Magbọjẹ Tintindo Gando Akuẹ Go

Paul yin otọ́ de he tindo visunnu awe. E dọmọ: “To whenue nulẹpo yíkuẹ to otò mítọn mẹ, núdùdù wá vẹahi bo ma yọ́n mọ. Mí nọ to na gànhiho susu nado họ̀nú, bọ whẹpo mí do nọ jẹ núdùdù-sàtọ lọ dè, núdùdù ko nọ saba vọ̀. Gbẹtọ lẹ húgo taun na huvẹ wutu, podọ mẹdelẹ nọ jai to tòhomẹ-liho ji. Onú dandan tọn lẹ vẹahi sọmọ bọ akuẹ yetọn nọ yì livi susu kavi liva lẹ. To godo mẹ, akuẹ otò lọ tọn masọ tindo pinpẹn ba. Podọ, akuẹ ṣie he tin to akuẹsẹdotẹn, gbọjẹ whenu gaa tọn, po dehe n’sẹdo na nujijọ ajiji lẹ po ma tindo pinpẹn ba.”

Paul yọnẹn dọ eyin whẹndo emitọn na duto ninọmẹ ehelẹ ji, emi dona yí “nuyọnẹn he pé” zan. (Howhinwhẹn lẹ 3:21) E dọmọ: “Lẹtliki-zọ́nwatọ wẹ n’yin, podọ n’nọ wà azọ́n depope he n’mọ, eyin akuẹ etọn ma tlẹ pé dehe n’dona yí. Mẹdelẹ nọ yí núdùdù kavi núzinzan whégbè tọn lẹ do suahọ mi. Eyin yé yí adi daho ẹnẹ do suahọ mi, n’nọ zan awe bo nọ sà awe he pò lẹ. To nukọn mẹ, n’de koklovi 40. To whenue yé whẹ́n, n’sà yé bo de 300 devo lẹ. To nukọn mẹ, n’ze koklo 50 jo na mẹde bo do yí saki gbàdo-linfin tọn awe, he dopodopo yetọn pẹ̀n sọ kilo 50. N’yí linfin enẹlẹ do na núdùdù whẹndo ṣie po whẹndo devo lẹ po na ojlẹ susu.”

Paul sọ yọnẹn dọ nuhe sọgbe taun wẹ e yin nado dejido Jiwheyẹwhe go. Jiwheyẹwhe nọ gọalọna mí eyin mí wà nuhe ewọ biọ to mí si lẹ. Jesu dọho gando dandannu gbẹ̀mẹ tọn lẹ tintindo go dọmọ: “Mì doalọtena magbọjẹ he ma yin dandan tọn; na . . . Otọ́ mìtọn olọn tọn yọnẹn dọ mì tindo nuhudo onú ehelẹ tọn.”—Luku 12:29-31.

E blawu dọ, kẹntọgán Jiwheyẹwhe tọn, Satani ko doyẹklọ suhugan mẹhe to aihọn mẹ lẹ tọn nado doafọna agbasanu lẹ. Gbẹtọ lẹ nọ hanú zẹjlẹgo gando nuhe sin nuhudo yé tindo nugbonugbo po nuhe yé nọ lẹndọ emi tindo nuhudo etọn lẹ po go, bo nọ do magbọjẹ na yede nado tindo nuhe ma yin dandan lẹ. Mẹdelẹ nọ tlọ biọ ahọ́ mẹ, bo nọ wá plọn to aliho sinsinyẹn mẹ dọ ‘ahọ́dutọ nọ lẹzun devi na mẹhe e duahọdo.’—Howhinwhẹn lẹ 22:7.

Mẹdelẹ nọ basi nudide he nọ hẹn kọdetọn ylankan wá lẹ. Paul dọmọ: “Mẹsusu to kọmẹnu ṣie lẹ mẹ jo whẹndo yetọn po họntọn yetọn lẹ po do, bo yì tògodo nado hẹn ninọmẹ yetọn pọnte. Mẹdelẹ yì matin gbedewema tògodo yìyì tọn lẹ, bo ma penugo nado mọ azọ́n. Podọ yé nọ to hinhọ̀nbẹ do ponọ lẹ bosọ nọ dọ́ alipá. Yé ma na dotẹnmẹ Jiwheyẹwhe nado gọalọna yé. Ṣigba, míwlẹ magbe taidi whẹndo de nado pehẹ nuhahun akuẹzinzan tọn lẹ po alọgọ Jiwheyẹwhe tọn po.”

NỌ HODO AYINAMẸ JESU TỌN

Paul zindonukọn dọmọ: “Jesu dọ dọ: ‘Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Oylan azán dopodopo tọn ko pé na ẹn.’ Enẹwutu, odẹ̀ he n’nọ hò egbesọegbesọ wẹ yindọ Jiwheyẹwhe ni ‘na núdùdù mítọn egbehe tọn mí to egbé’ na mí nido sọgan nọgbẹ̀. Podọ ewọ nọ gọalọ dile Jesu dopagbe etọn do. E ma yin whelẹponu wẹ mí nọ tindo nuhe jlo mí. To gbèdopo, n’to nado họ̀ núdùdù bo ma tlẹ yọ́n nuhe sà yè te. To whenue n’jẹ núdùdù-sàtọ lọ dè, n’wá mọdọ yaourt sà wẹ e te. N’ma yiwanna yaourt. Ṣigba, na núdùdù wẹ enẹ lọsu yin wutu, mí nù yaourt to ozán lọ mẹ. N’dopẹna Jiwheyẹwhe taun dọ to ojlẹ sinsinyẹn enẹ lẹpo mẹ, whẹndo ṣie nọ mọ nude dù janwẹ whẹpo do mlọnai.”a

“Todin, nulẹ pọnte na mí to akuẹzinzan-liho. Ṣigba, mí plọnnu sọn nuhe mí pehẹ lẹ mẹ dọ nuhe nọ gọalọnamẹ hugan nado duto magbọjẹ ji wẹ nado dejido Jiwheyẹwhe go. Jehovahb na to alọgọna mí dile e na dẹnsọ bọ mí na zindonukọn nado to ojlo etọn wà. Mí mọ nugbo-yinyin Psalm 34:8 tọn he dọmọ: ‘Dọ ẹ pọ́n bo mọdọ Jehovah yọ́n: donanọ wẹ sunnu nẹ he din fibẹtado to ewọ mẹ.’ Taidi kọdetọn de, mí ma nọ dibu nado pehẹ ninọmẹ akuẹzinzan tọn he sinyẹn taun lẹ ba.

“Mí wá mọnukunnujẹemẹ hezeheze todin dọ núdùdù sin hudo wẹ gbẹtọvi tindo nado nọgbẹ̀, e ma yin azọ́n kavi akuẹ gba. Mí yí jejejininọ do to tenọpọn ojlẹ he mẹ opagbe Jiwheyẹwhe tọn ehe na mọ hẹndi te, enẹ wẹ: ‘Gbàdo susugege na tin finẹ to osó lẹ ji.’ Ṣigba todin whẹ́, ‘eyin mí tindo núdùdù, avọ̀ po adọtẹn po, onú ehelẹ na pekọna mí.’ Mí mọ huhlọn yí sọn hogbe Biblu tọn lẹ mẹ he dọmọ: ‘Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo lẹ po. Na ewọ ko dọmọ: “Yẹn ma na jo mì do to aliho depope mẹ kavi gbẹ́ mì dai to aliho depope mẹ.” Na mí nido sọgan gọna adọgbigbo bo dọmọ: “Jehovah wẹ alọgọtọ ṣie; yẹn ma na dibu.”’”c

E nọ biọ yise nujọnu tọn nado “zinzọnlin hẹ Jiwheyẹwhe” dile Paul po whẹndo etọn po to wiwà do. (Gẹnẹsisi 6:9) Vlavo mí tindo nuhahun akuẹ tọn todin kavi to nukọn mẹ, nususu wẹ mí sọgan plọn sọn apajlẹ yise Paul tọn po nuyọnẹn pipé he e yizan tọn po mẹ.

Ṣigba, eyin nuhahun whẹndo tọn lẹ wẹ to magbọjẹ hẹnwa na mí lo?