Hoyijlẹdohogo He Sọgbe

TO WHENUENA hiẹ dọho, hosetọ towe lẹ tindo whẹjijọ lẹpo nado kanse dọ: “Naegbọn enẹ do yin nugbo? Kunnudenu tẹwẹ dohia dọ nuhe dọ hodọtọ lọ te dona yin alọkẹyi?” Taidi mẹplọntọ de, azọngban towe wẹ e yin nado na gblọndo kanbiọ mọnkọtọn lẹ tọn kavi nado gọalọna hosetọ towe lẹ nado mọ gblọndo lọ lẹ. Eyin nuagokun lọ yin nujọnu to hodidọ towe mẹ, hẹn ẹn diun dọ a na whẹwhinwhẹ́n he na dù to hosetọ towe lẹ ji nado kẹalọyi i. Ehe na hẹn nuzedonukọnnamẹ towe nado diọlinlẹnnamẹ.

Apọsteli Paulu yí hodidọ linlẹndiọnamẹ tọn zan. E nọ tẹnpọn nado diọ linlẹn na hosetọ etọn lẹ gbọn hodidọ he whèwhín, hoyijlẹdohogo lẹnpọn dagbe tọn, po ovẹvivẹ vẹkuvẹku po yiyizan dali. E ze apajlẹ dagbe de dai na mí. (Owalọ 18:4; 19:8) Na nugbo tọn, hodọtọ delẹ nọ yí hogbe linlẹndiọnamẹ tọn lẹ zan nado hẹn gbẹtọ lẹ buali. (Mat. 27:20; Owalọ 14:19; Kọl. 2:4) Yé sọgan bẹ hodidọ yetọn jẹeji po hopàdọ po, ganjẹ asisa lalo lẹ go, yí kunnudenu he ma dolido lẹ zan, gbẹkọ nugbo he sọta pọndohlan yetọn lẹ go, kavi dọ nuhe gbẹtọ lẹ yiwanna kakati nado hẹnmẹ lẹnnupọn. Mí dona tin to aṣeji nado dapana aliho mọnkọtọn lẹpo.

Yin Zize Sinai Gligli do Ohó Jiwheyẹwhe Tọn Ji. Nuplọnmẹ mítọn ma dona yin zize sinai do linlẹn mítọn titi lẹ ji gba. Mí na dovivẹnu nado má nuhe mí ko plọn sọn Biblu mẹ hẹ mẹdevo lẹ. Nado wà ehe, mí ko yin alọgọna tlala gbọn zinjẹgbonu hagbẹ afanumẹ nugbonọ nuyọnẹntọ tọn lẹ dali. Zinjẹgbonu ehelẹ nọ na tuli mí nado gbadopọnna Owe-wiwe po sọwhiwhe po. To enẹgodo, mí nọ deanana mẹdevo lẹ hlan Biblu mẹ, e mayin po yanwle lọ po nado dohia dọ míwlẹ wẹ dọ nugbo gba, ṣigba nado gbọn whiwhẹ dali dike yé ni mọ nuhe Biblu dọ na yedelẹ. Mí kọngbedopọ hẹ Jesu Klisti, he dọ to odẹ̀ mẹ hlan Otọ́ etọn dọmọ: “Ohó towe wẹ nugbo.” (Joh. 17:17) Jehovah Jiwheyẹwhe, yèdọ Didatọ olọn po aigba po tọn wẹ aṣẹpatọ he yiaga hugan. Enẹwutu hodidọ mítọn lẹ na gọ́ na lẹnpọn dagbe eyin yé sinai do Ohó etọn ji.

To whedelẹnu, hiẹ sọgan dọho na mẹhe ma jẹakọ hẹ Biblu lẹ kavi mẹhe ma kẹalọyi i taidi Ohó Jiwheyẹwhe tọn. Hiẹ dona yí wuntuntun zan gando whenue a na dè wefọ Biblu tọn lẹ podọ lehe a wàmọ gbọn go. Ṣigba hiẹ dona dovivẹnu nado dọ̀n ayidonugo yetọn wá asisa dejidego nudọnamẹ tọn enẹ ji dile e sọgan yawu yọnbasi do.

Be hiẹ dona wá tadona lọ kọ̀n dọ wefọ he sọgbe de hihia poun na wleawuna kunnudenu he ma sọgan yin gbigbẹdai de wẹ ya? E sọgan gọ̀n mayin mọ. E sọgan biọ dọ hiẹ ni lẹ́ ayidonugo hosetọ lọ tọn hlan lẹdo hodidọ lọ tọn ji nado dohia dọ wefọ lọ nọgodona nuhe dọ a te lẹ nugbonugbo. Eyin nunọwhinnusẹ́n de ji wẹ a to nùzindo poun sọn wefọ de mẹ ṣigba bọ lẹdo etọn ma to hodọdo hogo enẹ ji, e sọgan biọ dọ a ni na kunnudenu devo lẹ dogọ. E sọgan biọ dọ hiẹ ni yí wefọ devo he gando whẹho lọ go lẹ zan nado dù to mẹplidopọ towe lẹ ji dọ nuhe dọ a te sinai gligli do Owe-wiwe ji.

Dapana nùzinzindo nuhe wefọ de dohia ji glanglan. Yí sọwhiwhe do hia ẹ. Wefọ lọ sọgan basi zẹẹmẹ to paa mẹ do hogo he a to hodọdeji lọ ji. Ṣigba, whẹpo nuhe dọ a te nido diọlinlẹnnamẹ, hosetọ towe dona penugo nado mọ kunnudenu hodidọ towe tọn lẹ.

Yí Kunnudenu Devo lẹ do Nọgodona Ẹn. To whẹho delẹ mẹ, e sọgan yin alọgọnamẹnu nado yí kunnudenu he wá sọn asisa dejidego de mẹ zan gbọnvona Biblu nado gọalọna gbẹtọ lẹ nado mọdọ Owe-wiwe sọgbe hẹ lẹnpọn dagbe.

Di apajlẹ, hiẹ sọgan dlẹnalọdo wẹkẹ yinukundomọ lọ taidi kunnudenu dọ Mẹdatọ de tin. Hiẹ sọgan dọ̀n ayidonugo wá osẹ́n jọwamọ tọn lẹ ji, taidi osẹ́n nudọnwado tọn, bo hẹn ẹn lẹnnupọn dọ tintin osẹ́n mọnkọtọn lẹ tọn dohia hezeheze dọ Osẹ́n-namẹtọ de tin. Hoyijlẹdohogo towe na sọgbe eyin e tin to kọndopọmẹ hẹ nuhe yin didọ to Ohó Jiwheyẹwhe tọn mẹ. (Job 38:31-33; Ps. 19:1; 104:24; Lom. 1:20) Kunnudenu mọnkọtọn nọ gọalọ, na e nọ dohia dọ nuhe Biblu dọ sọgbe hẹ nugbo he nọ yin mimọ po nukun po lẹ.

Be hiẹ to vivẹnudo nado gọalọna mẹde nado mọ dọ Biblu yin Ohó Jiwheyẹwhe tọn nugbonugbo ya? Hiẹ sọgan yihodọ sọn hogbe wesetọ he yigbe dọ e yinmọ lẹ tọn mẹ, ṣigba be kunnudenu enẹ ko pé ya? Mẹhe nọ na sisi wesetọ enẹlẹ wẹ hoyidọ mọnkọtọn lẹ na gọalọna poun. Be a sọgan yí lẹnunnuyọnẹn zan nado dohia dọ nugbo wẹ Biblu dọ ya? Eyin linlẹn lẹnunnuyọnẹntọ mapenọ lẹ tọn wẹ hiẹ na yizan taidi asisa dejidego towe, dodonu he ma lodo ji wẹ a na to didó do. To alọ devo mẹ, eyin a bẹjẹeji po Ohó Jiwheyẹwhe tọn po bo wá dlẹnalọdo dodinnanu lẹnunnuyọnẹn tọn he zinnudo gbesisọ-yinyin Biblu tọn ji, hoyijlẹdohogo towe lẹ na yin zize sinai do dodonu he lodo ji.

Nudepope he a to vivẹnudo nado dohia, ze kunnudenu he pé do nọgodona ẹn. Lehe kunnudenu lọ na sù sọ na sinai do hosetọ towe ji. Di apajlẹ, eyin hiẹ to hodọdo azán godo tọn lẹ ji dile e yin zẹẹmẹ basina to 2 Timoti 3:1-5 mẹ do, hiẹ sọgan dọ̀n ayidonugo hosetọ towe lẹ tọn wá linlin nujijọ he gbayipe de ji nado dohia dọ gbẹtọ lẹ ma tindo ‘owanyi jọwamọ tọn.’ Apajlẹ dopo enẹ sọgan ko pé nado dohia dọ adà ohia azán godo tọn lẹ tọn ehe to yinyin hinhẹndi todin.

Yíyí onú voovo awe he tindo adà titengbe dopolọ lẹ jlẹdo yedelẹ go sọgan gọalọ. Nuyijlẹdonugo ma nọ do kunnudenu hia na ede gba; nujọnu-yinyin etọn dona yin didohia gbọn nuhe Biblu lọsu dọ dali. Ṣigba nuyijlẹdonugo sọgan gọalọna mẹde nado mọ lẹnpọn dagbenọ-yinyin linlẹn de tọn. Di dohia, nuyijlẹdonugo mọnkọtọn sọgan yin yiyizan to zẹẹmẹ bibasi dọ gandudu de wẹ Ahọluduta Jiwheyẹwhe tọn yin whenu. Hiẹ sọgan dohia dọ taidi gandudu gbẹtọvi tọn lẹ, Ahọluduta Jiwheyẹwhe tọn tindo gandutọ lẹ, mẹjidugando lẹ, osẹ́n lẹ, aliho whẹdida tọn, po aliho wepinplọn tọn de po.

Numimọ jọnun gbẹzan tọn lẹ sọgan yin yiyizan nado dohia dọ ayinamẹ Biblu tọn lẹ hihodo yin nuyọnẹnnu. Numimọ mẹdetiti tọn lẹ sọgan sọ yin yiyizan nado nọgodona nuhe yin didọ lẹ. Di dohia, eyin a dlẹnalọdo nujọnu-yinyin Biblu hihia po pinplọn ẹn po tọn na mẹde, a sọgan basi zẹẹmẹ lehe mọwiwà ko hẹn gbẹzan towe pọnte do. Nado na tuli mẹmẹsunnu etọn lẹ, apọsteli Pita dlẹnalọdo wunmẹdidiọ lọ, ehe e yí nukun etọn lẹ do mọ. (2 Pita 1:16-18) Paulu lọsu donù numimọ etọn titi lẹ go. (2 Kọl. 1:8-10; 12:7-9) Ṣigba hiẹ ma dona yí numimọ mẹdetiti tọn lẹ zan gbọzangbọzan gba, na ni ma yindọ hiẹ to ayidonugo he ma jẹ dọ̀n wá dewe ji.

To whenuena e yindọ fie gbẹtọ lẹ wá sọn po nulẹnpọn yetọn po gbọnvo, kunnudenu he dù to mẹde ji sọgan nọma pé nado duto mẹdevo ji. Enẹwutu, lẹnnupọndo pọndohlan hosetọ towe lẹ tọn ji to whenuena a jlo na de kunnudenu he a na yizan lẹ po lehe a na ze yé donukọnnamẹ do po. Howhinwhẹn lẹ 16:23 dọmọ: “Ayiha nuyọnẹntọ tọn plọn onù etọn, e sọ hẹn oplọn sù to nùflo etọn ji.”