Nawẹ Yẹn Sọgan Gọalọna Ovi Ṣie lẹ Nado Mọ Oplọn Dagbe Yí Gbọn?
OVI pinplọn sọgan yin yiyijlẹdo gbejizọnlin he gọ́ na awuvivi po avùnnukundiọsọmẹnu lẹ po go. Gbejizọnlin de wẹ he hiẹ po ovi towe lẹ po nọ basi dopọ. Hiẹ nọ na tuli yé bo nọ deanana yé po owanyi po bosọ nọ gọalọna yé nado zindonukọn to aliho ogbẹ̀ tọn ji. Yé tindo nususu nado plọn!
Nado yin kọdetọn dagbenọ bo tindo ayajẹ to gbẹ̀mẹ, ovi lẹ dona wleawuna jẹhẹnu walọ dagbe po gbigbọmẹ tọn lẹ po, bo plọn nado yọ́n dagbe gbọnvona oylan. Eyin yé plọn nado yọ́n Jehovah bo yiwanna ẹn, oplọn yetọn na hẹn ale nujọnu tọn wá na yé podọ nuplọnmẹ he yé mọyi na gbọṣi aimẹ kakadoi. Taidi mẹjitọ de, hiẹ nọ yí adà daho de wà to nuhe ovi towe lẹ plọn mẹ podọ to nukun he yé nọ yí do pọ́n nuhe plọn yé te lẹ po nukunnumọjẹnumẹ he yé nọ tindo po mẹ.
Gbejizọnlin ehe bẹ avùnnukundiọsọmẹnu lẹ hẹn. Ovi lẹ sọgan yin nuyiwadeji po awubibọ po, podọ yé sọgan plọn nususu he dẹn do walọ dagbe to gbonu. Mí to gbẹnọ to aihọn he tin to aṣẹpipa Satani Lẹgba tọn glọ de mẹ. (1 Johanu 5:19) E tindo ojlo to oplọn he ovi towe lẹ to mimọyi mẹ, ṣigba na lẹndai devo pete wutu. Satani yin nuplọnmẹtọ azọ́nyọnẹntọ he tindo numimọ taun—ṣigba na nugbo tọn, nuylankan plọnmẹtọ wẹ. Dile etlẹ yindọ e nọ gbọn oklọ dali do ede hia taidi “angẹli hinhọ́n tọn,” hinhọ́n he e nọ na lọ yin mẹkiklọ tọn bosọ jẹagọdo Ohó po ojlo Jehovah tọn po. (2 Kọlintinu lẹ 4:4; 11:14; Jẹlemia 8:9) Lẹgba po aovi etọn lẹ po yin mẹklọtọ azọ́nyọnẹntọ lẹ, he nọ nọgodona ṣejannabi, nugbomadọ, po doyiyi walọyizan tọn po.—1 Timoti 4:1.
Etẹwẹ hiẹ sọgan wà nado basi hihọ́na ovi towe lẹ ma nado yin kiklọ? Nawẹ hiẹ sọgan plọn yé nado kẹalọyi nuhe yin nugbo bo sọgbe gbọn? Afọdide titengbe dopo wẹ nado gbeje dewe pọ́n. Hiẹ dona ze apajlẹ dagbe dai. Nujọnu wẹ e sọ yin dọ hiẹ ni kẹalọyi azọngban towe nado plọn ovi towe lẹ bo yí whenu he jẹ zan nado wàmọ. Ṣigba, whẹpo mí nado gbadopọnna nuagokun ehelẹ, mì gbọ mí ni dọhodo dodonu oplọn he sọgbe tọn ji.
Dodonu Oplọn He Sọgbe Tọn
Mí sọgan plọnnu sọn Ahọlu Sọlọmọni Islaeli tọn dè, yèdọ dopo to sunnu nuyọnẹntọ he nkọtọn ma nọgbẹ̀ pọ́n lẹ mẹ. Biblu dọna mí dọmọ: “Jiwheyẹwhe sọ na nuyọnẹn po wuntuntun po Sọlọmọni gege gbọ̀pọ̀, po oklo ayiha tọn po, yèdọ di okẹ́n he tin to huto. Nuyọnẹn Sọlọmọni tọn sọ hugan nuyọnẹn ovi whèzẹtẹn tọn lẹpo tọn, po nuyọnẹn Egipti tọn lẹpo po.” Sọlọmọni sọgan “dọ howhinwhẹn fọtọ́n atọ̀n: ohàn etọn lẹ yin fọtọ́n po atọ́n po.” E tindo oyọnẹn he siso gando atin po gbekanlin lẹ po go. (1 Ahọlu lẹ 4:29-34) Ahọlu Sọlọmọni sọ penukundo họgbigbá Islaeli tọn lẹ go, gọna tẹmpli gigonọ Jehovah tọn he tin to Jelusalẹm.
Nukinkan Sọlọmọni tọn lẹ, taidi dehe yin mimọ to owe Yẹwhehodọtọ tọn mẹ, dohia dọ e mọnukunnujẹ jijọ gbẹtọ lẹ tọn mẹ taun. Jiwheyẹwhe gbọdo e nado zinnudo dodonu oplọn he sọgbe tọn ji. Sọlọmọni dọmọ: “Dòdó oyọnẹn tọn wẹ osi OKLUNỌ tọn.” Ahọlu nuyọnẹntọ lọ sọ dọmọ: “Osi OKLUNỌ tọn wẹ dòdó nuyọnẹn tọn: nuyọnẹn Wiwenọ Dopo lọ tọn wẹ zinzin.”—Howhinwhẹn lẹ 1:7; 9:10.
Eyin mí dibusi Jiwheyẹwhe, mí na tindo osi sisosiso na ẹn bo na tin to aṣeji ma nado hẹn homẹgble e. Mí yọnẹn dọ ewọ wẹ Ganhunupotọ podọ mí dona litaina ẹn. Mẹhe nọ dovọ́na omẹ lọ he ji ogbẹ̀ mítọn sinai do lẹ sọgan nọ yin pinpọnhlan taidi nuyọnẹntọ to nukun gbẹtọ lẹ tọn mẹ, ṣigba nuyọnẹn mọnkọtọn yin “nulú . . . to Jiwheyẹwhe dè.” (1 Kọlintinu lẹ 3:19) Ovi towe lẹ tindo nuhudo oplọn he sinai do “nuyọnẹn he sọn aga” ji tọn.—Jakobu 3:15, 17.
Obu ma nado hẹn homẹgble Jehovah tindo kanṣiṣa pẹkipẹki hẹ owanyi tintindo na ẹn. Jehovah jlo dọ devizọnwatọ etọn lẹ ni dibusi i bosọ yiwanna ẹn. Mose dọmọ: “Etẹwẹ OKLUNỌ lọ Jiwheyẹwhe towe jijlo sọn dè we . . . Islaeli, adavo nado nọ dibusi OKLUNỌ lọ Jiwheyẹwhe towe, nado nọ zinzọnlin to ali etọn lẹpo mẹ, podọ nado nọ yiwanna ẹn, podọ nado nọ sẹ̀n OKLUNỌ lọ Jiwheyẹwhe towe po ayiha towe lẹpo po, podọ po alindọn towe lẹpo po, nado nọ payi gbedide OKLUNỌ lọ tọn lẹ lọ go, po aṣẹdai etọn lẹ po, he yẹn degbena we to egbehe na dagbe towe?”—Deutelonomi 10:12, 13.
Eyin mí dó obu gbégbò tọn tintindo na Jehovah do ahun ovi mítọn lẹ tọn mẹ, mí na gbọnmọ dali ze dodonu oplọn he na hẹn ovi mítọn lẹ zun nuyọnẹntọ nugbonugbo tọn dai. Eyin yé zindonukọn nado wleawuna obu mọnkọtọn, pinpẹn-nutọn-yinyọnẹn he yé tindo na Mẹdatọ yetọn, yèdọ Asisa oyọnẹn nugbo lẹpo tọn, na jideji. Ehe na gọalọna ovi mítọn lẹ nado mọnukunnujẹ nuhe yé plọn lẹ mẹ ganji, bo ma na nọ wá tadona agọ̀ lẹ kọ̀n. Yé na wleawuna nugopipe lọ nado ‘yọ́n dagbe gbọnvona oylan.’ (Heblu lẹ 5:14) Dodonu mọnkọtọn nasọ gọalọna yé nado gbọṣi whiwhẹnọ-yinyin mẹ bo dapana ylanwiwa.—Howhinwhẹn lẹ 8:13; 16:6.
Ovi Towe lẹ to Pinpọn We!
Ṣigba nawẹ mí sọgan gọalọna ovi mítọn lẹ nado yiwanna Jehovah bo dibusi i gbọn? Gblọndo kanbiọ enẹ tọn yin mimọ to Osẹ́n he Jehovah na akọta Islaeli tọn gbọn yẹwhegán Mose dali mẹ. Anademẹ yin nina mẹjitọ Islaelivi lẹ dọmọ: “Hiẹ bo na yí ayiha towe lẹpo, po alindọn towe lẹpo po, po hlọnhlọn towe lẹpo po, do yiwanna OKLUNỌ lọ Jiwheyẹwhe towe. Podọ ohó helẹ, he yẹn degbena we to egbehe, na tin to ayiha towe ji: hiẹ nasọ yí sọwhiwhe do plọn yé ovi towe lẹ, bosọ dọho yetọn whenuena hiẹ sinai to owhé towe gbè, podọ whenuena hiẹ to zọnlinzin to aliho ji, podọ to whenuena hiẹ mlọnai, podọ to whenuena hiẹ fọntite.”—Deutelonomi 6:5-7.
Wefọ ehe plọnnu titengbe delẹ mẹjitọ lẹ. Dopo wẹ yindọ: Taidi mẹjitọ, hiẹ dona ze apajlẹ dagbe dai. Nado plọn ovi towe lẹ nado yiwanna Jehovah, hiẹ lọsu dona yiwanna Jiwheyẹwhe podọ ohó etọn lẹ dona tin to ayiha towe mẹ. Naegbọn ehe do yin nujọnu? Na hiẹ wẹ yin mẹplọntọ tintan ovi towe lẹ tọn. Nuhe yé plọn sọn apajlẹ towe mẹ na tindo nuyiwadomẹji sisosiso do yé ji. Podọ nudevo de ma nọ yinuwado gbẹzan ovi lẹ tọn ji sọ apajlẹ mẹjitọ lẹ tọn.
Mẹwhinwhàn, nujinọtedo, walọ dagbe po nuhe a tindo ojlo na lẹ po ma nọ sọawuhia to hodidọ towe kẹdẹ mẹ gba ṣigba to nuhe a nọ wà lẹ mẹ ga. (Lomunu lẹ 2:21, 22) Sọn ovu whenu, ovi lẹ nọ plọnnu gbọn sọwhiwhe yíyí do doayi nuhe mẹjitọ lẹ to wiwà go dali. Ovi lẹ nọ doayi nuhe nọ duahunmẹna mẹjitọ yetọn lẹ go, podọ onú enẹlẹ wẹ nọ saba lẹzun nujọnu na yé. Eyin hiẹ yiwanna Jehovah nugbonugbo, ovi towe lẹ na yọnẹn. Di dohia, yé na mọ dọ Biblu hihia po nupinplọn po nọ duahunmẹna we. Yé na doayi e go dọ hiẹ ze dagbenu Ahọluduta lọ tọn lẹ do otẹn tintan mẹ to gbẹzan towe mẹ. (Matiu 6:33) Opli Klistiani tọn lẹ yìyì to gbesisọ mẹ po mahẹ tintindo to azọ́n yẹwhehodidọ Ahọluduta lọ tọn mẹ po na dohia yé dọ sinsẹ̀n-bibasi wiwe ṣeke hlan Jehovah wẹ yin nujọnu hugan na we.—Matiu 28:19, 20; Heblu lẹ 10:24, 25.
Penukundo Azọngban Towe Go
Nuhe mẹjitọ lẹ sọ sọgan plọn sọn Deutelonomi 6:5-7 mẹ wẹ yindọ: Hiẹ wẹ tindo azọngban lọ nado plọn ovi towe lẹ. To omẹ Jehovah tọn lẹ ṣẹnṣẹn to hohowhenu, mẹjitọ lẹ wẹ nọ plọn ovi yetọn lẹ. To Klistiani owhe kanweko tintan tọn lẹ whenu, mẹjitọ lẹ zindonukọn nado yí adà nujọnu tọn de wà to ovi yetọn lẹ pinplọn mẹ. (2 Timoti 1:5; 3:14, 15) To owe he apọsteli Paulu kàn hlan Klistiani hatọ lẹ mẹ, e dohia dọ otọ́ lẹ na taun tọn wẹ dona “nọ plọn [ovi yetọn lẹ] to hihò po hokọnamẹ [Jehovah] tọn po mẹ.”—Efesunu lẹ 6:4.
Na mẹjitọ lẹ nọ yin kọgbidina gbọn magbọjẹ egbezangbe tọn, azọ́n po nuwiwa he nọ yí whenu to mẹsi lẹ po dali wutu, yé sọgan yin whiwhlepọn nado jo ovi yetọn lẹ pinplọn do na mẹdevo lẹ, taidi mẹplọntọ wehọmẹ tọn lẹ po vigopọntọ lẹ po. Ṣigba, mẹdevo ma sọgan yí otẹn mẹjitọ mẹtọnhopọntọ owanyinọ de tọn gba. Ma yí nukun pẹvi do pọ́n nuhe a yin po nuyiwadomẹji towe do yé ji po gbede blo. Eyin a tindo nuhudo alọgọ tọn, de yé po nuyọnẹn po bo ma jo azọngban wiwe towe do gbede blo.
Yí Whenu Zan Nado Plọn Ovi Towe Lẹ
Nudevo he mẹjitọ lẹ plọn sọn Deutelonomi 6:5-7 mẹ wẹ yindọ: Ovi lẹ pinplọn nọ biọ whenu po vivẹnudido po. Mẹjitọ Islaelivi lẹ dona “yí sọwhiwhe do plọn” nugbo Jiwheyẹwhe tọn ovi yetọn lẹ. Hogbe dowhenu Heblugbe tọn lọ he yin lilẹdogbedevomẹ taidi “yí sọwhiwhe do plọn” zẹẹmẹdo “nado basi dọvọdọ,” “nado dọ ẹ pludopludo.” Ehe dona yin wiwà to azán lọ blebu ji, yèdọ sọn afọnnu jẹ whèjai, “to owhé towe gbè” podọ “to aliho ji.” E nọ biọ whenu po vivẹnudido po nado plọn ovi lẹ bo deanana pọndohlan po walọyizan yetọn po na yé nido sọgan hẹn homẹ Jiwheyẹwhe tọn hùn.
To whelọnu lo, etẹwẹ hiẹ sọgan wà nado gọalọna ovi towe lẹ nado mọ oplọn dagbe yí? E biọ azọ́n susu. Plọn yé nado yiwanna Jehovah bo dibusi i. Ze apajlẹ dagbe dai. Penukundo azọngban towe nado plọn ovi towe lẹ go, bo yí whenu he pé zan nado plọn yé. Mapenọ wẹ hiẹ yin bo na ṣinuwa to ovi towe lẹ pinplọn whenu. Ṣigba eyin hiẹ dovivẹnu vẹkuvẹku nado wà ojlo Jiwheyẹwhe tọn, e yọnbasi taun dọ ovi towe lẹ ni yọ́n pinpẹn tuklajijẹ towe tọn bo mọaleyi sọn e mẹ. Howhinwhẹn lẹ 22:6 dọmọ: “Plọn ovi do aliho he e na gbọ̀n ji, whenuena e whẹ́n e ma na tọ́nsọn e ji.” Nunọwhinnusẹ́n ehe gando ovi lẹpo go.
Mẹpinplọn taidi gbejizọnlin de he nọ to nukọnzindo to gbẹzan mẹde tọn blebu mẹ. Eyin hiẹ po ovi towe lẹ po yiwanna Jiwheyẹwhe, mì na penugo nado duvivi gbejizọnlin enẹ tọn kakadoi. Ehe yinmọ na nususu na tin to whepoponu nado plọn gando Jehovah po lehe mí sọgan yinuwa sọgbe hẹ lẹndai etọn do po go.—Yẹwhehodọtọ 3:10, 11.
[Yẹdide to weda 15]
Be hiẹ nọ hia Biblu na ovi towe lẹ ya?
[Yẹdide to weda 16]
Yí whenu zan nado plọnnu ovi towe lẹ gando Mẹdatọ lọ go