Omẹ lọ He Basi Onú Lẹpo

YẸN yọ́n onú jiawu de. Be a jlo na sè onú lọ ya?⁠— Pọ́n alọ towe. Há alọvi towe lẹ. Jaale, yí ì do ze nude todin. Alọ towe sọgan wà nususu, podọ e sọgan wà onú lọ lẹ ganji. Be a yọ́n mẹhe basi alọ mítọn lẹ ya?⁠—

Mẹhe basi onù mítọn, awọntin mítọn, po nukun mítọn lẹ po lọ wẹ. Mọwẹ, Jiwheyẹwhe, yèdọ Otọ́ Mẹplọntọ Daho lọ tọn wẹ. Be homẹ mítọn ma hùn dọ Jiwheyẹwhe basi nukun na mí ya?⁠— Mí sọgan yí yé do mọ nususu. Mí sọgan pọ́n vounvoun lẹ. Mí sọgan mọ amamú lẹ po agahomẹ juju he yọnwhanpẹ lẹ po. Mí tlẹ sọgan mọ hẹ̀ví he to núdù lẹ dile a to mimọ to yẹdide lọ mẹ do. Na nugbo tọn, ayajẹnu de wẹ e yin dọ mí sọgan mọ onú mọnkọtọn lẹ, kavi e mayin mọwẹ?⁠—

Mẹnu wẹ basi onú ehe lẹpo? Be gbẹtọ delẹ wẹ basi yé ya? Lala. Gbẹtọ lẹ sọgan gbá ohọ̀. Ṣigba gbẹtọ ma sọgan basi ogbé he nọ wú lẹ gba. Gbẹtọ lẹ ma sọgan basi hẹ̀ví, vounvoun, kavi nutogbẹ̀ depope gba. Be a yọ́n enẹ ya?⁠—

Jiwheyẹwhe wẹ basi onú ehe lẹpo. Jiwheyẹwhe wẹ basi olọn lẹ po aigba po. Ewọ wẹ basi gbẹtọ lẹ ga. Ewọ wẹ dá sunnu tintan po yọnnu tintan lọ po. Jesu, Mẹplọntọ Daho lọ plọnmẹ ehe.​—⁠Matiu 19:​4-6.

Nawẹ Jesu wagbọn do yọnẹn dọ Jiwheyẹwhe wẹ dá sunnu po yọnnu po? Be Jesu mọ Jiwheyẹwhe to whenuena e to ehe basi wẹ ya?⁠— Mọwẹ, e mọ ẹn. Jesu tin to finẹ to whenuena Jiwheyẹwhe dá sunnu po yọnnu po. Jesu wẹ yin omẹ tintan he Jiwheyẹwhe dá. Jesu yin angẹli de to whenẹnu, bo nọ nọ̀ olọn mẹ hẹ Otọ́ etọn.

Biblu dọna mí dọ Jiwheyẹwhe dọmọ: “Gbọ mí ni basi gbẹtọ.” (Gẹnẹsisi 1:26) Be a yọ́n mẹhe Jiwheyẹwhe to enẹ dọna ya?⁠— E to hodọ na Ovi etọn. E to hodọ na mẹlọ he wá aigba ji to godo mẹ bo lẹzun Jesu.

Be enẹ hùnhomẹ na we ya? Lẹnnupọndo ehe ji! Eyin mí dotoaina Jesu, e dohia dọ mẹhe tin po Jiwheyẹwhe po to whenuena Jiwheyẹwhe dá aigba po nuhe tin to e mẹ lẹpo po wẹ to mí plọn niyẹn. Jesu plọn nususu sọn azọ́nwiwa dopọ hẹ Otọ́ olọn mẹ tọn etọn mẹ. Abajọ Jesu do yin Mẹplọntọ Daho lọ.

Be a lẹndọ Jiwheyẹwhe ma tindo ayajẹ to whenuena e tin to ewọ ṣokẹdẹ wẹ zọ́n bọ e do dá Ovi etọn wẹ ya?⁠— Lala, e ma yinmọ. Ṣigba, eyin e ma yinmọ, etẹwutu wẹ e do dá nutogbẹ̀ devo lẹ?⁠— E wàmọ na e yin Jiwheyẹwhe owanyinọ de wutu. E jlo dọ mẹdevo lẹ ni wá nọgbẹ̀ bo duvivi gbẹninọ tọn. Mí dona dopẹna Jiwheyẹwhe dọ e na mí ogbẹ̀.

Nuhe Jiwheyẹwhe ko basi lẹpo wẹ do owanyi etọn hia. E basi owhè. Owhè nọ na mí hinhọ́n po yozò po. Eyin e mayin owhè tọn wẹ, onú lẹpo wẹ na fá zẹjlẹgo bọ nudepope ma sọgan nọgbẹ̀ to aigba ji. Be e ma vivi na we dọ Jiwheyẹwhe basi owhè ya?⁠—

Jiwheyẹwhe sọ nọ hẹn jikun ja ga. A sọgan gbẹwanna jikun to whedelẹnu, na eyin e to jijà a ma sọgan tọ́n yì gbonu nado daihun. Ṣigba jikun wẹ nọ hẹn vounvoun lẹ whẹ́n. Enẹwutu eyin mí mọ vounvoun he yọnwhanpẹ lẹ, mẹnu wẹ mí dona dopẹna?⁠— Jiwheyẹwhe wẹ. Podọ mẹnu wẹ mí dona dopẹna to whenuena mí dù atin-sinsẹ́n po omá he vivi lẹ po?⁠— Jiwheyẹwhe wẹ, na owhè he e dá po jikun he nọ ja po wẹ nọ hẹn onú lọ lẹ whẹ́n.

Mí ni dọ dọ mẹde kanbiọ we dọ: “Be Jiwheyẹwhe janwẹ sọ basi gbẹtọ po kanlin lẹ lọsu po ya?” Gblọndo tẹwẹ a na na ẹn?⁠— E na sọgbe nado dọmọ: “Mọwẹ, Jiwheyẹwhe wẹ basi gbẹtọ po kanlin lẹ po.” Ṣigba etẹwẹ a na dọ eyin mẹlọ ma yise dọ Jiwheyẹwhe wẹ dá gbẹtọ lẹ nugbonugbo? Podọ etẹwẹ a na dọ eyin mẹlọ dọ dọ kanlin mẹ wẹ gbẹtọ wá sọn? Biblu ma plọnmẹ ehe gba. E dọ dọ Jiwheyẹwhe wẹ dá onú lẹpo.​—⁠Gẹnẹsisi 1:​26-31.

Ṣigba eyin mẹde dọna we dọ emi ma yise to Jiwheyẹwhe mẹ, etẹwẹ a na dọna ẹn?⁠— Do ohọ̀ de hia ẹ. Kanbiọ ẹ dọ: “Mẹnu wẹ gbá ohọ̀ enẹ?” Mẹlẹpo wẹ yọnẹn dọ mẹde wẹ gbá ẹ. E họnwun dọ ohọ̀ lọ ma wá aimẹ na ede poun gba!​—⁠Heblu lẹ 3:⁠4.

Enẹgodo hẹn mẹlọ yì jipa de mẹ bo do vounvoun de hia ẹ. Bo kanbiọ ẹ dọ: “Mẹnu wẹ basi ehe?” E mayin gbẹtọ wẹ gba. Podọ kẹdẹdile ohọ̀ lọ ma wá aimẹ na edetiti do, mọwẹ vounvoun ehe lọsu ma wá aimẹ na ede do niyẹn. Mẹde janwẹ basi i. Jiwheyẹwhe wẹ dá ẹ.

Dọ na ẹn dọ ni nọte bo doto hàngbe ohẹ̀ de tọn. Enẹgodo kanbiọ ẹ dọ: “Mẹnu wẹ dá ohẹ̀ lẹ bo plọn ohàn yé?” Jiwheyẹwhe wẹ. Jiwheyẹwhe wẹ basi olọn lẹ po aigba po gọna nutogbẹ̀ lẹpo! Ewọ wẹ Omẹ lọ he nọ namẹ ogbẹ̀.

Ṣogan, mẹde sọgan dọ dọ nuhe emi sọgan mọ lẹ kẹdẹ wẹ emi na yise. E sọgan dọmọ: ‘Eyin yẹn ma mọ nude, yẹn ma sọgan yí ì sè gba.’ Enẹwutu mẹdelẹ dọ dọ yé ma yise to Jiwheyẹwhe mẹ gba na yé ma sọgan mọ ẹn wutu.

Nugbo wẹ dọ mí ma sọgan mọ Jiwheyẹwhe. Biblu dọ dọ: ‘Mẹde ma sọgan mọ Jiwheyẹwhe.’ Sunnu wẹ o, yọnnu wẹ o, kavi ovi de to aigba ji ma sọgan mọ Jiwheyẹwhe. Enẹwutu mẹdepope ma dona tẹnpọn nado basi yẹdide kavi boṣiọ Jiwheyẹwhe tọn gba. Ewọ lọsu tlẹ dọna mí dọ mí ma hà bo basi boṣiọ emitọn. Enẹwutu, homẹ Jiwheyẹwhe tọn ma na hùn do mí go eyin mí tindo onú mọnkọtọn de to ohọ̀ mítọn mẹ.​—⁠Eksọdusi 20:​4, 5; 33:20; Johanu 1:⁠18.

Ṣigba eyin mí ma sọgan mọ Jiwheyẹwhe, nawẹ mí wagbọn do yọnẹn dọ E tin nugbonugbo? Lẹnnupọndo apajlẹ ehe ji. Be a sọgan mọ jẹhọn ya?⁠— Lala. Mẹdepope ma sọgan mọ jẹhọn. Ṣigba a sọgan mọ nuhe jẹhọn to wiwà lẹ. A sọgan mọ bọ amà lẹ nọ to whinwhàn to whenuena jẹhọn yìn do atinlà lẹ mẹ. Enẹ zọ́n bọ a yise dọ jẹhọn tin.

A sọgan mọ nuhe Jiwheyẹwhe ko wà lẹ ga. Eyin a mọ vounvoun whanpẹnọ de kavi ohẹ̀ de, dopo to nuhe Jiwheyẹwhe basi lẹ mẹ mọ wẹ a ko te niyẹn. Enẹwutu a dona yise dọ Jiwheyẹwhe tin nugbonugbo.

Mẹde sọgan kanse we dọ, ‘Mẹnu wẹ dá owhè po aigba po?’ Biblu dọmọ: ‘Jiwheyẹwhe dá olọn po aigba po.’ (Gẹnẹsisi 1:⁠1) Mọwẹ, Jiwheyẹwhe wẹ basi onú jiawu ehe lẹpo! Etẹwẹ hiẹ lẹn dogbọn enẹ dali?⁠—

Be homẹ towe ma hùn nado tin to ogbẹ̀ ya? Mí sọgan sè hàngbe vivi ohẹ̀ lẹ tọn. Mí sọgan mọ vounvoun lẹ po onú devo he Jiwheyẹwhe dá lẹ po. Podọ mí sọgan dù núdùdù he Jiwheyẹwhe na mí lẹ.

Mí dona dopẹna Jiwheyẹwhe na ehe lẹpo. Hú popolẹpo, mí dona dopẹna ẹn na ogbẹ̀ he e na mí. Eyin mí nọ dopẹna Jiwheyẹwhe nugbonugbo, mí dona wà nude. Etẹwẹ mí dona wà?⁠— Mí na dotoaina Jiwheyẹwhe, podọ mí na wà nuhe e dọna mí to Biblu mẹ lẹ. To mọwiwà mẹ, mí sọgan dohia dọ mí yiwanna Omẹ lọ he dá onú lẹpo.