Wleawudaina Oflin lọ po Ayajẹ Po
1. Dotẹnmẹ vonọtaun tẹwẹ ojlẹ Oflin tọn nọ hundote na mí?
1 Oflin he na yin bibasi to Tlatagbe 26 mars na hùn dotẹnmẹ dagbe de dote na mí nado jaya gando nuhe Jiwheyẹwhe wà nado whlẹn mí gán lọ go. (Isa. 61:10) Ṣigba, etlẹ yin jẹnukọnna azán lọ, gbigbọ ayajẹ tọn he mí na dohia na gọalọna mí nado wleawudai ganji. Gbọnna?
2. Etẹwẹ nọ whàn mí nado wleawudaina hùnwhẹ Oflin tọn lọ?
2 Awuwiwledaina Hùnwhẹ lọ: Dile etlẹ yindọ Tenu-Núdùdù Oklunọ tọn yin nuwiwa jlẹkaji tọn de, e sọ yin nujijọ ayidego tọn de. Enẹwutu, e nọ biọ dọ tito ni yin bibasi jẹnukọn, na nudọnamẹ nujọnu tọn he dona yin hihodo lẹ ma nado yin vọdona. (Howh. 21:5) Gànmẹ po nọtẹn he sọgbe lọ po dona yin dide. Yẹhiadonu he sọgbe lẹ dona yin awuwlena. Nọtẹn he yin dide lọ dona tin to wiweji bosọ to ninọmẹ dagbe mẹ. Hodọtọ he yin dide lọ dona wleawu po sọwhiwhe po, podọ anademẹ he họnwun lẹ dona yin nina yẹhiadonu-zetọ lẹ po aisinnunamẹtọ lẹ po. Ayihaawe ma tin dọ suhugan tito ehelẹ tọn ko yin bibasi. Pinpẹn-nutọn-yinyọnẹn na dotẹnmẹ whlẹngán tọn he ofligọ lọ hundote na mí wẹ nọ whàn mí nado wleawudai ganji na nujijọ ayidego tọn ehe.—1 Pita 1:8, 9.
3. Etẹwẹ mí sọgan wà nado wleawudaina ahun mítọn na Tenu-Núdùdù Oklunọ tọn lọ?
3 Awuwiwledaina Ahun Mítọn: Nujọnu wẹ e sọ yin nado wleawudaina ahun mítọn nado sọgan mọnukunnujẹ nuhe Oflin lọ zẹẹmẹdo mẹ to gigọ́ mẹ. (Ẹzla 7:10) Nado jẹ yanwle ehe kọ̀n, mí dona de whenu dovo nado hodo tito vonọtaun Biblu hihia ojlẹ Oflin tọn lọ tọn bo lẹnnupọndo azán godo tọn he Jesu yizan to aigba ji lẹ ji. Ayihamẹlinlẹnpọn do gbigbọ mẹde-yido-sanvọ́ tọn he Jesu dohia ji na whàn mí nado hodo apajlẹ etọn.—Gal. 2:20.
4. Ale ofligọ lọ tọn tẹwẹ nọ hẹn ayajẹ wá na we hugan?
4 Okú Klisti tọn suwhẹna nupojipetọ-yinyin Jehovah tọn. E tún mí dote sọn ylando po okú po si. (1 Joh. 2:2) E hùn dotẹnmẹ dote na mí nado tin to jijọho mẹ hẹ Jiwheyẹwhe podọ nado mọ ogbẹ̀ madopodo. (Kọl. 1:21, 22) E sọ nọ gọalọna mí nado hẹn gbemima mítọn lodo, yèdọ nado nọgbẹ̀ sọgbe hẹ klandowiwe mítọn na Jehovah bo hẹn tenọgligo taidi devi Klisti tọn lẹ. (Mat. 16:24) Na ayajẹ towe ni jideji dile hiẹ to awuwledai nado yì Oflin he ja lọ!