Be Hiẹ Tindo ‘Gbigbọ Teninọ Tọn’ Ya?
‘Omẹ nankọ wẹ mìwlẹ lo yin to nuwiwa walọ wiwe tọn po jijọ-di-Jiwheyẹwhe tọn lẹ po mẹ, dile mì to nukundo, bosọ to mizọnmizọn ji na wiwá azán Jehovah tọn tọn.’—2 PITA 3:11, 12.
1, 2. Apajlẹ tẹwẹ mí sọgan na nado basi dohia ‘gbigbọ teninọ tọn’ tintindo gando azán Jehovah tọn go?
YÍ NUKUN homẹ tọn do pọ́n whẹndo de he to nukundo jonọ delẹ he na wá dù núdùdù whèjai tọn hẹ yé. Ojlẹ he mẹ yé dona wá to sisẹpọ po awuyiya po. Alọnu asi lọ tọn ján to awuwiwlena núdùdù lẹ mẹ. Asu etọn po ovi yetọn lẹ po to alọgọ nado mọdọ onú lẹpo tin to titoji. Yemẹpo to jejeji. Mọwẹ, whẹndo lọ blebu to tenọpọn wiwá jonọ lọ lẹ tọn bosọ to nukundo núdùdù vivi po gbẹdido dagbe de po.
2 Taidi Klistiani lẹ, mí to tenọpọn nude he tlẹ sọ yin nujọnu hugan mọ. Etẹwẹ onú lọ? Mímẹpo wẹ to tenọpọn ‘azán Jehovah tọn’! Kaka e na do wá, mí dona tin taidi yẹwhegán Mika, he dọmọ: “Yẹn na nọ pọ́n hlan OKLUNỌ dè; yẹn na nọtepọn Jiwheyẹwhe whlẹngán ṣie tọn lọ.” (Mika 7:7) Be enẹ zẹẹmẹdo dọ mí dona bla alọ dogo wẹ ya? Lala. Nususu wẹ dona yin wiwà.
3. Sọgbe hẹ 2 Pita 3:11, 12, gbigbọ tẹwẹ Klistiani lẹ dona tindo?
3 Apọsteli Pita gọalọna mí nado tindo gbigbọ he sọgbe lọ dile mí to tenọ. E dọmọ: ‘Omẹ nankọ wẹ mìwlẹ lo yin to nuwiwa walọ wiwe tọn po jijọ-di-Jiwheyẹwhe tọn lẹ po mẹ, dile mì to nukundo, bosọ to mizọnmizọn ji hlan wiwá azán Jehovah tọn tọn.’ (2 Pita 3:11, 12) Doayi e go dọ hodidọ ehe ma to ayihaawe dohia gando gbẹtọ wunmẹ he mí dona yin go gba. To wekanhlanmẹ awe Pita tọn he Jiwheyẹwhe gbọdo lẹ mẹ, e basi zẹẹmẹ gbẹtọ wunmẹ he Klistiani lẹ dona yin tọn. E sọ na tuli yé nado zindonukọn ‘to nuwiwa walọ wiwe tọn po jijọ-di-Jiwheyẹwhe tọn lẹ po mẹ.’ Dile etlẹ yindọ owhe 30 nkọ ko juwayi sọn whenue gbọ́n Jesu Klisti na ohia ‘vivọnu titonu ehe tọn,’ Klistiani lẹ ma dona gbọjọ to aṣejininọ yetọn mẹ gba. (Matiu 24:3) Yé dona to “nukundo, bosọ to mizọnmizọn ji” hlan wiwá azán Jehovah tọn tọn.
4. Etẹlẹ wẹ ‘tintin to mizọnmizọn ji na wiwá azán Jehovah tọn tọn’ bẹhẹn?
4 Hogbe Glẹki tọn heyin lilẹdo “to mizọnmizọn ji” tofi zẹẹmẹdo “do mizọnmizọn na” to paa mẹ. Nugbo wẹ dọ, mí ma sọgan “do mizọnmizọn na” azán Jehovah tọn to paa mẹ gba. Gando enẹ go, mí “ma yọ́n azán lọ kavi ojlẹ lọ” whenuena Jesu Klisti na wá nado hẹn whẹdida ṣẹ do kẹntọ Otọ́ etọn tọn lẹ ji. (Matiu 24:36; 25:13) Owe alọdlẹndonu tọn de basi zẹẹmẹ dọ hogbe dodonu tọn he mẹ “do mizọnmizọn na” wá sọn tofi zẹẹmẹdo “ ‘nado whlẹndo’ bo gbọnmọ dali tindo kanṣiṣa pẹkipẹki hẹ ‘nado yin zohunhunnọ, to jejeji, bo yin ahunmẹduna gando nude go.’ ” Enẹwutu Pita to tulina yisenọ hatọ lẹ nado tindo ojlo vẹkuvẹku na wiwá azán Jehovah tọn tọn. Yé sọgan wà ehe gbọn hinhẹn ẹn do ayiha mẹ gligli dali. (2 Pita 3:12) Mílọsu dona tindo ninọmẹ apọ̀nmẹ tọn dopolọ todin he “azán daho bosọ dobu OKLUNỌ tọn” ko sẹpọ tlala.—Joẹli 2:31.
Nọte to ‘Nuwiwa Walọ Wiwe Tọn lẹ’ Mẹ
5. Nawẹ mí sọgan dohia dọ mí jlo vẹkuvẹku nado mọ ‘azán Jehovah tọn’ gbọn?
5 Eyin mí jlo vẹkuvẹku nado lùn azán Jehovah tọn tọ́n, mí na do enẹ hia gbọn ‘nuwiwa walọ wiwe tọn po jijọ-di-Jiwheyẹwhe tọn’ mítọn lẹ po gblamẹ. Hodidọ lọ ‘nuwiwa walọ wiwe tọn lẹ’ sọgan flin mí ayinamẹ Pita tọn dọmọ: “Di ovi tonusetọ, to ma yí mìde do daṣa di wantuntun hohowhenu tọn to wunvi mìtọn mẹ: ṣigba le ewọ he ylọ mì yin wiwe do, mọwẹ mì ni yin wiwe do to walọ alọpa-alọpa popo mẹ; na yè ko wlanwe etọn dọ, Mì na yin wiwe, na wiwe wẹ yẹn.”—1 Pita 1:14-16.
6. Nado yin wiwe, etẹwẹ mí dona wà?
6 Nado yin wiwe, mí dona hẹn wiwejininọ go to agbasamẹ, apọ̀nmẹ, walọ mẹ, podọ to gbigbọmẹ. Be mí to awuwledaina ‘azán Jehovah tọn’ gbọn míde hinhẹn do wiweji taidi mẹhe ji yinkọ Jehovah tọn tin te lẹ ya? E ma nọ bọawu to egbehe nado hẹn wiwejininọ mọnkọtọn go na nujinọtedo walọyizan aihọn tọn lẹ to doyi vudevude wutu. (1 Kọlintinu lẹ 7:31; 2 Timoti 3:13) Be mí nọ doayi e go dọ vogbingbọn he tin to nujinọtedo walọyizan tọn mítọn po aihọn tọn lẹ po ṣẹnṣẹn to gbigblo deji ya? Eyin lala wẹ, mí dona payi. Be nujinọtedo mítọn lẹ, dile yé tlẹ yiaga hugan aihọn tọn lẹ, to didepo wẹ ya? Eyin mọwẹ, mí dona ze afọdide nujikudo tọn nado jla whẹho lẹ do nado sọgan hẹn homẹ Jiwheyẹwhe tọn hùn.
7, 8. (a) Nawẹ mí sọgan wọnji nujọnu-yinyin mahẹ tintindo to ‘nuwiwa walọ wiwe tọn lẹ’ mẹ go gbọn? (b) Vọjlado tẹlẹ wẹ e sọgan biọ dọ mí ni basi?
7 Na yẹdide fẹnnuwiwa tọn sọgan yin mimọ to Internet ji to aliho he whlá lẹ mẹ wutu, mẹhe ma nọ mọ onú mawé mọnkọtọn to ojlẹ de mẹ wayi lẹ to “dotẹnmẹ hundote fẹnnuwiwa tọn he ma do dogbó lẹ” mọ todin, wẹ doto dopo dọ. Eyin mí nọ dín onú mawé mọnkọtọn lẹ to Internet ji, na jide tọn mí na to kọgbẹ́ gbedide Biblu tọn go ma nado “doalọ onú mawé de go.” (Isaia 52:11) Be mí na to ‘mizọnmizọn ji na wiwá azán Jehovah tọn’ nugbonugbo ya? Kavi be mí sọgan to azán enẹ sisẹ do nukọn to ayiha mítọn mẹ, bo to linlẹn dọ eyin mí tlẹ to ayiha mítọn hẹnflu po nuhe kudiho lẹ po, mí na gbẹ́ tindo whenu nado klọ́ míde wé wẹ ya? Eyin mí ko tindo nuhahun to adà ehelẹ mẹ, lehe e na yin niyaniyanu do sọ nado biọ to Jehovah si nado ‘de nukun mítọn sọn nuvọ́ lẹ pinpọn go bo na ogbẹ̀ mí to aliho edetiti tọn mẹ’!—Psalm 119:37.
8 Suhugan Kunnudetọ Jehovah tọn lẹ tọn, yọpọvu po mẹho po, to titẹdo nujinọtedo walọyizan tọn he yiaga Jiwheyẹwhe tọn lẹ go bo to didapana omọ̀ walọ mawé aihọn ehe tọn lẹ. To yinyọ́n niyaniya-yinyin ojlẹ mítọn tọn po ayinamẹ Pita tọn dọ ‘azán Jehovah tọn na wá di ajotọ’ po mẹ, yé nọ zindonukọn to ‘nuwiwa walọ wiwe tọn lẹ’ mẹ. (2 Pita 3:10) Nuwiwa yetọn lẹ nọ dohia dọ yé to ‘nukundo bosọ to mizọnmizọn ji na wiwá azán Jehovah tọn tọn.’a
Nọte to ‘Nuwiwa Jijọ-di-Jiwheyẹwhe Tọn lẹ’ Mẹ
9. Etẹwẹ jijọ-di-Jiwheyẹwhe dona whàn mí nado wà?
9 ‘Nuwiwa jijọ-di-Jiwheyẹwhe tọn lẹ’ lọsu yin onú titengbe eyin mí na hẹn azán Jehovah tọn do ayiha mẹ. “Jijọ-di-Jiwheyẹwhe” bẹ obu gbégbigbòna Jiwheyẹwhe tọn he nọ whàn mí nado wà nuhe jlọ to nukun etọn lẹ mẹ hẹn. Nugbonọ-yinyin hlan Jehovah wẹ nọ whàn mí nado wà nuwiwa jijọ-di-Jiwheyẹwhe tọn enẹlẹ. Ojlo etọn wẹ yindọ ‘gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.’ (1 Timoti 2:4) Jiwheyẹwhe “ma jlo dọ mẹdepope ni dọ̀n, adavo dọ omẹ popo ni wá lẹnvọjọ kọ̀n.” (2 Pita 3:9) Enẹwutu, be jijọ-di-Jiwheyẹwhe mítọn ma dona whàn mí nado dovivẹnu dogọ nado gọalọna gbẹtọ lẹ nado plọnnu gando Jehovah go bo hodo apajlẹ etọn ya?—Efesunu lẹ 5:1.
10. Naegbọn mí dona họ́ míde sọta ‘huhlọn oklọ adọkunnu lẹ tọn’?
10 Gbẹzan mítọn na gọ́ na nuwiwa jijọ-di-Jiwheyẹwhe tọn lẹ eyin mí nọ dín Ahọluduta Jiwheyẹwhe tọn whẹ́. (Matiu 6:33) Ehe nọ biọ dọ mí ni yí nukun jlẹkaji tọn do pọ́n agbasanu lẹ. Jesu na avase dọmọ: “Mì họ́ mìde, bosọ payi do nukunkẹn: to gege gbẹtọ tọn de mẹ ma wẹ ogbẹ̀ etọn nọte te sọn onú he ewọ tindo lẹ mẹ gba.” (Luku 12:15) Nugbo wẹ dọ e sọgan sinyẹn nado lẹndọ owanyi akuẹ tọn na tọ́nnukun na mí, ṣigba mí na wà dagbe nado doayi e go dọ ‘magbọjẹ aihọn ehe tọn po huhlọn oklọ adọkunnu lẹ tọn po’ sọgan “finyọ́n ohó” Jiwheyẹwhe tọn hù. (Matiu 13:22) E sọgan nọma bọawu nado mọ dandannu gbẹ̀mẹ tọn lẹ. Enẹwutu, to adà aihọn lọ tọn delẹ mẹ, mẹsusu nọ lẹndọ nado zan gbẹzan he pọnte de, yé dona sẹtẹn yì otò adọkun tọn de mẹ, vlavo bo tlẹ jo whẹndo yetọn do na owhe delẹ. Omẹ Jiwheyẹwhe tọn delẹ tlẹ ko lẹnnupọn to aliho ehe mẹ. Gbọn otò devo mẹ yìyì dali, yé sọgan penugo nado họ̀ gbẹdunu egbezangbe tọn lẹ na whẹndo yetọn. Ṣigba, etẹwẹ sọgan jọ do ninọmẹ gbigbọmẹ tọn mẹyiwanna yetọn he tin to whégbè lẹ tọn go? Matin anademẹ he sọgbe tatọ́-yinyin tọn to owhé lọ gbè, be yé na tindo gbigbọnọ-yinyin he nuhudo tin na nado lùn azán Jehovah tọn tọ́n ya?
11. Nawẹ azọ́nwatọ he yì tògodo de dohia dọ nuwiwa jijọ-di-Jiwheyẹwhe tọn lẹ yin nujọnu hugan adọkun gbọn?
11 Philippines-nu de he yì tògodo na agbasazọ́n wutu plọn nugbo Biblu tọn sọn Kunnudetọ Jehovah tọn lẹ dè to Japon. To nupinplọn gando azọngban tatọ́-yinyin tọn lẹ go dile Biblu dọ do, e mọdọ emi dona gọalọna whẹndo emitọn nado lẹzun Jehovah sẹ̀ntọ lẹ. (1 Kọlintinu lẹ 11:3) Asi etọn he tin to owhé to Philippines jẹagọdo yise yọyọ etọn sinsinyẹn bo jlo dọ e ni nọ do akuẹ hlan poun kakati nado wá whé nado plọn nuyise Biblu tọn etọn lẹ whẹndo lọ. Ṣigba, na niyaniya-yinyin ojlẹ lọ tọn po owanyi he e tindo na mẹyiwanna etọn lẹ po whàn ẹn wutu, sunnu lọ lẹkọyi whé. Homẹfa etọn to nuyiwa hẹ whẹndo etọn po owanyi po mẹ yin ahọsuna. To madẹnmẹ, whẹndo etọn yin kinkọndopọ to sinsẹ̀n-bibasi nugbo mẹ, bọ asi etọn sọ biọ lizọnyizọn whenu-gigọ́ tọn mẹ.
12. Naegbọn mí dona ze dagbenu gbigbọmẹ tọn lẹ do otẹn tintan mẹ?
12 Ninọmẹ mítọn sọgan yin yiyijlẹdo mẹhe tin to ohọ̀ he to miyọ́n ji de mẹ lẹ tọn go. Be nuyọnẹnnu wẹ e na yin nado to wezundo lẹdope nado bẹ nutindo agbasa tọn lẹ sọn ohọ̀ he to fifiọ bo na jai to madẹnmẹ de mẹ ya? Kakatimọ, be e ma na yin ogbẹ̀ lẹ whinwhlẹngán wẹ na yin nujọnu hugan lọ—yèdọ míwlẹ tọn po hagbẹ whẹndo mítọn tọn lẹ po gọna mẹdevo he tin to owhé lọ gbè lẹ tọn ya? Eyọn, titonu ylankan ehe na jai to madẹnmẹ, podọ ogbẹ̀ lẹ tin to owù mẹ. To ehe yinyọnẹn mẹ, mí dona ze dagbenu gbigbọmẹ tọn lẹ do otẹn tintan mẹ bo yí zohunhun do ze ayidonugo do azọ́n yẹwhehodidọ-Ahọluduta tọn he na whlẹn ogbẹ̀ lẹ gán lọ ji.—1 Timoti 4:16.
Mí Ma Dona ‘Tindo Oblọ’
13. Ninọmẹ tẹmẹ wẹ mí na jlo nado tin te to whenuena azán Jehovah tọn na wá?
13 To nuzinzindo nujọnu-yinyin gbigbọ teninọ tọn tintindo ji mẹ, Pita dọmọ: “Mẹyiwanna emi, le mìwlẹ to tenọpọn onú helẹ, mì yin vivẹnunọ, na [Jiwheyẹwhe] nido mọ mì matin oblọ podọ matin apà podọ to jijọho mẹ.” (2 Pita 3:14, NW) To yidogọ mẹ na ayinamẹ etọn nado nọ tindo mahẹ to nuwiwa walọ wiwe po jijọ-di-Jiwheyẹwhe tọn lẹ po mẹ, Pita zinnudo nujọnu-yinyin yinyin mimọ gbọn Jehovah dali to godo mẹ nado yin mẹhe ohùn họakuẹ Jesu tọn ko klọwé ji. (Osọhia 7:9, 14) Ehe nọ biọ dọ omẹ lọ ni yí yise zan to avọ́sinsan Jesu tọn mẹ bo lẹzun devizọnwatọ he klan ede do wiwe na Jehovah bo yí baptẹm de.
14. Etẹlẹ wẹ ‘oblọ matindo’ bẹhẹn?
14 Pita dotuhomẹna mí nado dovivẹnu nado yin mimọ “matin oblọ.” Be mí to avọ̀ walọyizan po gbẹtọ-yinyin Klistiani tọn mítọn po hẹn do wiweji, bọ e ma to yinyin hinhẹn kudiho gbọn aihọn dali ya? Eyin mí mọ oblọ de to avọ̀ mítọn lẹ mẹ, mí nọ tẹnpọn nado de e sẹ to afọdopolọji. Eyin avọ̀ he mí yiwanna taun de wẹ tindo oblọ lọ, mí nọ yí sọwhiwhe do yàn ẹn. Be mí nọ yinuwa to aliho dopolọ mẹ eyin avọ̀ Klistiani tọn mítọn wá tindo oblọ, na madogán gbẹtọ-yinyin tọn kavi walọyizan delẹ wutu ya?
15. (a) Naegbọn Islaelivi lẹ dona basi okẹ̀yẹ̀ lẹ do tónu avọ̀ yetọn lẹ tọn? (b) Naegbọn devizọnwatọ egbezangbe Jehovah tọn lẹ gbọnvo?
15 Islaelivi lẹ dona basi “okẹ̀yẹ̀ do tónu avọ̀ yetọn lẹ tọn” bo “yí kansislo avọ̀-juju tọn de do okẹ̀yẹ̀ tónu dopodopo tọn.” Etẹwutu? Na yé nido flin gbedide Jehovah tọn lẹ, bo setonuna yé, bosọ “yin wiwe” hlan Jiwheyẹwhe yetọn. (Osọha lẹ 15:38-40) Taidi devizọnwatọ egbezangbe Jehovah tọn lẹ, mí gbọnvona aihọn na mí nọ setonuna osẹ́n po nunọwhinnusẹ́n Jiwheyẹwhe tọn lẹ po wutu. Di dohia, mí nọ hẹn wiwejininọ walọyizan tọn go, bo nọ na sisi wiwe-yinyin ohùn tọn, bosọ nọ dapana boṣiọ-sinsẹ̀n wunmẹ lẹpo. (Owalọ lẹ 15:28, 29) Mẹsusu nọ na sisi mí na gbemima nujikudo tọn mítọn nado hẹn wiwejininọ mítọn go.—Jakobu 1:27.
Mí Ma Dona ‘Tindo Apà’
16. Etẹwẹ mídelẹ hinhẹn “matin apà” bẹhẹn?
16 Pita sọ dọ dọ mí dona yin mimọ “matin apà.” Nawẹ enẹ yọnbasi gbọn? To paa mẹ, oblọ de sọgan yin kiklọ sẹ, ṣigba e ma yọnbasi nado klọ́ ohia apà tọn sẹ gba. Apà nọ dohia dọ nude jẹdò to homẹ. Apọsteli Paulu na tuli Klistiani hatọ Filippinu lẹ dọmọ: “Mì nọ wà onú popo matin hùnhlún po avùn po. Na mì nido yin omẹ mahuwhẹ, omẹ mawàylan, ovi Jiwheyẹwhe tọn lẹ, madowhẹ to okọ̀ to akọta jijọ gbíngbánnọ po bublunọ po ṣẹnṣẹn, mẹhe ṣẹnṣẹn mì to wunhọ́n te di hinhọ́n to aihọn mẹ lẹ.” (Filippinu lẹ 2:14, 15) Eyin mí hodo ayinamẹ enẹ, mí na dapana nuhlundọ po nudindọn po bo na sẹ̀n Jiwheyẹwhe po mẹwhinwhàn wiwe ṣeke de po. Owanyi na Jehovah po kọmẹnu mítọn lẹ po na sisẹ mí nado dọyẹwheho “wẹndagbe ahọludu tọn he.” (Matiu 22:35-40; 24:14) Humọ, mí na to wẹndagbe lọ lá zọnmii dile etlẹ yindọ suhugan gbẹtọ lẹ tọn sọgan nọma mọnukunnujẹ nuhewutu mí to whenu mítọn yizan nado gọalọna mẹdevo lẹ nado plọnnu gando Jiwheyẹwhe po Ohó etọn, Biblu po go mẹ.
17. Etẹwẹ dona yin mẹwhinwhàn mítọn to whenuena mí to vivẹnudo nado pegan na lẹblanulọkẹyi lẹ to agun Klistiani tọn mẹ?
17 Na mí jlo na yin mimọ “matin apà” wutu, mí dona gbeje mẹwhinwhàn mítọn to yanwle mítọn lẹpo mẹ pọ́n. Mí ko jo aliho he mẹ aihọn nọ wà onú lẹ te na whẹwhinwhẹ́n ṣejannabi tọn lẹ wutu dai, taidi kanvinván nado yin adọkunnọ bo diyin. Eyin mí to vivẹnudo nado pegan na lẹblanulọkẹyi lẹ to agun Klistiani tọn mẹ, mì gbọ mẹwhinwhàn mítọn lẹ ni wé bosọ gbọ mí ni nọ yin whinwhàn to whepoponu gbọn owanyi na Jehovah podọ na mẹdevo lẹ dali. Homẹmiọnnamẹnu wẹ e yin nado mọ sunnu gbigbọnọ he yí ayajẹ po ojlo whiwhẹ tọn po do ‘to vivẹnudo nado pegan na otẹn nugopọntọ tọn’ lẹ nado sẹ̀n Jehovah po yisenọ hatọ yetọn lẹ po. (1 Timoti 3:1; 2 Kọlintinu lẹ 1:24) Na nugbo tọn, mẹhe pegan nado sẹ̀n taidi mẹho lẹ ‘nọ yìn lẹngbọpa Jiwheyẹwhe tọn po ojlo po; e mayin adọwhẹ́n tọn gba, adavo ojlo zogbe tọn; yé masọ nọ yí yede do basi ogán do ogú Jiwheyẹwhe tọn ji, ṣigba nọ yin ohia lẹ hlan lẹngbọpa lọ.’—1 Pita 5:1-4.
Mí Dona Tin “to Jijọho Mẹ”
18. Jẹhẹnu tẹlẹ wẹ Kunnudetọ Jehovah tọn lẹ yin yinyọnẹn na hugan?
18 To godo mẹ, Pita dọ dọ mí dona yin mimọ “to jijọho mẹ.” Nado sọgan nọgbẹ̀ sọgbe hẹ nubiọtomẹsi ehe, mí dona tin to jijọho mẹ hẹ Jehovah po kọmẹnu mítọn lẹ po. Pita zinnudo nujọnu-yinyin ‘owanyi he hunzo tintindo na ode awetọ’ po tintin to jijọho mẹ hẹ Klistiani hatọ lẹ po ji. (1 Pita 2:17; 3:10, 11; 4:8; 2 Pita 1:5-7) Nado tin to jijọho mẹ, mí dona yiwanna ode awetọ mítọn. (Johanu 13:34, 35; Efesunu lẹ 4:1, 2) Owanyi po jijọho mítọn po nọ sọawuhia taun to plidopọ akọjọpli tọn mítọn lẹ whenu. To akọjọpli de whenu to Costa Rica to 1999, nusàtọ de to agahun-glintẹn lọ gblehomẹ na Kunnudetọ otò lọ mẹ tọn he to kuavọdona afọzedaitọ lẹ ma yọnẹn bo nọte to nusisà etọn lẹ nukọn wutu. Ṣigba, to wunkẹngbe e doayi owanyi po jijọho he sọawuhia to kuavọdonamẹ zohunhunnọ he afọzedaitọ lọ lẹ mọyi mẹ, dile etlẹ yindọ Kunnudetọ otò lọ mẹ tọn lẹ ma yọ́n yé dai. To azán godo tọn gbè, nusàtọ lọ lọsu kọnawudopọ to kuavọdonamẹ lọ mẹ bosọ biọ plọnmẹ Biblu de.
19. Naegbọn e yin onú titengbe nado doafọna jijọho hẹ yisenọ hatọ lẹ?
19 Ahundopo yiyido doafọna jijọho hẹ mẹmẹsunnu po mẹmẹyọnnu gbigbọmẹ tọn mítọn lẹ po sọgan yinuwado lehe mí to tenọpọn azán Jehovah tọn po aihọn yọyọ dopagbe etọn lọ po vẹkuvẹku do ji. (Psalm 37:11; 2 Pita 3:13) Mí ni dọ dọ e sinyẹnawuna mí nado tin to jijọho mẹ hẹ yisenọ hatọ de. Be mí sọgan pọnnukọnhlan dọ mí to pọnọ́ hẹ ẹ to jijọho mẹ to Paladisi mẹ ya? Eyin mẹmẹsunnu de ṣinuwa do mí, mí dona ‘gbọwhẹ hẹ ẹ’ to niyaniya mẹ. (Matiu 5:23, 24) Mọwiwa yin onú titengbe eyin mí jlo na tin to jijọho mẹ hẹ Jehovah.—Psalm 35:27; 1 Johanu 4:20.
20. Aliho tẹlẹ mẹ wẹ ‘gbigbọ teninọ tọn’ dona yin didohia te?
20 Be mí ‘to nukundo, bosọ to mizọnmizọn ji hlan wiwá azán Jehovah tọn’ ya? Ojlo vẹkuvẹku mítọn nado mọ opodo ylanwiwa tọn nọ yin didohia gbọn gbigbọṣi wiweji to aihọn mawé tọn ehe mẹ dali. Humọ, ojlo zògbè mítọn na wiwá azán Jehovah tọn podọ na ogbẹ̀ to gandudu Ahọluduta tọn glọ nọ yin didohia gbọn nuwiwa jijọ-di-Jiwheyẹwhe tọn mítọn lẹ dali. Podọ nukundido mítọn nado nọgbẹ̀ to aihọn yọyọ jijọho tọn lọ mẹ nọ yin didohia to afọdidona jijọho hẹ sinsẹ̀n-basitọ hatọ mítọn lẹ mẹ todin. To aliho enẹlẹ mẹ, mí nọ dohia dọ mí tindo ‘gbigbọ teninọ tọn’ bosọ ‘to mizọnmizọn ji hlan wiwá azán Jehovah tọn tọn.’
[Nudọnamẹ Odò Tọn]
a Di apajlẹ, pọ́n Atọ̀họ̀-Nuhihọ́ Lọ Tọn 1er janvier, 2000, weda 16 po Annuaire des Témoins de Jéhovah 1997, weda 51 po.
Be Hiẹ Flin Ya?
• Etẹwẹ e zẹẹmẹdo nado ‘tin to mizọnmizọn ji na wiwá azán Jehovah tọn tọn’?
• Nawẹ ‘gbigbọ teninọ tọn’ nọ yin didohia to walọyizan mítọn mẹ gbọn?
• Naegbọn ‘nuwiwa jijọ-di-Jiwheyẹwhe tọn lẹ’ yin nujọnu?
• Etẹlẹ wẹ mí dona wà na Jehovah nido mọ mí ‘matin oblọ podọ matin apà podọ to jijọho mẹ’?
[Yẹdide to weda 11]
‘Gbigbọ teninọ tọn’ nọ yin didohia to nuwiwa walọ wiwe tọn lẹ mẹ
[Yẹdide to weda 12]
Azọ́n yẹwhehodidọ Ahọluduta tọn nọ whlẹn ogbẹ̀ gán
[Yẹdide to weda 14]
Dile mí to tenọpọn azán Jehovah tọn, mì gbọ mí ni doafọna jijọho hẹ mẹdevo lẹ