Kanbiọ lẹ sọn Wehiatọ lẹ Dè
Etẹwẹ agun na wà eyin Klistiani he nọ kùnhún de basi asidan he dekọtọn do okú mẹdevo lẹ tọn mẹ?
Asidan mọto tọn he dekọtọn do hùnhọdudu mẹ dona yin dodinna na agun Klistiani tọn dona wà nulẹpo ma nado didá azọngban hùnhọdudu tọn. (Deutelonomi 21:1-9; 22:8) Hunkuntọ he huwhẹ̀ to asidan sinsinyẹn de mẹ sọgan dù ohùn-họ́ eyin e dovọ́nanu kavi desọn ojlo mẹ do gbà osẹ́n Sesali tọn lẹ he gando hihọ́ gbẹtọ lẹ tọn po dehe dona yin hihodo to aliji lẹ po go. (Malku 12:14) Ṣigba whẹwhinwhẹ́n devo lẹ tin he mí dona gbadopọnna.
Hlọnhutọ he họnyi dopo to tòdaho fibẹtado Islaeli tọn lẹ mẹ dona yì owhẹ̀ nukọn. Eyin hlọnhuhu lọ yin mimọ nado yin kosọ, ewọ na yin dotẹnmẹna nado gbọṣi tòdaho lọ mẹ, bo na yin whinwhlẹn sọn ahọsuyitọ ohùn tọn lọ si. (Osọha lẹ 35:6-25) Enẹwutu eyin Klistiani de hùmẹ to asidan de mẹ, mẹho lẹ dona dindona whẹho lọ ganji nado yọnẹn eyin e dù ohùn-họ́. Pọndohlan gandudu tọn kavi nudide whẹdatẹn de tọn ma ko pé nado magbe afọdide he agun Klistiani tọn na ze tọn gba.
Di dohia, whẹdatẹn sọgan dohia dọ mẹlọ gbà osẹ́n aliho ji tọn delẹ, ṣigba mẹho he basi dodinnanu lọ lẹ sọgan mọdọ mẹlọ ma dù ohùn-họ́ gba na hunkuntọ lọ ma tindo nugopipe nado deanana ninọmẹ he dekọtọn do mẹhuhu lọ mẹ. To vogbingbọn mẹ, eyin whẹdatẹn lọ tlẹ jo whẹho lọ do, mẹho lẹ sọgan wá tadona kọ̀n dọ mẹlọ dù ohùn-họ́.
Nudide mẹho he to dodinna whẹho lọ lẹ tọn dona yin zize sinai do Owe-wiwe po kunnudenu he họnwun lẹ po ji—yèdọ gbeyiyi hunkuntọ lọ tọn podọ/kavi kunnude omẹ awe kavi atọ̀n he yí nukun do mọ nujijọ lọ tọn. (Deutelonomi 17:6; Matiu 18:15, 16) Eyin kunnudenu dohia dọ Klistiani lọ dù ohùn-họ́, wedegbẹ́ whẹdida tọn de dona yin zizedai. Eyin wedegbẹ́ lọ mọdọ ohùnhọ́dutọ lọ lẹnvọjọ, e na mọ wọhẹ sinai do Owe-wiwe ji he jẹ yí podọ alọhẹndotenamẹ delẹ na wá e ji na nuhe dù lẹblanulọkẹyi etọn lẹ to agun mẹ. E ma sọgan wadevizọn taidi mẹho kavi devizọnwatọ lizọnyizọnwiwa tọn de ba. Alọhẹndotenamẹ devo lẹ nasọ yin hinhẹnwa e ji. Podọ e na dogbè vọdonanu etọn tọn he dekọtọn do asidan po mẹhuhu po mẹ na Jiwheyẹwhe.—Galatianu lẹ 6:5, 7.
Di apajlẹ: Eyin ninọmẹ aimẹ tọn ylan to whenuena asidan lọ jọ, hunkuntọ lọ dona ko nọ̀ aṣeji taun. Eyin amlọn to sisà ẹ, e dona ko nọte bo gbọjẹ kakajẹ whenuena amlọn etọn họ́n, kavi e na ko dike mẹdevo ni kùnhún.
Mí ni dọ dọ hunkuntọ lọ to wezunhọ̀n. Eyin Klistiani de họ̀nwezun zẹ̀ dogbó he yin zizedai go, ehe yin awugbopo nado yí “nuhe yin Sesali tọn lẹ hlan Sesali.” E sọ do osi matindo na wiwe-yinyin ogbẹ̀ tọn hia, na nujijọ ylankan depope sọgan dekọtọn wutu. (Matiu 22:21) Enẹwutu, mì gbọ mí ni lẹnnupọndo onú devo lẹ ji dogọ. Apajlẹ tẹwẹ mẹho agun tọn de na zedai na lẹngbọpa lọ eyin e gbọn vọdonanu dali gbà osẹ́n Sesali tọn lẹ kavi desọn ojlo mẹ do vẹtolina yé?—1 Pita 5:3.
Klistiani lẹ ma dona do dope na mẹdevo lẹ do ojlẹ de mẹ he na biọ dọ yé ni gbà osẹ́n dogbó wezun he dona yin hinhọ̀n tọn gba. Nalete, to whẹho susu mẹ, nuhe e biọ lẹpo wẹ nado jẹ aliji domẹwhenu kavi diọ tito mẹtọn nado sọgan mọ whenu he pé na gbejizọnlin lọ. Eyin enẹ yin wiwà, Klistiani lọ ma na yin whiwhlepọn nado họ̀nwezun zẹjlẹgo, ṣigba e na penugo nado hodo osẹ́n aliji tọn he “huhlọn daho” gandudu tọn lẹ zedai. (Lomunu lẹ 13:1, 5) Ehe na gọalọna hunkuntọ lọ nado dapana asidan sinsinyẹn lẹ he sọgan dekọtọn do hùnhọdudu mẹ. E nasọ hẹn ẹn penugo nado ze apajlẹ dagbe dai bo hẹn ayihadawhẹnamẹnu dagbe go.—1 Pita 3:16.