Kanbiọ lẹ sọn Wehiatọ lẹ Dè
Whetẹnu wẹ Huhlọn Aihọn tọn he yin Anglo-Amérique lẹzun huhlọn aihọn tọn ṣinawetọ lọ he Biblu dọ dọdai etọn?
▪ Boṣiọ ogànnọ blibata he Ahọlu Nẹbukadnẹzali mọ lọ ma nọtena huhlọn aihọn tọn lẹpo. (Dan. 2:31-45) Kakatimọ, boṣiọ lọ nọtena huhlọn aihọn tọn atọ́n he dugán bẹsọn ojlẹ Daniẹli tọn mẹ bo diọnukunsọ omẹ Jiwheyẹwhe tọn lẹ.
Sọgbe hẹ zẹẹmẹ he Daniẹli basi gando boṣiọ ogànnọ lọ go, Huhlọn Aihọn tọn he yin Anglo-Amérique na wá sọn Lomu mẹ, e ma yindọ e na gbawhàn Lomu tọn wẹ gba. To numimọ he Daniẹli mọ lọ mẹ, gànyuu he bẹsọn azangandan lẹ mẹ lọ dlẹnkan biọ afọ po afọvi lẹ po mẹ. (To afọ po afọvi lẹ po mẹ, gànyuu lọ flusọ́ po okò po.)a Sọgbe hẹ numimọ Daniẹli tọn, azangandan gànyuu tọn lọ lẹ mẹ wẹ Huhlọn Aihọn tọn he yin Anglo-Amérique na wá sọn. Whenuho dekunnu dọ nuhe jọ pẹpẹ niyẹn. To vivọnu owhe 1700 lẹ tọn, Grande-Bretagne he yin apadewhe Ahọluigba Lomu tọn to ojlẹ de mẹ wayi jẹ yindi ji. To godo mẹ, États-Unis d’Amérique lọsu wá lẹzun otò huhlọnnọ de. Etomọṣo, huhlọn aihọn tọn ṣinawetọ he Biblu dọ dọdai etọn lọ ma ko wá aimẹ to whenẹnu. Etẹwutu mí do dọmọ? Na to ojlẹ enẹ mẹ, Grande-Bretagne po États-Unis po ma ko yinuwa to pọmẹ to aliho tangan de mẹ. Ṣigba, nuhe yé wà to Wẹkẹ-Whàn I whenu lọ niyẹn.
To ojlẹ lọ mẹ, “ovi ahọluduta lọ tọn lẹ” to azọ́nwa po zohunhun po titengbe to États-Unis, fie tatọ́-tẹnnọ yetọn tin te to Brooklyn, New York. (Mat. 13:36-43) Humọ, hagbẹ pipli mẹyiamisisadode lẹ tọn lẹ to yẹwhehodọ po zohunhun po to otò he tin to aṣẹpipa Ahọluigba Grande-Bretagne tọn glọ lẹ mẹ. To Wẹkẹ-Whàn I whenu, Grande-Bretagne po Amérique po wleawuna kanṣiṣa vonọtaun de to whenue yé to awhànfun sọta kẹntọ dopolọ lẹ. Humọ, na ninọmẹ awhàn lọ tọn hẹn owanyi akọta tọn sinyẹn deji wutu, yé diọnukunsọ mẹhe yin apadewhe okún “yọnnu” Jiwheyẹwhe tọn lọ tọn lẹ, ṣinyọ́nalọ owe yetọn lẹ ji bo sú mẹhe yin nukọntọ to azọ́n yẹwhehodidọ tọn lọ mẹ lẹ do gànmẹ.—Osọ. 12:17.
Enẹwutu, sọgbe hẹ dọdai Biblu tọn, huhlọn aihọn tọn ṣinawetọ lọ ma wá aimẹ to vivọnu owhe 1700 lẹ tọn, yèdọ whenue Grande-Bretagne jẹ yindi ji tlolo gba; kakatimọ, e wá aimẹ to bẹjẹeji azán Oklunọ tọn.b
[Nudọnamẹ odò tọn]
a Okò he flusọ́ po gànyuu po lọ nọtena ogbẹ́ delẹ he tin to otò Huhlọn Aihọn tọn he yin Anglo-Amérique tọn lẹ mẹ. Na ojlẹ susu, okò ehe hẹn ẹn vẹawuna Anglo-Amérique nado yin huhlọnnọ dile e na ko jlo do.
b Vọjlado de wẹ zẹẹmẹ ehe yin gando nudọnamẹ he tin to owe Dọdai Daniẹli Tọn mẹ, weda 57, hukan 24 po weda 56 po gọna weda 139 go.
[Yẹdide to weda 19]
Mẹmẹsunnu ṣinatọ̀n sọn tatọ́-tẹnnọ Watchtower tọn yin wiwle do gànmẹ to juin 1918