Mì Nọte Gligli po Nujikudo Mlẹnmlẹn Po
Yíyí Nudọnamẹ He Wá Do Ganmẹ lẹ Do Gọalọna Jọja Lẹ
EPAFLA yin Klistiani owhe kanweko tintan whenu tọn de he ko basi gbejizọnlin yì Lomu. Ṣigba, na whẹwhinwhẹ́n dagbe wutu, linlẹn etọn lẹ nọ gbẹ́ lẹkọyi Kọlọsi, heyin tòdaho de to Asia Pẹvi. E ko dọ yẹwheho wẹndagbe tọn to finẹ podọ matin ayihaawe e ko gọalọna Kọlọsinu delẹ nado lẹzun devi Jesu Klisti tọn lẹ. (Kọlọsinu lẹ 1:7) Epafla yin ahunmẹduna sisosiso dogbọn yisenọ hatọ he tin to Kọlọsi lẹ dali. Ehe sọgan yin mimọ to wekanhlanmẹ apọsteli Paulu tọn he e wlan hlan yé sọn Lomu mẹ dọmọ: “Epafla . . . dọnudo mì, bosọ yí odẹ̀ vivẹ́ do to azọ́nwa na mì whepoponu dọ, na mìwlẹ ni pegan bosọ sọgbe to ojlo Jiwheyẹwhe tọn lẹpo mẹ.”—Kọlọsinu lẹ 4:12.
Mọdopolọ, otọ́ po onọ̀ Klistiani egbezangbe tọn lẹ po nọ hodẹ̀ vẹkuvẹku na dagbemẹ-ninọ gbigbọmẹ ovi yetọn lẹ tọn. Mẹjitọ lẹ nọ dovivẹnu nado dó owanyi na Jiwheyẹwhe do ahun jọja yetọn lẹ tọn mẹ na yé nido sọgan lẹzun mẹhe lodo to yise mẹ.
Jọja Klistiani susu wẹ ko biọ alọgọ nado pehẹ avùnnukundiọsọmẹnu he yé nọ pannukọn to wehọmẹ po fidevo lẹ po. Viyọnnu owhe-15-mẹvi dopo dọmọ: “Nuhahun mítọn lẹ to yinylan deji. Ogbẹ̀ gọna obu taun. Mí tindo nuhudo alọgọ tọn!” Be obiọ jọja mọnkọtọn lẹ tọn po odẹ̀ mẹjitọ Klistiani lẹ tọn po ko mọ gblọndo yí ya? Mọwẹ! Anademẹ he wá sọn Biblu mẹ lẹ ko yin awuwlena gbọn “afanumẹ nugbonọ, nuyọnẹntọ” lọ gblamẹ. (Matiu 24:45) Hosọ ehe donù owe delẹ go he ko gọalọna jọja fọtọ́n donu kanweko lẹ nado ‘nọte gligli po nujikudo mlẹnmlẹn po.’ Mì gbọ mí ni gbadopọnna vude to owe helẹ mẹ.
“Mì Pọ́n . . .Kunnudetọ Yọyọ 15 000!”
To août 1941, gbẹtọ 115 000 wẹ plidopọ to St. Louis, Missouri, to Amẹlika, na plidopọ Kunnudetọ Jehovah tọn lẹ tọn he klohugan he nkọtọn ma ko yin bibasi pọ́n kakajẹ whenẹnu. To azán he gbọngodo, bo yin yiylọdọ “Azán Ovi lẹ Tọn” gbè, nudi ovi 15 000 wẹ sinai do oplò lọ nukọn bo dotoai po sọwhiwhe po to whenuena Joseph F. Rutherford dọho do hosọ lọ “Ovi Ahọlu lọ Tọn Lẹ” ji. To whenuena hodidọ etọn jei vivọnu, Rutherford he tindo owhe-71 to whenẹnu dọho to kọnugbè otọ́ de tọn mẹ dọmọ:
“Mì ovi lẹpo . . . he ko yigbe . . . nado setonuna Jiwheyẹwhe po Ahọlu etọn po lẹ, ni jaale bo fọ́nṣite.” Ovi lẹ fọ́nṣite dopọ. Mẹmẹsunnu Rutherford lá dọmọ: “Mì pọ́n kunnudetọ Ahọluduta lọ tọn yọyọ he hugan 15 000 lẹ!” Pẹhiho bẹjẹeji sinsinyẹn. Hodọtọ lọ yidogọ dọmọ: “Mìmẹpo he na wà nuhe go mì pé lẹpo nado dọna mẹdevo lẹ dogbọn ahọluduta Jiwheyẹwhe tọn dali lẹ . . . , ni jaale bo dọ Mọwẹ.” Ovi lẹ yigbe po gbèzeyiaga po dọ “Mọwẹ!” Enẹgodo e ze owe yọyọ lọ Enfants (Ovi lẹ) daga, ehe yin alọkẹyi po pẹhiho gaa de po.
To hodidọ he whànmẹ ehe godo, jọja lẹ yì oplò lọ ji, fie Mẹmẹsunnu Rutherford ze vọkan owe yọyọ lọ tọn dopodopo do alọmẹ na yé te taidi nunina de. Ninọmẹ lọ hẹn ayajẹ mẹplidopọ lẹ tọn gọfla. Dopo to mẹhe tin to nujijọ lọ tẹnmẹ dọmọ: “Ahun sinsinyẹnnọ lẹ kẹdẹ wẹ ma na yin whinwhàn to whenuena e mọ lehe jọja lẹ to jide mlẹnmlẹn po yise yetọn po [dohia] to Jiwheyẹwhe yetọn, Jehovah mẹ do.”
Jọja 1 300 wẹ yí baptẹm to plidopọ ayidego tọn enẹ ji, to yẹhiadonu mẹ na klandowiwe yetọn hlan Jehovah. Susu to yé mẹ gbẹ́ lodo to yise mẹ kakajẹ egbehe. Delẹ to alọgọ to agun yetọn lẹ mẹ, devo lẹ yin mẹdezejotọ lẹ to Bẹtẹli, bọ devo lẹ to sinsẹ̀n taidi mẹdehlan lẹ to aigba jonọ tọn lẹ ji. Na nugbo tọn, “Azán Ovi lẹ Tọn” po owe yọyọ enẹ po tindo nuyiwadomẹji he dẹn-to-aimẹ de do ahun jọja susu tọn ji!
“Owe lẹ Wá Do Ganmẹ Pẹpẹ”
To owhe 1970 lẹ gblamẹ, Kunnudetọ Jehovah tọn lẹ zín owe atọ̀n devo lẹ jẹgbonu ehe yinuwa do ahun jọja fọtọ́n donu kanweko lẹ tọn ji. Owe lọ lẹ wẹ Didotóayi Hlan Mẹplọntọ Daho lọ, Jọja Whenu Towe—Mimọ Dagbe Hugan Lọ Yí Sọn e Mẹ, po Owe Ṣie heyin Otan Biblu Tọn po. To 1982, adà “Les jeunes s’interrogent . . . ” tọn jẹ awusọhia ji to linlinnamẹwe Réveillez-vous! mẹ. Hosọ helẹ ko whàn ahun jọja po mẹho susu lẹ tọn po nado yinuwa. “Yẹn nọ dopẹna Jiwheyẹwhe to whèjai lẹpo na e dike bọ owe ehelẹ yin zinzinjẹgbonu,” wẹ owhe-14-mẹvi de dọ. “Yẹn yiwanna hosọ lọ lẹ,” wẹ owhe-13-mẹvi devo dọ, “yé wá do ganmẹ pẹpẹ.” Mẹjitọ lẹ po mẹho agun tọn lẹ po yigbe dọ hosọ helẹ wá do ganmẹ bosọ yin alemọyinu.
To 1989 hosọ “Les jeunes s’interrogent . . . ” tọn 200 wẹ ko tọ́n to Réveillez-vous! mẹ. To Plidopọ Agbegbe “Jijọ-di-Jiwheyẹwhe” tọn owhe enẹ mẹ tọn ji, owe Kanbiọ He Jọja lẹ Nọ Kanse—Gblọndo He Wazọ́n Lẹ yin didetọn (to Glẹnsigbe mẹ). Be e ko gọalọ nado hẹn jọja lẹ lodo to yise mẹ ya? Jọja atọ̀n wlan dọmọ: “Owe ehe yin onú jiawu de na mí nado hẹn mí mọnukunnujẹ nuhahun mítọn lẹ mẹ podọ nado yọ́n lehe mí na pehẹ yé gbọn. Mì basi susu na ojlo he mì tindo to dagbemẹ-ninọ mítọn mẹ.” Susu jọja lẹ tọn lẹdo aihọn pé wẹ kọngbedopọ hẹ nuhe yé dọ.
“E Gbọ̀ Huvẹ Mítọn”
To 1999, Kunnudetọ Jehovah tọn lẹ wleawuna wunmẹ anademẹ he wá do ganmẹ tọn devo na jọja lẹ. Ehe wẹ video lọ Young People Ask—How Can I Make Real Friends? [Jọja lẹ Kanse—Nawẹ Yẹn Sọgan Jihọntọn Nugbo lẹ Gbọn?] E whàn mẹsusu nado do pinpẹn nutọn yetọn hia. “Video lọ yinuwado oji e sisosiso,” wẹ jọja owhe-14-mẹvi de dọ. “E na yin apadewhe núdùdù gbigbọmẹ tọn mítọn to gbesisọmẹ,” wẹ onọ̀ godoponọ de dọ. Asi jọja de dọmọ: “Homẹmiọnnamẹnu de wẹ e yin nado yọnẹn dọ Họntọn alọmayiemẹ mítọn, Jehovah, yiwanna mí nugbonugbo bo nọ penukundo jọja lẹ go to titobasinanu lẹdo aihọn pé etọn mẹ.”
Kọdetọn tẹwẹ video lọ ko hẹnwa? Jọja lẹ dọmọ: “E ko gọalọna mi nado ṣinyan gbẹdohẹmẹtọ ṣie, nado gbàdomẹmẹ to agun mẹ, podọ nado yí Jehovah do basi họntọn ṣie.” “E ko gọalọna mi nado nọavunte sọta hagbẹ ṣie lẹ.” “E ko hẹn mi lodo to gbemima ṣie mẹ nado wà nuhe go yẹn pé lẹpo nado sẹ̀n Jehovah.” Podọ asu po asi po de wlan dọmọ: “Mí dopẹna mì sọn ahun mítọn lẹ mẹ wá na awuwiwlena ‘núdùdù’ ehe na mí. E gbọ̀ huvẹ mítọn.”
To azọ́n he Jiwheyẹwhe dena ẹn hinhẹndi mẹ, “afanumẹ nugbonọ, nuyọnẹntọ” he yin amisisadode lọ ko wleawuna núdùdù gbigbọmẹ tọn to ojlẹ sisọ mẹ na mẹhe jlo na kẹalọyi i lẹpo. Podọ lehe e yin ayajẹnu de nado mọ lehe anademẹ Owe-wiwe tọn mọnkọtọn lẹ to alọgọna jọja lẹ do to egbehe nado “pegan bosọ sọgbe to ojlo Jiwheyẹwhe tọn lẹpo mẹ” do sọ!