Dọnsẹpọ Jiwheyẹwhe
Kunnudenu He Do Owanyi Jiwheyẹwhe Tọn Hia Hugan
ABLAHAM yiwanna Jiwheyẹwhe. Tọgbo nugbonọ enẹ sọ yiwanna Isaki, yèdọ visunnu he e jì to yọnhowhe etọn mẹ. Ṣigba, whenue Isaki tindo nudi owhe 25, Ablaham yin whiwhlepọn nado wà nuhe na ko vẹawuna otọ́ de nado wà to jọwamọ-liho—Jiwheyẹwhe dona ẹn nado yí visunnu etọn do sanvọ́. Ṣigba a hanú blo, Isaki ma kú to otàn lọ mẹ. To whenuena Ablaham ze ohí etọn nado hù visunnu etọn, angẹli Jiwheyẹwhe tọn doalọtena ẹn. Kandai Biblu tọn he tin to Gẹnẹsisi 22:1-18 mẹ ehe do lehe owanyi Jiwheyẹwhe tọn siso sọ hia mí to dọdai-liho to kleun mẹ.
Wefọ 1 dọmọ: “Jiwheyẹwhe tẹ́n Ablaham pọ́n.” Ablaham tindo yise taun, ṣigba yise etọn na yin whiwhlepọn hugan gbede pọ́n todin. Jiwheyẹwhe dọmọ: “Yí visunnu towe lo, yèdọ Isaki, visunnu towe dopo akàn lọ he hiẹ yiwanna . . . bo yí i do sanvọ́ nunina mimẹ̀ tọn de to finẹ to dopo osó lẹ tọn ji fie tọn yẹn na dọ na we.” (Wefọ 2) Flindọ, Jiwheyẹwhe ma nọ dike devizọnwatọ etọn lẹ ni yin whiwhlepọn zẹ̀ nugopipe yetọn go. Enẹwutu, whlepọn ehe dohia dọ Jiwheyẹwhe dejido Ablaham go.—1 Kọlintinu lẹ 10:13.
To afọdopolọji, Ablaham do gbigbọ tonusise tọn hia. Mí hia dọmọ: “Ablaham sọ fọ́n to afọnnu fuu bo blapá na kẹtẹkẹtẹ etọn, bo yí awe to devisunnu etọn lẹ mẹ gọna ede, po Isaki visunnu etọn po, bo zẹ̀ nake na avọ́nunina mimẹ̀ lọ, bosọ fọ́n, bo yì.” (Wefọ 3) E họnwun dọ Ablaham ma dọ nudọnamẹ gigọ́ he gando whlepọn lọ go lẹ na mẹde.
Gbejizọnlin azán-atọ̀n tọn de bọdego, ehe hùn dotẹnmẹ dotena ẹn nado lẹnayihamẹpọn sisosiso do whẹho lọ ji. Ṣigba enẹ ma diọ gbemima Ablaham tọn gba. Nuhe e dọ lẹ do yise etọn hia. Whenue e mọ osó he yin jijlẹ na ẹn lọ hlan tlolo, e dọna devizọnwatọ etọn lẹ dọmọ: “Mì nọ̀ ofi po kẹtẹkẹtẹ lọ po; yẹn po ovi he po na yidọn; míwlẹ na sẹ̀n, bosọ lẹgọ wá mì dè.” Whenue Isaki kàn lẹngbọ he yé na yí do sanvọ́ lọ sè, Ablaham dọmọ: “Jiwheyẹwhe na wleawuna lẹngbọvu lọ na ede lọsu.” (Wefọ 5, 8) Naegbọn Ablaham do donukun dọ emi na lẹkọ po visunnu emitọn po? Na e “hia dọ, Jiwheyẹwhe tlẹ sọgan fọ́n ẹn [Isaki] dote sọn oṣiọ mẹ.”—Heblu lẹ 11:19.
To osó lọ ji, whenue Ablaham ze “ohí . . . nado hù visunnu etọn,” angẹli de hẹn alọ etọn go. Enẹgodo, Jiwheyẹwhe wleawuna agbò de, he azò etọn lẹ ján do nukànmẹ, na Ablaham nido sọgan yí do sanvọ́ do “otẹn visunnu etọn tọn mẹ.” (Wefọ 10-13) To nukun Jiwheyẹwhe tọn mẹ, e taidi dọ Ablaham ko yí Isaki do sanvọ́ wẹ nkọ. (Heblu lẹ 11:17) Weyọnẹntọ de basi zẹẹmẹ dọ, “Jiwheyẹwhe pọ́n ojlo lọ hlan taidi dọ nulọ ko yin wiwà.”
Jidide he Jehovah tindo to Ablaham mẹ sọgbe. Podọ Jehovah dona Ablaham na jidide he e tindo to ewọ mẹ wutu, na Jiwheyẹwhe vọ́ alẹnu he e basi hẹ ẹ dọ bosọ basi zẹẹmẹ deji yinukọn dogọ, yèdọ alẹnu he mẹ e dopagbe dona tọn na gbẹtọ akọta aigba ji tọn lẹpo te.—Wefọ 15-18.
To godo mẹ, Jiwheyẹwhe ma dike Ablaham ni yí visunnu etọn do sanvọ́, ṣigba ewọ lọsu wá yí Ovi etọn titi do sanvọ́ to nukọn mẹ. Ojlo Ablaham tọn nado yí Isaki do sanvọ́ nọtena avọ́sinsan he Jiwheyẹwhe yí Jesu, Ovi detọ́n dopo akàn etọn do basi na ylando mítọn wutu. (Johanu 3:16) Kunnudenu he do owanyi he Jiwheyẹwhe tindo na mí hia hugan wẹ avọ́sinsan Klisti tọn. To whenuena e yindọ Jiwheyẹwhe basi avọ́sinsan mọnkọ do ota mítọn mẹ, mí dona kanse míde dọ, ‘Avọ́sinsan tẹ nkọ wẹ n’sọgan basi nado hẹn homẹ Jiwheyẹwhe tọn hùn?’