Yí Dotẹnmẹ Hundote lọ Zan!
Oflin He Ja Na Hẹn Yọnbasi Na Mí Nado Do Pinpẹn-Nutọn Hia
1. Dotẹnmẹ vonọtaun tẹwẹ Oflin lọ na hundote?
1 Oflin he na yin bibasi to 14 avril na hùn dotẹnmẹ vonọtaun de dote nado wleawuna pinpẹn-nutọn-yinyọnẹn na dagbewà Jehovah tọn bosọ do e hia. Kandai he tin to Luku 17:11-18 mẹ do pọndohlan Jehovah po Jesu po tọn gando pinpẹn-nutọn-yinyọnẹn go hia. E blawu dọ mẹdopo gee to pòtọnọ ao he yin azọ̀nhẹngbọna lọ lẹ mẹ wẹ yí dotẹnmẹ hundote lọ zan nado dopẹ́. To sọgodo, gbọn nunina ofligọ lọ tọn gblamẹ wẹ awutu lẹpo na yin kúnsúdona te bọ gbẹninọ kakadoi na yọnbasi. Ayihaawe ma tin dọ dona enẹlẹ na whàn mí nado nọ dopẹ́ na Jehovah egbesọegbesọ. Ṣigba, nawẹ mí sọgan do pinpẹn-nutọn-yinyọnẹn hia to osẹ he ja lẹ mẹ gbọn?
2. Nawẹ mí sọgan wleawuna pinpẹn-nutọn-yinyọnẹn na ofligọ lọ gbọn?
2 Wleawuna Pinpẹn-Nutọn-Yinyọnẹn: Nuhe ji mẹde ze ayiha etọn do wẹ nọ whàn ẹn nado do pinpẹn-nutọn hia. Nado gọalọna mí nado wleawuna pinpẹn-nutọn-yinyọnẹn na ofligọ lọ, tito vonọtaun Biblu hihia Oflin tọn de yin awuwlena do owe mítọn delẹ mẹ, taidi sunzanhiawe mítọn kavi Dogbapọnna Owe-Wiwe lẹ. Be e ma na yọ́n dọ mì ni gbadopọnna ẹn to whẹndo mẹ ya? Mọwiwà na hẹn pinpẹn-nutọn-yinyọnẹn mítọn na ofligọ lọ jideji. Podọ taidi kọdetọn de, enẹ na yinuwado walọyizan mítọn ji to aliho dagbe mẹ.—2 Kọl. 5:14, 15; 1 Joh. 4:11.
3. Aliho tẹlẹ mẹ wẹ mí sọgan do pinpẹn-nutọn-yinyọnẹn hia to ojlẹ Oflin tọn lọ mẹ te?
3 Do Pinpẹn-Nutọn-Yinyọnẹn Hia: Jẹhẹnu enẹ didohia nọ biọ nuyiwa. (Kọl. 3:15) Pòtọnọ he yọ́n pinpẹn-nutọn lọ dín Jesu mọ bo dopẹ́ na ẹn. Ayihaawe ma tin dọ e sọ yí zohunhun do dọ lehe e mọ azọ̀nhẹngbọ to azọ́njiawu-liho do na mẹdevo lẹ. (Luku 6:45) Be pinpẹn-nutọn-yinyọnẹn na ofligọ lọ na whàn mí nado yí zohunhun do tindo mahẹ to nujijla Oflin tọn lọ mẹ ya? Aliho dagbe devo nado do pinpẹn-nutọn-yinyọnẹn hia wẹ nado basi gbehosọnalitọ alọgọtọ tọn kavi hẹn lizọnyizọn mítọn gblodeji to ojlẹ Oflin tọn lọ mẹ. To whèjai Oflin lọ tọn, pinpẹn-nutọn-yinyọnẹn na whàn mí nado dokuavọna jonọ lẹ bosọ wleawufo nado na gblọndo kanbiọ yetọn lẹ tọn.
4. Etẹwẹ mí sọgan wà bọ dotẹnmẹ he Oflin ehe na hundote ma na gbọ̀ mí go?
4 Be Oflin godo tọn mítọn wẹ ehe ya? (1 Kọl. 11:26) Mí ma yọnẹn. Amọ́ nuhe họnwun wẹ yindọ, eyin Oflin lọ wayi, be dotẹnmẹ vonọtaun enẹ lọsu wayi niyẹn. Be a na yí dotẹnmẹ hundote enẹ zan ya? Mì gbọ hogbe pinpẹn-nutọn-yinyọnẹn tọn mítọn lẹ po ayihamẹlinlẹnpọn mítọn po ni hẹn homẹhun Jehovah, Mẹhe gbọn alọtútlú dali wleawu ofligọ lọ tọn.—Ps. 19:14.