Hiẹ Sọgan Hẹn Nufinflin Towe Pọnte

JEHOVAH JIWHEYẸWHE dá apọ̀n gbẹtọvi tọn po nugopipe jiawu lọ po nado flinnu. E wleawuna ẹn nado yin nusẹdotẹn he mẹ onú sọgan yin didesọn bọ nuhọakuẹ he ko yin zize do e mẹ lẹ ma na yin hinhẹnbú. Apọ̀n yin awuwlena sọgbe hẹ lẹndai Jiwheyẹwhe tọn dọ gbẹtọvi lẹ ni nọgbẹ̀ kakadoi.—Ps. 139:14; Joh. 17:3.

Ṣigba hiẹ sọgan tindo numọtolanmẹ dọ suhugan nuhe hiẹ hẹn do ayiha mẹ lẹ wẹ nọ bu. E ma nọ taidi nuhe tin to finẹ eyin hiẹ tindo nuhudo etọn. Etẹwẹ hiẹ sọgan wà nado hẹn nufinflin towe pọnte?

Tindo Ojlo

Ojlo nọ yí adà titengbe de wà nado yidogọna nufinflin. Eyin mí hẹn ẹn zun aṣa nado yin ayidonugotọ, nado nọ tindo ojlo to gbẹtọ lẹ po nuhe to yìyì lẹdo mí pé lẹ po mẹ, ayiha mítọn nọ yin finfọndote. To whenẹnu e na bọawu na mí nado yinuwa po ojlo mọnkọtọn po to whenuena mí hia kavi sè nuhe tindo nuhọakuẹ dẹn-to-aimẹ de.

E mayin jonọbamẹnu na mẹde nado tindo awusinyẹnnamẹnu to yinkọ gbẹtọ lẹ tọn finflin mẹ gba. Ṣogan, taidi Klistiani lẹ, mí yọnẹn dọ gbẹtọ lẹ yin nujọnu—Klistiani hatọ lẹ, mẹhe mí nọ dekunnuna lẹ, podọ mẹdevo lẹ he nuwiwa nọ kọ̀n mí dopọ hẹ dile mí to nukunpedo dandannu gbẹ̀mẹ tọn lẹ go. Etẹwẹ sọgan gọalọna mí nado flin yinkọ he mí dona flin na taun tọn lẹ? Apọsteli Paulu slẹ́ yinkọ gbẹtọ 26 tọn to agun he e kanwe hlan de mẹ. Ojlo etọn to yé mẹ yin didohia gbọn nugbo lọ dali dọ e mayin dọ e yọ́n yinkọ yetọn lẹ kẹdẹ wẹ gba ṣigba donù zẹẹmẹ gigọ́ tangan delẹ go gando suhugan yetọn go. (Lom. 16:3-16) Kunnudetọ Jehovah tọn heyin nugopọntọ tomẹyitọ egbezangbe tọn delẹ nọ wà dagbe taun to yinkọ lẹ finflin mẹ, dile etlẹ yindọ yé nọ yì sọn agun de mẹ jẹ devo mẹ to sẹmẹsẹmẹ. Etẹwẹ nọ gọalọna yé? Yé sọgan yí ì do basi aṣa nado nọ yí yinkọ mẹde tọn zan gbọzangbọzan to ojlẹ tintan he yé dọho dopọ. Yé nọ dovivẹnu nado yí nukunta omẹ lọ tọn do flin yinkọ etọn. Humọ, yé nọ yí whenu zan hẹ omẹ voovo lẹ to lizọnyizọn kunnudegbe tọn mẹ podọ to núdùdù dopọ whenu. Eyin hiẹ mọ mẹde, be hiẹ na flin yinkọ etọn ya? Bẹjẹeji gbọn tintindo whẹwhinwhẹ́n dagbe de na yinkọ lọ finflin dali; enẹgodo tẹ́n delẹ to ayinamẹ he ko yin nina lẹ mẹ pọ́n.

Finflin nuhe hiẹ hia sọ yin onú titengbe ga. Etẹwẹ sọgan gọalọna we nado wà ehe? Ojlo po nukunnumọjẹnumẹ po yin onú titengbe. Hiẹ dona tindo ojlo susu to nuhe hiẹ to hihia mẹ nado hẹn ayidonugo gigọ́ towe do e ji. Hiẹ ma na flin nudọnamẹ lẹ eyin ayiha towe tin to fidevo pete dile hiẹ to tintẹnpọn nado hiawe. Nukunnumọjẹnumẹ nọ jideji to whenuena hiẹ kọ̀n nudọnamẹ lọ dopọ hẹ nuhe hiẹ jẹakọhẹ lẹ kavi hẹ oyọnẹn he hiẹ ko tindo dai. Kanse dewe dọ: ‘Nawẹ podọ whetẹnu wẹ yẹn sọgan yí nudọnamẹ ehe zan to gbẹzan ṣie mẹ? Nawẹ yẹn sọgan yí ì zan nado gọalọna mẹdevo gbọn?’ Nukunnumọjẹnumẹ sọ nọ pọnte eyin hiẹ hia hogbe susu dopọ kakati nado hia hogbe dopodopo. Hiẹ na yawu mọnukunnujẹ linlẹn lẹ mẹ bo yọ́n nuagokun tangan lẹ, na yé nido bọawu taun nado flin.

Whesọ Do Basi Dogbapọn

Azọ́nyọnẹntọ wepinplọn tọn lẹ zinnudo nuhọakuẹ-yinyin dogbapọn tọn ji. To dodinnanu de mẹ, mẹplọntọ wehọmẹ daho tọn de dohia dọ nukunwhiwhe dopo heyin yiyizan nado basi dogbapọn afọdopolọji tọn na hẹn sọha nudọnamẹ he tin to oflin mẹ jideji whlaawe. Enẹwutu to tadidona wehihia towe, kavi apadewhe etọn godo tlolo, gbadopọnna linlẹn tangan lẹ to ayiha mẹ nado sọgan hẹn ehelẹ do oflin towe mẹ. Lẹnnupọndo lehe hiẹ na basi zẹẹmẹ nuagokun yọyọ he hiẹ plọn lẹ tọn to hogbe towe titi lẹ mẹ do ji. Gbọn hinhẹn linlẹn he hiẹ ko hia lọ wá oflin towe mẹ to hihia ẹ godo tlolo dali, hiẹ na dlẹnkanna tedidi ojlẹ he hiẹ sọgan yí do flin nuagokun lọ tọn.

Enẹgodo to azán vude godo, dín dotẹnmẹ hundote de nado gbadopọnna nuhe hiẹ hia lọ gbọn nudọnamẹ lọ mimá hẹ mẹdevo dali. Hiẹ sọgan wàmọ hẹ hagbẹ whẹndo tọn de, mẹde to agun mẹ, azọ́nwatọgbẹ́, wehọmẹvigbẹ́, kọmẹnu, kavi mẹhe hiẹ mọ to lizọnyizọn kunnudegbe tọn mẹ de. E mayin nuagokun tangan lẹ kẹdẹ wẹ hiẹ na tẹnpọn nado vọ́ dọ gba ṣigba linlẹn Owe-wiwe tọn he zọ̀npọ hẹ yé lẹ ga. Ehe wiwà na hẹn ale wá na we, bo gọalọ nado zín onú titengbe lẹ do oflin towe mẹ; e nasọ hẹn ale wá na mẹdevo lẹ ga.

Lẹnayihamẹpọn Do Onú Titengbe lẹ Ji

To yidogọmẹ na dogbigbapọnna nuhe hiẹ ko hia po didọ ẹ na mẹdevo lẹ po, hiẹ na mọ dọ ayihamẹlinlẹnpọn do onú titengbe he ko yin pinplọn lẹ ji yin alemọyinu. Biblu kàntọ Asafi po Davidi po wà enẹ. Asafi dọmọ: ‘Yẹn na dọho azọ́n OKLUNỌ tọn: na yẹn na nọ flin azọ́njiawu etọn hoho tọn lẹ. Yẹn na lẹnayihamẹpọn do azọ́n towe lẹpo ji, bo nasọ nọ lẹn azọ́n towe lẹ pọ́n.’ (Ps. 77:11, 12) Mọdopolọ Davidi wlan dọmọ: “[Yẹn] to ayihamẹlẹnpọn na towe to ozán nukle mẹ,” podọ “yẹn flin azán hoho tọn lẹ; yẹn lẹn azọ́n towe lẹpo pọ́n.” (Ps. 63:6; 143:5) Be hiẹ nọ wàmọ ya?

Nulẹnpọn sisosiso he whèwhín mọnkọtọn do nuyiwa Jehovah tọn lẹ, jẹhẹnu etọn lẹ, po hodidọ he gando ojlo etọn go lẹ po ji nọ yí nususu wà hugan alọgigọna we nado flin nuagokun lẹ. Eyin hiẹ hẹn nulẹnpọn mọnkọtọn zun aṣa, e na zín nuhe yin nujọnu nugbonugbo lẹ do ahun towe mẹ. E na basi vọjlado na gbẹtọ he nkọtọn hiẹ yin to homẹ. Oflin he yin awuwlena lẹ na nọtena linlẹn he tin to ohò towe mẹ.—Ps. 119:16.

Nuyiwa Gbigbọ Jiwheyẹwhe Tọn

To dindin nado flin nugbo lẹ gando nuwiwa Jehovah tọn lẹ go po nuhe yin didọ gbọn Jesu Klisti dali lẹ po mẹ, mí ma yin jijodo míde ṣokẹdẹ gba. To ozán he jẹnukọnna okú etọn mẹ, Jesu dọna hodotọ etọn lẹ dọmọ: “Onú helẹ wẹ yẹn ko dọ hlan mì, to whenuena yẹn to ninọ hẹ mì. Ṣigba [alọgọtọ lọ, he yin gbigbọ wiwe], mẹhe Otọ́ na dohlan to oyín ṣie mẹ, ewọ na plọn onú lẹpo mì, bo nasọ hẹn nuhe yẹn dọ hlan mì lẹpo wá oflin mìtọn mẹ.” (Joh. 14:25, 26) Matiu po Johanu po tin to mẹhe to finẹ lẹ mẹ. Be gbigbọ wiwe sọawuhia nado yin alọgọtọ de na yé nugbonugbo ya? Na nugbo tọn, mọwẹ! Nudi owhe ṣinatọ̀n godo, Matiu dotana kandai gigọ́ tintan winwlan gando gbẹzan Klisti tọn go, gọna oflin họakuẹ mọnkọtọn lẹ taidi Yẹwhehodidọ Osó ji tọn po ohia gigọ́ tintin tofi Klisti tọn po gọna vivọnu titonu ehe tọn. Owhe 65 to okú Klisti tọn godo, apọsteli Johanu wlan Wẹndagbe etọn, he bẹ zẹẹmẹ gigọ́ lẹ hẹn gando nuhe Jesu dọ to ozán godo tọn he apọsteli lẹ yizan hẹ Oklunọ lọ whẹpo e do ze ogbẹ̀ etọn liai go. Matin ayihaawe, Matiu po Johanu po tindo oflin họnwun nuhe Jesu ko dọ bo wà lẹ tọn to whenuena yé tin hẹ ẹ, ṣigba gbigbọ wiwe yí adà tangan de wà to hinhẹn ẹn diun mẹ dọ yé ma wọnji zẹẹmẹ gigọ́ titengbe he Jehovah jlo dọ ni tin to Ohó kandai etọn tọn mẹ lẹ go gba.

Be gbigbọ wiwe nọ yinuwa taidi alọgọtọ de na devizọnwatọ Jiwheyẹwhe tọn lẹ to egbehe ya? Na jide tọn mọwẹ! Nugbo wẹ dọ, gbigbọ wiwe ma nọ ze nuhe mí ma ko plọn gbede lẹ do ayiha mítọn lẹ mẹ gba, ṣigba e nọ yinuwa taidi alọgọtọ de nado flin mí onú titengbe he mí ko plọn wayi lẹ. (Luku 11:13; 1 Joh. 5:14) Enẹgodo, eyin nuhudo etọn tin, nugopipe nulẹnpọn tọn mítọn lẹ nọ yin whinwhàn nado “flin ohó he yè dọ sọn onù yẹwhegán wiwe lẹ tọn mẹ jẹnukọn, podọ osẹ́n . . . Oklunọ Whlẹngantọ tọn tọn lẹ.”—2 Pita 3:1, 2.

‘Hiẹ Ma Dona Wọ̀n Gba’

Jehovah na avase Islaeli pludopludo dọmọ: ‘Hiẹ ma dona wọ̀n gba.’ E mayin dọ e to nukundo yé nado flin nulẹpo mlẹnmlẹn wẹ gba. Ṣigba yé ma dona joawuna yanwle mẹdetiti tọn lẹ sọmọ bọ oflin nuyiwa Jehovah tọn yetọn lẹ na lẹzun afọ-súnsúnnú gba. Yé dona flin hezeheze lehe Jehovah whlẹn yé gán do to whenuena angẹli lọ hù viplọnji Egipti tọn lẹpo podọ to whenuena Jehovah hùn Ohù Vẹẹ bo gọ̀ ẹ sú to enẹgodo, bọ Falo po awhànpa etọn po kútọ̀. Islaelivi lẹ dona flin dọ Jiwheyẹwhe na yé Osẹ́n etọn to Osó Sinai ji bo plan yé gbọn zungbo mẹ kaka wá Aigba Pagbe tọn ji. Yé ma dona wọnji to linlẹn lọ mẹ dọ oflin onú ehelẹ tọn dona zindonukọn nado tindo nugandomẹgo he siso de do gbẹninọ egbesọegbesọ tọn yetọn lẹ ji.—Deut. 4:9, 10; 8:10-18; Eks. 12:24-27; Ps.136:15.

Mí dona payi ma nado wọnji ga. Dile mí to pipehẹ kọgbidinamẹnu gbẹ̀mẹ tọn lẹ, mí dona nọ flin Jehovah, bo flin Jiwheyẹwhe he nkọtọn ewọ yin podọ owanyi he e dohia to Visunnu etọn nina mẹ, mẹhe wleawu ofligọ de tọn na ylando mítọn lẹ na mí nido sọgan tindo ogbẹ̀ pipé kakadoi. (Ps. 103:2, 8; 106:7, 13; Joh. 3:16; Lom. 6:23) Biblu hihia podọ mahẹ tintindo to opli agun tọn lẹ po lizọnyizọn kunnudegbe tọn po mẹ to gbesisọmẹ na zọ́n bọ mí na nọ flin nugbo họakuẹ ehelẹ hezeheze.

Eyin hiẹ pannukọn nudide lẹ, daho kavi pẹvi, flin nugbo họakuẹ enẹlẹ, bo dike yé ni yinuwado nulẹnpọn towe ji. Ma wọnji blo. Ganjẹ Jehovah go na anademẹ. Kakati nado nọ pọ́n whẹho lẹ hlan sọn pọndohlan gbẹtọ tọn mẹ kavi nado nọ dejido mẹwhinwhàn ahun mapenọ tọn de go poun, kanse dewe dọ, ‘Ayinamẹ kavi nunọwhinnusẹ́n tẹlẹ sọn Ohó Jiwheyẹwhe tọn mẹ wẹ dona yinuwado nudide ṣie ji?’ (Howh. 3:5-7; 28:26) Hiẹ ma sọgan flin nuhe hiẹ ma ko hia kavi sè gbede lẹ gba. Ṣigba dile hiẹ to whinwhẹ́n to oyọnẹn he pegan po owanyi na Jehovah po mẹ, oyọnẹn he ko yin bibẹpli bọ gbigbọ Jiwheyẹwhe tọn sọgan gọalọna we nado flin na gbloada dogọ. Humọ, owanyi towe na Jehovah he to whinwhẹ́n deji na whàn we nado yinuwa to kọndopọmẹ hẹ ẹ.