“Mì Dike Mẹde Wle Mì Di Kanlinmọ Blo”!

1. Sọgbe hẹ Kolosinu lẹ 2:4, 8, nawẹ Satani nọ tẹnpọn nado wle mí di kanlinmọ gbọn?

SATANI jlo na sisẹ́ mí na mí nido diọnukunsọ Jehovah. Nado jẹ yanwle etọn kọ̀n, e nọ tẹnpọn nado yinuwado nulẹnpọn mítọn ji, na taun tọn nado wle mí di kanlinmọ, na mí nido setonuna ẹn. Nuhe mẹ mí nọ tindo ojlo te lẹ wẹ e nọ yizan nado tẹnpọn bo diọlinlẹnna mí kavi doyẹklọ mí.—Hia Kolosinu lẹ 2:4, 8.

2, 3. (a) Naegbọn mí dona na ayidonugo avase he yin kinkandai to Kolosinu lẹ 2:8 mẹ? (b) Etẹwẹ mí na gbadopọnna to hosọ ehe mẹ?

² Be owù lọ tin nugbonugbo dọ Satani ni hẹn mí buali ya? Gbau! Flindọ Paulu ma kàn avase he tin to Kolosinu lẹ 2:8 mẹ hlan mayisenọ lẹ gba. Ṣigba, Klistiani yiamisisadode lẹ wẹ e kàn ẹn hlan. (Kol. 1:2, 5) To ojlẹ lọ mẹ, Klistiani enẹlẹ tin to owù mẹ, podọ to egbehe mílọsu tin to owù he tlẹ sọ ylan humọ mẹ. (1 Kọl. 10:12) Etẹwutu? Na Satani ko yin yinyan hlan lẹdo aigba tọn mẹ, podọ yanwle etọn wẹ nado hẹn devizọnwatọ nugbonọ Jiwheyẹwhe tọn lẹ buali. (Osọ. 12:9, 12, 17) Humọ, mí to gbẹnọ to ojlẹ de mẹ, whenue mẹylankan lẹ po mẹblutọ lẹ po to “yinylan deji dogọ” te.—2 Tim. 3:1, 13.

³ To hosọ ehe mẹ, mí na gbadopọnna lehe Satani nọ yí “oklọ ovọ́” lẹ zan nado tẹnpọn bo yinuwado nulẹnpọn mítọn ji do. Mí na dọhodo “ayiha wintinwintin” kavi “ayiha gigẹdẹ” etọn atọ̀n delẹ ji. (Efe. 6:11, Odò.) Enẹgodo, to hosọ he bọdego mẹ, mí na gbadopọnna lehe mí sọgan nọavùnte sọta nuyiwadomẹji ylankan depope he wlẹnwin Satani tọn lẹ sọgan ko tindo do nulẹnpọn mítọn ji do. Ṣigba jẹnukọn whẹ́, mì gbọ mí ni pọ́n nuhe mí sọgan plọn sọn aliho he mẹ Satani doyẹklọ Islaelivi lẹ te mẹ to whenue yé ko biọ Aigba Pagbe tọn lọ ji godo.

YÉ YIN WHIWHLEPỌN NADO DOALỌ TO BOṢIỌ-SINSẸ̀N MẸ

4-6. Sọgbe hẹ Deutelonomi 11:10-15, diọdo he gando aliho glelilẹ tọn go tẹwẹ Islaelivi lẹ dona basi to whenue yé jẹ Aigba Pagbe tọn lọ ji?

⁴ Satani yí ayiha gigẹdẹ do whlé Islaelivi lẹ pọ́n nado sẹ̀n boṣiọ. Nawẹ e wàmọ gbọn? E yọnẹn dọ yé do hudo núdùdù tọn, enẹwutu e tẹnpọn nado yí enẹ zan nado hẹn yé wà ojlo etọn. To whenue Islaelivi lẹ biọ Aigba Pagbe tọn lọ ji, yé dona diọ aliho he mẹ yé nọ wà glezọ́n te lẹ. Whenue yé to Egipti, Tọ̀sisa Nile tọn mẹ wẹ yé nọ dọ̀n osin sọn nado húsinna ogle yetọn lẹ. Ṣigba, to Aigba Pagbe tọn lọ ji, tọ̀sisa daho de ma tin, enẹwutu jikun he nọ ja sọn ojlẹ de mẹ jẹ devo mẹ, gọna ahun he nọ ja wẹ nọ húsinna ogle yetọn lẹ. (Hia Deutelonomi 11:10-15; Isa. 18:4, 5) Enẹwutu, Islaelivi lẹ dona plọn aliho glelilẹ tọn yọyọ lẹ. Enẹ ma na bọawuna yé, na suhugan mẹhe do numimọ glelilẹ tọn to yé mẹ lẹ tọn ko kú to danfafa ji.

⁵ Jehovah basi zẹẹmẹ na omẹ etọn lẹ dọ ninọmẹ yetọn ko diọ. Enẹgodo, e yí avase de dogọ, he sọgan ko taidi nuhe ma tindo kanṣiṣa hẹ glezọ́n to tintan whenu, dọmọ: “Mì payi ma nado dike ahun mìtọn ni yin yẹdoklọ nado danbú bo sẹ̀n yẹwhe devo lẹ bosọ dẹ́ do odò na yé.” (Deut. 11:16, 17) Naegbọn Jehovah do na avase sọta yẹwhe lalo lẹ sinsẹ̀n to whenue e to hodọ gando aliho glelilẹ tọn yọyọ lẹ pinplọn go?

⁶ Jehovah yọnẹn dọ Islaelivi lẹ na jlo nado plọn aliho delẹ he mẹ yè nọ lẹ̀ ogle te to lẹdo lọ mẹ sọn kosi he ṣẹnṣẹn yé te lẹ dè. Nugbo wẹ dọ kọmẹnu Islaelivi lọ lẹ tọn lẹ tindo numimọ tlala hú yé, podọ omẹ Jiwheyẹwhe tọn lẹ sọgan plọn aliho azọ́nwiwa tọn dagbe delẹ sọn yé dè, ṣigba owù de tin to e mẹ. Baali wẹ glesi Kenaninu enẹlẹ nọ sẹ̀n, bọ enẹ ko yinuwado pọndohlan yetọn ji. Yé yise dọ Baali wẹ tindo agahomẹ bo nọ namẹ jikun. Jehovah ma jlo dọ nuyise lalo enẹlẹ ni doyẹklọ omẹ emitọn lẹ. Ṣigba, whlasusu wẹ Islaelivi lẹ basi dide nado sẹ̀n Baali. (Sọh. 25:3, 5; Whẹ. 2:13; 1 Ahọ. 18:18) Todin, pọ́n lehe Satani penugo nado wle Islaelivi lẹ di kanlinmọ do.

WLẸNWIN ATỌ̀N HE SATANI YIZAN NADO WLE ISLAELIVI LẸ DI KANLINMỌ

7. Whlepọn yise tọn tẹwẹ Islaelivi lẹ pehẹ to whenue yé jẹ Aigba Pagbe tọn lọ ji?

⁷ Wlẹnwin tintan he Satani yizan wẹ yindọ, ewọ yí ojlo jọwamọ tọn he yé tindo dọ jikun ni ja zan. To whemẹwhemẹ, jikun vude poun wẹ nọ ja to Aigba Pagbe tọn lọ ji bẹsọn vivọnu avril tọn jẹ septembre. Jikun he nọ saba ja bẹsọn nudi osun octobre tọn mẹ wẹ nọ zọ́n bọ ojijẹ yetọn nọ sù bosọ nọ gọalọna yé nado nọgbẹ̀. Satani doyẹklọ Islaelivi lẹ nado yise dọ eyin yé na tindo kọdetọn dagbe, yé dona kẹalọyi aṣa kọmẹnu yetọn he yin kosi lẹ tọn. Kọmẹnu enẹlẹ yise dọ hùnwhẹ delẹ dona yin bibasi na yẹwhe yetọn lẹ nido yinuwa bo hẹn jikun nado ja na yé. Mẹhe ma tindo yise to Jehovah mẹ enẹlẹ kudeji dọ aliho dopo gee lọ niyẹn na akúdido nikaa nọ aimẹ dẹn, enẹwutu yé nọ basi hùnwhẹ kosi tọn delẹ na yẹwhe lalo lọ Baali.

8. Etẹwẹ yin wlẹnwin awetọ he Satani yizan? Basi zẹẹmẹ.

⁸ Satani yí wlẹnwin awetọ devo zan na Islaelivi lẹ. E yí ojlo mawé yetọn lẹ zan. Akọta kosi lọ lẹ nọ sẹ̀n yẹwhe lalo yetọn lẹ gbọn alọdido to nuyiwa mawé he hiọawu taun lẹ mẹ dali. Aliho sinsẹ̀n-bibasi tọn gblezọn ehe bẹ galilọ yọnnu po sunnu po tọn to tẹmpli mẹ hẹn. Zanhẹmẹ to mẹhe tindo vijinu dopolọ lẹ ṣẹnṣẹn po fẹnnuwiwa zanhẹmẹ tọn wunmẹ devo lẹ po yin alọkẹyi, bo tlẹ sọ nọ yin pinpọnhlan di nuhe sọgbe! (Deut. 23:17, 18; 1 Ahọ. 14:24) Kosi lọ lẹ yise dọ hùnwhẹ ehelẹ nọ zọ́n bọ yẹwhe yetọn lẹ nọ hẹn aigba yetọn nado de sinsẹ́n susu tọ́n. Hùnwhẹ kosi tọn he nọ bẹ fẹnnuwiwa zanhẹmẹ tọn hẹn enẹlẹ nọ dọ̀n Islaelivi susu, podọ ehe zọ́n bọ yelọsu yin yẹdoklọ nado doalọ to yẹwhe lalo lẹ sinsẹ̀n mẹ. Na nugbo tọn, Satani wle yé di kanlinmọ.

9. Sọgbe hẹ Hosea 2:16, 17, nawẹ Satani hẹn pọndohlan Islaelivi lẹ tọn gando Jehovah go dózin gbọn?

⁹ Satani sọ yí wlẹnwin atọ̀ntọ devo zan. E hẹn pọndohlan Islaelivi lẹ tọn gando Jehovah go dózin. To ojlẹ yẹwhegán Jelemia tọn mẹ, Jehovah dọ dọ yẹwhegán lalo lẹ hẹn omẹ Emitọn lẹ nado wọn yinkọ Emitọn “na Baali wutu.” (Jel. 23:27) E taidi dọ omẹ Jiwheyẹwhe tọn lẹ doalọtena yinkọ Jehovah tọn yiyizan bo yí yinkọ lọ Baali, he zẹẹmẹdo “Núnọ” kavi “Klunọ” do diọtẹnna ẹn. Nuyiwa ehe zọ́n bọ vogbingbọn he tin to Jehovah po Baali po ṣẹnṣẹn masọ họnwun to linlẹn Islaelivi lẹ tọn mẹ ba, bọ e bọawuna yé dogọ nado nọ ṣaka hùnwhẹ sinsẹ̀n-bibasi Baali tọn lẹ dopọ hẹ sinsẹ̀n-bibasi Jehovah tọn.—Hia Hosea 2:16, 17, po nudọnamẹ odò tọn po.

WLẸNWIN SATANI TỌN LẸ TO EGBEHE

10. Wlẹnwin tẹlẹ wẹ Satani nọ yizan to egbehe?

¹⁰ Wlẹnwin dopolọ lẹ wẹ Satani nọ yizan to egbehe. E nọ domọwle gbẹtọ lẹ gbọn ojlo jọwamọ tọn yetọn lẹ yiyizan, fẹnnuwiwa zanhẹmẹ tọn zizedaga, po pọndohlan yetọn gando Jehovah go hinhẹn dózin po dali. Jẹnukọn whẹ́, mì gbọ mí ni gbadopọnna wlẹnwin he mí slẹ gbọngodo ehe.

11. Nawẹ Satani hẹn pọndohlan gbẹtọ lẹ tọn gando Jehovah go dózin gbọn?

¹¹ Satani nọ hẹn pọndohlan gbẹtọ lẹ tọn gando Jehovah go dózin. To okú apọsteli Jesu tọn lẹ tọn godo, mẹdelẹ he nọ ylọ yede dọ Klistiani lẹ jẹ nuplọnmẹ lalo lẹ hẹn gbayipe ji. (Owalọ 20:29, 30; 2 Tẹs. 2:3) Atẹṣitọ ehelẹ jẹ hinhẹn vẹawuna gbẹtọ lẹ ji nado yọ́n mẹhe Jiwheyẹwhe nugbo dopo akàn lọ yin. Di apajlẹ, yé doalọtena yinkọ Jiwheyẹwhe tọn yiyizan to vọkan Biblu tọn yetọn lẹ mẹ, bo nọ yí hogbe delẹ taidi “Oklunọ” do diọtẹnna ẹn. Gbọn yinkọ Jiwheyẹwhe tọn titi didesẹ podọ tẹnmẹ-yinkọ lọ “Oklunọ” yíyí do diọtẹnna ẹn dali, yé nọ hẹn ẹn vẹawuna Biblu-hiatọ lẹ nado mọ vogbingbọn he to Jehovah po “oklunọ” devo he yin nùdego to Owe-wiwe mẹ lẹ po ṣẹnṣẹn. (1 Kọl. 8:5) Yé nọ yí hogbe dopolọ “Oklunọ” zan na Jehovah po Jesu po, bọ ehe nọ hẹn ẹn vẹawuna mẹlẹ nado mọnukunnujẹemẹ dọ Jehovah gbọnvona Visunnu etọn. (Joh. 17:3) Bẹwlu ehe wẹ hẹn nuyise Atọ̀n-to-Dopomẹ tọn wá, yèdọ nuyise de he ma tin to Ohó Jiwheyẹwhe tọn mẹ. Taidi kọdetọn de, mẹsusu nọ mọdọ Jiwheyẹwhe dablu, bosọ yise dọ gbẹtọ ma gán yọ́n mẹhe ewọ yin. Lalo nankọ die!—Owalọ 17:27.

12. Etẹwẹ sinsẹ̀n lalo ko zedaga, podọ etẹwẹ yin kọdetọn lọ sọgbe hẹ Lomunu lẹ 1:28-31?

¹² Satani nọ yí ojlo mawé lẹ zan. To Islaeli hohowhenu tọn, Satani yí sinsẹ̀n lalo zan nado ze fẹnnuwiwa daga. To egbehe, nudopolọ wẹ e nọ wà. Sinsẹ̀n lalo nọ yí nukunpẹvi do pọ́n walọyizan mawé lẹ bo tlẹ nọ ze yé daga. Taidi kọdetọn de, susu mẹhe sọalọakọ́n dọ emi to Jiwheyẹwhe sẹ̀n lẹ tọn wẹ ko gbẹkọ nujinọtedo walọ dagbe tọn etọn he họnwun lẹ go. Apọsteli Paulu basi zẹẹmẹ kọdetọn lọ tọn to wekanhlanmẹ etọn hlan Lomunu lẹ mẹ. (Hia Lomunu lẹ 1:28-31.) Delẹ to “nuhe ma jẹ lẹ” mẹ wẹ fẹnnuwiwa zanhẹmẹ tọn wunmẹ lẹpo, ehe bẹ zanhẹmẹ to mẹhe tindo vijinu dopolọ lẹ ṣẹnṣẹn hẹn ga. (Lom. 1:24-27, 32; Osọ. 2:20) Lehe e yin nujọnu dọ mí ni tẹdo nuplọnmẹ Biblu tọn he họnwun lẹ go do sọ!

13. Wlẹnwin devo tẹwẹ Satani nọ yizan?

¹³ Satani nọ yí ojlo jọwamọ tọn mítọn lẹ zan. Mí nọ tindo ojlo lọ to jọwamọ-liho nado wleawuna nugopipe delẹ he na gọalọna mí nado penukundo míde po whẹndo mítọn lẹ po go. (1 Tim. 5:8) To paa mẹ, mí sọgan wleawuna nugopipe enẹlẹ to whenue mí yì wehọmẹ bo yin wehọmẹvi azọ́n sinsinyẹnwatọ lẹ. Ṣigba, mí dona tin to aṣeji. To otò susu lẹ mẹ, gbọnvona dọ tito wepinplọn tọn nọ plọn wehọmẹvi lẹ nado wleawuna nugopipe yọ́n-na-yizan lẹ, e sọ nọ bẹ tamẹnuplọnmẹ gbẹtọvi tọn lẹ hẹn ga. Wehọmẹvi lẹ nọ yin tulina nado nọ tindo ayihaawe gando tintin Jiwheyẹwhe tọn go podọ ma nado nọ tindo sisi na Biblu. Yè nọ plọn yé dọ nuplọnmẹ nulẹ tin yededenu tọn wẹ yin aliho nuyọnẹn tọn dopo gee lọ nado basi zẹẹmẹ lehe ogbẹ̀ wá aimẹ do tọn. (Lom. 1:21-23) Nuplọnmẹ mọnkọ lẹ jẹagọdo “nuyọnẹn Jiwheyẹwhe tọn.”—1 Kọl. 1:19-21; 3:18-20.

14. Etẹwẹ tamẹnuplọnmẹ gbẹtọvi tọn nọ zedaga?

¹⁴ Tamẹnuplọnmẹ gbẹtọvi tọn ma nọ ze nujinọtedo dodo tọn Jehovah tọn lẹ daga. E ma nọ gọalọnamẹ nado wleawuna adà sinsẹ́n gbigbọ Jiwheyẹwhe tọn lẹ, ṣigba “azọ́n agbasalan tọn lẹ” kọ̀n wẹ e nọ planmẹ jẹ. (Gal. 5:19-23) E nọ fọ́n awagundido po goyiyi po dote na gbẹtọ lẹ, bọ taidi kọdetọn de yé nọ wá lẹzun “wanyina mẹdetiti tọ́.” (2 Tim. 3:2-4) Jijọ enẹlẹ jẹagọdo gbigbọ walọmimiọn po whiwhẹ po tọn he devizọnwatọ Jiwheyẹwhe tọn lẹ yin tulina nado wleawuna. (2 Sam. 22:28) Klistiani delẹ he yì wehọmẹ alavọ tọn ko dike na pọndohlan yetọn ni yin adàdiọna gbọn linlẹn gbẹtọvi tọn lẹ dali kakati ni yin linlẹn Jiwheyẹwhe tọn. Mì gbọ mí ni pọ́n apajlẹ nuhe mẹ enẹ sọgan dekọtọn do tọn dopo.

15, 16. Etẹwẹ a plọn sọn numimọ mẹmẹyọnnu de tọn mẹ?

¹⁵ Mẹmẹyọnnu de he ko nọ sinsẹ̀nzọn whenu-gigọ́ tọn mẹ na owhe 15 linlán dọmọ: “Taidi Kunnudetọ he yí baptẹm de, n’ko hianu bosọ sèhó gando owù he afọdidona wehọmẹ alavọ tọn bẹhẹn lẹ go, ṣigba n’dovọ́na avase enẹlẹ. N’lẹndọ ayinamẹ enẹ ma gando go e.” Avùnnukundiọsọmẹnu tẹlẹ wẹ ewọ pehẹ? E yigbe dọmọ: “Nuhe n’dona nọ plọn lẹ nọ yí whenu po huhlọn ṣie po sọmọ bọ n’ma nọ penugo nado yiagbọji bo hodẹ̀ hlan Jehovah dile n’ko nọ wà do wayi, agbọ́ nọ pé mi sọmọ bọ n’ma gán nọ duvivi hodọdopọ sinai do Biblu ji tọn hẹ mẹdevo lẹ, podọ n’ma gán nọ wleawuna opli lẹ ganji. N’dopẹ́ dọ tlolo he n’doayi e go dọ dee titlọ do wepinplọn dahodaho lẹ mẹ to haṣinṣan ṣie hẹ Jehovah hẹngble, n’mọdọ n’dona doalọte. Podọ n’wàmọ.”

¹⁶ Nuyiwadomẹji tẹwẹ wepinplọn daho tindo do nulẹnpọn mẹmẹyọnnu de tọn ji? E gblọn dọmọ: “E huwinyan na mi nado yigbe dọ wepinplọn he n’doafọna zọ́n bọ n’nọ mọhodọdo mẹdevo lẹ go, titengbe mẹmẹsunnu po mẹmẹyọnnu ṣie lẹ po, bo nọ donukun nususu sọn yé si zẹjlẹgo, podọ n’sọ klan dee sọn yé go. E yí whenu susu to asi e nado doalọtena pọndohlan enẹlẹ tintindo. To ojlẹ enẹ mẹ to gbẹzan ṣie mẹ, n’wá doayi e go dọ owùnu taun wẹ e yin nado dovọ́na avase he Otọ́ olọn mẹ tọn mítọn nọ na mí gbọn titobasinanu etọn gblamẹ lẹ. Jehovah yọ́n mi tlala hú yẹnlọsu. Eyin n’yọnẹn wẹ n’na ko dotoaina ẹn!”

17. (a) Etẹwẹ dona yin gbemima mítọn? (b) Etẹwẹ mí na gbadopọnna to hosọ he bọdego mẹ?

¹⁷ Magbe ma nado dike gbede na “tamẹnuplọnmẹ po oklọ ovọ́” aihọn Satani tọn po ni wle we di kanlinmọ. Zindonukọn nado nọ họ́ dewe sọta wlẹnwin Satani tọn lẹ. (1 Kọl. 3:18; 2 Kọl. 2:11) A dike gbede ewọ ni hẹn pọndohlan towe gando Jehovah go flu blo. Nọ nọgbẹ̀ sọgbe hẹ nujinọtedo walọ dagbe tọn Jehovah tọn he yiaga taun lẹ. Podọ a dike Satani doyẹklọ we nado dovọ́na ayinamẹ Jehovah tọn blo. Ṣigba, etẹwẹ lo eyin a doayi e go dọ nulẹnpọn aihọn ehe tọn ko bẹpla we? Hosọ he bọdego na do lehe Ohó Jiwheyẹwhe tọn sọgan gọalọna mí nado họ́ etlẹ yin linlẹn gọna aṣa he “hẹnai lẹ liai” do hia.—2 Kọl. 10:4, 5.