gbọn titonu Satani tọn dali lẹ dọmọ: “Mì wá dee, mì he to tuklajẹ, bọ yé doagbàn pinpẹn na lẹ, yẹn nasọ na gbọjẹ mì. Mì yí zẹ̀gẹ̀ ṣie do okọ̀ mìtọn, na mì ni sọ plọ́n núpinplọ́n ṣie: Na homẹmimiọnnọ podọ ayiha whiwhẹnọ wẹ yẹn: Mì nasọ mọ gbọjẹ hlan alindọn mìtọn lẹ. Na zẹ̀gẹ̀ ṣie bọawu, agbàn ṣie sọ fua.” (Matiu 11:28-30) Jesu wà nuhe yin dọdai etọn dọ gando e go to Isaia 61:1, 2 mẹ, he hia dọmọ: “Oklunọ ko yí amisisá do dè mi nado dọyẹwhehó wẹndagbe tọn hlan homẹmimiọnnọ lẹ; é ko do mi hlan nado basi pọ́ngbọ ayiha awublanọ lẹ tọn, nado lá mẹdekannujẹ hlan mẹmẹglọ lẹ, podọ hùnhùn ogànhọ̀ tọn na ogàntọ lẹ. Nado lá owhe alọkẹyi Oklunọ tọn, podọ azán ahọsuyi Jiwheyẹwhe mítọn tọn; nado miọnhomẹna mẹhe to awubla lẹpo.”
Hinhọ́n Hẹntọ lẹ Bibẹ́pli
9. Nujijọ ayidego tọn tẹ́ wẹ wá aimẹ to 1914?
9 To hihẹ́jiyì etọn godo, Jesu dona nọte kakajẹ whenue ojlẹ lọ na wá na Jiwheyẹwhe nado na ẹn huhlọn Ahọluduta tọn. To whelọnu e na klán “lẹngbọ lẹ” sọn “gbọgbọẹ lẹ” go. (Matiu 25:31-33; Psalm 110:1, 2) Ojlẹ enẹ wá to whenuena ‘azán godo tọn lẹ’ bẹjẹeji to 1914. (2 Timoti 3:1-5) Jesu, Ahọlu Ahọluduta olọn mẹ tọn Jiwheyẹwhe tọn he yin huhlọnna lọ, zindo bibẹ́ mẹhe jlo nado hodo hinhọ́n lọ lẹ pli do adusilọ alọkẹyi etọn tọn mẹ ji. To Wẹkẹ Whàn I godo, azọ́n mẹbibẹ́pli tọn enẹ zindonukọn po jìdeji awuyiya madoalọte po.
10. Kanbiọ tẹwẹ sọgan yin kinkanse dogbọn mẹhe Jesu to yiyizan lẹ to azọ́n mẹbẹpli tọn mẹ dali?
10 To gandudu Jesu Klisti tọn glọ, azọ́n mẹbibẹ́pli tọn lọ ko yin didona po kọdetọn daho po. E ma ko jọ to whenuho mẹ pọ́n gbede bọ gbẹtọ lẹ sọn akọta lẹpo mẹ nado kọnawudopọ to pọmẹ to sinsẹ̀n-bibasi nugbo nukunnumọjẹnumẹ tọn mẹ gba. Podọ mẹnu to egbehe wẹ yin omẹ lọ lẹ he to hinhọ́n he to tintọ́n sọn Jiwheyẹwhe po Klisti po dè hodo? Mẹnu lẹ wẹ to nuhe Filippinu lẹ 2:15 he dọmọ: ‘Mì to wunhọn di hinhọ́n to aihọn mẹ’ basi?—Osọhia 22:17.
11. Etẹwẹ yin otẹn Mẹylọhodotọklisti tọn gando hinhọ́n gbigbọmẹ tọn go?
11 Be Mẹylọhodotọklisti to enẹ basi ya? Mẹylọhodotọklisti, po sinsẹ̀n he kata etọn lẹ po, na jide tọn ma to wunhọn di hinhọ́n to aihọn mẹ gba. Na nugbo tọn, yẹwhenọ lẹ taidi sinsẹ̀ngan azán Jesu gbè tọn lẹ. Yé ma to hinhọ́n nugbo sọn Jiwheyẹwhe po Klisti po dè hẹn họnwun gba. To owhe gbànnukunatọ̀n lẹ die wayì, linlinwe lọ Theology Today dọmọ: “Po awubla po yè dona yigbe dọ hinhọ́n ehe ma nọ họnwun to Ṣọṣi po sisẹ́ po dile yè yigbe do gba. ... Ṣọṣi ko yigbe nado lẹzun tomẹnu he lẹdo e lẹ pẹpẹ. E ma yin hinhọ́n aihọn tọn taun gba kakatimọ hinhọ́n he nọ sọawuhia to aihọn mẹ lọsu tá tọ́ wẹ eyin.” Podọ ninọmẹ Mẹylọhodotọklisti tọn tlẹ sọ ylan hugan to egbehe. Nuhe nọ yin yiylọ dọ hinhọ́n he e nọ tá sọn aihọn mẹ na nugbo tọn yin zinvlù na enẹ wẹ nuhe Satani po aihọn etọn lẹpo po tindo nado zedonukọnnamẹ. Lala, hinhọ́n nugbo tọn depope ma to wiwá sọn sinsẹ̀n aihọn tọn heyin Mẹylọhodotọklisti tọn lẹ he jeagọdo yede to gigọmẹ gba.
12. Mẹnu lẹ wẹ nọpọ do yin titobasinanu hinhọ́n hẹntọ nugbo lọ to egbehe?
12 E sọgan yin didọ po nujikudo po dọ ogbẹ́ aihọn yọyọ heyin Kunnudetọ Jehovah tọn lẹ tọn, wẹ yin titobasinanu nugbo lọ he to hinhọ́n hẹn to egbehe. To gbèkọndopọ mẹ, hagbẹ́ etọn lẹpo—sunnu, yọnnu, po jọja lẹpo ga—nọ hẹn hinhọ́n yetọn sọn Jehovah po Klisti po dè họnwun to gbẹtọvi lẹpo nukọn. To owhe he wayì mẹ, to nuhe dibla yì agun 70 000 Kunnudetọ Jehovah tọn lẹ tọn mẹ lẹdo aihọn pé, nuhe hugan hinhọ́n hẹntọ livi ẹnẹ wẹ ko to ohó dogbọn Jiwheyẹwhe po lẹndai etọn lẹ po dọ na mẹdevo lẹ po zohunhun po. Podọ todin to owhe dopodopo mẹ, mí nọ mọ jìdeji bẹplidopọ gọnugọnu gbẹtọ lẹ tọn he sọ jlo nado yin nukunnumọjẹnumẹ to gbigbọmẹ. Fọtọ́n kanweko susu lẹ ko yin bibaptizi to Biblu pinplọn po wiwá oyọnẹn he pegan nugbo lọ tọn kọ̀n po godo. Na nugbo tọn, “ojlo [Jiwheyẹwhe] tọn wẹ yindọ yè ni whlẹn omẹ popo gán, podọ na yé ni wá oyọnẹn nugbo tọn kọ̀n.”—1 Timoti 2:4.
13. Etẹ go wẹ mí sọgan yí hinhọ́n he to wiwá sọn Jehovah dè jlẹdo?
13 Mí sọgan yí nukunnumọjẹnumẹ he nọ wá sọn Jehovah dè todin jlẹdo nuhe jọ to whenuena omẹ hohowhenu Jiwheyẹwhe tọn lẹ tọ́n sọn Egipti go: “Oklunọ sọ to yìyì to nukọn na yé to okle to dòtin aslọ tọn de mẹ, nado do aliho hia yé; podọ to ozán mẹ to dòtin miyọn tọn de mẹ, nado na hinhọ́n yé, na yé nido to yìyì to okle po ozán po.” (Eksọdusi 13:21, 22) Aslọ to okle podọ mìyọn to ozán mẹ yin anadenamẹnu he go yè sọgan ganjẹ de sọn Jiwheyẹwhe dè. Yé yin nuhe go yè sọgan ganjẹ de taidi owhè he Jiwheyẹwhe dá nado wleawuna hinhọ́n okle tọn na mí. Mọdopolọ ga, mí sọgan ganjẹ Jehovah go nado to titá hinhọ́n do omọ́liho lọ ji to gbigbọ liho na nugbo-dintọ lẹ to azán godo tọn he gọna owù ehelẹ mẹ zọnmii. Howhinwhẹn lẹ 4:18 na mí jide dọmọ: “Omọ́ nugbonọ tọn taidi hinhọ́n he sẹ́, he to sisẹ́ yì nukọn kaka jẹ okle.”
Hinhọ́n Ahọluduta lọ Tọn Hinhẹn Họnwun
14. Etẹwẹ dona yin lẹndai tangan hinhọ́n hẹntọ lẹ tọn?
14 To whenuena e yindọ Jehovah wẹ Asisa nukunnumọjẹnumẹ tọn, bọ Klisti yin Ogán hinhọ́n enẹ Hẹn Họnwun Tọ́ tọn, hodotọ Jesu tọn lẹ dona hẹn ẹn họnwun ga. E dọ dogbọn yé dali dọmọ: “Mì wẹ hinhọ́n aihọn tọn. ... Mọkẹdẹ wẹ mì ni gbọ hinhọ́n mìtọn ni họ́nwun to gbẹtọ lẹ nukọn do, na yé nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.” (Matiu 5:14, 16) Podọ etẹwẹ yin hosọ tangan hinhọ́n ehe tọn ehe hodotọ etọn lẹ na hẹn họnwun to gbẹtọ lẹ nukọn? Etẹwẹ yé na plọnmẹ to vivọnu whenuho aihọn tọn ehe whenu? Jesu ma dọ dọ hodotọ etọn lẹ na plọnmẹ gandudu démocratie tọn, kavi aṣẹ-glanglan-panamẹtọ, gbèkọ̀ndopọ Ṣọṣi po Aimatẹn po tọn, kavi linlẹn aihọn tọn devo depope gba. Kakatimọ, to Matiu 24:14 mẹ e dọdai dọ to pinpannukọn homẹkẹn lẹdo aihọn pé whenu, “yẹwheho wẹndagbe ahọludu tọn he lẹ [na yin] didọ to aigba fininọ lẹpo mẹ na okunnu de hlan akọta lẹpo; whenẹnu wẹ opodo [na] wá.” Gbọnmọ dali wẹ, hinhọ́n hẹntọ lẹ to egbehe nọ dọna mẹdevo lẹ dogbọn Ahọluduta Jiwheyẹwhe tọn dali, he na hẹn aihọn Satani tọn wá opodo etọn bo na planmẹ biọ aihọn yọyọ dodonọ tọn mẹ.—1 Pita 2:9.
15. Mẹhe jlo hinhọ́n lọ lẹ na lẹhlan fitẹ?
15 Mẹhe yiwanna hinhọ́n lẹ ma nọ yin vìvì sọn aliji gbọn alọsọakọn aihọn ehe tọn po yanwle etọn lẹ po dali gba. Alọsọakọn po yanwle enẹ lẹpo na lẹzun afín to madẹnmẹ, to whenuena e yindọ aihọn ehe ko to vivọnu etọn sẹpọ. Kakatimọ, owanyina dódónọ lẹ na jlo nado lẹhlan wẹndagbe he to yinyin lilá gbọn mẹhe to hinhẹn hinhọ́n Ahọluduta Jiwheyẹwhe tọn họnwun lẹdo agósu aigba tọn lẹpo pé dali. Omẹ ehelẹ wẹ yè dọ dọdai yetọn to Osọhia 7:9, 10, mẹ he dọmọ: “To onu helẹ godo yẹn pọn, doayi e go, gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ sọn gbẹtọ lẹpo mẹ, podọ sọn ogbè lẹpo mẹ, ṣite to ofìn lọ [Jiwheyẹwhe tọn] nukọn podọ to Lẹngbọvu lọ [Klisti] nukọn ... Yé sọ to awhádo ogbè lélé, dọmọ, whlẹngan hlan Jiwheyẹwhe mítọn he sinai to ofìn lọ ji, podọ hlan Lẹngbọvu lọ.” Wefọ 14 dọmọ: “Ehelẹ wẹ yé he tọ́n sọn nukunbibia daho mẹ.” Mọwẹ, yé lùn opodo aihọn ehe tọn tọ́n biọ aihọn yọ́yọ́ madopodo he tin to Ahọluduta Jiwheyẹwhe tọn glọ.
Aihọn Yọyọ Nukunnumọjẹnumẹ Tọn Lọ
16. Etẹwẹ na jọ do aihọn Satani tọn go to nukunbibia daho lọ whenu?
16 Aihọn yọyọ lọ na yin lilẹwé to hinhọ́n nugbo tọn mẹ. Na nugbo tọn, lẹnnupọn do lehe ninọmẹ lọ na nọ ji to azán he gbè Jiwheyẹwhe na hẹn titonu ehe wá vivọnu etọn godo. Satani, aovi etọn lẹ, po tonudọtọ etọn lẹ po, gọna ajọwatọ etọn lẹ po, to pọmẹ po titonu sinsẹ̀n tọn etọn lẹ po na búsẹ sọn aimẹ—yemẹpo! Zòmọ ajọjijla Satani tọn lẹpo pete na búsẹ sọn aimẹ ga. Gbọnmọ, to nukunbibia daho lọ godo, linlinwe, linlinnamẹwe, owe lẹ, alọnuwe lẹ, kavi alọnuwe pẹvi lẹ he nọ yin zinzin nado nọgodona aihọn ylankan ehe depope ma nasọ tin pọ́n gbede bà. Nulilá mẹhodu tọn lẹ sọn azọ́nwhé television kavi ladio tọn mẹ ma nasọ tin bà. Lẹdo kudiho adínọ aihọn Satani tọn pete na yin zìzàsẹ mlẹnmlẹn to nukunwhiwhe dopo mẹ vaun!—Matiu 24:21; Osọhia 7:14; 16:14-16; 19:11-21.
17, 18. Nawẹ hiẹ sọgan basi zẹẹmẹ lẹdo gbigbọmẹ tọn to vivọnu aihọn Satani tọn godo gbọn?
17 Lehe enẹ na yin kọgbọ daho de do sọ! Bẹsọn azán enẹ gbè, hinhọ́n gbigbọmẹ tọn he wé, bo jlọmẹdote he na nọ wá sọn Jehovah po Ahọluduta etọn po dè wẹ na yinuwa do gbẹtọvi lẹ ji. Isaia 54:13 dọdai dọmọ: “Ovi towe lẹpo na sọ yin pinplọn sọn Oklunọ dè, jijọho ovi towe lẹ tọn na sù.” Po gandudu Jiwheyẹwhe tọn po he na to gandu do aigba lẹpo pete ji, opagbe etọn wẹ yindọ, dile Isaia 26:9 dọ do, “omẹ he to aihọn mẹ lẹ na plọn dódó.”
18 Po awuyiya po, ninọmẹ apọ̀nmẹ tọn po gbigbọmẹ tọn lẹpo na diọ do dagbe ji. Nuhe nọ jlomẹdote lẹ wẹ na gbayipe kakati nado yin ayimajai, walọ gblewa tọn he gbayipe talala to egbehe. Mẹhe tin to ogbẹ̀ to whenẹnu lẹpo na yin pinplọn nugbo dogbọn Jiwheyẹwhe po lẹndai etọn lẹ po dali. Dọdai Isaia 11:9 tọn na yin hinhẹndi to gigọmẹ, ehe dọmọ: “Aihọn na gọ́ na nuyọnẹn Oklunọ tọn, dile osìn ṣinyọn ohù ji do.”
Eyin Onu Niyaniya Tọn Nado Hodo Hinhọ́n Lọ
19, 20. Naegbọn mẹhe jlo nado hodo hinhọ́n lọ lẹ dona tin to aṣeji?
19 Todin, to owhe opodo titonu ylankan ehe tọn mẹ, onu niyaniya tọn wẹ eyin nado hodo hinhọ́n aihọn tọn. Podọ mí dona tin to aṣeji, na awhàn sinsinyẹn de tin he na yin fùnfùn nado hẹn mí ma nado zinzọ̀nlin to hinhọ́n lọ mẹ. Nukundiọsọmẹ ehe na wá sọn huhlọn zìnvlu tọn lẹ dè—sọn Satani, aovi etọn lẹ, po titobasinanu aigba ji tọn etọn lẹ po dè. Enẹwutu wẹ apọsteli Pita do gbẹnunamẹ dọmọ: “Mì yin hùwhẹnọ bo sọ nọ họ́ mìde: na lẹgba, mẹglatọ mìtọn, di kinnikinni he to lìlì, é to zọnlinzin pè, bo to mẹhe é na tlẹ́ndù dín.”—1 Pita 5:8.
20 Satani na zé aliglọnnamẹnu lẹpo do aliho ji na mẹhe to dindọnsẹpọ hinhọ́n lọ lẹ, na é jlo nado hẹn yé gbọṣi zinvlù mẹ wutu. E sọgan yin kọgbidinamẹnu sọn hẹnnumẹ lẹ kavi họ́ntọn dai tọn lẹ he jẹagodo nugbo lọ lẹ dè. E sọgan yin ayihaawe tintindo dogbọn Biblu dali na yinyin mẹhe yè tọ́nnukunna gbọn nuplọnmẹ sinsẹ̀n lalo tọn lẹ kavi nujijla mẹhe ma yisè dọ Jiwheyẹwhe tin lẹ tọn po mẹhe yise dọ nudepope ma sọgan yin yinyọnẹn dogbọn tintin Jiwheyẹwhe tọn dali lẹ tọn po. E sọgan yin ayilinlẹn ylando mẹdetiti tọn lẹ wẹ hẹn ẹn vẹawu nado nọgbẹ̀ sọgbe hẹ nubiọtomẹsi sọn olọn mẹ wá lẹ.
21. Afọdide tẹwẹ dona yin zize gbọn mẹhe jlo nado nọgbẹ̀ to aihọn yọ́yọ́ Jiwheyẹwhe tọn mẹ lẹpo dali?
21 Depope he aliglọnnamẹnu lọ lẹ sọgan yin, be hiẹ jlo nado duvivi ogbẹ̀ tọn to aihọn matin ohẹ́n, osẹ́nhẹngba, mawadodo, po awhàn po mẹ ya? Be hiẹ jlo nado duvivi agbasaliho pipé po ogbẹ̀ madopodo po to paladisi aigba ji tọn de mẹ nugbo nugbo ya? To whelọnu lo kẹalọyi bosọ hodo Jesu taidi hinhọ́n aihọn tọn lọ bo dotoai hlan wẹ̀ndomẹ hodotọ etọn lẹ tọn, mẹhe to “ohó ogbẹ̀ tọn” lọ go hẹn gligli podọ he to ‘hinhọ́nwun di hinhọn to aihọn mẹ.’—Filippinu lẹ 2:15, 16. (Pọ́n w-F 1/4/93, weda 13.)
Nawẹ Hiẹ Na Na Gblọndọ Gbọn?
◻ Nawẹ sinsẹ̀ngan lẹ dohia gbọn dọ owanyina zinvlù tọ́ wẹ yé yin?
◻ Walọ tẹwẹ Jesu tindo dohlan gbẹtọ lẹ?
◻ Nawẹ bẹplidopọ hinhọ́n hẹntọ lẹ tọn to nukọnzindo gbọn?
◻ Diọdo ayidego tọn tẹlẹ wẹ na wá aimẹ to madẹnmẹ?
◻ Naegbọn e do yin onu niyaniya tọn nado hodo hinhọ́n aihọn tọn lọ to egbehe?
[Yẹdide to weda 14, 15]
Falesi ahún sinsinyẹnnọ lẹ yàn dawe he nukun etọn yin hùnhùn gbọn Jesu dali jẹgbonu