Biblu Yiyizan Nado Na Gblọndo

EYIN mẹde kanhose mí dogbọn nuyise mítọn, aliho gbẹninọ tọn mítọn, pọndohlan mítọn gando nujijọ agọe tọn lẹ go, todido mítọn na sọgodo dali, mí nọ dovivẹnu nado yí Biblu zan to gblọndo nina mẹ. Etẹwutu wẹ? Na Ohó Jiwheyẹwhe tọn wẹ e yin wutu. Biblu mẹ wẹ mí nọ mọ nuyise mítọn lẹ te. Biblu ji wẹ aliho gbẹninọ mítọn tọn sinai do. E nọ diọadana pọndohlan mítọn gando nujijọ aihọn tọn lẹ go. Todido mítọn na sọgodo sinai gligli do opagbe gbọdo Biblu tọn lẹ ji.—2 Tim. 3:16, 17.

Mí yọ́n azọngban he oyín mítọn bẹhẹn ganji. Kunnudetọ Jehovah tọn lẹ wẹ mí yin. (Isa. 43:12) Enẹwutu mí nọ na gblọndo lẹ, e mayin sinai do tamẹnuplọnmẹ gbẹtọvi tọn ji wẹ gba, ṣigba sinai do nuhe Jehovah dọ to Ohó gbọdo etọn mẹ ji. Nugbo wẹ dọ, dopodopo mítọn nọ tindo linlẹn mẹdetiti tọn lẹ do whẹho lẹ ji, ṣigba mí nọ na dotẹnmẹ Ohó Jiwheyẹwhe tọn nado deanana pọndohlan mítọn lẹ na mí kudeji mlẹnmlẹn dọ nugbo wẹ e yin wutu. Na nugbo tọn, Biblu na mí mẹdekannujẹ na nudide mẹdetiti tọn to whẹho susu mẹ. Kakati nado nọ zín nudide mítọn do mẹdevo lẹ ji, mí jlo nado plọnmẹ nunọwhinnusẹ́n he tin to Owe-wiwe mẹ lẹ, bo gbọnmọ dali na dotẹnmẹ todoaitọ mítọn lẹ nado yí mẹdekannujẹ nudide tọn dopolọ he mí nọ duvivi etọn zan. Taidi apọsteli Paulu, mí nọ dín ‘nado nọgodona tonusise gbọn yise dali.’—Lom. 16:26.

Jesu Klisti yin zẹẹmẹ basina to Osọhia 3:14 mẹ taidi “kunnudetọ dodonọ, nugbonọ.” Nawẹ e na gblọndo kanbiọ lẹ tọn bo yinuwa hẹ ninọmẹ he yin zize pannukọn ẹn lẹ gbọn? To whedelẹnu gbọn apajlẹ he na hẹn gbẹtọ lẹ lẹnnupọn yiyizan dali. To ojlẹ devo lẹ mẹ gbọn kinkanse hokansetọ lọ lehe ewọ mọnukunnujẹ wefọ de mẹ do dali. Podọ gbọzangbọzan gbọn hoyidọ sọn wefọ lẹ mẹ, hodọdo yé ji, kavi alọdindlẹndo yé dali. (Mat. 4:3-10; 12:1-8; Luku 10:25-28; 17:32) To owhe kanweko tintan whenu, owe-hihá Owe-wiwe tọn lẹ nọ saba tin to sinagọgu lẹ mẹ. Kunnudenu de matin dọ Jesu tindo bladopọ mẹdetiti tọn owe-hihá enẹlẹ tọn gba, ṣigba e yọ́n Owe-wiwe ganji bo nọ saba dlẹnalọdo yé to nupinplọn mẹdevo lẹ whenu. (Luku 24:27, 44-47) E sọgan gbọn nugbonọ-yinyin dali dọ dọ nuhe plọnmẹ emi te mayin sọn emilọsu dè gba. Nuhe e sè sọn Otọ́ etọn dè wẹ e nọ dọ.—Joh. 8:26.

Ojlo mítọn wẹ nado hodo apajlẹ Jesu tọn. Mí ma ko sè Jiwheyẹwhe dọho tlọlọ, dile Jesu wà do gba. Ṣigba Biblu yin Ohó Jiwheyẹwhe tọn. Eyin mí yí ì zan taidi dodonu de na gblọndo mítọn lẹ, mí na dapana ayidonugo dindọ̀n wá mídelẹ ji. Mí na dohia dọ kakati nado to linlẹn gbẹtọvi mapenọ tọn de dọ, mí na magbe mlẹnmlẹn nado dike Jiwheyẹwhe ni dọ nuhe yin nugbo.—Joh. 7:18; Lom. 3:4.

Nugbo wẹ dọ, ojlo mítọn mayin nado yí Biblu zan poun gba ṣigba nado wàmọ to aliho de mẹ he na hẹn ale daho tlala wá na todoaitọ mítọn. Mí jlo dọ e ni dotoai po ayiha he hùndonuvo po. Sinai do walọyizan mẹlọ tọn ji, hiẹ sọgan bẹ linlẹn Owe-wiwe tọn lẹ jẹeji gbọn didọ dali dọmọ: “Be hiẹ ma yigbe dọ nuhe yin nujọnu na nugbo tọn wẹ nuhe Jiwheyẹwhe dọ ya?” Kavi hiẹ sọgan dọmọ: “Be hiẹ yọnẹn dọ Biblu dọhodo kanbiọ enẹ pẹpẹ ji ya?” Eyin hiẹ to hodọna mẹhe ma tindo osi na Biblu, vlavo hiẹ dona yí homẹbibiọ he gbọnvo de zan. Hiẹ sọgan dọmọ: “Dike yẹn ni má dọdai hohowhenu tọn ehe hẹ we.” Kavi hiẹ sọgan dọmọ: “Owe heyin mimá gbayipe hugan to whenuho gbẹtọvi tọn mẹ dọle . . . ”

To whedelẹnu, hiẹ sọgan dọhodo wefọ de ji poun. Ṣigba, to fie e yọnbasi te, e na yọ́n hugan nado hùn Biblu tlọlọ bo hia nuhe e dọ. Do wefọ lọ hia mẹlọ to vọkan Biblu etọn titi mẹ to whedepopenu he ehe yọn-na-yizan. Yizan tlọlọ Biblu tọn ehe nọ saba tindo nugandomẹgo huhlọnnọ do gbẹtọ lẹ ji.—Heb. 4:12.

Klistiani mẹho lẹ tindo azọngban vonọtaun de nado yí Biblu zan to gblọndo nina kanbiọ lẹ whenu. Dopo to jẹhẹnu sinsẹ̀nzọnwiwa taidi mẹho de tọn wẹ yindọ mẹmẹsunnu lọ nọ “hẹn ohó nugbo go gligli, dile yè plọn ẹn do, gbọn oplọn he pegan dali.” (Titu 1:9) Hagbẹ agun tọn de sọgan basi nudide sinsinyẹn de to gbẹzan mẹ to whenuena mẹho de ko na ẹn ayinamẹ godo. Lehe e yin onú titengbe dọ ayinamẹ ehe ni sinai gligli do Owe-wiwe ji do sọ! Apajlẹ mẹho de tọn to ehe wiwà mẹ sọgan yinuwado mẹsusu devo lẹ ji to aliho nuplọnmẹ tọn yetọn mẹ.