Yí Zìnzìn Zan Ṣogan Yin Nujikudonọ

ZÌNZÌN yin nugopipe lọ nado yinuwa hẹ gbẹtọ lẹ ganji bo ma hẹn yé gblehomẹ. E zẹẹmẹdo yinyọ́n lehe po whenue onú lẹ na yin didọ do po. Ehe ma zẹẹmẹdo mimọ́n nuhe sọgbe kavi nado sọtadona nugbo gba. Zìnzìn ma dona yin dindọnwlu dopọ hẹ obu gbẹtọ tọn gba.—Howh. 29:25.

Sinsẹ́n gbigbọ tọn nọ wleawuna dodonu dagbe hugan lọ nado yí zìnzìn zan. Enẹwutu, mẹhe yin whinwhàn gbọn owanyi dali ma nọ jlo nado hẹn mẹdevo lẹ gblehomẹ gba; e nọ jlo nado gọalọna yé. Mẹhe jọmẹ bo yin homẹmimiọnnọ nọ wà dẹẹdẹ to nuwiwa etọn lẹ mẹ. Mẹhe yin jijọhonọ nọ dín aliho lẹ nado tindo haṣinṣan dagbe hẹ mẹdevo lẹ. To whenuena gbẹtọ lẹ tlẹ yinuwa po fifiẹ po, mẹhe yin linsinyẹntọ nọ gbọṣi abọẹ.—Gal. 5:22, 23.

Ṣigba, mahopọnna aliho he mẹ owẹ̀n Biblu tọn yin zizedonukọnnamẹ te, mẹdelẹ na mọhodọdego janwẹ. Na ninọmẹ ylankan ahun mẹ tọn he suhugan Ju owhe kanweko tintan whenu tọn lẹ tindo wutu, Jesu Klisti lẹzun “zannu ahlìda tọn de, osó afọklẹn tọn de” na yé. (1 Pita 2:7, 8) Jesu dọ gando azọ́n yẹwhehodidọ Ahọluduta lọ tọn go dọmọ: “Yẹn wá nado flọ miyọ́n do aihọn ji.” (Luku 12:49) Podọ owẹ̀n Ahọluduta Jehovah tọn, he biọ dọ gbẹtọ lẹ ni yọ́n nupojipetọ-yinyin Mẹdatọ yetọn tọn, zindonukọn nado yin whẹho niyaniya tọn he pannukọn gbẹtọvi lẹ. Mẹsusu nọ gblehomẹ do owẹ̀n lọ go dọ Ahọluduta Jiwheyẹwhe tọn na de titonu ylankan ehe sẹ̀ to madẹnmẹ. Etomọṣo, to tonusise na Jiwheyẹwhe mẹ, mí zindonukọn nado to yẹwhehodọ. Ṣigba dile mí to mọwà, mí nọ hẹn ayinamẹ Biblu tọn lọ do ayiha mẹ dọmọ: “Eyin e yin wiwà, le e te to huhlọn mẹ na mì, mì nọ nọ̀ jijọho hẹ omẹ popo.”—Lom. 12:18.

Yí Zìnzìn Zan to Kunnudide Whenu. To ninọmẹ susu mẹ wẹ mí nọ dọho na mẹdevo lẹ te dogbọn yise mítọn dali. Nugbo wẹ dọ mí nọ wàmọ to kunnudegbe, ṣigba mí sọ nọ dín dotẹnmẹ hundote lẹ to whenuena mí tin hẹ hẹnnumẹ lẹ, azọ́nwatọgbẹ́ lẹ, po wehọmẹvigbẹ́ lẹ po. To ninọmẹ ehe lẹpo mẹ, zìnzìn dona yin yiyizan.

Eyin mí ze owẹ̀n Ahọluduta lọ tọn donukọnnamẹ to aliho he hẹn mẹdevo lẹ tindo linlẹn lọ dọ mí to whẹgbledo yé mẹ, yé sọgan gbẹ́ ẹ dai. To whenuena e yindọ yé ma biọ alọgọ mítọn podọ vlavo ma mọ nuhudo lọ na ẹn, yé sọgan gblehomẹ do nudepope he mí dọ nado jla linlẹn yetọn do go. Nawẹ mí sọgan dapana linlẹn agọ̀ nina mẹdevo lẹ gbọn? Pinplọn nado yí hodọdopọ họntọnjihẹmẹ tọn zan sọgan gọalọ.

Dovivẹnu nado bẹ hodọdopọ jẹeji gbọn hogo he mẹ omẹ awetọ tindo ojlo te de finfọndote dali. Eyin hẹnnumẹ, azọ́nwatọgbẹ́, kavi wehọmẹvigbẹ́ de wẹ mẹlọ, a sọgan ko yọ́n nuhe e tindo ojlona lẹ. Eyin a ma tlẹ ko dukosọ hẹ mẹlọ pọ́n, a sọgan dọhodo nuhe a sè to linlin mẹ kavi he gbẹtọ lẹ to didọ gbayipe to lẹdo lọ mẹ ji. Hodidọ mọnkọtọn lẹ nọ saba do nuhe tin to ayiha gbẹtọ susu lẹ tọn mẹ hia. Yin ayidonugotọ to whenuena a to azọ́nwa sọn whédegbè-jẹ-whédegbè. Aṣọdonu họmẹ tọn lẹ, aihundanu lẹ, nuyizan sinsẹ̀n tọn lẹ, po wema he yè tlẹ do mọto he yin ginglin do owhé lọ gbè go lẹ po sọgan do nususu hia dogọ gando nuhe mẹ whétọ lọ tindo ojlo te lẹ go. Dile whétọ lọ wá ohọ̀n ji, dotoaina nuhe e dọ lẹ. Nuhe e dọ na zinnudo kavi basi vọjladona tadona he kọ̀n a wá dogbọn ojlo po pọndohlan etọn po dali. Humọ, hodidọ etọn na do nuhe a dona lẹnnupọndeji nado sọgan dekunnu hia we yinukọn dogọ.

Dile hodọdopọ lọ to yìyì, dọhodo nuagokun he sọgbe hẹ hogo lọ ji sọn Biblu po owe sinai do Biblu ji lẹ po mẹ. Ṣigba ma yin tọ́ntlọ́ngbọ́n to hodọdopọ lọ mẹ blo. (Yẹwh. 3:7) Dike whétọ towe ni tindo mahẹ to hodọdopọ lọ mẹ eyin e jlo nado wàmọ. Tindo ojlo to pọndohlan po linlẹn etọn lẹ po mẹ. Ehelẹ sọgan deanana we nado yí zìnzìn zan.

Whẹpo do dọho, lẹnnupọndo nukun he whétọ lọ na yí do pọ́n hodidọ lọ ji. Howhinwhẹn lẹ 12:8 na tuli mí nado tindo ‘onù nuyọnẹntọ tọn.’ Hogbe Heblu tọn heyin yiyizan tofi tindo kanṣiṣa hẹ hogbe mọnkọtọn lẹ taidi wuntuntun po mẹdehihọ́ po. Enẹwutu, nuyọnẹn tintindo bẹ awuwhiwhle to hodidọ mẹ hẹn nado sọgan lẹnnupọn ganji bo yinuwa po zìnzìn po. Wefọ 18 weta dopolọ tọn to Howhinwhẹn lẹ mẹ na avase mí sọta ‘hodidọ matin lẹnpọn he taidi sisọ́ ohí de tọn.’ Na nugbo tọn, mí sọgan nọgodona nugbo Biblu tọn matin homẹ hinhẹngblena mẹdevo lẹ.

Wuntuntun didohia to hogbe towe lẹ mẹ sọgan gọalọna we nado dapana aliglọnnamẹnu he ma jẹ lẹ finfọndote. Eyin hogbe lọ “Biblu” yiyizan nọ fọ́n nuhahun dote, a sọgan yí hodidọ mọnkọtọn lẹ zan taidi “Owe-wiwe” kavi “owe he ko yin zinzinjẹgbonu to nuhe hugan ogbè 2 000 lẹ mẹ todin.” Eyin a dlẹnalọdo Biblu, a sọgan kàn linlẹn he mẹlọ tindo gandego sè bo hẹn nuhe e dọ do ayiha mẹ to hodọdopọ lọ pete whenu.

Zìnzìn yiyizan nọ saba zẹẹmẹdo yinyọ́n ojlẹ he sọgbe nado dọho. (Howh. 25:11) Hiẹ sọgan nọma kọngbedopọ hẹ nuhe whétọ lọ dọ lẹpo, ṣigba e ma yin dandan nado dọnnu hẹ ẹ do linlẹn etọn he ma sọgbe hẹ Owe-wiwe lẹpo ji gba. Ma tẹnpọn nado dọ nulẹpo na whétọ lọ to afọdopolọji blo. Jesu dọna devi etọn lẹ dọmọ: “Yẹn gbẹsọ tindo onú susu nado dọ hlan mì, ṣigba mìwlẹ ma sọgan hẹn yé to dinvie gba.”—Joh. 16:12.

Eyin e yọnbasi, nọ na pipà ahundopo tọn mẹhe a to hodọna lẹ. Eyin whétọ lọ tlẹ to núdọ̀n, a sọgan gbẹsọ pà ẹ na titẹdo pọndohlan tangan de go. Apọsteli Paulu wà ehe to whenuena e to hodọna tamẹnuplọnmẹtọ lẹ to Alẹọpagu Atẹni tọn mẹ. Tamẹnuplọnmẹtọ lẹ to ‘hodọna ẹn po gbigbọ nudindọn tọn po.’ Nawẹ Paulu na wagbọn bo de nuagokun etọn tọ́n matin homẹ hinhẹngblena yé? Jẹnukọn whẹ́, e doayi agbà voovo he yé ko basi na yẹwhe yetọn lẹ go. Kakati nado gblewhẹdo Atẹninu lẹ na boṣiọ-sinsẹ̀n yetọn, e yí zìnzìn do na pipà yé na owanyi sinsẹ̀n tọn sinsinyẹn he yé tindo. E dọmọ: “Yẹn mọhlan dọ to onú lẹpo mẹ hùnsẹ̀ntọ alọpa de to onú lẹpo mẹ wẹ mì.” Mẹdọnsẹpọ ehe hùn aliho lọ do nùvo na ẹn nado ze owẹ̀n etọn gando Jiwheyẹwhe nugbo lọ go donukọnna yé. Taidi kọdetọn de, mẹdelẹ lẹzun yisenọ.—Owalọ 17:18, 22, 34.

A gblehomẹ to whenuena whétọ de jẹagọdo we blo. Dù to dewe ji bo nabọẹ. Pọ́n ehe hlan taidi dotẹnmẹ hundote lẹ nado mọnukunnujẹ nuhe tin to linlẹn omẹ lọ tọn mẹ jẹ obá de mẹ. Hiẹ sọgan dọnudo e na didọ nuhe tin to linlẹn etọn mẹ jẹgbonu. Eyin e dọna we tlọlọ dọ: “Yẹn tindo sinsẹ̀n ṣie titi” lo? A sọgan yí zìnzìn do kanse dọ: “Be sinsẹ̀nnọ de wẹ a ko yin to gbẹzan towe lẹpo mẹ ya?” To gbeyiyi etọn godo, yidogọ dọmọ: “Be a lẹndọ gbẹtọvi lẹ na wá yin kinkọndopọ do sinsẹ̀n dopo mẹ pọ́n gbede ya?” Ehe sọgan hùn aliho do nùvo na hodọdopọ yinukọn dogọ lẹ.

Pọndohlan jlẹkaji tọn tintindo gando mídelẹ go sọgan gọalọna mí nado yí zìnzìn zan. Mí tindo nujikudo mlẹnmlẹn dọ aliho Jehovah tọn lẹ yin dodo bọ Ohó etọn yin nugbo. Mí nọ dọho po nujikudo po gando onú ehelẹ go. Ṣigba whẹwhinwhẹ́n depope matin nado lẹzun dodonọ-mẹdetiti tọn jlátọ gba. (Yẹwh. 7:15, 16) Mí dopẹ́ dọ mí yọ́n nugbo lọ bo nọ duvivi dona Jehovah tọn, ṣigba mí yọnẹn ganji dọ homẹdagbe majẹhẹ etọn po yise mítọn to Klisti mẹ po wẹ zọ́n bọ mí do yin alọkẹyi, e mayin na dodonọ-yinyin mítọn titi wutu gba. (Efe. 2:8, 9) Mí yọnẹn dọ mí dona ‘to dodinna míde, eyin mí tin to yise mẹ bo mọdona míde dagbedagbe.’ (2 Kọl. 13:5) Enẹwutu eyin mí to didọna gbẹtọ lẹ nado hẹn gbẹzan yetọn sọgbe hẹ nubiọtomẹsi Jiwheyẹwhe tọn lẹ, mí dona gbọn whiwhẹ dali yí ayinamẹ Biblu tọn zan na mídelẹ ga. Mí ma tindo jlọjẹ lọ nado dawhẹna hatọ mítọn lẹ gba. Jehovah “ko yí whẹdida lẹpo na Ovi,” podọ mímẹpo wẹ na ṣite to whẹdaján etọn nukọn nado dogbè nuhe mí wà lẹ tọn.—Joh. 5:22; 2 Kọl. 5:10.

To Whẹndo po Klistiani Hatọ lẹ po Ṣẹnṣẹn. E mayin kunnudegbe kẹdẹ wẹ mí na yí zìnzìn zan te gba. To whenuena e yindọ dohia sinsẹ́n gbigbọ Jiwheyẹwhe tọn wẹ zìnzìn yin, mí sọ dona do e hia to whenuena mí to nuyiwa hẹ hagbẹ whẹndo tọn lẹ to whégbè. Owanyi na whàn mí nado do mẹtọnhopọn hia na numọtolanmẹ mẹdevo lẹ tọn. Asu ahọsi Ẹsteli tọn mayin Jehovah sẹ̀ntọ gba, ṣigba Ẹsteli do sisi hia na ẹn bo yí wuntuntun zan to whenuena e to whẹho he gando devizọnwatọ Jehovah tọn lẹ go zedonukọnna ẹn. (Ẹsteli, weta 3-8) To whedelẹnu, zìnzìn yíyí do yinuwa hẹ hagbẹ whẹndo tọn he mayin Kunnudetọ lẹ sọgan biọ dọ mí ni dike walọyizan mítọn ni na pipà aliho nugbo lọ tọn kakati nado basi zẹẹmẹ nuyise mítọn lẹ tọn na yé poun.—1 Pita 3:1, 2.

Mọdopolọ, nugbo lọ dọ mí yọ́n hagbẹ agun lọ tọn lẹ ganji ma zẹẹmẹdo dọ mí sọgan nọ dọho kàunkàun na yé kavi ylangbè na yé gba. Mí ma dona lẹndọ, na yé whèwhín wutu yé dona penugo bo doakọnna ninọmẹ lọ gba. Mọjanwẹ mí ma dona din whẹjijọ gbọn didọ dali dọmọ: “Ogbè ṣie wẹ jọ mọ.” Eyin mí doayi e go dọ aliho he mẹ mí nọ dọho te nọ hẹn mẹdevo lẹ gblehomẹ, mí dona magbe nado diọ. ‘Owanyi sisosiso he mí tindo na ode awetọ’ dona whàn mí nado “nọ wà dagbe . . . hlan yé he yin yise whédo tọn lẹ.”—1 Pita 4:8, 15; Gal. 6:10.

To Hodidọ na Mẹplidopọ de Whenu. Mẹhe nọ dọho to oplò ji lẹ sọ dona yí zìnzìn zan. Mẹhe pli dopọ lẹ wá sọn nọtẹn po ninọmẹ voovo lẹ po mẹ. Nukọnyiyi gbigbọmẹ tọn yetọn gbọnvo. E sọgan yin ojlẹ tintan he mẹdelẹ wá Plitẹnhọ Ahọluduta tọn mẹ niyẹn. Mẹdevo lẹ sọgan to jujugbọn ojlẹ sinsinyẹn de mẹ bọ hodọtọ lọ ma yọnẹn. Etẹwẹ sọgan gọalọna hodọtọ de ma nado hẹn mẹplidopọ etọn lẹ gblehomẹ?

To kọndopọmẹ hẹ ayinamẹ apọsteli Paulu tọn hlan Titu, hẹn ẹn zun yanwle towe “ma nado dọho gbigble do mẹde go, . . . adavo [nado yin] omẹ dẹẹdẹ, he na nọ do walọmimiọn hia omẹ popo.” (Titu 3:2) Dapana apajlẹ aihọn tọn hihodo to hogbe he nọ de mẹhe wá sọn akọ̀ devo, kavi mẹhe nọ dó ogbè devo lẹ pò yiyizan mẹ. (Osọ. 7:9, 10) Dọhodo nubiọtomẹsi Jehovah tọn lẹ ji po ahundopo po, bo do nuyọnẹn he tin to yé yiyizan mẹ hia; ṣigba dapana ohó agọ̀ didọ gando mẹhe ma ko jẹ zọnlinzin to aliho Jehovah tọn lẹ ji mlẹnmlẹn go. Kakatimọ, na tuli mẹlẹpo nado yọ́n ojlo Jiwheyẹwhe tọn bo wà nuhe nọ hẹn homẹ etọn hùn. Yí mẹpipa zohunhunnọ po ahundopo tọn po zan gọna hogbe ayinamẹ tọn lẹ. Gbọn hodidọ po kọnugbè towe po dali, do owanyi sisosiso mẹmẹsunnu-yinyin tọn he mímẹpo dona tindo na ode awetọ hia.—1 Tẹs. 4:1-12; 1 Pita 3:8.