Mọaleyi sọn Aigba-Denamẹ Mẹdetiti Tọn Mẹ
1. Etẹwẹ aigba-denamẹ mẹdetiti tọn yin?
1 Etẹwẹ aigba-denamẹ mẹdetiti tọn yin? Tito de wẹ ehe yin he agun he tindo aigba-denamẹ susu lẹ nọ saba yizan bọ wẹnlatọ de sọgan tindo aigba-denamẹ etọn titi sẹpọ fie e nọ nọ̀. Owe Mí Yin Tito-Basina, weda 103, dọmọ: “Tintindo aigba-denamẹ mẹdetiti tọn he to yakẹ de na gọalọna we nado yí whenu he hiẹ sọgan klandovo na sinsẹ̀nzọn kunnudegbe tọn lẹ zan po kọdetọn dagbe tlala po. Podọ hiẹ sọgan basi oylọna wẹnlatọ devo nado wazọ́n hẹ we to aigba-denamẹ towe titi ji.”
2. Nawẹ aigba-denamẹ mẹdetiti tọn nọ yidogọna lizọnyizọn mítọn gbọn?
2 E Nọ Yidogọna Lizọnyizọn Mítọn: Eyin a mọ aigba-denamẹ mẹdetiti tọn de yí sẹpọ azọ́nwatẹn towe, hiẹ sọgan nọ zọnhẹ wẹnlatọ de, vlavo wẹnlatọ he azọ́nwatẹn etọn ma dẹn do we nado tindo mahẹ to lizọnyizọn lọ mẹ to whenue a yí gbọjẹ to whèmẹ kavi whẹpo do yì whégbè. Eyin aigba-denamẹ he a mọyi lọ ma dẹn do fie a nọ nọ̀, hiẹ po whẹndo towe po sọgan nọ yì dekunnu to finẹ to whèjai lẹ. Eyin a ma penugo bo yì opli sinsẹ̀nzọn kunnudegbe tọn, a dona biọ anademẹ Jehovah tọn to odẹ̀ mẹ whẹpo do jẹ yẹwhehodọ ji. (Flp. 4:6) Ṣigba, aigba-denamẹ mẹdetiti tọn ma dona glọnalina we nado nọ tọ́n hẹ agun lọ. Na sẹfifo wẹ mẹsusu nọ saba tọ́n na kunnudegbe wutu, e na yọ́n dọ mí ni nọ tọ́n hẹ pipli mítọn.
3. Ale tẹlẹ wẹ aigba-denamẹ mẹdetiti tọn de tintindo nọ hẹnwa?
3 Ale Lẹ: Eyin a tindo aigba-denamẹ mẹdetiti tọn, a sọgan nọ yì dekunnu to finẹ sọgbe hẹ tito towe. A na penugo nado zan whenu susu to kunnudegbe podọ zọnlin towe ma na sù. Ehe tlẹ sọ nọ hẹn ẹn bọawuna wẹnlatọ delẹ nado basi gbehosọnalitọ alọgọtọ kavi whepoponu tọn. Humọ, na whétọ he do ojlo hia lẹ tin to yakẹ wutu, gọyìpọn po oplọn yetọn lẹ po bibasi ma nọ vẹawu. Mẹsusu mọdọ kunnudide whlasusu to aigba-denamẹ mẹdetiti tọn de ji whẹpo do gọ̀ ẹ jo, na mẹdevo lẹ nido wazọ́n to e ji, nọ gọalọna yé nado jẹakọ hẹ whétọ lẹ ganji podọ whétọ lẹ sọ nọ voawu hẹ yé taun. Be hiẹ ma lẹndọ aigba-denamẹ mẹdetiti tọn de tintindo na gọalọna hiẹ po whẹndo towe po nado hẹn lizọnyizọn mìtọn di to gigọ́ mẹ ya?—2 Tim. 4:5.