Dovivẹnu Nado Jẹ Ahun Hosetọ Towe lẹ Tọn Mẹ

TO YIDOGỌMẸ na kunnudidena gbẹtọ lẹ, hiẹ dona dovivẹnu nado jẹ ahun yetọn mẹ. To Biblu mẹ, ahun nọ saba yin nùdego taidi adà awetọ awusọhia paa mẹde tọn. Ahun yẹhiadonu tọn nọtena nuhe mẹde yin to homẹ—numọtolanmẹ etọn, nuhe ji e nọ lẹnnupọndo lẹpo, nuhewutu e nọ lẹnnupọndeji, podọ lehe linlẹn enẹlẹ nọ yinuwado nuyiwa etọn lẹ ji do. Ahun yẹhiadonu tọn ehe mẹ wẹ okún nugbo lọ tọn nọ yin didó do. (Mat. 13:19) Podọ tonusisena Jiwheyẹwhe dona wá sọn ahun mẹ.—Howh. 3:1; Lom. 6:17.

Na mẹpinplọn towe nido sọgan jẹ ahun hosetọ towe tọn mẹ, a dona ze ayidonugo do yanwle ehelẹ ji: (1) Yọ́n nuhe ko yinuwado ahun hosetọ towe tọn ji. (2) Wleawuna jẹhẹnu mẹjlọdote tọn lẹ, taidi owanyi po obú Jiwheyẹwhe tọn po. (3) Na tuli hosetọ towe nado gbadopọnna mẹwhinwhàn etọn lẹ nado sọgan hẹn homẹ Jehovah tọn hùn to gigọ́mẹ.

Yí Wuntuntun Zan. Whẹwhinwhẹ́n he wutu mẹde ma do kẹalọyi nugbo lọ gbọnvona mẹdevo tọn. To anadidena plọnmẹ Biblu whégbè tọn de whenu, e sọgan biọ dọ hiẹ ni dè nuvẹun he nuplọntọ lọ tindo gando sinsẹ̀n go sẹ̀ bo wleawuna nugbo he na dè linlẹn agọ̀ he e tindo lẹ sẹ̀, kavi a ni wleawuna kunnudenu lẹ poun. Kanse dewe dọ: ‘Taidi gbẹtọvi de, be omẹ ehe yọnẹn dọ emi tindo nuhudo gbigbọmẹ tọn lẹ ya? Etẹlẹ wẹ e yise? Etẹlẹ wẹ e ma yise? Naegbọn e do wá tadona enẹlẹ kọ̀n? Be e tindo nuhudo alọgọ tọn nado dù to ojlo he sọgan glọnalina ẹn nado kẹalọyi azọngban he nugbo lọ yinyọnẹn bẹhẹn lẹ ji wẹ ya?’

E ma nọ bọawu to whepoponu nado yọ́n nuhewutu gbẹtọ lẹ yí onú delẹ sè gba. Howhinwhẹn lẹ 20:5 dọmọ: “[Ayinamẹ] to ayiha gbẹtọ tọn mẹ taidi osin he siso: ṣigba omẹ zìnzìn wẹ na dọ̀n ẹn jẹgbonu.” Zìnzìn yin nugopipe lọ nado mọnukunnujẹ nuhe ma họnwun ganji lẹ mẹ. Ehe nọ biọ ayidonugo sọwhiwhe tọn po walọ mẹtọnhopọn tọn po.

Onú lẹpo ma nọ yin didọ po onù po gba. Hodidọ tangan de sọgan hẹn diọdo wá to nukunta nuplọntọ de tọn ji kavi to kọnugbè etọn mẹ. Eyin mẹjitọ de wẹ hiẹ yin, matin ayihaawe hiẹ yọnẹn dọ diọdo de to walọyizan ovi towe tọn mẹ sọgan dohia dọ e to awujona nuyiwadomẹji yọyọ de to gbẹzan mẹ. Ma yí nukunpẹvi do pọ́n ohia ehelẹ blo. Ohia nuhe tin to ahun mẹlọ tọn mẹ lẹ tọn wẹ yé yin.

Kanbiọ heyin awuwlena ganji lẹ sọgan gọalọna we nado yọ́n nuhe tin to ahun mẹde tọn mẹ. Hiẹ sọgan kanse dọmọ: “Etẹwẹ yin numọtolanmẹ towe gando . . . ?” “Etẹwẹ hẹn we tindo nujikudo dọ . . . ?” “Etẹwẹ na yin nuyiwa towe eyin . . . ?” Ṣigba, tin to aṣeji ma nado gbahundona gbẹtọ lẹ po kanbiọ susu po. Hiẹ sọgan yí zìnzìn zan bo bẹ kanbiọ towe jẹeji dole, “Jaale dike yẹn ni kàn ohó ehe sè we. . ..” E biọ sọwhiwhe nado yọ́n nuhe tin to ahun mẹ. To whẹho susu mẹ, jidide dona yin awuwlena na ojlẹ de whẹpo mẹde na jlo nado dọ nuhe tin to ahun etọn mẹ lẹ. Etomọṣo, hiẹ dona payi na omẹ lọ ni ma do lẹndọ a to nuhe ma dù we lẹ kanse blo.—1 Pita 4:15.

Aliho he mẹ hiẹ yinuwa hlan nuhe a sè lẹ te sọ biọ zìnzìn ga. Flin dọ yanwle towe wẹ nado mọnukunnujẹ gbẹtọ lẹ mẹ nado sọgan yọ́n nudọnamẹ Biblu tọn he na whàn yé. Yawu dùto mẹwhinwhàn depope ji nado do pọndohlan agọ̀ yetọn lẹ hia. Kakatimọ, tin to aṣeji nado yọ́n linlẹn yetọn he ma sọawuhia to hogbe yetọn lẹ mẹ. Gbọnmọ dali, hiẹ na yọ́n nuhe a na gblọn; podọ eyin nuplọntọ towe mọdọ hiẹ mọnukunnujẹ emi mẹ, e sọgan lẹnnupọn sisosiso do nuhe a dọ lẹ ji.—Howh. 16:23.

Hiẹ sọgan whàn gbẹtọ lẹ jẹ obá de mẹ, etlẹ yin to whenuena a to hodọna pipli daho de. Eyin a nọ pọ́n nukunji na mẹplidopọ lẹ ganji, bo nọ doayi dohia nukunta tọn lẹ go, bosọ nọ kàn kanbiọ mẹhẹnlẹnnupọn tọn he ma biọ gblọndo lẹ sè, hiẹ sọgan yọ́n numọtolanmẹ hosetọ towe lẹ tọn jẹ obá de mẹ gando nuhe dọ a te go. Eyin a yọ́n mẹplidopọ towe lẹ ganji, do mẹtọnhopọn hia na ninọmẹ yetọn lẹ. Ze ninọmẹ paa agun lọ tọn do lẹnpọn mẹ dile a to hoyijlẹdohogo hẹ yé sọn Ohó Jiwheyẹwhe tọn mẹ.—Gal. 6:18.

Numọtolanmẹ Dagbe lẹ Finfọndote. To whenuena hiẹ ko mọnukunnujẹ nuhe mẹde yise, nuhe e ma yise, podọ whẹwhinwhẹ́n he wutu wẹ jẹ obá de mẹ, hiẹ na penugo nado ze ohó towe sinai do enẹ ji. To fọnsọnku etọn godo, Jesu jẹ ahun devi etọn lẹ tọn mẹ gbọn ‘zẹẹmẹ Owe-wiwe tọn bibasi’na yé gando nuhe ko ṣẹṣẹ jọ lẹ go dali. (Luku 24:32) Hiẹ lọsu dona dovivẹnu nado hẹn kanṣiṣa tin to nuhe mẹde ko tindo numimọ etọn, nuhe e to nukundo vẹkuvẹku, po nuhe e to mimọ to Ohó Jiwheyẹwhe tọn po ṣẹnṣẹn. Ahun nuplọntọ de tọn na yin whinwhàn to aliho dagbe mẹ eyin e mọ hezeheze dọ: “NUGBO LỌ die!”

Gbọn nùzindo dagbewà Jehovah tọn, owanyi etọn, nukundagbe majẹhẹ etọn, po aliho dodo etọn lẹ po tọn ji dali, hiẹ to alọgọna nuplọntọ towe lẹ nado wleawuna owanyi yetọn na Jiwheyẹwhe. Eyin a yí whenu zan nado do jẹhẹnu dagbe he Jiwheyẹwhe nọ mọ to hosetọ towe lẹ dopodopo mẹ hia yé, hiẹ to whẹwhinwhẹ́n lẹ na yé nado yise dọ haṣinṣan mẹdetiti tọn yọnbasi hẹ ẹ. Ehe sọgan yin wiwà gbọn ayihamẹlinlẹnpọn do wefọ delẹ ji taidi Psalm 139:1-3, Luku 21:1-4, po Johanu 6:44 po dali, podọ gbọn alọgigọna hosetọ towe lẹ nado mọnukunnujẹ lehe owanyi Jehovah tọn na devizọnwatọ nugbonọ etọn lẹ siso sọ mẹ dali. (Lom. 8:38, 39) Basi zẹẹmẹ dọ Jehovah ma nọ doayi nuṣiwa mítọn lẹ kẹdẹ go gba ṣigba e nọ mọ aliho gbẹninọ mítọn tọn blebu, zohunhun mítọn na sinsẹ̀n-bibasi wiwe-ṣeke, po owanyi mítọn na oyín etọn po. (2 Otàn. 19:2, 3; Heb. 6:10) E nọ flin onú lẹpo gando dopodopo mítọn go, podọ to aliho jiawu de mẹ, e na gọ̀ mẹhe ‘tin to yọdo oflin tọn mẹ lẹpo’ wá ogbẹ̀. (Joh. 5:28, 29; Luku 12:6, 7) To whenuena e yindọ gbẹtọvi lẹ yin didá to apajlẹ po ojlẹmọ Jiwheyẹwhe tọn po mẹ, hodidọ do jẹhẹnu etọn lẹ ji na nọ saba whàn yé nado yigbe to aliho dagbe mẹ sọn ahun mẹ wá.—Gẹn. 1:27.

Mí sọgan sọ yinuwado ahun hosetọ mítọn lẹ tọn ji eyin mí plọn nado nọ pọ́n mẹdevo lẹ dile Jehovah nọ mọ yé do. E sọgbe nado lẹnnupọn dọ eyin Jiwheyẹwhe nọ hò dopodopo mítọn lẹ tọn pọ́n, mọjanwẹ e nasọ nọ do mẹtọnhopọn dopolọ hia mẹdevo lẹ do, mahopọnna fie yé wá sọn kavi akọta yetọn. (Owalọ 10:34, 35) Eyin mẹde ko penugo nado wá tadona enẹ kọ̀n, e na tindo whẹwhinwhẹ́n dolido sinai do Owe-wiwe ji nado sukúndona wangbẹna po nuvẹun po to ahun etọn mẹ. Ehe na hẹn ẹn penugo nado tin to jijọho mẹ hẹ mẹdevo lẹ dile e to pinplọn nado wà ojlo Jiwheyẹwhe tọn.

Budisi Jiwheyẹwhe yin numọtolanmẹ devo he a dona gọalọna mẹdevo lẹ nado tindo. (Ps. 111:10; Osọ. 14:6, 7) Osi gbégbò tọn, kavi budisi Jiwheyẹwhe mọnkọtọn, sọgan whàn mẹde nado basi wadotana nuhe hugan huhlọn jọwamọ tọn etọn. Gbọn hodọdo nuwiwa mẹhẹnjọsi po dagbewanyi jiawu Jehovah tọn po ji dali, hiẹ sọgan gọalọna mẹdevo lẹ nado wleawuna obu he sọgbe ma nado hẹn homẹ gble e.—Ps. 66:5; Jẹl. 32:40.

Hẹn ẹn diun dọ hosetọ towe lẹ mọnukunnujẹemẹ dọ walọyizan yetọn yin nujọnu to nukun Jehovah tọn mẹ. E tindo numọtolanmẹ, podọ gbeyiyi mítọn hlan anademẹ etọn sọgan hẹn awubla kavi ayajẹ wá na ẹn. (Ps. 78:40-42) Dohia gbẹtọ lẹ nuhewutu walọyizan yetọn sọgan gọalọna Jiwheyẹwhe nado gblọnhona avùnnukundiọsọmẹ Satani tọn.—Howh. 27:11.

Gọalọna hosetọ towe lẹ nado mọdọ jijẹ nubiọtomẹsi Jiwheyẹwhe tọn lẹ kọ̀n na hẹn ale wá na yé. (Isa. 48:17) Aliho dopo nado wà ehe wẹ nado dlẹnalọdo kọdetọn he nuyọnẹn Jiwheyẹwhe tọn gbigbẹdai, etlẹ yin na ojlẹ gli de nọ hẹnwa to agbasa-liho podọ to numọtolanmẹ-liho. Basi zẹẹmẹ lehe ylando nọ hẹn mí jẹla sọn Jiwheyẹwhe dè bo nọ glọnalina mẹdevo lẹ nado plọn nugbo lọ sọn mí dè, bosọ nọ gbọnmọ dali hò jlọjẹ yetọn yí do. (1 Tẹs. 4:6) Gọalọna hosetọ towe lẹ nado wlebona dona he tonusisena Osẹ́n Jiwheyẹwhe tọn lẹ hẹnwa na yé. Hẹn pinpẹn-nutọn-yinyọnẹn yetọn lodo na nugbo lọ dọ zọnlinzinzin to aliho dodo Jehovah tọn lẹ ji nọ whlá mí sọn nugbajẹmẹji susu mẹ. Eyin mẹde ko tindo yise to nuyọnẹn aliho Jiwheyẹwhe tọn lẹ tọn mẹ, e na gbẹwanna nuyiwa he sọta yé lẹpo. (Ps. 119:104) Tonusise ma na yin agbanpẹnmẹnu na ẹn gba, ṣigba e na pọ́n ẹn hlan taidi aliho de nado do mẹdezejo owanyinọ etọn na Jehovah hia.

Alọgigọna Mẹdevo lẹ Nado Gbeje Yedelẹ Pọ́n. Nado sọgan to whinwhẹ́n zọnmii to gbigbọ-liho, gbẹtọ lẹ dona yigbena obiọ ahun yetọn tọn lẹ. Basi zẹẹmẹ lehe Biblu sọgan gọalọna yé nado wà ehe do.

Gọalọna hosetọ towe lẹ nado yọnẹn dọ Biblu mayin kandai osẹ́n, ayinamẹ, nujijọ whenuho tọn, po dọdai tọn lẹ po poun gba. E sọ nọ do linlẹn Jiwheyẹwhe tọn hia. To Jakobu 1:22-25, Ohó Jiwheyẹwhe tọn yin yiyijlẹdo mẹpọ́nnu de go. Gbọn nuyiwa mítọn hlan nuhe e dọ podọ hlan aliho he mẹ Jehovah nọ hẹn lẹndai etọn lẹ di te dali, wẹndomẹ Biblu tọn nọ do nuhe tin to ahun mítọn mẹ hia. Gbọnmọ dali, e nọ do nukun he Jiwheyẹwhe, mẹhe nọ ‘gbeje ahun pọ́n’ nọ yí do nọ pọ́n mí hia. (Howh. 17:3) Na tuli hosetọ towe lẹ nado hẹn ehe do ayiha mẹ. Dotuhomẹna yé nado lẹnayihamẹpọndo nuhe Jiwheyẹwhe ko whlá do kandai Biblu tọn mẹ na mí ji podọ do diọdo he yé dona basi to gbẹzan yetọn mẹ nado sọgan hẹn homẹ etọn hùn ji. Gọalọna yé nado pọ́n Biblu hihia hlan taidi aliho de nado yọ́n lehe Jehovah nọ dindona “linlẹn ayiha tọn po ojlo ayiha tọn po” do, na yé nido sọgan kọngbedopọ hẹ Jiwheyẹwhe bo basi diọdo he jẹ lẹ.—Heb. 4:12; Lom. 15:4.

Biblu plọntọ delẹ sọgan jlo nado yinuwa do nuhe yé to pinplọn lẹ ji; ṣigba yé nọ dibu na nuhe mẹdevo lẹ na lẹn. Yé sọgan to ahidi hẹ ojlo sinsinyẹn agbasa tọn delẹ. Kavi yé sọgan dín whẹjijọ dọ emilẹ to Jiwheyẹwhe sẹ̀n to whenuena yé gbẹ pò to aṣa aihọn tọn lẹ go tẹdo. Do owù he awuwhiwhle nado basi nudide bẹhẹn lẹ hia. (1 Ahọ. 18:21) Na tuli yé nado hodẹ̀ na Jiwheyẹwhe nado gbeje bo lẹ̀ ahun yetọn lẹ wé.—Ps. 26:2; 139:23, 24.

Dohia yé dọ Jehovah mọnukunnujẹ tuklajẹ yetọn mẹ podọ Biblu basi zẹẹmẹ nuhe to jijọ tọn. (Lom. 7:22, 23) Gọalọna yé nado tin to aṣeji ma nado dike ayilinlẹn ahun mapenọ tọn lẹ ni dù to yé ji.—Howh. 3:5, 6; 28:26; Jẹl. 17:9, 10.

Na tuli dopodopo yetọn nado gbeje mẹwhinwhàn etọn lẹ pọ́n. Plọn ẹn nado nọ kanse ede dọ: ‘Naegbọn yẹn jlo na wà ehe? Be e na dohia Jehovah dọ yẹn yọ́n pinpẹn nuhe e ko wà na mi lẹpo tọn ya?’ Dovivẹnu nado hẹn nujikudo lọ lodo dọ haṣinṣan dagbe tintindo hẹ Jehovah wẹ onú họakuẹ hugan to gbẹ̀mẹ.

Gọalọna hosetọ towe lẹ nado mọnukunnujẹ nuhe Jehovah sinsẹ̀n po ‘ahun lẹpo’ po zẹẹmẹdo mẹ. (Luku 10:27) Ehe zẹẹmẹdo dọ numọtolanmẹ, ojlo, po mẹwhinwhàn yetọn lẹpo po dona tin to kọndopọmẹ hẹ aliho Jehovah tọn lẹ. Enẹwutu plọn hosetọ towe lẹ nado nọ gbadopọnna nuhe yé nọ wà, numọtolanmẹ yetọn gando nubiọtomẹsi Jiwheyẹwhe tọn lẹ go podọ mẹwhinwhàn he wutu yé do to Jiwheyẹwhe sẹ̀n. (Ps. 37:4) Dile nuplọntọ towe lẹ jẹ nukunnumọjẹ adà he biọ vọjlado lẹ mẹ ji, na tuli yé nado nọ hodẹ̀ na Jehovah dọmọ: ‘Hẹn ahun ṣie do dopo nado nọ dibusi oyín towe.’—Ps. 86:11.

Eyin nuplọntọ de wleawuna haṣinṣan mẹdetiti tọn hẹ Jehovah, yise wẹ na whàn ẹn nado setonuna Jiwheyẹwhe, e mayin na hiẹ dọmọ na ẹn wutu poun gba. To whenẹnu, ewọ lọsu na ede na nọ “dindona onú heyin alọkẹyi hlan Oklunọ.” (Efe. 5:10; Flp. 2:12) Tonusise he wá sọn ahun mẹ mọnkọtọn nọ hẹn homẹ Jehovah tọn hùn.—Howh. 23:15.

Hẹn ẹn do ayiha mẹ dọ Jehovah wẹ nọ dindona ahun bo nọ dọ̀n gbẹtọ lẹ biọ haṣinṣan de mẹ hẹ ẹ. (Howh. 21:2; Joh. 6:44) Gbekọndopọ wẹ yin bibiọ to mí si. (1 Kọl. 3:9) E tin taidi dọ ‘Jiwheyẹwhe to vẹvẹ gbọn míwlẹ dali.’ (2 Kọl. 5:20; Owalọ 16:14) Jehovah ma nọ hẹn mẹde gánnu-gánnu nado kẹalọyi nugbo lọ gba, ṣigba dile mí to Owe-wiwe yizan, e sọgan hẹn hosetọ mítọn lẹ nado mọdọ nuhe sè yé te yin gblọndo na kanbiọ kavi odẹ̀ yetọn lẹ. Hẹn nugbo ehe do ayiha mẹ to whedepopenu he dotẹnmẹ lọ hundonuvo na we nado plọn mẹdevo lẹ, bo nọ biọ anademẹ po alọgọ Jehovah tọn po vẹkuvẹku.—1 Otàn. 29:18, 19; Efe. 1:16-18.