WESẸDOTẸN INTẸNẸT JI TỌN Watchtower Tọn
WESẸDOTẸN INTẸNẸT JI TỌN
Watchtower Tọn
Gungbe
ẹ,ọ,ṣ
  • á
  • à
  • é
  • è
  • Ẹ
  • ẹ
  • ẹ́
  • ẹ̀
  • í
  • ì
  • ó
  • ò
  • Ọ
  • ọ
  • ọ́
  • ọ̀
  • Ṣ
  • ṣ
  • ú
  • ù
  • BIBLU
  • OWE LẸ
  • OPLI LẸ
  • be w. 282-w. 285
  • Anademẹ lẹ Na Nugopọntọ Wehọmẹ Tọn Lẹ

Video de ma tin na adà ehe

Jaale, nuhahun de wá aimẹ gando video lọ go.

  • Anademẹ lẹ Na Nugopọntọ Wehọmẹ Tọn Lẹ
  • Mọaleyi sọn Wehọmẹ Lizọnyizọn Yẹwhehọluduta Tọn Mẹ
  • Hosọ Mọnkọtọn
  • Wehọmẹ Lizọnyizọn Yẹwhehọluduta Tọn 2015 Tọn Na Gọalọna Mí Nado Hẹn Aliho Mẹpinplọn Tọn Mítọn Pọnte
    Lizọnyizọn Ahọluduta Tọn Mítọn—2014
  • Anademẹ lẹ Gando Opli Gbẹzan po Lizọnyizọn Mítọn po Tọn Go
    Anademẹ lẹ Gando Opli Gbẹzan po Lizọnyizọn Mítọn po Tọn Go
  • Payi “Azọ́nyinyọnẹn Mẹpinplọn Tọn” Towe Go
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2008
  • Gọalọna Nuplọntọ Towe lẹ Nado Yí Baptẹm
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá (Oplọn)—2021
Pọ́n Nudevo Lẹ
Mọaleyi sọn Wehọmẹ Lizọnyizọn Yẹwhehọluduta Tọn Mẹ
be w. 282-w. 285

Anademẹ lẹ Na Nugopọntọ Wehọmẹ Tọn Lẹ

TO AGUN dopodopo mẹ, mẹho de nọ yin dide nado yin nugopọntọ Wehọmẹ Lizọnyizọn Yẹwhehọluduta tọn tọn. Eyin azọngban ehe ko yin zizedo alọmẹ na we, zohunhun towe na wehọmẹ lọ podọ ojlo he a tindo to nukọnyiyi wehọmẹvi dopodopo tọn mẹ sọgan yin adà ayidego tọn de to nuhe wehọmẹ lọ nọ wadotana to agun mìtọn mẹ.

Adà titengbe azọ́ndenamẹ towe tọn wẹ nado deanana Wehọmẹ Lizọnyizọn Yẹwhehọluduta tọn to sẹmẹsẹmẹ to agun mìtọn mẹ. Hẹn ẹn do ayiha mẹ dọ to yidogọmẹ na wehọmẹvi he tindo azọ́n lẹ, mẹplidopọ lẹ lọsu tin to finẹ. Deanana wehọmẹ lọ to aliho de mẹ bọ agun lọ blebu na mọ nuflinmẹ he whànmẹ, bo yọn-na-yizan lẹ yí gando e whe gbau dopo to yanwle wehọmẹ lọ tọn heyin nùdego to weda 5 jẹ 8 nuplọnmẹwe ehe tọn mẹ lẹ go.

Tindo ojlo to wehọmẹvi lẹpo mẹ, vlavo yé yin azọ́ndena nado hiawe, nado wà azọ́ndenamẹ he taidi wadohia lẹ, kavi nado na hodidọ lẹ. Gọalọna yé nado pọ́n nuhe wà yé te e mayin taidi azọ́ndenamẹ de poun gba ṣigba taidi dotẹnmẹ hundote de nado yinukọn to sinsẹ̀nzọn yetọn hlan Jehovah mẹ. Na nugbo tọn, vivẹnudido yetọn lẹ na yidogọna nukọnyiyi yetọn. Ṣigba onú titengbe wẹ e sọ yin ga dọ hiẹ ni do ojlo hia to yé mẹ, gọalọna yé nado mọnukunnujẹ nuhọakuẹ-yinyin ayinamẹ hodidọ lọ tọn mẹ, bo basi zẹẹmẹ lehe ayinamẹ mọnkọtọn sọgan yin yiyizan do. Nado jẹ enẹ kọ̀n, dotoaina azọndenamẹ mẹdopodopo tọn po sọwhiwhe po na hiẹ nido sọgan na ayinamẹ dagbe lẹ.

Hẹn ẹn diun dọ wehọmẹ lọ bẹ bo fó domẹwhenu. Ze apajlẹ dagbe dai gbọn zẹẹmẹ towe lẹ hinhẹn do ojlẹ heyin nina yé lọ mẹ dali. Eyin wehọmẹvi de dù ganmẹ, hiẹ kavi alọgọtọ de dona na ohia avase tọn de. Eyin ohia ehe yin nina, wehọmẹvi lọ dona fó nuhe e to didọ sọn nùmẹ bo tlọ́n oplò ji to afọdopolọji. Eyin adà tito-to-whinnu lọ tọn devo dù whenu, hẹn hodidọ towe do glido, bo dọhodo whẹho lọ ji hẹ mẹmẹsunnu lọ to opli godo.

Eyin a tin to opli ji, hiẹ wẹ dona deanana wehọmẹ lọ. Eyin hiẹ ma penugo nado wá to whedelẹnu, mẹho devo he ko yin dide jẹnukọn gbọn pipli mẹho lẹ tọn dali na penukundo wehọmẹ lọ go. Eyin hiẹ tindo nuhudo alọgọ tọn nado wleawuna todohukanji wehọmẹ tọn lẹ, nado kàn azọ́ndenamẹ lẹ bo má yé, kavi nado basi tito na mẹhe na wà azọ́n mẹhe gọ̀n lẹ tọn, devizọnwatọ lizọnyizọnwiwa tọn he ko yin dide gbọn pipli mẹho lẹ tọn dali sọgan gọalọ nado wà ehelẹ.

Yinkọ Zizedai. Na tuli wẹnlatọ lẹpo nado ze yinkọ dai to wehọmẹ. Mẹdevo lẹ he to gbẹdo hẹ agun lọ po zohunhun po sọ sọgan ze yinkọ dai ga eyin yé kọngbedopọ hẹ nuplọnmẹ Biblu tọn lẹ bọ gbẹzan yetọn sọgbe hẹ nunọwhinnusẹ́n Klistiani tọn lẹ. Eyin mẹde do ojlo hia nado ze yinkọ dai, pà ẹ po zohunhun po. Eyin mẹhe jlo na ze yinkọ dai lọ ma ko lẹzun wẹnlatọ, hiẹ taidi nugopọntọ wehọmẹ tọn dona dọhodo nubiọtomẹsi he kọ̀n e dona jẹ whẹ́ lẹ ji hẹ ẹ. E na yọnhugan eyin mẹhe to anadena plọnmẹ Biblu etọn (kavi mẹjitọ yisenọ de) tin to otẹn lọ mẹ hẹ we. Nubiọtomẹsi ehelẹ yin nudopolọ taidi mẹhe jlo na lẹzun wẹnlatọ he ma ko yí baptẹm de tọn. Yé tin to weda 97 jẹ 99 owe Yin Tito-Basina Nado Basi Wadotana Lizọnyizọn Mítọn Tọn mẹ. Tindo kandai he sọgbe mẹhe ze yinkọ dai na wehọmẹ lọ lẹpo tọn.

Owe Ayinamẹ Tọn Yiyizan. Owe ayinamẹ wehọmẹvi dopodopo tọn tin to vọkan nuplọnmẹwe etọn titi mẹ, to weda 79 jẹ 81 ji. Dile ohia sinmẹnọ lọ dohia do, jẹhẹnu hodidọ tọn depope he bẹsọn 1 jẹ 17 sọgan yin yiyizan to whenuena wehọmẹvi de yin azọ́ndena nado hiawe. Na azọ́n he na yin wiwà taidi wadohia lẹ, jẹhẹnu hodidọ tọn depope wẹ sọgan yin yiyizan adavo 7tọ, 52tọ, po 53tọ po. Popolẹpo wẹ yọn-na-yizan na hodidọ lẹ adavo 7tọ, 18tọ po 30tọ po.

To whenuena jẹhẹnu hodidọ tọn de yin dide, nugopọntọ wehọmẹ tọn kavi alọgọtọ etọn dona mọdọ emi kanwe gọ́ otẹn heyin awuwlena bọdo jẹhẹnu hodidọ tọn enẹ go to “Azán He E Yin Didenamẹ” glọ po wekantin he yọ́n súnsún po to owe wehọmẹvi lọ tọn mẹ. To whenuena wehọmẹvi lọ ko wazọ́n etọn godo, kanse e to nuglọ eyin e basi nuhe ayinamẹ he sọawuhia to vivọnu weta lọ tọn biọ lẹ. Eyin e wàmọ, ohia de dona yin bibasi do apotin pẹvi he tin to owe ayinamẹ tọn lọ ji mẹ. Eyin hiẹ jlo dọ ewọ ni to azọ́nwado jẹhẹnu hodidọ tọn dopolọ ji zọnmii, nuhudo matin nado basi kandai devo do owe ayinamẹ tọn lọ ji gba; jo otẹn “Azán He E Yin Tadona” tọn do poun. Finẹ dona yin wekan gọ́ e mẹ to whenuena ojlẹ sọ na ẹn nado yì jẹhẹnu hodidọ tọn devo ji. Humọ, to weda 82 owe wehọmẹvi lọ tọn ji, to amiyọnwhé aliho nuzedonukọnnamẹ heyin yiyizan tọn, kàn azán lọ do finẹ bọdo hodidọ wehọmẹvi tọn dopodopo go. Otẹn yin jijodo to owe ayinamẹ hodidọ tọn ji podọ to todohukanji aliho nuzedonukọnnamẹ tọn lẹ ji nado dike dopodopo ni yin yiyizan whla awe. Wehọmẹvi lẹ dona tindo owe yetọn lẹ to alọmẹ to tito-to-whinnu lọ whenu.

Nọ de jẹhẹnu hodidọ tọn dopo gee namẹ to ojlẹ dopo mẹ. To paa mẹ, e nọ yọnhugan nado de jẹhẹnu hodidọ tọn lẹ namẹ dile yé yin sislẹ debọdo-dego do. Ṣigba, eyin wehọmẹvi delẹ do nugopipe he sẹhundaga hia, hiẹ sọgan na tuli yé nado plọn nupinplọn delẹ na yede bo yí yé do yizan mẹ. Enẹgodo hiẹ sọgan gọalọna yé to jẹhẹnu hodidọ tọn delẹ ji he a lẹndọ e na yidogọna nukọnyiyi yetọn taidi hodọtọ po mẹplọntọ kọdetọn dagbenọ po.

Eyin wehọmẹvi de tlẹ ko to azọ́nwa to wehọ lọ mẹ na owhe susu, e sọgan mọaleyi tlala sọn nupinplọn dopodopo pinplọn bo yí yé zan mẹ. Nado gọalọna wehọmẹvi he tindo nuhudo tangan lẹ, hiẹ sọgan de jẹhẹnu hodidọ tọn delẹ na yé nado wazọ́n deji kakati nado hodo lehe e yin sislẹ debọdo-dego do.

Ayinamẹ Nina. Yí apajlẹ po nunọwhinnusẹ́n Biblu tọn lẹ po zan ganji to ayinamẹ nina whenu. Wehọmẹvi lẹ dona mọdọ nunọwhinnusẹ́n yiaga Ohó Jiwheyẹwhe tọn lẹ wẹ to anadena ayinamẹ heyin nina po aliho he mẹ e yin nina te po.

Hẹn ẹn do ayiha mẹ dọ hiẹ yin ‘azọ́nwatọ dopọ’ hẹ mẹmẹsunnu po mẹmẹyọnnu towe lẹ po. (2 Kọl. 1:24) Taidi yewlẹ, hiẹ lọsu dona to vivẹnudo zọnmii nado hẹn nugopipe towe pọnte taidi hodọtọ po mẹplọntọ po. Plọn owe Mọaleyi sọn Wehọmẹ Lizọnyizọn Yẹwhehọluduta Tọn Mẹ na dewe, yí ayinamẹ etọn lẹ zan, bo ze apajlẹ dagbe dai na mẹdevo lẹ nado wà nudopolọ.

Dile hiẹ to mọwà, hẹn ẹn zun yanwle towe nado gọalọna wehọmẹvi lẹ nado lẹzun wehiatọ dagbe, hodọtọ he pegan, po mẹplọntọ kọdetọn dagbenọ po. Nado jẹ enẹ kọ̀n, dovivẹnu nado na alọgọ he jẹ, na wehọmẹvi lẹ nido mọnukunnujẹ jẹhẹnu hodidọ tọn voovo mẹ, nuhewutu yé do yin nujọnu, podọ lehe yé sọgan yin awuwlena do. Nuplọnmẹwe ehe yin awuwlena to aliho de mẹ he na gọalọna we nado wà enẹ. Ṣigba, e biọ nususu to hiẹ si hugan nudọnamẹ owe ehe tọn hihia poun. Basi zẹẹmẹ nudọnamẹ lọ lẹ tọn po lehe yé sọgan yin yiyizan do po.

Pà wehọmẹvi lọ eyin e wà dagbe to jẹhẹnu hodidọ tọn de ji. To kleun mẹ, dọ nuhe hẹn ẹn tindo kọdetọn dagbe kavi nuhewutu nuhe e wà do yin nujọnu. Eyin ayidonugo nina hlan nuagokun de na hẹn ale wá na ẹn, hẹn ẹn diun dọ e mọnukunnujẹ whẹwhinwhẹ́n lọ mẹ. Dọ lehe e na jẹ yanwle enẹ kọ̀n do na ẹn. Yì nuagokun lọ ji tlọlọ, ṣigba wàmọ to aliho he jọmẹ de mẹ.

Flin dọ teninọ to pipli de nukọn nado dọho nọ sinyẹnawuna mẹsusu. Eyin mẹde nọ lẹndọ emi ma wazọ́n ganji, e sọgan tindo ayihaawe eyin e jẹ nado dovivẹnu yinukọn dogọ. Hodo apajlẹ Jesu tọn, mẹhe ma wẹ́n “ofán gbigbà” kavi ṣí “sekan he to azọ̀ tì.” (Mat. 12:20) Yí numọtolanmẹ wehọmẹvi lọ tọn do lẹnpọn mẹ. Na ayinamẹ sọgbe hẹ ninọmẹ wehọmẹvi lọ tọn, vlavo e yin wẹnlatọ yọyọ kavi numimọnọ de. Mẹpipa zohunhun po ahundopo tọn po sọgan na huhlọn gbẹtọ lẹ nado to nuhe go yé pé lẹpo basi.

Doyẹyigona wehọmẹvi dopodopo. Lomunu lẹ 12:10 dọna mí dọmọ: ‘To gbégbigbò didohia ode awetọ mẹ mì yin nukọntọ.’ Ayinamẹ dagbe nankọtọn die na anademẹtọ Wehọmẹ Lizọnyizọn Yẹwhehọluduta tọn! Eyin wehọmẹvi lọ yin mẹho na we, yí sọwhiwhe do hodo anademẹ heyin nina to 1 Timoti 5:1, 2 mẹ. Nalete, mahopọnna owhe mẹde tọn, eyin ayinamẹ he bẹ vọjlado bibasi to nuyiwa etọn mẹ lẹ hẹn yin nina to aliho he jọmẹ mẹ, e nọ saba yin alọkẹyi po awubibọ po.—Howh. 25:11.

To ayinamẹ nina whenu, zinnudo yanwle nuplọnmẹ lọ tọn ji na wehọmẹvi lọ. Yanwle enẹ mayin nado mọ pipà yí poun bo yin didọna nado zindonukọn jẹ jẹhẹnu hodidọ tọn devo ji gba. Mọwẹ e mayin nado yin hodọtọ po mẹplọntọ he na dọ̀n ayidonugo mẹdevo lẹ tọn po do niyẹn. (Howh. 25:27) Ojlo mítọn wẹ nado yí nunina hodidọ tọn mítọn zan nado pagigona Jehovah bo gọalọna mẹdevo lẹ nado yọ́n ewọ bo yiwanna ẹn. Azọ́nplọnmẹ mítọn na hẹn mí pegan nado penukundo azọ́n heyin zẹẹmẹ etọn basi to Matiu 24:14 po 28:19, 20 po mẹ go ganji. To nukọn mẹ, mẹmẹsunnu he ko yí baptẹm bo pegan lẹ sọgan yin oylọ-basina nado tindo mahẹ to nukunpipedo “lẹngbọpa Jiwheyẹwhe tọn” go taidi hodọtọ po mẹplọntọ gbangba tọn lẹ po.—1 Pita 5:2, 3.

Na ayinamẹ wehọmẹvi lẹ nado hia nudọnamẹ jẹhẹnu hodidọ tọn yetọn he na bọdego to azán vude he e yin didena yé godo. Na yé tuli nado yí nuhe yé plọn lẹ do yizan mẹ to whenuena yé to awuwlena azọ́ndenamẹ wehọmẹ tọn yetọn, to hodọdopọ egbesọegbesọ tọn mẹ, to gblọndo nina to opli lẹ ji whenu, podọ to sinsẹ̀nzọn kunnudegbe tọn mẹ ga.

Azọ́n lẹ Didenamẹ. To paa mẹ, ehe dona yin bibasi e whe gbau osẹ atọ̀n jẹnukọn. Azọ́ndenamẹ lọ lẹpo dona yin kinkàn eyin e yọnbasi.

Adà he bẹ agun lọ pinplọn hẹn lẹ dona yin didena mẹho lẹ, titengbe mẹhe na penukundo adà mọnkọtọn lẹ go ganji, kavi devizọnwatọ lizọnyizọnwiwa tọn he yin mẹplọntọ dagbe lẹ.

Nado yọ́n azọ́n he na yin didena mẹmẹsunnu kavi mẹmẹyọnnu lẹ, hodo anademẹ heyin awuwlena to todohukanji wehọmẹ tọn lọ ji. Eyin mẹmẹyọnnu he nọ wazọ́n to wehọ lọ mẹ sù hugan mẹmẹsunnu lẹ, hẹn ẹn diun dọ dotẹnmẹ susu yin nina mẹmẹsunnu lẹ nado wazọ́n devo gbọnvona wehihia.

Gbadopọnna ninọmẹ mẹdopodopo tọn to azọ́n lẹ didenamẹ whenu. Be dandannu wẹ e yin nado deazọ́nna mẹho kavi devizọnwatọ lizọnyizọnwiwa tọn de to wehọmẹ to azán dopolọ gbè he e tindo azọ́n to Opli Sinsẹ̀nzọn tọn ji kavi to osẹ dopolọ mẹ he ewọ tindo togunmẹho to agun mẹ ya? Be dandannu wẹ e yin nado deazọ́nna mẹmẹyọnnu de po ovi jọja etọn he e sọgan tindo nuhudo nado gọalọna po to azán dopolọ gbè ya? Titengbe to whẹho jọja de kavi nuplọntọ he ma ko yí baptẹm de tọn mẹ, be hosọ lọ sọgbe hẹ ẹ ya? Hẹn ẹn diun dọ azọ́ndenamẹ lọ sọgbe na jẹhẹnu hodidọ tọn he ji wehọmẹvi lọ to azọ́nwa do.

Na azọ́n heyin didena mẹmẹyọnnu lẹ, wehọmẹvi lọ na nọ saba de aliho nuzedonukọnnamẹ tọn etọn sọgbe hẹ nudọnamẹ he tin to weda 78 po 82 po ji. Alọgọtọ dopo dona yin dide na ẹn, ṣigba e sọgan yí hugan dopo zan. Eyin wehọmẹvi de biọ alọgọtọ he na jẹna aliho nuzedonukọnnamẹ tangan de tọn, obiọ enẹ dona yin alọkẹyi.

Klasi Devo Lẹ. Eyin wehọmẹvi hugan 50 ko ze yinkọ dai, hiẹ sọgan jlo nado lẹnnupọndo nọtẹn devo lẹ yiyizan na azọ́n he wehọmẹvi lẹ nọ wà ji. Sọgbe hẹ nuhudo agun mìtọn tọn, tito ehe sọgan yin yiyizan na nuzedonukọnnamẹ wehọmẹvi tọn lẹpo kavi na awe he gbọngodo lẹ kẹdẹ.

Klasi dopodopo heyin yiyidogọ dona tindo anademẹtọ he pegan. E na yọnhugan eyin anademẹtọ lọ yin mẹho de. Fie e lẹzun dandan te, devizọnwatọ lizọnyizọnwiwa tọn he pegan ganji de sọgan wà ehe. Pipli mẹho lẹ tọn wẹ dona de anademẹtọ lọ lẹ. Nugopọntọ wehọmẹ tọn dona wazọ́n to kọndopọ pẹkipẹki mẹ hẹ yé na ayidonugo he jẹ nido sọgan yin nina jẹhẹnu hodidọ wehọmẹvi lẹ tọn mahopọnna fie azọ́ndenamẹ yetọn devo na yin bibasi te.

Klasi Vonọtaun Wehihia Tọn. Eyin pipli mẹho lẹ tọn magbe dọ mẹdelẹ to agun lọ mẹ dona yin pinplọn nado hiawe to ogbè he nọ yin didó to agun lọ mẹ, hiẹ sọgan basi tito ehe tọn to kọndopọmẹ hẹ Wehọmẹ Lizọnyizọn Yẹwhehọluduta tọn. Nuplọnmẹ ehe sọgan bẹ yọnhia po yọnkan po hẹn, kavi yanwle etọn sọgan yin nado hẹn nugopipe wehihia tọn pọnte.

Klasi mọnkọtọn lẹ ma dona yin bibasi dandan to ojlẹ dopolọ he mẹ wehọmẹvi lẹ to azọ́n yetọn lẹ wà to Wehọmẹ Lizọnyizọn Yẹwhehọluduta tọn mẹ gba. Alọgọ he jẹ nina sọgan biọ whenu susu dogọ hugan dehe na tin-to-aimẹ to wehọmẹ lọ whenu. Mẹho lẹ yọ́n nuhudo agun lọ tọn podọ yé dona magbe do ojlẹ he mẹ nuplọnmẹ mọnkọtọn na yin bibasi ji. Sọgbe hẹ nuhudo lọ, tito lẹ sọgan yin bibasi nado plọnmẹ taidi pipli de kavi to dodonu mẹdopodopo tọn ji.

Mẹplọntọ he pegan dona yin mimọ. E na yọnhugan eyin azọ́n lọ yin didena mẹmẹsunnu he didẹ́ to wehihia mẹ bo jẹakọ hẹ ogbè lọ ganji de. Eyin mẹmẹsunnu de ma tin, mẹho lẹ sọgan biọ to mẹmẹyọnnu apajlẹ dagbenọ he pegan de si nado gọalọ. E dona blatá to nupinplọn klasi lọ whenu.—1 Kọl. 11:3-10; 1 Tim. 2:11, 12.

Alọnuwe lọ, Yí Dewe Zan na Wehihia po Wekinkan Po ko tin-to-aimẹ to ogbè susu mẹ. E yin zinzinjẹgbonu nado wleawuna nuplọnmẹ yọnhia po yọnkan po tọn lẹ. Nuplọnmẹwe devo lẹ sọgan yin yiyizan ga, sinai do nugopipe wehihia mẹhe ze yinkọ dai lẹ tọn ji. Eyin wehọmẹvi lẹ ko yinukọn dile e jẹ do, yé dona yin tulina nado tindo mahẹ to tito-to-whinnu Wehọmẹ Lizọnyizọn Yẹwhehọluduta tọn mẹ.

Taidi nugopọntọ wehọmẹ ehe tọn, hiẹ sọgan wà nususu nado hẹn ale wá na agun lọ. Wleawu ganji, podọ to kọndopọmẹ hẹ ayinamẹ he tin to Lomunu lẹ 12:6-8 mẹ, penukundo azọ́ndenamẹ towe go taidi nuhọakuẹ he Jiwheyẹwhe zedo alọmẹ na we de.

    Gun Publications | (1976-2025)
    Ṣí Adà Towe
    Hùn Adà Towe
    • Gungbe
    • Dohlan
    • Nujlomẹ Lẹ
    • Copyright © 2025 Watch Tower Bible and Tract Society of Pennsylvania
    • Osẹ́n Nọtẹn lọ Tọn Lẹ
    • Osẹ́n Nudọnamẹ Mẹdetiti Tọn
    • De Osẹ́n Nudọnamẹ Tọn Lẹ
    • JW.ORG
    • Hùn Adà Towe
    Dohlan