WETA 12
Nawẹ A Sọgan Lẹzun Họntọn Jiwheyẹwhe Tọn Gbọn?
1, 2. Slẹ delẹ to họntọn Jehovah tọn lẹ mẹ?
OMẸ nankọ wẹ a nọ jlo na jihọntọn hẹ? Mẹhe a yiwanna. Mẹhe onú etọn nọ jẹ towe ji bọ hiẹ lọsu tọn nọ jẹ etọn ji. Mẹhe jọmẹ bo tindo jẹhẹnu he a yiwanna lẹ.
2 Jehovah Jiwheyẹwhe nọ de gbẹtọvi delẹ taidi họntọn. Di apajlẹ, Ablaham yin dopo to họntọn Jehovah tọn lẹ mẹ. (Isaia 41:8; Jakọbu 2:23) Jehovah sọ yiwanna Davidi. E dọ dọ Davidi yin ‘sunnu de he ahun emitọn kẹalọyi.’ (Owalọ lẹ 13:22) Yẹwhegán Daniẹli sọ yin “omẹ họakuẹ tlala de” to nukun Jehovah tọn mẹ.—Daniẹli 9:23.
3. Naegbọn Ablaham, Davidi po Daniẹli po do yin họntọn Jehovah tọn?
3 Nawẹ Ablaham, Davidi po Daniẹli po lẹzun họntọn Jehovah tọn gbọn? Jehovah dọna Ablaham dọ: “Hiẹ ko dotoaina ogbè ṣie.” (Jenẹsisi 22:18) Enẹ dohia dọ mẹhe nọ yí whiwhẹ do setonuna Jehovah lẹ wẹ ewọ nọ jihọntọn hẹ. Akọta dopo blebu tlẹ sọgan lẹzun họntọn etọn. Jehovah dọna akọta Islaeli tọn dọmọ: “Mì setonuna ogbè ṣie, yẹn nasọ lẹzun Jiwheyẹwhe mìtọn bọ mìwlẹ na lẹzun omẹ ṣie lẹ.” (Jelemia 7:23) Enẹwutu, hiẹ lọsu dona nọ setonuna Jehovah eyin a jlo na lẹzun họntọn etọn nugbonugbo.
JEHOVAH NỌ BASI HIHỌ́NA HỌNTỌN ETỌN LẸ
4, 5. Nawẹ Jehovah nọ basi hihọ́na họntọn etọn lẹ gbọn?
4 Biblu dọ dọ Jehovah nọ dín aliho lẹ “nado do huhlọn etọn hia do mẹhe nọ yí ahun pipé de do sẹ̀n ẹn lẹ tamẹ.” (2 Otànnugbo lẹ 16:9) To Salmu lẹ 32:8 mẹ, Jehovah dopà na mẹdepope he na yin họntọn etọn dọ: “Yẹn na na we wuntuntun bo na plọn we aliho he hiẹ dona gbọn. Yẹn na ze nukun ṣie do ji we bo na na we ayinamẹ.”
5 Kẹntọ he dohuhlọn taun de jlo na glọnalina mí nado yin họntọn Jiwheyẹwhe tọn. Ṣigba, Jehovah jlo na basi hihọ́na mí. (Hia Salmu lẹ 55:22.) Taidi họntọn Jehovah tọn lẹ, mí nọ yí ahun mítọn lẹpo do sẹ̀n ẹn. Mí nọ yin nugbonọ na ẹn etlẹ yin to ninọmẹ sinsinyẹn lẹ mẹ. Podọ mí tindo nujikudo dopolọ taidi salmu-kantọ he wlan gando Jehovah go dọmọ: “Na ewọ tin to adusilọ ṣie mẹ wutu, yẹn ma na yin tẹnsẹna gbede.” (Salmu lẹ 16:8; 63:8) Nawẹ Satani nọ tẹnpọn nado glọnalina mí nado yin họntọn Jiwheyẹwhe tọn gbọn?
WHẸSADOKỌNAMẸ SATANI TỌN
6. Etẹwẹ Satani dọ gando gbẹtọvi lẹ go?
6 To Weta 11tọ mẹ, mí plọn dọ Satani diọnukunsọ Jehovah bo sawhẹdokọna ẹn dọ ewọ yin lalonọ podọ mawadodonọ, na e ma dike bọ Adam po Evi po nado magbe dagbe po oylan po tọn na yede wutu. Owe Jobu tọn he to Biblu mẹ plọn mí dọ Satani sọ sawhẹdokọna gbẹtọvi he jlo na yin họntọn Jiwheyẹwhe tọn lẹ ga. Satani dọ dọ yé nọ sẹ̀n Jiwheyẹwhe na nuhe yé gán mọyi sọn E si lẹ wutu, e ma yin na yé yiwanna Ẹn wutu. Satani tlẹ sọ dọ dọ emi gán sisẹ́ mẹdepope nado diọnukunsọ Jiwheyẹwhe. Gbọ mí ni pọ́n nuhe mí gán plọn sọn Jobu dè, podọ lehe Jehovah gọalọna ẹn do.
7, 8. (a) Nukun tẹwẹ Jehovah nọ yí do pọ́n Jobu? (b) Etẹwẹ Satani dọ gando Jobu go?
7 Omẹ nankọ wẹ Jobu yin? Dawe homẹdagbenọ de wẹ, he nọgbẹ̀ to nudi owhe 3 600 die. Jehovah dọ dọ to ojlẹ enẹ mẹ, mẹde ma tin he taidi ewọ nkọ to aigba ji. Jobu tindo sisi sisosiso na Jiwheyẹwhe bo gbẹwanna oylan. (Jobu 1:8) Mọwẹ, họntọn Jehovah tọn wẹ Jobu yin nugbonugbo.
8 Satani sawhẹdokọna Jobu dọ ale mẹdetiti tọn lẹ wutu wẹ e do to Jiwheyẹwhe sẹ̀n. Satani dọna Jehovah dọ: “Be hiẹ ma ko wleawuna opá hihọ́-basinamẹ tọn de lẹdo ewọ po whédo etọn po gọna nuhe e tindo lẹpo ya? Hiẹ ko dona azọ́n alọ etọn tọn bọ kanlin-yìnyìn etọn lẹ ko gbàpe to aigba ji. Ṣigba, nado diọ ninọmẹ lọ, dlẹnalọ towe bo doalọ nuhe e tindo lẹpo go bo pọ́n dọ ewọ ma na zánnu do gowe to nukun towe mẹ ya.”—Jobu 1:10, 11.
9. Etẹwẹ Jehovah nagbè Satani nado wà?
9 Satani sawhẹdokọna Jobu dọ nuhe e gán mọyi sọn Jehovah si lẹ kẹdẹ wutu wẹ e do to sinsẹ̀n Ẹn. Satani sọ sọalọakọ́n dọ emi gán hẹn Jobu nado doalọtena Jehovah sinsẹ̀n. Jehovah ma kọngbedopọ hẹ Satani, ṣigba e yigbe dọ Satani ni tẹ́n Jobu pọ́n nado yọnẹn eyin owanyi he e tindo na Jehovah wutu wẹ e do yin họntọn Etọn.
SATANI YANGBÉ JOBU TỌN
10. Nawẹ Satani yangbé Jobu tọn gbọn, podọ nawẹ Jobu yinuwa gbọn?
10 Jẹnukọn whẹ́, Satani kàn ayiha bọ kanlin Jobu tọn lẹpo yin finfin kavi yin huhusudo. Enẹgodo, Satani hù suhugan devi Jobu tọn lẹ tọn. Nulẹpo wẹ Jobu hẹnbu. To godo mẹ, Satani yí yujẹhọn de do hù ovi Jobu tọn ao lẹ. Etomọṣo, Jobu gbẹ́ yin nugbonọ na Jehovah. “Mahopọnna nuhe jọ do e go ehe lẹpo, Jobu ma waylando kavi sawhẹ nuylankan depope tọn dokọna Jiwheyẹwhe.”—Jobu 1:12-19, 22.
Jehovah dona Jobu, na ewọ do ede hia di họntọn nugbonọ de wutu
11. (a) Nudevo tẹwẹ Satani sọ wà na Jobu? (b) Nawẹ Jobu yinuwa gbọn?
11 Satani ma jogbe. E diọnukunsọ Jiwheyẹwhe bo dọmọ: “Doalọ ohú po agbasalan etọn po go bo pọ́n dọ ewọ ma na zánnu do gowe to nukun towe mẹ ya.” Enẹwutu, Satani yí azọ̀nylankan de do hò Jobu. (Jobu 2:5, 7) Ṣogan, Jobu gbẹ́ yin nugbonọ na Jehovah. E dọmọ: “Kaka yẹn nado kú, yẹn ma na jo tenọgli ṣie do!”—Jobu 27:5.
12. Nawẹ Jobu dohia dọ lalodo wẹ Satani te gbọn?
12 Jobu ma yọ́n nude gando whẹsadokọnamẹ Satani tọn lẹ kavi nuhewutu e do to yaji sọmọ go. E lẹndọ Jehovah wẹ to nuhahun lẹ hẹnwa emi ji. (Jobu 6:4; 16:11-14) Mahopọnna enẹ, Jobu gbẹ́ yin nugbonọ na Jehovah. Todin, e họnwun pete. Jobu ma yin ṣejannabinọ. Owanyi he e tindo na Jiwheyẹwhe wẹ zọ́n bọ e do yin họntọn Etọn. Lalo wẹ whẹsadokọnamẹ Satani tọn lẹpo!
13. Etẹ mẹ wẹ nugbonọ-yinyin Jobu tọn dekọtọn do?
13 Dile etlẹ yindọ Jobu ma yọ́n nuhe to jijọ to olọn mẹ, e yin nugbonọ na Jiwheyẹwhe bo dohia dọ mẹylankan wẹ Satani yin. Jehovah dona Jobu, na e do ede hia di họntọn nugbonọ de wutu.—Jobu 42:12-17.
LEHE SATANI TO WHẸSADOKỌNA WE DO
14, 15. Owhẹ̀ tẹwẹ Satani sadokọna gbẹtọvi lẹpo?
14 A sọgan plọn onú titengbe delẹ sọn nuhe jọ do Jobu go mẹ. To egbehe, Satani nọ sawhẹdokọna mí dọ nuhe mí gán mọyi sọn Jehovah si lẹ wutu wẹ mí do to sinsẹ̀n Ẹn. To Jobu 2:4 mẹ, Satani dọ dọ: “Nuhe gbẹtọ tindo lẹpo wẹ e na bẹ jo nado whlẹn ogbẹ̀ ede tọn.” Enẹwutu, gbẹtọvi lẹpo wẹ Satani to whẹsadokọna dọ yé yin ṣejannabinọ, e ma yin Jobu kẹdẹ. Owhe kanweko susu to okú Jobu tọn godo, Satani gbẹ́ to Jehovah vlẹko bo to whẹsadokọna devizọnwatọ etọn lẹ. Di apajlẹ, mí hia to Howhinwhẹn lẹ 27:11 mẹ dọ: “Visunnu ṣie, yin nuyọnẹntọ bo hẹn homẹ ṣie hùn, na yẹn nido gblọnhona ewọ he to vivlẹ mi kò.”
15 A sọgan de nado setonuna Jehovah bo yin họntọn nugbonọ de na Ẹn nado do Satani hia di lalonọ. Eyin etlẹ biọ dọ a ni basi diọdo daho lẹ to gbẹzan towe mẹ nado lẹzun họntọn Jiwheyẹwhe tọn, nudide dagbe hugan he a sọgan basi lọ niyẹn! Whẹho sinsinyẹn de wẹ nudide enẹ yin. Satani dọ dọ a ma na yin nugbonọ na Jiwheyẹwhe eyin nuhahun lẹ fọ́n. E nọ tẹnpọn nado doyẹklọ mí ma nado yin nugbonọ na Jiwheyẹwhe. Gbọnna?
16. (a) Aliho tẹlẹ wẹ Satani nọ yizan nado tẹnpọn bo hẹnalọdotena mí ma nado sẹ̀n Jehovah? (b) Nawẹ Lẹgba sọgan tẹnpọn bo hẹnalọdotena we ma nado wà nuhe sọgbe gbọn?
16 Aliho susu wẹ Satani nọ yizan nado tẹnpọn bo hẹn haṣinṣan mítọn hẹ Jiwheyẹwhe gble. E nọ yangbé mítọn “di kinnikinni de he to lìlì bo to mẹhe e na tlẹndu dín.” (1 Pita 5:8) Ni ma paṣa we blo eyin họntọn towe lẹ, hẹnnumẹ towe lẹ, kavi mẹdevo lẹ tẹnpọn nado hẹnalọdotena we ma nado plọn Biblu podọ ma nado wà nuhe sọgbe. A sọgan nọ mọ dewe di mẹhe to mẹgbeyinyan de glọ.a (Johanu 15:19, 20) Satani sọ nọ diọwunmẹ na ede zun “angẹli hinhọ́n tọn de.” Enẹwutu, e sọgan tẹnpọn nado doyẹklọ mí nado vẹtolina Jehovah. (2 Kọlintinu lẹ 11:14) Aliho devo he Satani sọ nọ yizan wẹ nado hẹn mí lẹndọ mí ma jẹ nado sẹ̀n Jiwheyẹwhe.—Howhinwhẹn lẹ 24:10.
NỌ SETONUNA GBEDIDE JEHOVAH TỌN LẸ
17. Etẹwutu mí do nọ setonuna Jehovah?
17 Eyin mí setonuna Jehovah, mí nọ do Satani hia di lalonọ. Etẹwẹ na gọalọna mí nado nọ setonu? Biblu dọmọ: “Hiẹ dona yí ahun towe lẹpo, alindọn towe lẹpo, podọ huhlọn towe lẹpo do yiwanna Jehovah Jiwheyẹwhe towe.” (Deutelonomi 6:5) Mí nọ setonuna Jehovah, na mí yiwanna ẹn wutu. Dile owanyi mítọn na Jehovah to jijideji, mí na nọ tindo ojlo nado wà nuhe e biọ to mí si lẹpo. Apọsteli Johanu wlan dọ: “Na nuhe owanyi Jiwheyẹwhe tọn zẹẹmẹdo die, dọ mí ni yìn gbedide etọn lẹ; ṣogan gbedide etọn lẹ ma pẹnagbànmẹ.”—1 Johanu 5:3.
18, 19. (a) Etẹwẹ yin delẹ to nuhe Jehovah dọ dọ e ma sọgbe lẹ mẹ? (b) Nawẹ mí wagbọn do yọnẹn dọ Jehovah ma to nuhe zẹ̀ nugopipe mítọn go de biọ to mí si?
18 Ṣigba, etẹwẹ yin delẹ to nuhe Jehovah dọna mí dọ e ma sọgbe lẹ mẹ? Delẹ to yé mẹ yin sislẹ do apotin lọ “Gbẹwanna Nuhe Jehovah Gbẹwanna” mẹ. Tlolo whẹ́, a gán lẹndọ delẹ to onú enẹlẹ mẹ ma ka ylan sọmọ nẹ. Amọ́, eyin a hia wefọ Biblu tọn lọ lẹ bo yí sọwhiwhe do lẹnnupọndo yé ji, a na mọdọ nuyọnẹnnu wẹ e yin nado setonuna osẹ́n Jehovah tọn lẹ. A gán sọ mọdọ a dona basi diọdo delẹ to gbẹzan towe mẹ. Dile etlẹ yindọ e sọgan nọma bọawu to whedelẹnu, eyin a basi diọdo enẹlẹ, a na tindo jijọho gọna ayajẹ he nọ wá sọn họntọn nugbonọ Jiwheyẹwhe tọn yinyin mẹ. (Isaia 48:17, 18) Nawẹ mí wagbọn do yọnẹn dọ e yọnbasi nado basi diọdo enẹlẹ?
19 Jehovah ma nọ biọ to mí si nado wà nuhe zẹ̀ nugopipe mítọn go gbede. (Deutelonomi 30:11-14) Taidi họntọn nugbo de, e yọ́n mí hú mílọsu. E yọ́n nugopipe po madogán mítọn lẹ po. (Salmu lẹ 103:14) Apọsteli Paulu na mí tuli dọ: “Nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali de, na mìwlẹ nido penugo nado doakọnna ẹn.” (1 Kọlintinu lẹ 10:13) Mí sọgan deji dọ Jehovah na nọ na mí huhlọn nado wà nuhe sọgbe to whelẹponu. E na na we “huhlọn he hú jọwamọ tọn,” na a nido doakọnna ninọmẹ sinsinyẹn lẹ. (2 Kọlintinu lẹ 4:7) To whenue Paulu ko duvivi alọgọ Jehovah tọn to ojlẹ mọnkọtọn lẹ mẹ godo, e penugo bo dọmọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13.
PLỌN NADO NỌ YIWANNA NUHE JIWHEYẸWHE YIWANNA LẸ
20. Jẹhẹnu tẹlẹ wẹ a dona nọ dohia, podọ etẹwutu?
20 Eyin mí jlo na yin họntọn Jehovah tọn, mí dona doalọtena nuhe Jehovah dọ dọ e ma sọgbe lẹ wiwà, amọ́ mí sọ dona wà nususu humọ. (Lomunu lẹ 12:9) Họntọn Jiwheyẹwhe tọn lẹ nọ yiwanna nuhe e yiwanna lẹ. Onú enẹlẹ yin sislẹ to Salmu lẹ 15:1-5 mẹ. (Hia.) Họntọn Jehovah tọn lẹ nọ hodo apajlẹ etọn bo nọ do jẹhẹnu delẹ hia taidi “owanyi, ayajẹ, jijọho, homẹfa, homẹdagbe, dagbewà, yise, walọmimiọn, mawazẹjlẹgo.”—Galatianu lẹ 5:22, 23.
21. Nawẹ a sọgan plọn nado nọ do jẹhẹnu he Jiwheyẹwhe yiwanna lẹ hia gbọn?
21 Nawẹ a sọgan plọn nado nọ do jẹhẹnu dagbedagbe enẹlẹ hia gbọn? A dona plọn nuhe Jehovah yiwanna lẹ gbọn Biblu hihia po Biblu pinplọn to gbesisọ mẹ po dali. (Isaia 30:20, 21) Dile a to mọwà, owanyi he a tindo na Jehovah na jideji, podọ dile owanyi enẹ to jijideji, a na jlo nado nọ setonuna ẹn.
22. Etẹwẹ na yin kọdetọn lọ eyin a setonuna Jehovah?
22 Diọdo he e sọgan biọ dọ a ni basi to gbẹzan towe mẹ lẹ sọgan yin yiyijlẹdo awù hoho lẹ dide nado ze yọyọ devo lẹ do go. Biblu dọ dọ a dona “de gbẹtọ-yinyin hoho lọ . . . sẹ̀ sọn ogo, bo yí gbẹtọ-yinyin yọyọ lọ dogo.” (Kolosinu lẹ 3:9, 10) Dile etlẹ yindọ diọdo enẹlẹ bibasi sọgan nọma bọawu, eyin mí basi yé bo setonuna Jehovah, e dopà dọ emi na na mí “ale daho” de. (Salmu lẹ 19:11) Mọwẹ, basi dide nado setonuna Jehovah bo dohia dọ lalonọ wẹ Satani. Sẹ̀n Jehovah, e ma yin na ale he a na wá mọyi sọn e mẹ wutu, ṣigba na a tindo owanyi matin ṣejannabi na ẹn wutu. Gbọnmọ dali, a na lẹzun họntọn nugbo Jiwheyẹwhe tọn de!
a Enẹ ma zẹẹmẹdo dọ Satani wẹ to anadena mẹhe jlo na hẹn we doalọtena Biblu pinplọn lẹ. Ṣigba, Satani wẹ “yẹwhe titonu ehe tọn,” podọ “aihọn lọ pete tin to huhlọn [etọn] glọ.” Enẹwutu, e ma dona paṣa mí eyin mẹlẹ tẹnpọn nado hẹn mí doalọtena Jehovah sinsẹ̀n.—2 Kọlintinu lẹ 4:4; 1 Johanu 5:19.