Kanbiọ lẹ sọn Wehiatọ lẹ Dè

Anademẹ tẹwẹ Owe-wiwe wleawuna gando ovi pinplọn go to whenuena mẹjitọ dopo yin Kunnudetọ Jehovah tọn bọ awetọ mayin Kunnudetọ de?

Nunọwhinnusẹ́n titengbe Owe-wiwe tọn awe wleawuna anademẹ do ovi pinplọn ji na mẹjitọ Kunnudetọ he alọwlemẹ etọn mayin Kunnudetọ de. Tintan wẹ: “Míwlẹ ma ha nọ ma setonuna Jiwheyẹwhe hú gbẹtọ.” (Owalọ lẹ 5:29) Awetọ wẹ: “Asu wẹ ota asi tọn dile Klisti yin ota agun tọn do.” (Efesunu lẹ 5:23) E mayin asi he asu yetọn yin Kunnudetọ lẹ kẹdẹ go wẹ wefọ awetọ lọ gando gba ṣigba dehe asu yetọn mayin Kunnudetọ lẹ lọsu ga. (1 Pita 3:1) Nawẹ mẹjitọ Kunnudetọ de sọgan hẹn nunọwhinnusẹ́n ehelẹ do jlẹkaji do to whenuena e to ovi etọn lẹ plọn?

Eyin asu lọ yin Kunnudetọ Jehovah tọn de, azọngban etọn wẹ e yin nado penukundo whẹndo etọn go to gbigbọ po agbasa po liho. (1 Timoti 5:8) Dile etlẹ yindọ onọ̀ mayisenọ lọ sọgan nọ yí whenu susu zan hẹ ovi lọ lẹ, otọ́ Kunnudetọ lọ dona plọn ovi etọn lẹ gbọn nuplọnmẹ gbigbọmẹ tọn nina to whégbè po hinhẹn yé yì opli Klistiani tọn lẹ po dali, to fie yé na mọaleyi sọn nuplọnmẹ dagbe po gbẹdido he sọgbe lẹ po mẹ te.

Etẹwẹ eyin asi mayisenọ etọn tẹkudeji dọ emi na nọ hẹn ovi lọ lẹ yì sinsẹ̀nhọ etọn mẹ kavi plọn nuyise etọn lẹ ovi lọ lẹ? Osẹ́n otò lọ tọn sọgan na ẹn jlọjẹ nado wàmọ. Eyin ovi lọ lẹ na yin dindọn biọ nuyiwa sinsẹ̀n-bibasi tọn mẹ to ofi mọnkọtọn lẹ, e na sinai taun do jẹhẹnu mẹpinplọn gbigbọmẹ tọn otọ́ lọ tọn ji. Dile ovi lọ lẹ to whinwhẹ́n, nuhe otọ́ yetọn plọn yé sọn Owe-wiwe mẹ dona gọalọna yé nado hodo nugbo Ohó Jiwheyẹwhe tọn. Lehe homẹ asu yisenọ lọ tọn na hùn do sọ eyin ovi etọn lẹ nọte to nugbo lọ mẹ!

Eyin onọ̀ lọ yin Kunnudetọ Jehovah tọn de, e dona na sisi nunọwhinnusẹ́n tatọ́-yinyin tọn bọ dagbemẹ-ninọ tẹgbẹ̀ ovi etọn lẹ tọn sọ dona duahunmẹna ẹn. (1 Kọlintinu lẹ 11:3) To whẹho susu mẹ, asu mayisenọ de ma na gbẹ́ dọ asi Kunnudetọ etọn ni ma nọ na oplọn walọ dagbe po gbigbọmẹ tọn po ovi lọ lẹ, podọ opli omẹ Jehovah tọn lẹ tọn nọ gọalọ nado jẹ yanwle enẹ kọ̀n. Onọ̀ lọ sọgan gọalọna asu mayisenọ etọn nado mọ ale he nọ wá sọn nuplọnmẹ mẹjlọdote tọn he ovi yetọn lẹ to mimọyi sọn titobasinanu Jehovah tọn dè mẹ. E sọgan gbọn zìnzìn dali zinnudo ale he nọ wá sọn nunọwhinnusẹ́n walọ dagbe Biblu tọn lẹ zínzín do ahun ovi lọ lẹ tọn mẹ ji, na yé to gbẹ̀nọ to aihọn he gblezọn to walọyizan-liho de mẹ wutu.

Ṣigba, asu mayisenọ lọ sọgan tẹkudeji dọ sinsẹ̀n emitọn wẹ ovi lọ lẹ na basi, bo na nọ plan yé yì sinsẹ̀nhọ etọn mẹ bo nasọ nọ plọn yé nuyise sinsẹ̀n etọn tọn. Kavi asu de sọgan jẹagọdo sinsẹ̀n lẹpo bo tẹkudeji dọ ovi lọ lẹ ni ma nọ yin pinplọn nuplọnmẹ sinsẹ̀n tọn depope. Taidi tatọ́ whẹndo lọ tọn, nudide etọn wẹ enẹ yin nado basi na taun tọn.a

Dile e to sisi na tatọ́-yinyin asu etọn tọn, taidi Klistiani klandowiwe de, asi yisenọ lọ na flin walọyizan apọsteli Pita po Johanu po tọn, heyin: “Míwlẹ ma sọgan nọ ma dọ nuhe mí ko mọ, bosọ se.” (Owalọ lẹ 4:19, 20) Na dagbemẹ-ninọ gbigbọmẹ ovi lọ lẹ tọn wutu, onọ̀ Kunnudetọ de na dín dotẹnmẹ hundote lẹ nado na yé anademẹ walọ dagbe tọn lẹ. E tindo azọngban de to Jehovah nukọn nado plọn mẹdevo lẹ nuhe e yọnẹn dọ e yin nugbo, podọ e ma dona wọnji ovi etọn lẹ go gba. (Howhinwhẹn lẹ 1:8; Matiu 28:19, 20) Nawẹ onọ̀ Kunnudetọ lọ sọgan pehẹ nuhahun sinsinyẹn lọ gbọn?

Di apajlẹ, lẹnnupọndo whẹho yise to Jiwheyẹwhe mẹ tọn ji. Asi Kunnudetọ de sọgan gọ̀n ma penugo nado nọ basi oplọn Biblu gbesisọ tọn de hẹ ovi etọn lẹ na asu etọn gbẹ́ wutu. Be e dona dapana nudepope didọ gando Jehovah go na ovi etọn lẹ na whẹwhinwhẹ́n ehe wutu wẹ ya? Lala. To jọwamọ-liho, hodidọ po nuwiwa etọn lẹ po na nọ do yise etọn to Mẹdatọ lọ mẹ hia. Matin ayihaawe, ovi etọn lẹ na nọ kàn kanbiọ se do whẹho lọ ji. E dona yí mẹdekannujẹ sinsẹ̀n tọn etọn zan po awuvivo po gbọn yise he e tindo to Mẹdatọ lọ mẹ didọna mẹdevo lẹ dali, gọna ovi etọn lẹ. Eyin e ma tlẹ penugo nado deanana plọnmẹ Biblu de hẹ ovi etọn lẹ kavi plan yé yì opli lẹ to gbesisọmẹ, e sọgan dọ oyọnẹn Jehovah Jiwheyẹwhe tọn na yé.—Deutelonomi 6:7.

Gando haṣinṣan he tin to Kunnudetọ de po alọwlemẹ mayisenọ etọn po ṣẹnṣẹn go, apọsteli Paulu wlan dọmọ: “Yè lẹ̀ asu he ma yise wé gbọn asi dali, yè sọ lẹ̀ asi he ma yise wé gbọn asu dali; eyin e mayin mọ ovi mìtọn lẹ yin mawé; ṣigba dinvie yé yin wiwe.” (1 Kọlintinu lẹ 7:14) Jehovah nọ pọ́n kọndopọ alọwle tọn hlan taidi wiwe na alọwlemẹ yisenọ lọ tọn wutu, podọ ovi lọ lẹ nọ yin wiwe to nukun Jehovah tọn mẹ. Asi Kunnudetọ lọ dona wà nuhe go e pé lẹpo nado gọalọna ovi etọn lẹ nado mọnukunnujẹ nugbo lọ mẹ, bo jo kọdetọn godo mẹ tọn lọ do alọ Jehovah tọn mẹ.

Eyin ovi lọ lẹ whẹ́n, yé dona basi nudide nuhe yé na wà tọn sinai do nudọnamẹ he yé ko mọyi sọn mẹjitọ yetọn lẹ dè ji. Yé sọgan de nado yinuwa to kọndopọmẹ hẹ hogbe Jesu tọn lẹ dọmọ: “Mẹhe yiwanna otọ́ kavi onọ̀ hú mi, e ma jẹ na mi.” (Matiu 10:37) Yé sọ yin gbedena ga dọmọ: “Mì ovi emi, mì setonuna mẹjitọ mìtọn lẹ to Oklunọ mẹ.” (Efesunu lẹ 6:1) Jọja susu ko de nado ‘setonuna Jiwheyẹwhe taidi ogán’ kakati ni yin mẹjitọ mayisenọ de, mahopọnna yajiji sinsinyẹn he yé nọ mọyi sọn mẹjitọ enẹ dè. Lehe e na yin ahọsumẹ de na mẹjitọ Kunnudetọ lọ do sọ nado mọdọ ovi etọn lẹ de nado sẹ̀n Jehovah mahopọnna nukundiọsọmẹ!

[Nudọnamẹ odò tọn]