WESẸDOTẸN INTẸNẸT JI TỌN Watchtower Tọn
WESẸDOTẸN INTẸNẸT JI TỌN
Watchtower Tọn
Gungbe
ẹ,ọ,ṣ
  • á
  • à
  • é
  • è
  • Ẹ
  • ẹ
  • ẹ́
  • ẹ̀
  • í
  • ì
  • ó
  • ò
  • Ọ
  • ọ
  • ọ́
  • ọ̀
  • Ṣ
  • ṣ
  • ú
  • ù
  • BIBLU
  • OWE LẸ
  • OPLI LẸ
  • be oplọn 34 w. 202-w. 205 huk. 4
  • Jlọmẹdote bo Na Tulimẹ

Video de ma tin na adà ehe

Jaale, nuhahun de wá aimẹ gando video lọ go.

  • Jlọmẹdote bo Na Tulimẹ
  • Mọaleyi sọn Wehọmẹ Lizọnyizọn Yẹwhehọluduta Tọn Mẹ
  • Hosọ Mọnkọtọn
  • Nugopipe Hodọdopọ Tọn lẹ Hinhẹn Pọnte
    Mọaleyi sọn Wehọmẹ Lizọnyizọn Yẹwhehọluduta Tọn Mẹ
  • Jlọmẹdote bo Na Tulimẹ
    Jo Dewe Na Wehihia po Mẹpinplọn Po
  • Be Hiẹ Nọ Hẹn Opli Klistiani Tọn lẹ Yin Mẹhẹnlodo Tọn Ya?
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2010
  • Hẹn Lizọnyizọn Towe Pọnte Dogọ—Hodọdopọ de Bibẹjẹeji Nado Dekunnu to Aliho Mayin Aṣa Tọn Mẹ
    Lizọnyizọn Ahọluduta Tọn Mítọn—2014
Pọ́n Nudevo Lẹ
Mọaleyi sọn Wehọmẹ Lizọnyizọn Yẹwhehọluduta Tọn Mẹ
be oplọn 34 w. 202-w. 205 huk. 4

OPLỌN 34

Jlọmẹdote bo Na Tulimẹ

Etẹwẹ hiẹ dona wà?

Kakati nado dọho susu do whẹho mẹhẹngbọjọ tọn lẹ ji, dọho dogbọn nuhe hẹn ninọmẹ de pọnte kavi he hẹnmẹ tindo jidide dali.

Naegbọn E Do Yin Nujọnu?

Aihọn he ma tindo owanyi ehe nọ hẹn mẹsusu gbọjọ. Mẹsusu tindo nuhahun sinsinyẹn lẹ. Eyin owẹ̀n Biblu tọn yin zizedonukọnnamẹ ganji, e nọ hẹn omẹ ahunjijlọnọ lẹ tindo pọndohlan dagbe dogọ.

WẸNDAGBE de wẹ owẹ̀n he mí yin gbedena nado dọyẹwheho etọn lọ yin. Jesu dọmọ: “Yè ma sọgan nọma dọho wẹndagbe tọn pé akọta lẹpo ṣẹnṣẹn whẹ́.” (Malku 13:10) Jesu lọsu ze apajlẹ lọ dai gbọn yẹwheho ‘wẹndagbe ahọluduta Jiwheyẹwhe tọn’ didọ dali. (Luku 4:43) Owẹ̀n he apọsteli lẹ lọsu dọyẹwheho etọn yin zẹẹmẹ basina taidi “wẹndagbe Jiwheyẹwhe tọn” po “wẹndagbe Klisti tọn” po. (1 Tẹs. 2:2; 2 Kọl. 2:12) Owẹ̀n mọnkọtọn nọ jlọmẹdote bo nọ na tulimẹ.

To kọndopọmẹ hẹ “wẹndagbe madopodo” he ‘angẹli he to zinzlọn to olọn ṣẹnṣẹn’ lọ to lilá, mí nọ dotuhomẹna gbẹtọ lẹ dọmọ: “Mì dibusi Jiwheyẹwhe, bosọ na gigo e.” (Osọ. 14:6, 7) Mí nọ dọho na gbẹtọ lẹ to filẹpo dogbọn Jiwheyẹwhe nugbo lọ dali, oyín etọn, jẹhẹnu jiawu etọn lẹ, azọ́njiawu etọn lẹ, lẹndai owanyinọ etọn, nugbo lọ dọ mí na dogbè na ẹn, po nuhe e biọ to mí si lẹ po. Wẹndagbe lọ bẹ nugbo lọ hẹn dọ Jehovah Jiwheyẹwhe na và mẹylankan he ma nọ gbògbéna ẹn bo nọ hẹn gbẹzan mẹdevo lẹ tọn gble lẹ sudo. Ṣigba e mayin azọngban mítọn nado dawhẹna mẹhe mí to yẹwheho dọ na lẹ gba. Ojlo vẹkuvẹku mítọn wẹ yindọ mẹsusu dogọ na kẹalọyi owẹ̀n Biblu tọn na e nido sọgan lẹzun wẹndagbe de na yé nugbonugbo.—Howh. 2:20-22; Joh. 5:22.

De Hosọ Mẹhẹngbọjọ Tọn lẹ Pò. Nugbo wẹ dọ, nuhe nọ hẹnmẹ gbọjọ lẹ tin to gbẹ̀mẹ. Mí ma nọ gbẹkọ ehelẹ go gba. Nado bẹ hodọdopọ de jẹeji, a sọgan donù nuhahun he to ahunmẹduna mẹhe tin to aigba-denamẹ mìtọn ji lẹ go bo dọhodeji to kleun mẹ. Ṣigba hodọdeji zẹjlẹgo ma nọ saba wà dagbe gba. Gbẹtọ lẹ nọ to owẹ̀n ahungbadonamẹ tọn lẹ sè to whepoponu, enẹwutu hodidọ do nuhe ma vivi sisè lẹ ji sọgan hẹn yé nado sú ohọ̀n yetọn kavi otó yetọn lẹ. To bẹjẹeji hodidọ towe tọn tlolo, dovivẹnu nado dlẹnalọdo nugbo kọfanamẹ tọn he tin to Ohó Jiwheyẹwhe tọn mẹ lẹ. (Osọ. 22:17) Enẹgodo, eyin mẹlọ ma tlẹ jlo nado zindonukọn to hodọdopọ lọ mẹ, a na ko jo nuhe jlọmẹdote de do na ẹn nado lẹnnupọndeji. Ehe sọgan hẹn ẹn tindo ojlo nado dotoai to whedevonu.

Mọdopolọ, eyin a yin azọ́ndena nado na hodidọ de, ma gbidikọna mẹplidopọ lẹ po nudọnamẹ linlin ylankan tọn lẹ po kiki na susugege etọn tin-to-aimẹ poun wutu blo. Eyin hodọtọ de nọ dọho susu do awugbopo gandutọ lẹ tọn, linlin sẹ́nhẹngba po danuwiwa tọn lẹ po, gọna fẹnnuwiwa he gbayipe ji, e sọgan hẹn mẹplidopọ etọn lẹ gbọjọ. Eyin adà mẹhẹngbọjọ tọn ehelẹ ma tindo lẹndai de nado hẹndi to hodidọ lọ mẹ, nuhudo matin nado dọ yé gba. Nudọnamẹ mọnkọtọn lẹ didọ to kleun mẹ sọgan zinnudo gbesisọ-yinyin hodidọ towe tọn ji. E sọ sọgan do nuhe nọ hẹn ninọmẹ de ylan deji lẹ hia bo gbọnmọ dali yin yiyizan nado do nuhewutu pọngbọ he tin to Biblu mẹ yọn-na-yizan hia. Eyin e yọnbasi, yì nuagokun lọ ji tlọlọ bo ma dọho susu do nuhahun lọ lẹ ji blo.

To paa mẹ, e ma sọgbe kavi yọnbasi nado de nudọnamẹ mẹhẹngbọjọ tọn lẹpo sẹ̀ sọn hodidọ mẹ gba. Avùnnukundiọsọmẹnu lọ wẹ nado ze nudọnamẹ mẹhẹngbọjọ po mẹjlọdote tọn po donukọnnamẹ to aliho de mẹ bọ kọdetọn lọ na yin dehe na tulimẹ. Nado jẹ yanwle ehe kọ̀n, a dona yọ́n nuhe na yin yiyidogọ lẹ, nuhe na yin didesẹ lẹ, podọ nuhe na yin nùzindeji lẹ. To Yẹwhehodidọ Osó ji tọn mẹ, Jesu dotuhomẹna todoaitọ etọn lẹ nado dapana aliho ṣejannabi wekantọ po Falesi lẹ po tọn, bo na apajlẹ delẹ nado do nuhe dọ e te hia. (Mat. 6:1, 2, 5, 16) Ṣigba, kakati nado dọho susu do apajlẹ ylankan sinsẹ̀ngán enẹlẹ tọn ji, Jesu zinnudeji dọ hosetọ etọn lẹ dona mọnukunnujẹ aliho nugbo Jiwheyẹwhe tọn lẹ mẹ bo nọgbẹ̀ sọgbe hẹ yé. (Mat. 6:3, 4, 6-15, 17-34) Taidi kọdetọn de, yé yin jijlọdote.

Dike Hodidọ Towe Ni Na Tulimẹ. Eyin hiẹ yin azọ́ndena nado dọhodo adà nuwiwa Klistiani tọn delẹ ji to agun towe mẹ, dovivẹnu nado jlọmẹdote kakati nado mọhodọdomẹgo. Hẹn ẹn diun dọ a nọ wà nuhe a na tuli mẹdevo lẹ nado wà. (Lom. 2: 21, 22; Heb. 13:7) Dọho po owanyi po, e mayin nado hẹnmẹ gblehomẹ gba. (2 Kọl. 2:4) Eyin a deji dọ yisenọ hatọ towe lẹ jlo na hẹn homẹ Jehovah tọn hùn, nuhe dọ a te na do jidide enẹ hia, podọ ehe na tindo nuyiwadomẹji dagbe do mẹdevo lẹ ji. Doayi lehe apọsteli Paulu do jidide mọnkọtọn hia do go, dile e yin kinkàndai to 1 Tẹsalonikanu lẹ 4: 1-12; 2 Tẹsalonikanu lẹ 3:4, 5; po Filemọni 4, 8-14, 21 po mẹ do.

To whedelẹnu, dandannu wẹ e yin na mẹho lẹ nado na avase sọta walọyizan ylankan lẹ. Ṣigba whiwhẹ na gọalọna yé nado yinuwa hẹ mẹmẹsunnu yetọn lẹ to gbigbọ walọmimiọn tọn mẹ. (Gal. 6:1) Aliho he mẹ onú lẹ yin didọ te dona dohia dọ mí nọ na sisi mẹhe tin to agun mẹ lẹ. (1 Pita 5:2, 3) Biblu na ayinamẹ jọja lẹ na taun tọn, nado tin to aṣeji na ehe. (1 Tim. 4:12; 5:1, 2; 1 Pita 5:5) Eyin e wá lẹzun dandan nado wọhẹmẹ, nado do mẹplọnlọmẹgo, nado deananamẹ, ehe dona yin zize sinai do nuhe Biblu dọ ji. (2 Tim. 3:16) Zẹẹmẹ Owe-wiwe tọn ma dona yin didiọ kavi yin kọslona nado nọgodona linlẹn delẹ he yin pọndohlan hodọtọ lọ tọn gba. To whenuena ayinamẹ sinsinyẹn tlẹ dona yin nina, hodidọ lọ sọgan na tulimẹ eyin nùzindonuji lọ yin zizedo lehe yè sọgan dapana ylanwiwa do, lehe nuhahun lẹ sọgan yin dididẹ do, lehe awusinyẹnnamẹnu lẹ sọgan yin dududeji do, lehe nuṣiwa de sọgan yin vivọjlado do, podọ lehe nubiọtomẹsi Jehovah tọn lẹ nọ basi hihọ́na mí do ji.—Ps. 119:1, 9-16.

To awuwlena hodidọ towe whenu, na ayidonugo vonọtaun hlan lehe hiẹ na hẹn nuagokun dopodopo po hodidọ lọ blebu po wá tadona kọ̀n do. Nuhe yin didọ gbọngodo wẹ nọ saba yin finflin hugan. Be e na na tulimẹ ya?

To Hodidọ hẹ Yisenọ Hatọ lẹ Whenu. Devizọnwatọ Jehovah tọn lẹ yọ́n pinpẹn dotẹnmẹ hundote he yé tindo lẹ tọn na gbẹdido to opli Klistiani tọn lẹ ji. Ojlẹ kọfanamẹ gbigbọmẹ tọn wẹ ehelẹ yin. Biblu dotuhomẹna mí nado ‘nọ na tuli ode awetọ’ to whenuena mí pli to nọtẹn sinsẹ̀n-bibasi tọn lẹ mẹ. (Heb. 10:25) Enẹ ma nọ yin wiwà gbọn hodidọ po gblọndo lẹ nina to opli lẹ whenu po kẹdẹ dali gba ṣigba gbọn hodọdopọ jẹnukọnna opli lẹ podọ to opli lẹ godo dali ga.

Dile etlẹ yindọ nuhe sọgbe wẹ e yin nado nọ dọhodo gbẹninọ egbesọ tọn mítọn lẹ ji, tulinamẹ daho hugan nọ wá sọn hodidọ do onú gbigbọmẹ tọn lẹ ji mẹ. Ehelẹ nọ bẹ numimọ he mí duvivi etọn to sinsẹ̀nzọn wiwe mítọn mẹ lẹ hẹn. Ojlo dagbe didohia to ode awetọ mẹ sọ nọ jlọmẹdote ga.

Mí dona payi mídelẹ go ma nado yin nuyiwadeji gbọn aihọn ehe dali. To whenuena Paulu to wekan hlan Klistiani he tin to Efesu lẹ, e dọmọ: “Mì jo lalodido dai, na mì omẹ pó ni nọ dọ nugbo hẹ kọmẹnu etọn.” (Efe. 4:25) Lalo jijodo bo dọ nugbo biọ dọ mí ni dapana gigopipana onú po gbẹtọ he aihọn lọ nọ pọ́n di yẹwhe lẹ po. Mọdopolọ, Jesu na avase sọta “oklọ adọkun tọn.” (Mat. 13:22) Enẹwutu, to hodidọ hẹ ode awetọ whenu, mí dona payi ma nado nọgodona oklọ enẹ gbọn yẹyididogona nutindo agbasa tọn lẹ zẹjlẹgo dali.—1 Tim. 6:9, 10.

To whenuena apọsteli Paulu to ayinamẹ na do nuhudo lọ ji nado nọ jlọmẹdote, e dotuhomẹna mí ma nado nọ dawhẹna kavi de mẹmẹsunnu mítọn pò, eyin e tindo awugbopo delẹ na e yin “madogánnọ to yise mẹ” wutu, enẹ wẹ yindọ, na e ma yọ́n obá he mẹ mẹdekannujẹ Klistiani tọn gbloada jẹ wutu. Na nugbo tọn, eyin mí jlo dọ hodọdopọ mítọn ni jlọ mẹdevo lẹ dote, mí dona nọ lẹnnupọndo lẹdo he mẹ yé wá sọn po obá he mẹ nukọnyiyi gbigbọmẹ tọn yetọn jẹ po ji. Lehe e na blawu nado “yí zannu ahlìda de do aliho mẹmẹsunnu [kavi mẹmẹyọnnu de tọn ji]” do sọ!—Lom. 14:1-4, 13, 19.

Mẹhe to ahidi hẹ nuhahun sinsinyẹn mẹdetiti tọn lẹ, taidi azọ̀n-jẹmagbọ de, nọ yọ́n pinpẹn hodọdopọ mẹjlọdote tọn. Omẹ mọnkọtọn sọgan nọ dovivẹnu susu nado yì opli lẹ. Mẹhe mọnukunnujẹ ninọmẹ etọn mẹ lẹ sọgan kanse dọ: “Be e pọnte ya?” Matin ayihaawe, e na yọ́n pinpẹn mẹtọnhopọn yetọn tọn. Ṣigba, ninọmẹ agbasalilo etọn tọn sọgan nọma yin nuhe fọnjlodotena ẹn hugan nado dọhodeji. Vlavo hogbe pinpẹn-nutọn-yinyọnẹn po pipà tọn lẹ po sọgan yin nuhe na miọnhomẹna ẹn hugan. Be a doayi owanyi etọn na Jehovah go po akọ́ndonanu etọn po to ninọmẹ he sinyẹnawu de glọ ya? Be gblọndo etọn lẹ nọ na tuli we ya? Be e ma na yọ́n hugan nado nọ dlẹnalọdo vivẹnudido etọn lẹ po nuhe e to wiwà na dagbe agun lọ tọn lẹ po kakati nado nọ ze ayidonugo do awugbopo etọn lẹ ji ya?—1 Tẹs. 5:11.

Eyin mí jlo dọ hodọdopọ mítọn ni jlọmẹdote, onú titengbe wẹ e yin nado lẹnnupọndo nukun he Jehovah nọ yí do pọ́n nuhe ji mí to hodọdo lọ. To Islaeli hohowhenu tọn mẹ, mẹhe dọho jẹagọdo nukunmọnu Jehovah tọn lẹ go bo hlún dogbọn manna dali lẹ mọ homẹgble sinsinyẹn Jiwheyẹwhe tọn. (Sọh. 12:1-16; 21:5, 6) Mí na dohia dọ mí mọaleyi sọn apajlẹ enẹlẹ mẹ eyin mí nọ na sisi mẹho lẹ bo nọ do pinpẹn-nutọn hia na núdùdù gbigbọmẹ tọn he afanumẹ nugbonọ nuyọnẹntọ lọ nọ wleawuna.—1 Tim. 5:17.

To whenuena mí tin hẹ mẹmẹsunnu Klistiani tọn mítọn lẹ, mí ma sọgan bà onú dagbe he mí na dọ lẹ pò gba. Ṣigba, eyin hodidọ mẹde tọn zẹ̀pá, ze afọdide tintan lọ nado diọ hodọdopọ lọ zun mẹjlọdote tọn.

Vlavo mí to kunnudena mẹdevo lẹ, to hodọ sọn oplò ji, kavi to hodọ hẹ yisenọ hatọ lẹ, mì gbọ mí ni yí wuntuntun zan nado sọgan dọ nuhe na jlọmẹdote “dile onú te do, na e nido wazọ́n ojọmiọn tọn hlan mẹhe sè lẹ.”—Efe. 4:29.

LEHE E NỌ YIN WIWÀ DO

  • Hẹn ẹn do ayiha mẹ dọ azọ́ndenamẹ mítọn wẹ nado dọyẹwheho wẹndagbe lọ tọn.

  • Nọ jlọmẹdote kakati nado nọ mọhodọdomẹgo.

  • Tindo pọndohlan jlẹkaji tọn gando mẹhe a to hodọna lẹ go.

  • To hodọdopọ mẹ, lẹnnupọndo lehe hodidọ towe sọgan yinuwado omẹ awetọ ji do.

AYINAMẸ: Dla madogánnọ kavi mẹhe azọ̀n hò do họmẹ de pọ́n. Bẹ hodọdopọ mẹjlọdote tọn jẹeji. Yin awuvẹmẹtọ, ṣigba dike hodidọ towe ni na tulimẹ. Lẹnnupọn jẹnukọn nado sọgan jẹ ehe kọ̀n.

    Gun Publications | (1976-2025)
    Ṣí Adà Towe
    Hùn Adà Towe
    • Gungbe
    • Dohlan
    • Nujlomẹ Lẹ
    • Copyright © 2025 Watch Tower Bible and Tract Society of Pennsylvania
    • Osẹ́n Nọtẹn lọ Tọn Lẹ
    • Osẹ́n Nudọnamẹ Mẹdetiti Tọn
    • De Osẹ́n Nudọnamẹ Tọn Lẹ
    • JW.ORG
    • Hùn Adà Towe
    Dohlan