Nọ to Nukọnyi Taidi Lizọnyizọnwatọ De
1. Apajlẹ owhe kanweko tintan whenu tọn tẹlẹ wẹ dohia dọ mí dona nọ yinukọn to lizọnyizọn mítọn mẹ?
1 Klistiani lẹ dona nọ yinukọn to lizọnyizọn yetọn mẹ. Enẹ wẹ zọ́n bọ Jesu zindonukọn nado plọnazọ́n devi etọn lẹ gando yẹwhehodidọ go. (Luku 9:1-5; 10:1-11) Enẹ wẹ sọ zọ́n bọ Akuila po Pliskila po dọ̀n Apolo do ogbẹ́ mẹ bo “hẹn aliho Jiwheyẹwhe tọn họnwun na ẹn to aliho he sọgbe mẹ dogọ.” (Owalọ 18:24-26) Whẹwhinwhẹ́n dopolọ wutu wẹ Paulu do na tuli Timoti, he yin yẹwhehodọtọ numimọnọ de, nado zindonukọn nado nọ jo ede na mẹpinplọn, na nukọnyiyi etọn nido sọgan “họnwun na gbẹtọ lẹpo.” (1 Tim. 4:13-15) Mahopọnna lehe e ko dẹnsọ bọ mí to azọ́nwa na Oklunọ di afanumẹ, yèdọ taidi wẹnlatọ wẹndagbe lọ tọn, mí dona zindonukọn nado to lizọnyizọn mítọn hẹn pọnte dogọ.
2. Nawẹ mí sọgan plọnnu sọn mẹdevo lẹ dè gbọn?
2 Nọ Plọnnu sọn Mẹdevo lẹ Dè: Dopo to aliho he mẹ mí sọgan hẹn lizọnyizọn mítọn pọnte dogọ te lẹ mẹ wẹ nado nọ plọnnu sọn mẹdevo lẹ dè. (Howh. 27:17) Enẹwutu, nọ na ayidonugo wẹnlatọ he a to azọ́nwa hẹ to whenue e to hodọna whétọ de. Nọ kàn ayinamẹ sè gando adà lizọnyizọn lọ tọn tangan de go sọn wẹnlatọ kọdetọn dagbenọ lẹ dè bo nọ yí sọwhiwhe do dotoaina ayinamẹ yetọn. (Howh. 1:5) Be a ma nọ yọ́n lehe a na basi gọyìpọn kavi deanana plọnmẹ Biblu de do wẹ ya? Kavi a ma nọ yọ́n lehe a sọgan tindo mahẹ to adà lizọnyizọn lọ tọn devo lẹ mẹ do wẹ ya? Ze afọdide bo kanhose nugopọntọ pipli kunnudegbe tọn towe kavi wẹnlatọ numimọnọ de nado plọnazọ́n we. Flindọ gbigbọ wiwe Jehovah tọn sọgan gọalọna we nado hẹn azọ́nyinyọnẹn towe pọnte dogọ, enẹwutu nọ biọ gbigbọ wiwe etọn whẹwhẹ to odẹ̀ mẹ.—Luku 11:13.
3. Eyin a ma tlẹ kàn ayinamẹ biọ whẹpo mẹde do na we, nawẹ a dona yinuwa gbọn?
3 Eyin a ma tlẹ kàn ayinamẹ biọ whẹpo mẹde do na we ayinamẹ do lehe a sọgan yinukọn do ji, ma gblehomẹ blo. (Yẹwh. 7:9) Taidi Apolo, kẹalọyi alọgọ lọ po whiwhẹ po bo yọ́n pinpẹn etọn. Aliho he mẹ gbẹtọ nuyọnẹntọ de nọ yinuwa te niyẹn.—Howh. 12:15.
4. Sọgbe hẹ nuhe Jesu dọ, whẹwhinwhẹ́n titengbe tẹ wutu wẹ mí dona nọ to nukọnyi taidi yẹwhehodọtọ?
4 Nukọnyiyi Nọ Pagigona Jiwheyẹwhe: Jesu yí apajlẹ de zan nado na tuli hodotọ etọn lẹ nado yinukọn to lizọnyizọn yetọn mẹ. E yí ede jlẹdo vẹntin de go bo yí hodotọ yiamisisadode etọn lẹ jlẹdo alà vẹntin lọ tọn lẹ go. E dọ dọ Otọ́ emitọn nọ hẹn alà he to sinsẹ́n detọ́n lẹ dopodopo zun wiwe, “na e nido de sinsẹ́n tọ́n dogọ.” (Joh. 15:2) Kẹdẹdile mẹhe tindo vẹngle de nọ jlo dọ alà vẹntin etọn lẹ tọn ni de sinsẹ́n tọn dogọ do, mọ wẹ Jehovah nọ jlo dọ mí ni nọ to nukọnyi bo to ‘sinsẹ́n nùflo mítọn tọn’ detọ́n dogọ do niyẹn. (Heb. 13:15) Kọdetọn dagbe tẹwẹ mí nọ tindo to whenue mí to nukọnyi taidi yẹwhehodọtọ de? Jesu na mí gblọndo lọ: “Ehe mẹ wẹ Otọ́ ṣie yin gigopana te, dọ mì ni nọ to sinsẹ́n susu detọ́n.”—Joh. 15:8.