Alọdlẹndonu Nuplọnwe Opli Gbẹzan po Lizọnyizọn po Tọn
3-9 Octobre
NUHỌAKUẸ LẸ SỌN OHÓ JIWHEYẸWHE TỌN MẸ | HOWHINWHẸN LẸ 1–6
Onú Sisosiso Gbigbọmẹ Tọn Lẹ
it-1-F 511
Oyọnẹn
Asisa Oyọnẹn Tọn. Jehovah wẹ yin Asisa oyọnẹn tọn. Na nugbo tọn, ewọ wẹ yin gbẹ̀namẹtọ, podọ ogbẹ̀ yin nujọnu na mẹde he jlo na tindo oyọnẹn depope. (Slm 36:9; Ow 17:25, 28) Humọ, Jiwheyẹwhe wẹ dá nulẹpo, enẹwutu eyin gbẹtọvi de na tindo oyọnẹn, e dona plọnnu gando alọnuzọ́n Jiwheyẹwhe tọn go. (Osọ 4:11; Slm 19:1, 2) Jiwheyẹwhe sọ gbọdo Ohó etọn nado yin kinkandai, ehe sọgan gọalọna gbẹtọvi lẹ nado plọnnu gando ojlo Jiwheyẹwhe tọn po lẹndai etọn lẹ po go. (2Ti 3:16, 17) Enẹwutu, Jehovah wẹ asisa oyọnẹn nugbo lẹpo tọn, podọ mẹhe to oyọnẹn dín dona nọ dibusi Jiwheyẹwhe, bọ ehe na zọ́n bọ e na tin to aṣeji ma nado hẹn homẹgble Jehovah. Budisi ehe wẹ bẹjẹeji oyọnẹn tọn. (Hwh 1:7) Budisi Jiwheyẹwhe to aliho enẹ mẹ nọ zọ́n bọ yè nọ mọ oyọnẹn he pegan, ṣigba mẹhe ma nọ dibusi Jiwheyẹwhe lẹ nọ saba wá tadona he ma sọgbe kọ̀n gando nuhe yé to mimọ lẹ go.
17-23 Octobre
g-F 11/13 16
Be Hiẹ Nọ Tin “to Hùnwhẹ mẹ to Whepoponu” Ya?
“Azán lẹpo wẹ nọ yin ylankan na mẹhe yè to yasana, ṣigba, mẹhe ahun etọn gọ́ na ayajẹ nọ tin to hùnwhẹ mẹ to whepoponu.”—Howhinwhẹn lẹ 15:15.
ETẸWẸ hogbe enẹlẹ zẹẹmẹdo? Yé nọ dlẹnalọdo ninọmẹ apọ̀nmẹ tọn po numọtolanmẹ mẹde tọn po. “Mẹhe yè to yasana” nọ to nulẹnpọn do onú agọ̀ lẹ ji—yèdọ pọndohlan de he nọ hẹn azán etọn lẹ yin “ylankan,” kavi apọṣimẹnu. To vogbingbọn mẹ, “mẹhe ahun etọn gọ́ na ayajẹ” nọ ze ayiha do onú dagbe lẹ ji—yèdọ pọndohlan de he nọ hẹn ẹn tindo ayajẹ ahun mẹ tọn, ehe nọ zọ́n bọ e nọ tin “to hùnwhẹ mẹ to whepoponu.”
Mímẹpo wẹ nọ tindo nuhahun he sọgan hò ayajẹ mítọn yí jẹ obá de mẹ. Etomọṣo, mí sọgan nọ wà onú delẹ he na gọalọna mí nado nọ hẹn ayajẹ mítọn go to ninọmẹ sinsinyẹn lẹ mẹ. Mì gbọ mí ni gbadopọnna nuhe Biblu dọ.
• Ma nọ dike magbọjẹ osọ he ja tọn lẹ ni nọ hẹn we gbọjọ to egbé blo. Jesu Klisti dọmọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.”—Matiu 6:34.
• Nọ tẹnpọn nado ze ayiha do onú dagbe he sin numimọ a ko tindo wayi lẹ ji. To whenue a jẹflumẹ, nọ flin onú dagbe enẹlẹ bo nọ lẹnayihamẹpọn do yé ji. Humọ, ma nọ ze ayiha do nuṣiwa kavi walọ ylankan he ko wayi lẹ ji blo. Nọ plọnnu sọn yé mẹ bo nọ zindonukọn. Nọ yinuwa taidi húnkùntọ de he nọ yìnnukunpọn mẹpọ́nnu he nọ mọnú hlan godo mẹ, ṣigba bo ma nọ to pinpọn e mẹ mapote. Sọ hẹn do ayiha mẹ dọ Jiwheyẹwhe “dè . . . wẹ jona nugbo tin te.”—Salmu lẹ 130:4.
• Whenue magbọjẹ lẹ hẹn we jẹflumẹ, nọ dọhona mẹde he sọgan jlọ we dote. “Magbọjẹ . . . nọ hẹn agbàn pẹ̀n” ahun mítọn, “ṣigba, ohó dagbe nọ vọ́ zodolanmẹna ẹn,” wẹ Howhinwhẹn lẹ 12:25 dọ. “Ohó dagbe” enẹ sọgan wá sọn hagbẹ whẹndo tọn kavi họntọn dejidego de dè—yèdọ mẹhe ma nọ mọhodọdomẹgo kavi tindo pọndohlan agọ̀, ṣigba mẹhe “nọ yiwannamẹ to whelẹponu.”—Howhinwhẹn lẹ 17:17.
Ohó nuyọnẹn tọn he tin to Biblu mẹ lẹ ko gọalọna mẹsusu nado tindo ayajẹ dogọ to gbẹ̀mẹ, etlẹ yin to ninọmẹ sinsinyẹn lẹ mẹ. Gbọ hogbe enẹlẹ ni gọalọna hiẹ lọsu ga.
24-30 Otobre
w14-F 1/12 12-13
“Zinzin Mẹde Tọn Na Hẹn Ẹn Whleawu Nado Gblehomẹ”
Bọlu-plọnmẹtọ wehọmẹ de tọn yin yinyan, na homẹgble sinsinyẹn etọn wutu.
Ovi de gblehomẹ sinsinyẹn, na e ma mọ nuhe dín e te yí wutu.
Onọ̀ de dawhá do visunnu etọn ji sinsinyẹn, na abò etọn mẹ ma to titoji wutu.
MÍMẸPO wẹ ko mọ bọ mẹde gblehomẹ pọ́n, podọ matin ayihaawe mílọsu ko gblehomẹ to ojlẹ de kavi devo mẹ pọ́n. Nugbo wẹ dọ mí sọgan nọ pọ́n homẹgble hlan taidi numọtolanmẹ agọ̀ de he dona yin kúnsúdona, amọ́ mí nọ saba lẹndọ mí tindo whẹwhinwhẹ́n nado gblehomẹ titengbe to whenue mí lẹndọ yè tafu mí. To hosọ de mẹ, Association américaine de psychologie tlẹ dọ dọ “homẹgble yin numọtolanmẹ gbẹtọvi tọn de he sọgbe bo nọ saba yidogọna agbasalilo.”
Pọndohlan enẹ sọgan taidi nuhe sọgbe, eyin mí lẹnnupọndo nuhe apọsteli Paulu he yin Klistiani de wlan to gbọdo glọ ji. Na e yọnẹn dọ ojlẹ delẹ sọgan tin bọ gbẹtọvi lẹ na nọ gblehomẹ wutu, e dọmọ: “Mì sọgan gblehomẹ, amọ́ mì waylando blo; mì dike owhè yihọ to whenue mì gbẹ́ pò to homẹgble ji blo.” (Efesunu lẹ 4:26) Po ehe po to ayiha mẹ, be mí na nọ yawu gblehomẹ wẹ ya, kavi mí na nọ wà nuhe go mí pé nado duto e ji?
BE HIẸ DONA NỌ GBLEHOMẸ WẸ YA?
Whenue Paulu to ayinamẹ enẹ na gando homẹgble go, e didọ hogbe salmu-kantọ tọn lẹ wẹ tin to ayiha mẹ na ẹn, ehe dọmọ: “Mì sọgan duadi, amọ́ mì waylando blo.” (Salmu lẹ 4:4) Enẹwutu, etẹwẹ ayinamẹ Paulu tọn enẹlẹ zẹẹmẹdo taun? E basi zẹẹmẹ yinukọn dogọ dọmọ: “Mì gbọ adi sinsinyẹn, homẹgble, adánjijẹ, awhá po mẹzunzun wunmẹ lẹpo po ni dẹn do mì gọna nuylankan lẹpo.” (Efesunu lẹ 4:31) Na nugbo tọn, ayinamẹ wẹ Paulu to nina Klistiani lẹ ma nado nọ yawu gblehomẹ. Nuhe sọ whànmẹ wẹ yindọ Association américaine de psychologie yidogọ to hosọ lọ mẹ dọ: “Dodinnanu lẹ dohia dọ ‘awujijona’ homẹgble nọ yidogọna homẹgble po adi sinsinyẹn po poun wẹ bo ma nọ gọalọ paali . . . nado didẹ whẹho lọ.”
To whelọnu lo, nawẹ mí dona hẹn homẹgble po dekọtọn etọn lẹ po “dẹn do” mí gbọn? Ahọlu nuyọnẹntọ Islaeli hohowhenu tọn lọ, Sọlomọni wlan dọmọ: “Ayihaawe ma tin dọ zinzin mẹde tọn na hẹn ẹn whleawu nado gblehomẹ, podọ gigo wẹ e yin na ẹn nado nọ miọnnukundo nuṣiwa.” (Howhinwhẹn lẹ 19:11) Nawẹ “zinzin mẹde tọn” nọ gọalọna ẹn to whenue adi fọ́n to ohò etọn mẹ gbọn?
LEHE ZINZIN NỌ HẸNMẸ WHLEAWU NADO GBLEHOMẸ DO
Zinzin yin nugopipe lọ nado mọnú dohlan nukọn gando ninọmẹ de go. Nado tindo zinzin zẹẹmẹdo nado mọ kọdetọn whẹho de tọn hlan. Nawẹ ehe nọ gọalọ gbọn to whenue yè hẹn homẹgble mí kavi dinho mí?
Whenue mí mọ mawadodo, adi sọgan do mí. Ṣigba, eyin numọtolanmẹ mítọn sisẹ́ mí bọ mí yinuwa po kanyinylan po, mí sọgan gbleawuna míde kavi mẹdevo. Kẹdẹdile miyọ́n he yè ma deanana ganji de sọgan fiọ ohọ̀ de do, mọ wẹ homẹgble sọgan hẹn yinkọ dagbe mítọn gọna haṣinṣan mítọn hẹ mẹdevo lẹ etlẹ yin hẹ Jiwheyẹwhe gble do. Enẹwutu, to whenue numọtolanmẹ homẹgble tọn fọ́n to ohò mítọn mẹ, mí dona nọ lẹnnupọn sisosiso yinukọn gando ninọmẹ lọ go. Nukunnumọjẹnumẹ gigọ́ tintindo gando nuhe to jijọ lọ go na gọalọna mí nado duto numọtolanmẹ mítọn lẹ ji.
Otọ́ Sọlomọni tọn, yèdọ Ahọlu Davidi yin whinwhlẹn sọn hùnhọ́dudu dawe lọ Nabali tọn si, na yè gọalọna ẹn nado mọnú dohlan nukọn gando ninọmẹ lọ go. Davidi po sunnu etọn lẹ po basi hihọ́na lẹngbọ Nabali tọn lẹ to danfafa Jude tọn ji. To whenue ojlẹ sọ̀ nado pà ofún na lẹngbọ lẹ, Davidi biọ núdùdù Nabali. Ewọ gblọn dọmọ: “Be yẹn na yí núdùdù ṣie po osin ṣie po, gọna olàn he n’hù na fúnpatọ ṣie lẹ bo yí i na sunnu he wá sọn fihe mẹde ma yọnẹn lẹ wẹ ya?” Mẹmasi-gbè nankọ die! Whenue Davidi sè hogbe ehelẹ, ewọ po sunnu 400 po fọ́n nado yì sukúndona Nabali po whédo etọn po.—1 Samuẹli 25:4-13.
Asi Nabali tọn, Abigaili, sè gando whẹho lọ go bo tọ́n nado yì pé Davidi. To whenue e sẹpọ Davidi po sunnu etọn lẹ po, e jẹklo bo dọmọ: “Dike deviyọnnu towe ni dọhona we, na hiẹ ni dotoaina ohó deviyọnnu towe tọn lẹ.” Enẹgodo, e basi zẹẹmẹ lehe Nabali gú do tọn na Davidi bo dọna Davidi dọ eyin e yiahọsu to e go bo duhùnhọ, e na wá vẹna ẹn.—1 Samuẹli 25:24-31.
Nawẹ hogbe Abigaili tọn lẹ gọalọna Davidi nado yí zinzin do didẹ ninọmẹ lọ gbọn? Tintan, e mọdọ gugutọ wẹ Nabali, podọ awetọ Davidi mọdọ eyin emi yiahọsu to e go, emi na duhùnhọ. Taidi Davidi, nude sọgan hẹn homẹgblena hiẹ lọsu. Ṣigba, etẹwẹ a dona wà? Hosọ Clinique Mayo tọn de he na ayinamẹ gando homẹgble go dọmọ: “Yiagbọji na ojlẹ kleun de bo hianu jẹ 10.” Mọwẹ, yiagbọji bo lẹnnupọndo nuhe na ko yin adọ̀ nuhahun lọ tọn po kọdetọn nuhe a jlo na wà lọ tọn lẹ po ji. Dike zinzin ni nọ hẹn we whleawu nado gblehomẹ—kavi tlẹ de homẹgble lọ sẹ̀.—1 Samuẹli 25:32-35.
Mọdopolọ, mẹsusu ko mọ alọgọ yí to egbehe nado duto homẹgble yetọn ji. Sebastian dọ dọ to whenue emi tindo owhe 23 bo tin to gànpamẹ to Pologne, Biblu pinplọn gọalọna emi nado nọ duto homẹgble po numọtolanmẹ sinsinyẹn emitọn po ji. “Jẹnukọn whẹ́, n’nọ lẹnnupọndo nuhahun lọ ji,” wẹ e dọ. “Enẹgodo, n’nọ tẹnpọn nado yí ayinamẹ Biblu tọn do yizan mẹ. N’mọdọ Biblu wẹ yin owe anademẹ tọn dagbe hugan lọ.”
Setsuo lọsu nọ yinuwa to aliho dopolọ mẹ. E dọmọ: “To whenue mẹdevo lẹ hẹn homẹgble mi to azọ́nmẹ, n’nọ saba dawhá do yé ji. Todin he n’plọn Biblu, kakati nado dawhá, n’nọ kanse dee dọ: ‘Owhẹ̀ mẹnu tọn wẹ taun? Be e ma yin yẹn wẹ hẹn nuhahun lọ wá vlavo nẹ?’ ” Nulinlẹnpọn do kanbiọ mọnkọtọn lẹ ji nọ hẹn ẹn whleawu nado gblehomẹ bọ e nọ penugo nado duto numọtolanmẹ sinsinyẹn he fọ́n to ahun etọn mẹ ji.
Numọtolanmẹ homẹgble tọn sọgan sinyẹn taun, ṣigba ayinamẹ he wá sọn Ohó Jiwheyẹwhe tọn mẹ lẹ tlẹ sọ dohuhlọn hugan mọ. Eyin a nọ yí ayinamẹ nuyọnẹn tọn Biblu tọn lẹ do yizan mẹ bo nọ hodẹ̀ nado biọ alọgọ Jiwheyẹwhe tọn, hiẹ lọsu sọgan dike bọ zinzin na hẹn we whleawu nado gblehomẹ kavi duto e ji.
31 Octobre–6 Novembre
w08-F 1/4 16
Ovi lẹ Pinplọn Whẹ́n to Aihọn He Nọ Joalọdokọjinamẹ de Mẹ
Anadidena Ogába Lọ
Doayi e go dọ Salmu lẹ 127:4, 5 yí mẹjitọ jlẹdo “dawe huhlọnnọ de” go. Be ehe dohia dọ otọ́ lẹ kẹdẹ wẹ sọgan plọn ovi lẹ po kọdetọn dagbe po ya? Lala. Na nugbo tọn, nunọwhinnusẹ́n he tin to nuyijlẹdonugo lọ mẹ gando otọ́ po onọ̀ lẹ po go—gọna mẹjitọ godoponọ lẹ ga. (Howhinwhẹn lẹ 1:8) Hodidọ lọ “dawe huhlọnnọ” to didohia dọ e nọ biọ huhlọn jẹ obá de mẹ nado sọgan de ogába de sọn ogá de mẹ. To ojlẹ Biblu tọn mẹ, ogá nọ yin bibasi po gànvẹẹ po bọ awhànfuntọ de nọ tùnafọ ogá lọ ji nado dọ̀n ẹn bo “de ogá” lọ. (Jelemia 50:14, 29) E họnwun dọ huhlọn po vivẹnu susu po wẹ e nọ biọ nado dọ̀n ogába lọ wá godo whẹpo do de e hlan nukọn!
Mọdopolọ, ovi lẹ pinplọn whẹ́n nọ biọ vivẹnu susu. Yelọsu lẹ ma nọ plọn yede whẹ́n poun gba, dile ogába de ma nọ de ede do. E blawu dọ to egbehe, mẹjitọ susu ma nọ tindo ojlo nado dovivẹnu dile e jẹ do. Yé nọ joalọdokọjinamẹ. Yé nọ dike televiziọn, wehọmẹ po hagbẹ lẹ po ni plọnnu ovi yetọn lẹ gando dagbe po oylan po go, gọna walọ dagbe po zanhẹmẹ po. Yé nọ na ovi yetọn lẹ nudepope he yé biọ. Podọ eyin lala didọ na biọ zẹẹmẹ susu bibasi, yé nọ gbọ bo nọ yigbe—bo nọ dín whẹjijọ dọ emi ma jlo na hẹn homẹgblena ovi emitọn lẹ. Nado dọ hójọhó, alọjodokọjinamẹ yetọn wẹ nọ hẹn ovi lẹ gble taun.
Azọ́n sinsinyẹn wẹ ovi lẹ pinplọn whẹ́n yin. E nọ biọ vivẹnudido nado yí ahun lẹpo do wazọ́n mọnkọtọn sọgbe hẹ anademẹ he tin to Ohó Jiwheyẹwhe tọn mẹ, amọ́ ale lọ lẹ mayọnjlẹ. Linlinwe lọ Parents dọmọ: “Dodinnanu lẹ . . . ko dohia dọ ovi he yin pinplọn whẹ́n gbọn mẹjitọ owanyinọ he nọ yí aṣẹpipa yetọn zan ganji lẹ dali—enẹ wẹ mẹhe nọ nọgodona ovi yetọn ṣigba bo nọ ze dogbó dai lẹ—nọ tindo kọdetọn dagbe to wehọmẹ, nọ tindo azọ́nyinyọnẹn dagbe lẹ, nọ voawu bo nọ tindo ayajẹ to nulẹpo mẹ hugan ovi he mẹjitọ yetọn lẹ nọ joalọdokọjinamẹ kavi nọ ylanhùn zẹjlẹgo lẹ.”
Ale he tlẹ yọ́n hugan de sọ tin. Mí ko gbadopọnna adà tintan Howhinwhẹn lẹ 22:6 tọn, ehe dọmọ: “Plọn yọpọvu do aliho he ewọ dona gbọn ji.” Wefọ lọ zindonukọn po hogbe homẹmiọnnamẹ tọn ehelẹ po dọmọ: “Eyin ewọ tlẹ whẹ́n mẹho, e ma na tọ́n sọn e ji.” Be howhinwhẹn gbọdo ehe dohia dọ yé na tindo kọdetọn dagbe dandan wẹ ya? Lala. Ovi towe tindo mẹdekannujẹ nudide bibasi tọn bo na yí i zan dile e to whinwhẹ́n. Amọ́, wefọ ehe bẹ jidenamẹ de hẹn na mẹjitọ lẹ. Jide tẹwẹ?
Eyin hiẹ plọn ovi towe lẹ sọgbe hẹ ayinamẹ Biblu tọn lẹ, a to awuwlena yé nado whẹ́n to ninọmẹ dagbe mẹ bo tindo kọdetọn dagbe—bọ a na wá mọ ovi towe lẹ na yin ayajẹnọ, bo na pegan bo nasọ whèwhín. (Howhinwhẹn lẹ 23:24) Hú popolẹpo, wleawuna “ogá” họakuẹ ehelẹ, basi hihọ́na yé bo yí dewe zan to anadidena yé mẹ. E ma na vẹna we gbede.
it-1-F 279 huk. 5
Opò, Obá
Aṣẹpipa mẹjitọ tọn. “Opò” kavi obá sọ nọ dlẹnalọdo aṣẹpipa he mẹjitọ lẹ tindo do ovi yetọn lẹ ji. Owe Howhinwhẹn lẹ tọn dlẹnalọdo aṣẹpipa ehe whlasusu, yèdọ hogbe de he nọ dlẹnalọdo mẹplọnlọ wunmẹ lẹpo kakajẹ obá he nọ yin yiyizan nado hò ovi lẹ ji. E họnwun dọ mẹjitọ lẹ wẹ Jiwheyẹwhe deazọ́nna nado yí obá ehe zan nado deanana ovi yetọn lẹ. Eyin mẹjitọ lọ gboawupo nado wà ehe, e na hẹn oylan po okú po wá na ovi etọn, podọ ewọ lọsu na mọ winyan bo na hẹn nukundagbe Jiwheyẹwhe tọn bu. (Hwh 10:1; 15:20; 17:25; 19:13) “Nulú doadọ̀do to ahun yọpọvu tọn mẹ, ṣigba, obá mẹplọnlọ tọn wẹ na họ̀n ẹn sẹ̀ pete.” “A dọ̀n alọ mẹplọnlọ tọn dogodo na yọpọ sunnu de blo. Eyin a yí obá do hò e, e ma na kú. Hiẹ dona yí obá do hò e, nado sọgan whlẹn ẹn sọn Yọdò si.” (Hwh 22:15; 23:13, 14) Na nugbo tọn, “mẹdepope he gọ̀ obá etọn dogodo gbẹwanna visunnu etọn, ṣigba, mẹhe yiwanna ẹn nọ yí sọwhiwhe do domẹplọnlọ e go.”—Hwh 13:24; 19:18; 29:15; 1Sa 2:27-36.