Plọnnu sọn Nuṣiwa Islaelivi lẹ Tọn Mẹ
ISLAELIVI lẹ yọ́n nuhe Jehovah donukun sọn yé si to whenuena yé to Aigba Pagbe tọn lọ mẹ biọ. Jiwheyẹwhe ko degbè gbọn Mose gblamẹ dọmọ: “Mì na yàn tòmẹnu aigba lọ tọn lẹpo jẹgbonu sọn mì nukọn, bo sukún zannu winwlan yetọn lẹpo tọn do, bosọ sukún boṣiọ kinkọ̀n yetọn lẹpo tọn do, bosọ và ofi yiji yetọn lẹpo.”—Osọha 33:52.
Islaelivi lẹ ma dona basi alẹnu depope hẹ tòmẹnu aigba lọ tọn lẹ, mọjanwẹ yé masọ dona wlealọ hẹ yé do niyẹn. (Deut. 7:2, 3) Na nugbo tọn, avase yin nina omẹ dide Jiwheyẹwhe tọn lẹ dọmọ: “Payi dewe go, hiẹ nikaa basi alẹnu de hẹ tòmẹnu aigba lọ tọn lẹ fie hiẹ jei, e nikaa yin omọ̀ de to gblagbla towe mẹ.” (Eks. 34:12) Ṣogan, Islaelivi lẹ vẹtolina Jiwheyẹwhe bo jẹ omọ̀ mẹ. Etẹwẹ zọ́n bọ yé do jai? Nuplọnmẹ avase tọn tẹlẹ wẹ mí sọgan mọyi sọn numimọ yetọn mẹ?—1 Kọl. 10:11.
Sọn Gbẹdido mẹ Biọ Boṣiọ-Sinsẹ̀n Mẹ
To bẹjẹeji, Islaelivi lẹ gbawhàn mẹhe nọ nọ̀ Aigba Pagbe tọn lọ ji lẹ tọn dile yé to aigba lọ yí. Ṣigba, ovi Islaeli tọn lẹ gboawupo nado setonuna gbedide Jiwheyẹwhe tọn lẹ mlẹnmlẹn. Yé ma yàn kẹntọ lẹ jẹgbonu gba. (Whẹ. 1:1–2:10) Kakatimọ, dile Islaelivi lẹ jẹ gbẹnọ ji to “akọta ṣinawe” he nọ nọ̀ aigba lọ ji lẹ ṣẹnṣẹn, nuyiwa gbọzangbọzan hẹ tòmẹnu akọta enẹlẹ tọn wá dekọtọn do họntọnjiji hẹ yé mẹ. (Deut. 7:1) Nawẹ ehe yinuwado Islaelivi lẹ ji gbọn? Biblu dọmọ: “Yé sọ yí viyọnnu yetọn nado yin asi yetọn lẹ, bosọ na viyọnnu yetọn titi lẹ hlan visunnu yetọn lẹ, bosọ to yẹwhe yetọn lẹ sẹ̀n. Ovi Islaeli tọn lẹ sọ wà enẹ he yin oylan to nukun OKLUNỌ tọn mẹ, bosọ wọnji OKLUNỌ Jiwheyẹwhe yetọn go, bo to Baalimi po Aṣelọti po sẹ̀n.” (Whẹ. 3:5-7) Na omẹ Islaeli tọn lẹ, gbẹdido hẹ tòmẹnu aigba lọ tọn lẹ wá dekọtọn do alọwiwle hẹ yé po boṣiọ-sinsẹ̀n po mẹ. Dile Islaelivi lẹ jẹ alọwle hẹ omẹ enẹlẹ ji, todido masọ tin sọmọ dọ yé na penugo nado yàn kosi lẹ jẹgbonu sọn aigba lọ ji ba. Sinsẹ̀n-bibasi nugbo yin hinhẹnflu podọ Islaelivi lẹ lọsu jẹ yẹwhe lalo lẹ sẹ̀n ji.
Todin he Islaelivi lẹ jihọntọn hẹ tòmẹnu Aigba Pagbe lọ tọn lẹ, omẹ enẹlẹ wá yin owù na yé to gbigbọ-liho hú whenue yé yin kẹntọ. Sọ lẹnnupọndo aliho devo he mẹ sinsẹ̀n-bibasi yetọn sọgan ko yin hinhẹnflu te ji.
Sọn Glelilẹ mẹ Biọ Baali Sinsẹ̀n Mẹ
To whenuena ovi Islaeli tọn lẹ biọ Aigba Pagbe tọn lọ mẹ, yé masọ nọ yì sọn fide jẹ fide ba, podọ susu yetọn lẹzun glesi lẹ. E yọnbasi dọ aliho glelilẹ tọn dopolọ he mẹhe ko nọ pọ̀ aigba lọ dai lẹ nọ yizan lẹ wẹ yelọsu jẹ yiyizan ji. E họnwun dọ, e ma yin aliho glelilẹ Kenaninu lẹ tọn kẹdẹ wẹ yé jẹ hihodo ji gba. Gbẹdido hẹ omẹ lẹdo lọ tọn lẹ sọ doyẹklọ Islaelivi lẹ nado kẹalọyi nuyise yetọn he gando glezọ́nwiwà go lẹ.
Kenaninu lẹ nọ sẹ̀n Baali susu, podọ nuyise yetọn wẹ yindọ yẹwhe enẹlẹ nọ hẹn aigba de sinsẹ́n susu tọ́n. Gbọnvona aigba lọ pipọ̀ po sinsẹ́n etọn lẹ bibẹ po, Islaelivi lẹ wá kọnawudopọ hẹ Kenaninu lẹ to nukọn mẹ nado gbògbéna yẹwhe yetọn lẹ taidi asisa nuyọ́nnamẹ tọn. Gbọnmọ dali, mẹsusu to Islaeli nọ sọalọakọ́n dọ yé to Jehovah sẹ̀n, ṣigba nado dọ hójọhó, atẹṣi wẹ yé te mlẹnmlẹn.
Avase Sinsinyẹn de Na Mí to Egbehe
Vlavo Islaelivi lẹ ma ko lẹn paali nado tindo mahẹ to sinsẹ̀n-bibasi Baali tọn po nuyiwa gblezọn etọn lẹ po mẹ to whenuena yé mọ tòmẹnu Aigba Pagbe lọ tọn lẹ to tintan whenu. Ṣogan, fie gbẹdido yetọn wá plan yé jẹ niyẹn. Be e ma yin nuyiwadomẹji ylankan dopolọ lẹ wẹ to tepọn mí, eyin mí nọ dogbẹ́ hẹ mẹdelẹ he taidi mẹhe jọmẹ ṣigba he ma kẹalọyi nuyise, nujinọtedo, po nunọwhinnusẹ́n Klistiani tọn lẹ po ya? Nugbo wẹ dọ, e sọgan biọ dọ mí ni yinuwa dopọ hẹ mayisenọ lẹ jẹ obá de mẹ, vlavo to azọ́nwatẹn mítọn, to wehọmẹ, kavi etlẹ yin to whégbè. Etomọṣo, numimọ Islaelivi lẹ tọn na mí avase dọ, mí na dín nuhahun na míde eyin mí nọ doafọna gbẹdido mọnkọtọn lẹ. Biblu zinnudo nugbo he ma sọgan yin agọjẹdo lọ ji dọmọ: “Ogbẹ́ ylankan nọ hẹn walọ dagbe gble.”—1 Kọl. 15:33.
To egbehe, mí nọ pehẹ whlepọn susu he taidi dehe Islaelivi lẹ pehẹ. Aihọn egbehe tọn gọ́ na boṣiọ wunmẹwunmẹ lẹ. Ehelẹ bẹ akuẹ, omẹ nukundeji ayidedai tọn lẹ, aihundatọ lanmẹyiya tọn he diyin lẹ, tito tonudidọ tọn lẹ, sinsẹ̀ngán delẹ, kakajẹ hagbẹ whẹndo tọn delẹ ji hẹn. Depope to onú ehelẹ mẹ sọgan wá yí otẹn tintan to gbẹzan mítọn mẹ. Gbẹdido pẹkipẹki hẹ mẹhe ma yiwanna Jehovah lẹ sọgan zọ́n bọ mí na jai to gbigbọ-liho.
Adà tangan de to sinsẹ̀n-bibasi Baali tọn mẹ he dọ̀n Islaelivi susu bo doyẹklọ yé wẹ nuyiwa zanhẹmẹ tọn he ma sọgbe lẹ. Omọ̀ mọnkọtọn lẹ gbẹsọ to yẹdoklọ delẹ to omẹ Jiwheyẹwhe tọn lẹ mẹ. Di apajlẹ, nọtẹn Internet tọn de ji yìyì poun to nuglọ to ohọ̀ mẹdetiti tọn mẹ sọgan ko pé nado hẹn ayihadawhẹnamẹnu dagbe mẹhe nọ dín tlintlindo kavi mẹhe ma tin to aṣeji de tọn gble. Lehe e na blawu do sọ dọ Klistiani de ni yin yẹdoklọ gbọn yẹdide fẹnnuwiwa Internet ji tọn dali!
‘Ayajẹnọ Wẹ Yé He to Aṣẹdai Etọn lẹ Yìn’
Nudide mẹdetiti tọn wẹ e yin nado setonuna Jehovah kavi lala to whenuena mí to mẹhe mí na dogbẹ́ hẹ lẹ de. (Deut. 30:19, 20) Enẹwutu, mí dona kanse míde dọ: ‘Mẹnu lẹ wẹ n’nọ dogbẹ́ hẹ to ayidedai ṣie lẹ whenu? Etẹwẹ yin walọyizan po nujinọtedo yetọn lẹ po? Be yé nọ sẹ̀n Jehovah ya? Be gbẹdido hẹ yé na gọalọna mi nado yin Klistiani dagbe dogọ ya?’
Psalm-kàntọ lọ jihàn dọmọ: “[Ayajẹnọ] wẹ yé he aliho yetọn yin pipé lẹ, mẹhe to zọnlinzin to osẹ́n OKLUNỌ tọn mẹ lẹ. [Ayajẹnọ] wẹ yé he to aṣẹdai etọn lẹ yìn, he yí ayiha pete do to dindin in.” (Ps. 119:1, 2) Na nugbo tọn, “[Ayajẹnọ] wẹ mẹdepope he dibusi OKLUNỌ; he zinzọnlin to aliho etọn lẹ ji.” (Ps. 128:1) Mì gbọ mí ni plọnnu sọn nuṣiwa Islaelivi lẹ tọn mẹ bo setonuna Jehovah mlẹnmlẹn to whenuena mí to gbẹdohẹmẹtọ mítọn lẹ de.—Howh. 13:20.
[Yẹdide to weda 26]
Gbẹdido hẹ mẹhe ma yiwanna Jehovah lẹ sọgan dọ̀n mí biọ boṣiọ-sinsẹ̀n mẹ