Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Etẹwẹ sọgan gọalọna Klistiani nugbo de eyin mẹyiwanna de gbẹ́ Jehovah dai?

Jlọ dewe dote gọna hagbẹ whẹndo towe tọn devo he yin nugbonọ lẹ. Hẹn alọnu ján to nuwiwa gbigbọmẹ tọn lẹ mẹ. Hẹn dewe tin-to-aimẹ nado gọalọna mẹdevo lẹ. Ma hẹn todido bu gbede blo dọ mẹyiwanna lọ sọgan lẹkọwa. Ma gblewhẹdo dewe blo. Na sisi tito mẹplọnlọ-domẹgo Jiwheyẹwhe tọn bo dọ numọtolanmẹ towe lẹ na họntọn lẹ.—1/9, weda 18-21.

• Aliho awe tẹlẹ mẹ wẹ Owe-wiwe gọalọna mí nado yọ́n ‘azán godo tọn lẹ’ te?

Biblu dọ dọdai nuhe na jọ to “opodo aihọn tọn” whenu lẹ tọn. (Matiu 24:3, 7, 8; Luku 21:11) E sọ basi zẹẹmẹ diọdo he na tin to walọyizan po nuyiwa gbẹtọ lẹ tọn po mẹ to ‘azán godo tọn lẹ’ mẹ tọn. (2 Timoti 3:1-5) Na taun tọn, wẹndagbe ahọluduta lọ tọn dona yin lilá to ojlẹ ehe mẹ.—15/9, weda 4-6.

• Etẹwẹ agun na wà eyin Klistiani he to ohún kùn de basi asidan he dekọtọn do okú mẹdevo lẹ tọn mẹ?

Mẹho he to dogbapọnna whẹho lọ lẹ sọgan mọ dọ mẹlọ ma dù ohùn-họ́ gba na húnkùntọ lọ ma tindo nugopipe nado deanana ninọmẹ he dekọtọn do mẹhuhu lọ mẹ. Ṣigba eyin Klistiani lọ dù ohùn-họ́ bo do lẹnvọjọ hia, e na mọ wọhẹ sinai do Owe-wiwe ji yí podọ alọhẹndotenamẹ delẹ na wá e ji na nuhe dù lẹblanulọkẹyi etọn lẹ to agun mẹ.—15/9, weda 30.

• Naegbọn ogbẹ̀ madopodo ma sinai do nukọnyiyi lẹnunnuyọnẹn tọn lẹ ji?

Lẹnunnuyọnẹntọ lẹ ko dovivẹnu nado dlẹnkanna tedidi gbẹzan gbẹtọvi tọn. Di apajlẹ, yé ko tẹnpọn nado yidogọna whla sọha he nuvikun lẹ nọ vọ́ yedelẹ hẹn jẹ yọyọ podọ nado wleawuna otù, ayì, kavi ahun yọyọ lẹ na awutunọ lẹ he na sọgbe pẹpẹ hẹ agbasa yetọn. Ṣigba Biblu dohia dọ aliho dopo akàn he mẹ gbẹtọvi lẹ sọgan mọ ogbẹ̀ madopodo te wẹ yin gbọn ofligọ Jesu tọn gblamẹ.—1/10, weda 3-5.

• Be baptẹm Klistiani tọn wá sọn aṣa lẹ̀wé Ju lẹ tọn mẹ wẹ ya?

Lala. Juvi lẹ nọ basi nuyiwa lẹ̀wé tọn do ota yede tọn mẹ, ehe ma yin mọ po baptẹm Johanu tọn po. Lẹ̀wé he yin bibiọ to Osẹ́n Mose tọn mẹ dona nọ yin vivọbasi, ṣigba baptẹm Klistiani tọn nọ yin bibasi whladopo gee.—15/10, weda 12-13.

• Etẹwẹ Wehọmẹ Azọ́nplọnmẹ Devizọnwiwa tọn yin?

E yin nupinplọn osẹ ṣinatọ̀n tọn de na mẹho agun tọn po devizọnwatọ lizọnyizọnwiwa tọn tlẹnnọ lẹ po he ninọmẹ yetọn hẹn yé penugo nado yin didohlan fie nuhudo susu tin te. Ehe sọgan yin agun he mẹ yé wá sọn, fidevo to otò yetọn mẹ kavi to otò devo mẹ.—15/11, weda 10-11.

• Etẹwẹ kavi mẹnu wẹ yin agọjẹdoklistigotọ he yin nùdego to 1 Johanu 2:18; 4:3 mẹ?

To paa mẹ, hogbe lọ “agọjẹdoklistigotọ” dlẹnalọdo mẹdepope he diọnukunsọ kavi gbọn oklọ dali sọalọakọ́n nado yin Klisti kavi afọzedaitọ etọn lẹ. Nuhe Jesu po Johanu po dọ lẹ dohia dọ agọjẹdoklistigotọ lọ yin pipli he bẹ mẹsusu he yin agọjẹdoklistigotọ lẹ hẹn de he nọ hẹn sinsẹ̀n-nuplọnmẹ lalo lẹ gbayipe bo gbẹ́ Ahọluduta Jiwheyẹwhe tọn dai.—1/12, weda 4-6.