Whlá Ahun Towe
“Hú whiwhla lẹpo, yí [ahun] towe whlá, na e mẹ wẹ asisa ogbẹ̀ tọn sọn.”—HOWHINWHẸN LẸ 4:23.
1, 2. Naegbọn mí dona whlá ahun mítọn?
DAWE yọnhonọ de he nọ nọ̀ lopo Caraïbe tọn de ji tọ́n jẹgbonu sọn ohọ̀ etọn mẹ to jẹhọn-ahizi de godo. Dile e to nuhe yin hinhẹngble to lẹdo etọn mẹ lẹ pọ́n, e doayi e go dọ atin-gbó de he ko tin to họngbó etọn nukọn na owhe susu ko họ́. E paṣa ẹ dọ ‘nawẹ enẹ sọgan jọ gbọn to whenuena e yindọ atin pẹvipẹvi he lẹdo e lẹ gbẹ́ pò to ote?’ Atinta atin he ko jai lọ tọn pinpọn wleawuna gblọndo lọ. Ṣẹnṣẹn atin he e taidi dọ nude ma sọgan sẹtẹn na lọ tọn ko dù, podọ jẹhọn lọ ko hẹn nuhe mayin mimọ dai lọ jẹ gbangba poun wẹ.
2 Lehe e nọ blawu sọ to whenuena sinsẹ̀n-basitọ nugbonọ he taidi mẹhe lodo taun to aliho gbẹzan Klistiani tọn ji de jai to whlepọn yise tọn nukọn. Biblu dọ po gbesisọ po dọ ‘ayilinlẹn ahun gbẹtọ tọn mẹ tọn yin oylan sọn ovu gbọ́n.’ (Gẹnẹsisi 8:21) Ehe zẹẹmẹdo dọ eyin mí ma tin to aṣeji, ahun he tlẹ yin dagbe hugan lẹ sọgan yin kiklọ nado wà oylan. To whenuena e yindọ ahun gbẹtọvi mapenọ depope tọn wẹ sọgan yin kiklọ, mí dona yí nukun nujọnu tọn do pọ́n ayinamẹ lọ dọmọ: “Hú whiwhla lẹpo, yí [ahun] towe whlá, na e mẹ wẹ asisa ogbẹ̀ tọn sọn.” (Howhinwhẹn lẹ 4:23) Enẹwutu nawẹ mí sọgan whlá ahun yẹhiadonu tọn mítọn gbọn?
Dodinna Mẹdetiti to Gbesisọ mẹ Yin Dandannu
3, 4. (a) Kanbiọ tẹlẹ wẹ sọgan yin kinkanse gando ahun agbasa tọn de go? (b) Etẹwẹ na gọalọna mí nado gbeje ahun yẹhiadonu tọn mítọn pọ́n?
3 Eyin hiẹ yì doto de dè nado gbeje agbasa towe pọ́n, e yọnbasi taun dọ e ni pọ́n ahun towe. Be agbasalilo towe blebu, gọna ahun towe, nọ dohia dọ hiẹ to núdùdù hunsindagbe tọn dù ganji ya? Nawẹ ohùn towe to nuyiwa do? Be ahun towe nọ hò ganji kavi hihò etọn sinyẹn hugan wẹ? Be hiẹ nọ daihun lanmẹyiya tọn ganji ya? Be onú ko ṣikọna ahun towe hugan wẹ ya?
4 Eyin ahun agbasa tọn de dona nọ yin gbigbejepọn to gbesisọ mẹ, etẹwẹ dogbọn ahun yẹhiadonu tọn towe dali? Jehovah nọ dindona ẹn. (1 Otannugbo lẹ 29:17) Mílọsu dona nọ wàmọ ga. Gbọnna? Gbọn kanbiọ ehe nkọtọn lẹ kinkanse míde dali: Be ahun ṣie nọ mọ núdùdù gbigbọmẹ tọn susu yí gbọn oplọn gbesisọ mẹdetiti tọn po opli lẹ yìyì po dali ya? (Psalm 1:1, 2; Heblu lẹ 10:24, 25) Be owẹ̀n Jehovah tọn nọ duahunmẹna mi taidi “miyọ́n jiji de [he] yè ṣinyọnnudo do ohú ṣie lẹ mẹ,” bọ e nọ sisẹ mi nado tindo mahẹ to azọ́n yẹwhehodidọ Ahọluduta tọn po gbẹtọ lẹ hinhẹn zun devi po tọn mẹ ya? (Jẹlemia 20:9; Matiu 28:19, 20; Lomunu lẹ 1:15, 16) Be yẹn nọ yin whinwhàn nado dovivẹnu tlala, nado tindo mahẹ to adà sinsẹ̀nzọ́n whenu-gigọ́ tọn delẹ mẹ to whenuena e yọnbasi ya? (Luku 13:24) Lẹdo wunmẹ tẹwẹ yẹn nọ hùn ahun yẹhiadonu tọn ṣie do nùvo hlan? Be e nọ jlo mi nado dogbẹ́ hẹ mẹhe ahun yetọn yin kinkọndopọ to sinsẹ̀n-bibasi nugbo mẹ lẹ ya? (Howhinwhẹn lẹ 13:20; 1 Kọlintinu lẹ 15:33) Mì gbọ mí ni nọ yawu doayi madogán depope go bo ze afọdide lẹ nado jla ẹ do to afọdopolọji.
5. Lẹndai dagbe tẹlẹ wẹ whlepọn yise tọn lẹ sọgan yí wà?
5 Mí nọ saba pehẹ whlepọn yise tọn lẹ. Yé nọ hùn dotẹnmẹ dote na mí nado doayi ninọmẹ ahun mítọn tọn go. Mose dọna Islaelivi he ko jlo na biọ Aigba Pagbe tọn ji lẹ dọmọ: ‘OKLUNỌ lọ Jiwheyẹwhe towe ko hẹn we gbọ̀n zungbo mẹ na owhe kande, na e nido hohuwhẹ we, nado tẹ́n we pọ́n, nado yọ́n nuhe tin to ahun towe mẹ, eyin hiẹ na payi gbedide etọn lẹ go, kavi lala.’ (Deutelonomi 8:2) Be numọtolanmẹ, ojlo, kavi nuyiwa he nọ sọawuhia to whenuena mí wá pannukọn ninọmẹ kavi whlepọn madonukun lẹ ma nọ paṣa mí ya? Whlepọn he Jehovah na dotẹnmẹ nado wá lẹ sọgan hẹn mí doayi awugbopo mítọn lẹ, bo hùn dotẹnmẹ dote na mí nado basi vọjlado. (Jakobu 1:2-4) Mì gbọ mí ni nọ lẹnnupọn bosọ nọ hodẹ̀ do lehe mí nọ pehẹ whlepọn lẹ do ji tẹgbẹ̀!
Etẹwẹ Hodidọ Mítọn lẹ Nọ Dohia?
6. Etẹwẹ nuhe mí yiwanna nado dọ lẹ nọ dehia gando ahun mítọn go?
6 Nawẹ mí sọgan yọ́n nuhe mí ko bẹpli do ahun mítọn mẹ lẹ gbọn? Jesu dọmọ: “Gbẹtọ dagbe sọn adọkunnu dagbe [ahun] etọn mẹ tọn wẹ e nọ hẹn enẹ heyin dagbe tọ́n jẹgbonu sọn wá; gbẹtọ ylankan sọn adọkunnu ylankan etọn mẹ tọn wẹ e nọ hẹn enẹ heyin ylankan tọ́n jẹgbonu sọn wá: na sọn onú [susugege he to ahun mẹ] wẹ onù nọ dọ.” (Luku 6:45) Nuhe mí nọ saba dọ lẹ nọ do nuhe ahun mítọn jlo nado wà lẹ hia ganji. Be mí nọ saba dọho gando onú agbasa tọn lẹ po kọdetọn dagbe tintindo to aihọn mẹ po go wẹ ya? Kavi be hodidọ mítọn lẹ nọ saba sinai do onú gbigbọmẹ tọn po yanwle yẹwhehọluduta tọn lẹ po ji wẹ? Kakati nado nọ to nuṣiwa mẹdevo lẹ tọn jla pé, be owanyi nọ whàn mí nado ṣinyọnnudo yé ya? (Howhinwhẹn lẹ 10:11, 12) Be mí nọ dọho zẹjlẹgo gando gbẹtọ lẹ po gbẹzan yetọn lẹ po go ṣigba bo nọ dọ vude gando nunọwhinnusẹ́n po linlẹn gbigbọmẹ tọn lẹ po go wẹ ya? Be ehe sọgan yin ohia de dọ mí to ojlo glanglan tindo to whẹho mẹdetiti tọn mẹdevo lẹ tọn mẹ wẹ ya?—1 Pita 4:15.
7. Etẹwẹ mí sọgan plọn sọn kandai nọvisunnu ao Josẹfu tọn lẹ tọn mẹ gando ahun mítọn whiwhla go?
7 Lẹnnupọn do nuhe jọ to whẹndo daho dopo mẹ ji. Visunnu mẹho ao Jakobu tọn lẹ “ma sọgan yí jijọho do dọho hlan” Josẹfu heyin nọvisunnu pẹvi yetọn. Etẹwutu? Yé to awuwhàn na visunnu yiwanna hugan otọ́ yetọn tọn wẹ e yin. To godo mẹ, to whenuena Jiwheyẹwhe hẹn Josẹfu kúdlọ lẹ, he dohia dọ e tindo nukundagbe Jehovah tọn, yé “sọ vọ́ wangbẹna ẹn deji.” (Gẹnẹsisi 37:4, 5, 11) Po kanyinylan po, yé sà nọvisunnu yetọn do kanlinmọgbenu. Enẹgodo, nado sọgan ṣinyọnnudo nuṣiwa yetọn, yé klọ otọ́ yetọn bo dọ na ẹn dọ gbekanlin ylankan de wẹ ko hù Josẹfu. Nọvisunnu ao Josẹfu tọn lẹ gboawupo nado whlá ahun yetọn to ojlẹ enẹ mẹ. Eyin mí nọ yawu mọhodọdo mẹdevo lẹ go, be enẹ ma na yin kunnudenu dọ mí tindo nuvẹun kavi awuwhàn to ahun mítọn mẹ ya? Mí dona tin to aṣeji bo na nọ gbadopọnna nuhe nọ tọ́n sọn onù mítọn mẹ bosọ dona nọ yawu de linlẹn he ma sọgbe depope sẹ.
8. Etẹwẹ na gọalọna mí nado gbadopọnna ahun mítọn eyin mí wá jai jẹ lalodido mẹ?
8 Dile etlẹ yindọ “e glo Jiwheyẹwhe nado dolalo,” gbẹtọvi mapenọ lẹ nọ dolalo. (Heblu lẹ 6:18) ‘Gbẹtọ lẹpo wẹ yin lalonọ,’ wẹ psalm-kàntọ doavigbe dọ. (Psalm 116:11) Yèdọ apọsteli Pita tlẹ gbọn lalo dali mọ́n Jesu whlaatọ̀n. (Matiu 26:69-75) Enẹwutu, mí dona tin to aṣeji nado dapana lalodido, na Jehovah gbẹwanna “odẹ́ lalo tọn.” (Howhinwhẹn lẹ 6:16-19) Eyin e wá jọ bọ mí na dolalo janwẹ, e na yọnhugan nado gbadopọnna nuhe zọ́n. Be na obu gbẹtọ tọn wutu wẹ ya? Be na mí na yin yasana wutu wẹ ya? Be na mí ma jlo dọ yinkọ mítọn ni gble kavi na ṣejannabi wutu wẹ ya? Depope he whẹho lọ na yin, lehe e sọgbe sọ dọ mí ni lẹnnupọn deji, bo gbọn whiwhẹ dali yigbe nuṣiwa mítọn tọn, bo vẹvẹna jona sọn Jehovah dè, bo dín alọgọ etọn nado duto madogán mítọn ji! “Mẹho agun tọn lẹ” na tin to otẹn he yọnhugan mẹ nado gọalọnamẹ.—Jakobu 5:14.
9. Etẹwẹ odẹ̀ mítọn lẹ sọgan dohia gando ahun mítọn go?
9 To gblọndo mẹ hlan nuyọnẹn po oyọnẹn po he Ahọlu jọja Sọlọmọni biọ, Jehovah dọmọ: “Na ehe ko tin to [ahun] towe mẹ wutu, podọ hiẹ ma ko biọ adọkun, kavi nuyọnna, kavi gbégbòna . . . , nuyọnẹn po oyọnẹn po yè na hlan we; yẹn nasọ na adọkun we, po nuyọnna po.” (2 Otannugbo lẹ 1:11, 12) Jehovah yọ́n nuhe tin to ahun Sọlọmọni tọn mẹ sọn nuhe e biọ po dehe e ma biọ lẹ po mẹ. Etẹwẹ odẹ̀ he mí nọ hò hlan Jiwheyẹwhe lẹ nọ dehia gando ahun mítọn go? Be odẹ̀ mítọn lẹ nọ dohia dọ mí jlo oyọnẹn, nuyọnẹn, po wuntuntun po ya? (Howhinwhẹn lẹ 2:1-6; Matiu 5:3) Be dagbenu Ahọluduta tọn lẹ tin to ahun mítọn mẹ pẹkipẹki ya? (Matiu 6:9, 10) Eyin odẹ̀ mítọn lẹ lẹzun dọvọdọ tọn po dehe ma nọ wá sọn ahun mẹ po, ehe sọgan dohia dọ mí dona yí whenu zan nado lẹnayihamẹpọn do nuyiwa Jehovah tọn lẹ ji. (Psalm 103:2) Klistiani lẹpo wẹ dona tin to aṣeji nado yọ́n nuhe odẹ̀ yetọn nọ dohia.
Etẹwẹ Nuyiwa Mítọn lẹ Nọ Dohia?
10, 11. (a) Fie wẹ ayọdide po galilọ po nọ bẹjẹeji sọn? (b) Etẹwẹ na gọalọna mí ma nado ‘deayọ to ahun mẹ’?
10 E ko yin didọ dọ nuyiwa lẹ nọ do nususu hia hugan hogbe. Nuyiwa mítọn lẹ nọ dọ nususu gando nuhe mí yin to homẹ go. Di apajlẹ, to whẹho wiwejininọ tọn mẹ, nado whlá ahun mítọn bẹ nususu hẹn hugan didapana nuyiwa ogalilọ kavi ayọdide tọn de poun. To Yẹwhehodidọ Osó ji tọn mẹ, Jesu dọmọ: “Eyin mẹdepope pọ́n yọnnusi de nado wà núgbigble hẹ ẹ, é ko deayọ hẹ ẹ to ayiha etọn mẹ dote.” (Matiu 5:28) Nawẹ mí sọgan dapana ayọdide etlẹ yin to ahun mítọn mẹ gbọn?
11 Tọgbo nugbonọ Job ze apajlẹ dagbe de dai na Klistiani sunnu po yọnnu po he ko wlealọ lẹ. Matin ayihaawe, Job nọ tindo nuyiwa hẹ awhlivu lẹ bo tlẹ sọ nọ gbọn homẹdagbe dali gọalọna yé eyin yé tindo nuhudo alọgọ tọn. Ṣigba linlẹn ojlo zanhẹmẹ tọn tintindo to yé mẹ ma wà ayihamẹ na dawe tenọgligo-hẹntọ ehe pọ́n gbede. Etẹwutu? Na e ko magbe ma nado pọ́n yọnnu lẹ po wantuntun po wutu wẹ. “Yẹn basi alẹnu de hẹ nukun ṣie lẹ,” wẹ e dọ. “Nawẹ yẹn na pọ́n yọpọyọnnu do lò?” (Job 31:1) Mì gbọ mí ni basi alẹnu mọnkọtọn de hẹ nukun mítọn lẹ bosọ whlá ahun mítọn.
12. Nawẹ hiẹ sọgan yí Luku 16:10 zan gando ahun towe whiwhla go gbọn?
12 “Ewọ heyin nugbonọ to onú pẹvi tlala de mẹ, e na yin nugbonọ to onú susu mẹ ga,” wẹ Visunnu Jiwheyẹwhe tọn dọ, “podọ ewọ heyin mawadodonọ to onú pẹvi tlala de mẹ, sọ yin mawadodonọ to onú susu mẹ ga.” (Luku 16:10) Mọwẹ, mí dona gbeje walọyizan mítọn pọ́n to whẹho he whè taun egbesọegbesọ tọn lẹ mẹ, yèdọ etlẹ yin nuhe to jijọ to nuglọ to owhé mítọn gbè lẹ. (Psalm 101:2) To whenuena mí tin to aisinsin to owhé mítọn gbè, bo to televiziọn pọ́n, kavi to whenuena mí tin to Internet ji, be mí nọ hẹn ẹn diun dọ mí to tonusena tudohomẹnamẹ Owe-wiwe tọn he dọmọ: “Ṣigba galilọ, po mawé lẹpo po, kavi nukunkẹn, yè sọ ylọ oyín etọn to mì ṣẹnṣẹn ba blo, dile e jẹ na mẹwiwe lẹ do; na e bo yin ofẹ́n, kavi hogblo, kavi aslan-yìnyìn” ya? (Efesunu lẹ 5:3, 4) Podọ etẹwẹ dogbọn danuwiwa he sọgan tin to televiziọn kavi aihundida video tọn ji lẹ mẹ dali? Psalm-kàntọ lọ dọmọ “OKLUNỌ to dodonọ lẹ whlepọn: ṣigba mẹylankan po mẹhe yiwanna [danuwiwa] po ayiha etọn gbẹwanna.”—Psalm 11:5.
13. Avase tẹwẹ sọgbe to whenuena mí to nulẹnpọndo nuhe nọ tọ́n jẹgbonu sọn ahun mítọn mẹ lẹ ji?
13 “[Ahun] yin oklenọ hugan onú lẹpo, podọ e sọ yin awutunọ tupinpẹnnọ,” wẹ Jẹlemia dọ. (Jẹlemia 17:9) Oklenọ-yinyin ahun tọn sọgan sọawuhia to whenuena mí dín whẹjijọ na nuṣiwa mítọn lẹ, yí nukunpẹvi do pọ́n ylando lẹ, ze agbàn lọ do gbẹtọ-yinyin mítọn ji, kavi zinnudo nuwadotana mítọn lẹ ji hugan. Ahun tupinpẹnnọ de sọ penugo nado yin dẹgbè awenọ ga—yèdọ nado tindo nùflo he nọ dọ onú vivi lẹ, ṣigba bọ nuyiwa lẹ na gbọnvo. (Psalm 12:2; Howhinwhẹn lẹ 23:7) Lehe e yin nujọnu sọ dọ mí ni yin nugbonọ dile mí to dogbapọnna nuhe nọ tọ́n jẹgbonu sọn ahun mítọn mẹ lẹ!
Be Nukun Mítọn Yin Dopo Ya?
14, 15. (a) Etẹwẹ nukun heyin “dopo” zẹẹmẹdo? (b) Nawẹ hinhẹn nukun yin dopo nọ gọalọna mí nado whlá ahun mítọn gbọn?
14 “Nukun wẹ miyọngban agbasa tọn,” wẹ Jesu dọ. E yidogọ dọmọ: “Enẹwutu eyin nukun towe yin dopo, agbasa towe lẹpo pete na gọ́ na hinhọ́n.” (Matiu 6:22) Nukun heyin dopo nọ tin to yanwle, kavi lẹndai dopo ji, e ma nọ yin ayihafẹsẹna sọn e ji gba. Na nugbo tọn, nukun mítọn dona yin zizedo ‘ahọluduta lọ po dodo Jiwheyẹwhe tọn po dindin ji whẹ́.’ (Matiu 6:33) Eyin nukun mítọn mayin dopo, etẹwẹ sọgan jọ do ahun yẹhiadonu tọn mítọn go?
15 Lẹnnupọndo whẹho gbẹninọ tọn ji. Nubiọtomẹsi Klistiani tọn de wẹ e yin nado wleawuna nuhe whẹndo mítọn tindo nuhudo etọn lẹ. (1 Timoti 5:8) Ṣigba etẹwẹ lo eyin mí yin whiwhlepọn nado tindo nuhe tin to zoji lẹ, nuhe yọnhugan lẹ, podọ núdùdù, avọ̀, ohọ̀, po onú devo lẹ po he gbẹtọ lẹ nọ dín hugan? Be enẹ ma sọgan hẹn ahun po ayiha mítọn po zun kanlinmọ, bo hẹn sinsẹ̀n-bibasi mítọn ma nado yin ahundopo tọn ya? (Psalm 119:113; Lomunu lẹ 16:18) Etẹwutu mí nado hẹn alọnu ján to nukunpipedo nuhudo agbasa tọn lẹ go mẹ sọmọ bọ gbẹzan mítọn na yin zize sinai do whẹndo, ajọ́, po agbasanu lẹ po kẹdẹ ji? Flin ayinamẹ gbọdo lọ dọmọ: “Mì ni payi mìde go, vlavo [ahun] mìtọn nika yin yíyí gigọfla do doagbanna, po nùnùmú ogbẹ̀ tọn po, bọ azán lọ nado wá mì ji ajiji di omọ̀ de. Na mọwẹ e na wá yemẹpo ji do he nọ nọ̀ nukunmẹ aigba tọn ji lẹpo.”—Luku 21:34, 35.
16. Ayinamẹ tẹwẹ Jesu na gando nukun go, podọ etẹwutu?
16 Nukun yin kanṣiṣa nujọnu hodọdopọ tọn de na ayiha po ahun po. Nuhe ji mí zín nukun do sọgan yinuwado linlẹn, numọtolanmẹ, po nuyiwa mítọn lẹ po ji. To hogbe nuyijlẹdonugo tọn lẹ yiyizan mẹ, Jesu dlẹnalọdo huhlọn whlepọn nupinpọn tọn bo dọmọ: “Eyin nukun towe adusi tọn hẹn we dahli, sún in sẹ̀, bosọ dè e sọn ogo we: na e do ale na we na dopo awutugonu towe tọn ni dọ̀n, hú na yè ni ze agbasa towe lẹpo pete dlan [Gẹhẹnna] mẹ.” (Matiu 5:29) Mí dona glọnalina nukun ma nado gbọṣi nuhe ma sọgbe lẹ pinpọn ji. Di apajlẹ, mí ma dona nọ na ẹn dotẹnmẹ nado pọ́n nuhe yin awuwlena nado fọ́n numọtolanmẹ po ojlo he ma sọgbe lẹ po dote.
17. Nawẹ Kọlọsinu lẹ 3:5 yiyi-do-yizan mẹ na gọalọna mí nado whlá ahun mítọn gbọn?
17 Nugbo wẹ dọ, e mayin nukun kẹdẹ wẹ yin agbasagonu he nọ kọ̀n mí dopọ hẹ nuhe to yìyì to gbonu agbasa tọn lẹ gba. Agbasagonu devo lẹ, taidi alọdonugo po nusise po, nọ yí adà yetọn wà ga, podọ mí dona nọ basi hihọ́na agbasagonu mọnkọtọn lẹ lọsu ga. Apọsteli Paulu na tulimẹ dọmọ: “Enẹwutu mì nọ hẹn awutugonu mìtọn he tin to aihọn mẹ lẹ kú, galilọ, mawé, wantuntun, ojlo ylankan, po nukunkẹn po, heyin boṣiọ-sinsẹ̀n.”—Kọlọsinu lẹ 3:5.
18. Afọdide tẹlẹ wẹ mí dona ze gando linlẹn he ma sọgbe lẹ go?
18 Ojlo he ma sọgbe de sọgan fọ́n to nuglọ ayiha mítọn tọn mẹ pete. Nulinlẹnpọn do onú mọnkọtọn lẹ ji nọ saba hẹn ojlo he ma sọgbe lọ sinyẹn deji, bo nọ yinuwado ahun ji. “Whenẹnu, [ojlo ylankan] whenuena e mọho, e ji ylando.” (Jakobu 1:14, 15) Mẹsusu yigbe dọ lehe vijinu-yido-daihun nọ saba wá aimẹ gbọn niyẹn. Lehe e yin nujọnu dọ mí ni yí onú gbigbọmẹ tọn lẹ do gọ́ ayiha mítọn mẹ do sọ! (Filippinu lẹ 4:8) Podọ eyin linlẹn he ma sọgbe de fọ́n to ayiha mẹ janwẹ, mí dona tẹnpọn nado de e sẹ.
‘Sẹ̀n Jehovah po Ahun Pipé de Po’
19, 20. Nawẹ mí sọgan tindo kọdetọn dagbe to Jehovah sinsẹ̀n po ahun pipé de po mẹ gbọn?
19 To yọnhowhe etọn lẹ mẹ, Ahọlu Davidi dọna visunnu etọn dọmọ: “Hiẹ, Sọlọmọni visunnu ṣie, hiẹ ni yọ́n Jiwheyẹwhe otọ́ towe tọn, bo nọ yí [ahun] pipé de do sẹ̀n ẹn po otù jijlọ tọn de po: na OKLUNỌ to [ahun] lẹpo mẹ dinpọn, bosọ tunwun aṣava linlẹn tọn lẹ.” (1 Otannugbo lẹ 28:9) Sọlọmọni lọsu hodẹ̀ bo biọ ‘ahun tonusise tọn de.’ (1 Ahọlu lẹ 3:9) Etomọṣo, e pannukọn awusinyẹnnamẹnu nado hẹn ahun mọnkọtọn de go to gbẹzan etọn blebu mẹ.
20 Eyin mí na tindo kọdetọn dagbe to enẹ mẹ, e mayin dọ mí na tindo ahun he nọ hẹn homẹ Jehovah tọn hùn kẹdẹ de poun wẹ gba ṣigba mí sọ dona whlá ẹ. Nado sọgan wà ehe, mí dona hẹn nuflinmẹ he tin to Ohó Jiwheyẹwhe tọn mẹ lẹ do ahun mẹ pẹkipẹki—yèdọ ‘do ṣẹnṣẹn etọn.’ (Howhinwhẹn lẹ 4:20-22) Mí sọ dona yí i do basi aṣa nado nọ gbeje ahun mítọn pọ́n, bo nọ yí odẹ̀ do lẹnnupọndo nuhe hodidọ po nuyiwa mítọn lẹ po nọ dehia ji. Nulẹnpọn mọnkọtọn ma na tindo nuhọakuẹ depope gba eyin mí ma nọ dín alọgọ Jehovah tọn vẹkuvẹku nado basi vọjlado na awugbopo depope he mí mọ. Podọ lehe e yin nujọnu sọ dọ mí dona tin to aṣeji taun do nuhe mí nọ yí do ahun mẹ gbọn agbasagonu mítọn lẹ mẹ dali! To ehe wiwà mẹ, mí na tindo jide dọ ‘jijọho Jiwheyẹwhe tọn he hú nuyọnẹn lẹpo na whlá ahun mítọn po huhlọn nulẹnpọn tọn mítọn lẹ po to Klisti Jesu mẹ.’ (Filippinu lẹ 4:6, 7) Mọwẹ, mì gbọ mí ni magbe nado whlá ahun mítọn hugan onú devo depope he na yin whiwhla bosọ sẹ̀n Jehovah po ahun pipé de po.
Be Hiẹ Flin Ya?
• Naegbọn e yin nujọnu nado whlá ahun mítọn?
• Nawẹ dogbigbapọnna nuhe mí nọ dọ lẹ na gọalọna mí nado whlá ahun mítọn gbọn?
• Etẹwutu nukun mítọn dona yin “dopo”?
[Yẹdide to weda 23]
Etẹ go wẹ mí nọ saba dọho gando to lizọnyizọn kunnudegbe tọn mẹ, opli lẹ ji, podọ to whégbè?
[Yẹdide to weda 25]
Nukun heyin dopo ma nọ yin ayihafẹsẹna gba