Nudide Tẹwẹ Hiẹ Na Basi?
Dotowhé he nọ kẹalọyi mẹzizẹ matin hùndido lẹ fọ́n bo to jijideji lẹdo aihọn pé. Be hiẹ mọnukunnujẹ nunọnutẹnmẹ he tin-to-aimẹ lẹ na whẹho hùndido tọn mẹ to gigọ́ mẹ ya? Hiẹ dona yọ́n ehe nado sọgan basi nudide dagbe gando nukunpedomẹgo dotowhé tọn po mẹzizẹ po go. Pọ́n video lọ Pas de sang: la médecine relève le défi. Enẹgodo, yí kanbiọ he tin to odò lẹ zan nado gbadopọnna nuhe hiẹ plọn sọn e mẹ lẹ to odẹ̀ mẹ.—Ayidonugo: Na video lọ bẹ apadewhe mẹzizẹ tọn kleun delẹ hẹn wutu, mẹjitọ lẹ dona yí wuntuntun zan to whenuena yé to video lọ pọ́n po yọpọ lẹ po.
(1) Etẹwẹ yin whẹwhinwhẹ́n tangan he wutu Kunnudetọ Jehovah tọn lẹ nọ gbẹ́ hùndido? (2) Na nuhe dù nukunpedomẹgo dotowhé tọn, etẹwẹ Kunnudetọ Jehovah tọn lẹ nọ jlo? (3) Jlọjẹ tangan tẹwẹ awutunọ lẹ tindo? (4) Naegbọn e yin nuyọnẹnnu bo sọgbe hẹ lẹnpọn dagbe nado kẹalọyi nunọnutẹnmẹ hùndido tọn lẹ? (5) Eyin e jọ bọ ohùn susu wayi sọn mẹde go, onú titengbe awe tẹlẹ wẹ doto lẹ dona wà to niyaniya mẹ? (6) Nujinọtedo ẹnẹ tẹlẹ ji wẹ aliho nunọnutẹnmẹ hùndido tọn yiyizan sinai do? (7) Nawẹ doto lẹ sọgan (a) de ohùn hinhẹngú pò gbọn? (b) hlá nugonu vẹẹ lẹ dote gbọn? (c) gọalọna agbasa nado wleawuna ohùn gbọn? (d) hẹn ohùn he whè lọ gọwá gbọn? (8) Basi zẹẹmẹ aliho nuwiwa tọn he nọ yin yiylọdọ (a) ohùn hinhẹn flusọ́ gbọn nuhe ma yin ohùn dali (hémodilution) podọ (b) anadidena ohùn ma nado yìgbé tọn. (9) Etẹwẹ hiẹ na jlo nado yọnẹn gando nunọnutẹnmẹ hùndido tọn depope go? (10) Be mẹzizẹ he doglẹ lẹ sọgan yin bibasi matin hùndido ya? (11) Nukọnyiyi tẹlẹ wẹ to tintin to pipli dotozọ́nwatọ lẹ tọn ṣẹnṣẹn?
Nudide mẹdetiti tọn he sinai do ayihadawhẹnamẹnu mẹdopodopo tọn he yin pinplọn gbọn Biblu dali ji wẹ e yin nado kẹalọyi delẹ to nukunpedomẹgo he yin didohia to video lọ mẹ lẹ mẹ. Be hiẹ ko magbe wunmẹ nukunpedomẹgo matin hùndido tọn he hiẹ to jijlo nado kẹalọyi na dewe podọ na ovi towe lẹ, bo ko kanwe gọ́ kalti DPA de mẹ ya? Na nudọnamẹ gigọ́ lẹ do whẹho ehelẹ ji, yí sọwhiwhe do gbadopọnna “Kanbiọ lẹ sọn Wehiatọ lẹ Dè” to Atọ̀họ̀-Nuhihọ́ lọ Tọn 15 juin 2004 po 15 octobre 2000 po mẹ. Enẹgodo, yí owe-to-wemẹ lọ “Nawẹ Yẹn Dona Basi Nudide Gando Nugonu Pẹvi Ohùn Tọn lẹ Gọna Nukunpedomẹgo Dotowhé Tọn He Bẹ Ohùn Yẹnlọsu-Titi Tọn Hẹn Go Gbọn?” to Lizọnyizọn Ahọluduta Tọn Mítọn novembre 2006 tọn mẹ zan nado basi nudide mẹdetiti tọn towe gando nunọnutẹnmẹ he hiẹ na kẹalọyi kavi gbẹ́ lẹ go. Enẹgodo, hẹn ẹn diun dọ hiẹ kàn nudide towe lẹ do kalti DPA towe mẹ ganji. Nudide towe lẹ dona yin didọna afọzedaitọ towe do whẹho agbasalilo tọn ji lẹ po hagbẹ whẹndo towe tọn depope he ma yin Kunnudetọ lẹ po to gigọ́ mẹ.