Kanbiọ lẹ sọn Wehiatọ lẹ Dè

Nukun tẹwẹ agun Klistiani tọn nọ yí do pọ́n adọwhẹ́n?

Ohó Jiwheyẹwhe tọn gblewhẹdo ahànnumu po adọwhẹ́n po bo do yé hia taidi walọ he ma jẹ hẹ devizọnwatọ Jiwheyẹwhe tọn lẹ. Enẹwutu, nukun dopolọ wẹ agun Klistiani tọn nọ yí do pọ́n mẹhe lẹzun adọwhẹ́nnọ bo ma jlo na diọ po mẹhe peve to ahànnumu mẹ po. Ahànnumunọ po adọwhẹ́nnọ po ma sọgan yin apadewhe agun Klistiani tọn gba.

Howhinwhẹn lẹ 23:20, 21 dọmọ: “A tin to ahànnumunọ lẹ mẹ blo; to yé he [nọ yí nukunkẹn do dù olàn] lẹ mẹ. Na ahànnumunọ po adọ̀nọ po na zun wamọnọ: adidọnọ wẹ na yí nukija ṣinyọnna agbasa etọn.” Deutelonomi 21:20 dọho gando ‘adingbannọ podọ atẹnọ’ de go, he jẹ nado yin hùhù to Osẹ́n Mose tọn glọ. Sọgbe hẹ wefọ ehe, awe to nuyiwa atẹnọ he ma lẹnvọjọ ehe tọn lẹ mẹ wẹ yindọ “duvanọ [kavi adọwhẹ́nnọ] de wẹ ewọ, podọ ahànnumunọ.” E họnwun dọ to Islaeli hohowhenu tọn mẹ, adọwhẹ́n nọ yin pinpọnhlan taidi walọyizan he ma jẹ hẹ mẹhe jlo na sẹ̀n Jiwheyẹwhe lẹ.

Ṣigba, etẹwẹ adọwhẹ́n bẹhẹn, podọ etẹwẹ Owe-wiwe Glẹki tọn lẹ dọ gando whẹho ehe go? Adọwhẹ́nnọ yin zẹẹmẹ basina taidi “mẹhe tindo aṣa lọ nado nọ yí nukunkẹn po ojlo zogbe po do dùnú bo nùahàn.” Enẹwutu, mí dona hẹn do ayiha mẹ dọ wunmẹ nukunkẹn tọn de wẹ adọwhẹ́n yin, podọ Ohó Jiwheyẹwhe tọn dọna mí dọ “nukunkẹnnọ lẹ” ma na dugu Ahọluduta Jiwheyẹwhe tọn. (1 Kọlintinu lẹ 6:9, 10; Filippinu lẹ 3:18, 19; 1 Pita 4:3) Humọ, to whenuena apọsteli Paulu na avase Klistiani lẹ sọta “azọ́n agbasalan tọn lẹ” wiwà, e donù “ahànnumu, gbẹduzẹjlẹgo po onú mọhunkọ lẹ po” go. (Galatianu lẹ 5:19-21) Núdùdù zẹjlẹgo nọ saba zọnpọ hẹ ahànnumu po gbẹduzẹjlẹgo po. To yidogọmẹ, ayihaawe matin dọ adọwhẹ́n yin dopo to nuhe Paulu ylọdọ “onú mọhunkọ lẹ” mẹ. Dile e yin do na “azọ́n agbasalan tọn” devo lẹ, Klistiani he yin yinyọnẹn gbayipe taidi adọwhẹ́nnọ bosọ gbọn tasinsinyẹn dali gbẹ́ nado jo walọyizan nukunkẹn tọn etọn do dona yin didesẹ sọn agun mẹ.—1 Kọlintinu lẹ 5:11, 13.a

Dile etlẹ yindọ Biblu dohia dọ alọ dopolọ ji wẹ ahànnumunọ po adọwhẹ́nnọ po tin te, ahànnumunọ nọ bọawu yinyọnẹn hugan adọwhẹ́nnọ. Ohia ahànnumu tọn lẹ nọ saba to gbangba klòlò. Ṣigba, e nọ vẹawu taun nado yọ́n obá he mẹ mẹde ko peve to adọwhẹ́n mẹ jẹ na ehe ma sọgan yin yinyọnẹn gbọn awusọhia gbonu tọn poun dali. Enẹwutu, nukunpipedo whẹho adọwhẹ́n tọn lẹ go na biọ dọ mẹho agun tọn lẹ ni yí sọwhiwhe po wuntuntun po zan taun.

Di apajlẹ, lanmẹ-mimọ zẹjlẹgo sọgan yin ohia adọwhẹ́n tọn, ṣigba e ma nọ yinmọ to whepoponu gba. Azọ̀n sọgan zọ́n bọ mẹde na pẹnzin zẹjlẹgo. Yè sọ sọgan dugu kiklo tọn sọn mẹjitọ lẹ dè. Mí sọ dona hẹn ẹn do ayiha mẹ dọ ninọmẹ agbasa tọn de wẹ lanmẹ-mimọ yin, to whenuena adọwhẹ́n yin ayilinlẹn apọ̀nmẹ tọn. Lanmẹ-mimọ yin zẹẹmẹ basina taidi “ninọmẹ mẹhe klo zẹjlẹgo to agbasamẹ tọn,” to whenuena adọwhẹ́n zẹẹmẹdo “nukunkẹn kavi gbẹdudu zẹjlẹgo.” Enẹwutu, pọndohlan he mẹde tindo gando núdùdù go wẹ nọ do adọwhẹ́n hia, e ma yin zínpinpẹn mẹlọ tọn gba. Gbẹtọ sọgan nọma mọlanmẹ zẹjlẹgo kavi tlẹ yin omẹ tlẹ́lẹ ṣogan bo yin adọwhẹ́nnọ. Humọ, nuhe nọ yin pinpọnhlan taidi zínpinpẹn kavi kiklo he sọgbe gbọnvo taun sọn nọtẹn de mẹ jẹ devo mẹ.

Etẹwẹ yin ohia adọwhẹ́n tọn lẹ? Mẹhe yin adọwhẹ́nnọ nọ gboawupo gbọzangbọzan nado dava ede, bo tlẹ nọ yí nukunkẹn do bẹ núdù sọmọ bọ e nọ lẹ́n kavi jẹazọ̀n. Mawazẹjlẹgo matindo etọn nọ dohia dọ masin he e to kinkọndo Jehovah po yinkọ dagbe omẹ Etọn lẹ tọn po go ma nọ duahunmẹna ẹn gba. (1 Kọlintinu lẹ 10:31) To alọ devo mẹ, mẹhe nọ dùnú zẹjlẹgo vlavo to whedelẹnu ma na yin pinpọnhlan to afọdopolọji taidi “nukunkẹnnọ” gba. (Efesunu lẹ 5:5) Etomọṣo, to gbigbọ Galatianu lẹ 6:1 tọn mẹ, Klistiani mọnkọtọn sọgan tindo nuhudo alọgọ tọn. Paulu dọmọ: “Mẹmẹsunnu emi, yèdọ eyin yè wle mẹde to ylando depope mẹ, mì mẹhe yin gbigbọnọ lẹ ni hẹn omẹ mọnkọtọn gọ̀ do otẹn etọn mẹ to gbigbọ walọmimiọn tọn mẹ.”

Naegbọn ayinamẹ Biblu tọn nado dapana núdùdù zẹjlẹgo do yin nujọnu taun to egbehe? Whẹwhinwhẹ́n lọ wẹ yindọ, Jesu na avase titengbe gando ojlẹ mítọn go dọmọ: “Mì ni payi mìde go, vlavo ayiha mìtọn nikaa yin yíyí gigọfla do doagbanna, [po núdùdù zẹjlẹgo po], po núnùmú ogbẹ̀ tọn po, bọ azán lọ nado wá mì ji ajiji di omọ̀ de.” (Luku 21:34, 35) Vivẹnudido ma nado peve to núdùdù zẹjlẹgo mẹ yin aliho tangan dopo nado họ̀nna gbẹzan he nọ gbleawunamẹ to gbigbọ-liho.

Hùwhẹ kavi jlẹkajininọ yin jẹhẹnu Klistiani tọn de. (1 Timoti 3:2, 11) Enẹwutu, mí deji dọ Jehovah na gọalọna mẹdepope he nọ dovivẹnu vẹkuvẹku nado yí ayinamẹ Biblu tọn do yizan mẹ gando walọyizan jlẹkaji tọn go to dùdù po nùnù po mẹ.—Heblu lẹ 4:16.

[Nudọnamẹ Odò Tọn]