Alọdlẹndonu Nuplọnwe Opli Gbẹzan po Lizọnyizọn po Tọn

19-25 Septembre

NUHỌAKUẸ LẸ SỌN OHÓ JIWHEYẸWHE TỌN MẸ | SALMU LẸ 135-141

Eksọdusi

it-1-F 849 huk. 6

⁶ Jehovah ze oyín etọn daga bo whlẹn Islaelivi lẹ gbọn huhlọn etọn didohia to aliho he jiawu mẹ dali. To whenue yé ko jẹ Whèzẹtẹn-waji Ohù Vẹẹ tọn awuyẹyẹ-afọyẹyẹ, Mose nọ nukọnna visunnu Islaeli tọn lẹ to ohàn de jiji mẹ. Nọviyọnnu etọn Miliami he yin yẹwhegán-yọnnu de hẹn ohún bo nọ nukọnna yọnnu he hẹn ohún bo to wedu lẹpo, bọ topọ mẹ yé nọ yihàn na sunnu lọ lẹ. (Eks 15:1, 20, 21) Vogbingbọn daho de tin to Islaelivi lẹ po kẹntọ yetọn lẹ po ṣẹnṣẹn. To whenue yé tọ́n sọn Egipti, dotẹnmẹ ma yin nina gbẹtọ po kanlin po nado gbleawuna yé; avún dopo tata ma tlẹ gbó Islaelivi lẹ. (Eks 11:7) Dile etlẹ yindọ kandai Eksọdusi tọn ma dọ dọ Falo po awhànpa etọn po yin vivasudo do ohù lọ mẹ, Salmu lẹ 136:15 dọ dọ Jehovah “siọ Falo po awhànpa etọn po do Ohù Vẹẹ mẹ.”

26 Septembre–2 Octobre

it-1-F 365

Onù

Awutugonu de wẹ e yin he Jiwheyẹwhe wleawuna, fie núdùdù nọ yin zizedo bo nọ yin lìlì nado yì adọ̀go mẹ, podọ gbẹtọvi lẹ nọ yí i zan nado dọho. Ohó he nọ yin didọ lẹpo dona nọ yin nado hẹn pipà wá na Ewọ. (Slm 34:1; 51:15; 71:8; 145:21) Salmu-kantọ de dọ dọ nuhe tindo gbọfufu lẹpo na nọ pà Jehovah; enẹwutu nuhe gbẹtọvi lẹ dona nọ yí onù yetọn do wà niyẹn, eyin yé jlo na nọgbẹ̀. Apọsteli Paulu basi zẹẹmẹ dọ yise tintindo to Jiwheyẹwhe po Visunnu etọn po mẹ, etlẹ yin to ahun mẹ, ma ko pé. Gbeyiyi gbangba tọn dona zọnpọ hẹ ẹ, na mí nido mọ whlẹngán.—Slm 150:6; Lo 10:10.

Sọgbe hẹ lẹndai po jlọjẹ Jehovah tọn po, gọna huhlọn he e tindo taidi Mẹdatọ lọ, ewọ sọgan dọ nudagbe he devizọnwatọ etọn dona dọ lẹ na ẹn. E gbọdo yẹwhegán etọn lẹ nado wàmọ to azọ́njiawu-liho. (Eks 4:11, 12, 15; Jel 1:9) To nujijọ de whenu, e tlẹ hẹn kẹtẹkẹtẹ de nado dọho. (Sọh 22:28, 30; 2Pi 2:15, 16) To egbehe, e ma yin to gbọdo glọ wẹ ohó Jiwheyẹwhe tọn lẹ sọgan yin didọna devizọnwatọ etọn lẹ te, ṣigba gbọn Ohó gbọdo etọn he yin kinkandai gblamẹ, ehe nọ hẹn yé sọgbe mlẹnmlẹn na azọ́n dagbe lẹpo. (2Ti 3:16, 17) Yé ma nọ to nukundo wiwá Klisti tọn nado hẹn wẹndagbe de wá na yé, mọjanwẹ yé ma nọ yì dín owẹ̀n he yé jlo na lá lọ sọn asisa devo mẹ do niyẹn. Owẹ̀n lọ to nukọnna yé bo ko yin awuwlena, na yé nido lá ẹ, dile e yin didọna yé do dọmọ: “Ohó lọ to dè we, yèdọ to onù towe titi mẹ podọ to ahun towe titi mẹ.”—Lo 10:6-9; De 30:11-14.

Onù Sọgan Hẹn Ogbẹ̀ Kavi Okú Wá. E ko họnwun todin dọ nujọnu wẹ e yin nado nọ yí onù mítọn zan to aliho dagbe mẹ, podọ nuhe Jehovah dọ niyẹn. Ohó etọn dọmọ: “Asisa ogbẹ̀ tọn wẹ onù dodonọ tọn.” (Hwh 10:11) Enẹwutu, onù dona yin hihọ́-basina po sọwhiwhe po (Slm 141:3; Hwh 13:3; 21:23), na yíyí i zan to aliho agọ̀ mẹ sọgan hẹn nugbajẹmẹji wá mẹhe yí i zan to aliho agọ̀ mẹ lọ ji. (Hwh 10:14; 18:7) Jiwheyẹwhe nọ hẹn mẹde nado dogbè, na nuhe e dọ sọn onù etọn mẹ wutu. (Mt 12:36, 37) Mẹde sọgan nọ whlẹndo ji do dọho, bo yí sọmawhe do dopà. (Yẹ 5:4-6) Mẹde sọgan na pipà oklọ tọn mẹdevo, ehe na zọ́n bọ mẹlọ na jai bo yin whẹgbledo. (Hwh 26:28) Onú titengbe wẹ e yin nado nọ họ́ onù mítọn to mẹylankan lẹ nukọn, na eyin mí tlẹ de onú kleun de pò sọn nuhe nuyọnẹn Jiwheyẹwhe tọn nọ deanana devizọnwatọ etọn lẹ nado dọ lẹ mẹ, enẹ sọgan hẹn vlẹko wá oyín Jiwheyẹwhe tọn ji bo dekọtọn do okú mẹ na mí. (Slm 39:1) Jesu ze apajlẹ dagbe dai na nuhe dù tonusisena ojlo Jiwheyẹwhe tọn bo ma nọ mọhodọdo kẹntọ etọn lẹ go kavi zun yé.—Isa 53:7; Ow 8:32; 1Pi 2:23.

Na Klistiani lẹ yin mapenọ wutu, yé dona tin to aṣeji to whelẹponu; enẹwutu yé dona nọ họ́ ahun yetọn. Jesu dọ dọ e ma yin nuhe biọ onù gbẹtọ tọn mẹ wẹ nọ hẹn ẹn flu gba, amọ́ nuhe tọ́njẹgbonu sọn onù etọn mẹ, na “sọn susugege nuhe tin to ahun mẹ lẹ tọn mẹ wẹ onù nọ dọtọ́n.” (Mt 12:34; 15:11) Enẹwutu, mí dona nọ nọ̀ aṣeji nado nọ lẹnnupọn whẹpo do dọho, bo nọ lẹnnupọndo kọdetọn lọ lẹ ji. Ehe nọ biọ dọ mí ni yí nugopipe apọ̀nmẹ tọn mítọn zan nado yí nudagbe he mí plọn sọn Ohó Jiwheyẹwhe tọn mẹ lẹ do yizan mẹ.—Hwh 13:3; 21:23.