Họ̀nhungàn Hlan Aihọn Ayajẹ Tọn De

“HUHLỌNNỌ hugan lọ—e mayin to owhe fọtọ́n awe ehelẹ mẹ poun gba ṣigba to whenuho gbẹtọvi tọn lẹpo mẹ—wẹ Jesu Nazalẹti tọn,” wẹ linlinwe Time dọ. To whenuena Jesu tin to aigba ji, e mayin kiklo-yinyin etọn kẹdẹ wẹ gbẹtọ ahunjijlọnọ fọtọ́n susu yí do yọnẹn na gba, ṣigba na awuvẹmẹ he e nọ tindo na mẹdevo lẹ. Abajọ yé jlo nado yí i do duahọlu. (Johanu 6:10, 14, 15) Ṣogan, dile eyin nudego to hosọ he jẹnukọn mẹ do, Jesu gbẹ́ nado tindo mahẹ to tonudidọ mẹ.

E WHÈ gbau gblọndo Jesu tọn sinai do onú titengbe atọ̀n ji: Pọndohlan Otọ́ etọn tọn gando nudide-mẹdetiti tọn gbẹtọvi lẹ tọn go, he bẹ gandudu gbẹtọvi lẹ tọn hẹn; oyọnẹn Jesu tọn dọ huhlọn whiwhla hlọnhlọnnọ susu wẹ to azọ́nwa sọta vivẹnudido gbẹtọ lẹ tọn to gandudu mẹ; podọ lẹndai Jiwheyẹwhe tọn nado ze gandudu olọn tọn he na dugán do aigba blebu ji de dai. Eyin mí gbadopọnna nuagokun atọ̀n ehelẹ po sọwhiwhe po, mí na mọ nuhewutu vivẹnudido gbẹtọvi lẹ tọn nado hẹn aigba zun nọtẹn dagbe de ko gboawupo. Mí nasọ mọ lehe kọdetọn dagbe na yin tintindo do.

Be Gbẹtọvi lẹ Sọgan Dugán do Yéde Ji Ya?

To whenuena Jiwheyẹwhe dá gbẹtọvi lẹ, e degbè na yé nado paṣẹ do onú he nọ lìn to aigba ji lẹpo ji. (Gẹnẹsisi 1:26) Ṣigba gbẹtọvi lẹ tin to nupojipetọ-yinyin Jiwheyẹwhe tọn glọ. Sunnu po yọnnu tintan po dona hẹn taliai yetọn hlan Jiwheyẹwhe diun gbọn tonusise yíyí do joagọ sọn sinsẹ́n “atin yinyọ́n dagbe po oylan po lọ tọn” kọ̀n. (Gẹnẹsisi 2:17) E blawu dọ, Adam po Evi po ṣi mẹdekannujẹ yetọn zan bo vẹtolina Jiwheyẹwhe. Atin sinsẹ́n gbẹnamẹ lọ zize mayin nuyiwa ajojijẹ tọn de poun gba. E bẹ atẹṣiṣi sọta nupojipetọ-yinyin Jiwheyẹwhe tọn hẹn. Nudọnamẹ odò tọn de na Gẹnẹsisi 2:17 to The New Jerusalem Bible mẹ dọ dọ Adam po Evi po sọalọakọ́n “nado tindo mẹdekannujẹ mlẹnmlẹn walọyizan tọn to ehe mẹ gbẹtọvi gbẹ́ nado yọnẹn dọ nudida de wẹ emi yin . . . Ylando tintan yin nukundiọsọ nupojipetọ-yinyin Jiwheyẹwhe tọn.”

Na whẹho sinsinyẹn walọ dagbe tọn he gandego wutu, Jiwheyẹwhe na dotẹnmẹ Adam po Evi po gọna kúnkan yetọn lẹ nado de aliho gbẹzan yedetiti tọn, podọ yé ze nujinọtedo yedetiti tọn dai na nuhe dù dagbe po oylan po. (Psalm 147:19, 20; Lomunu lẹ 2:14) Nado dọhojọho, whenẹnu wẹ gbẹtọ jẹ tintẹnpọn ji nado basi nudide edetiti tọn. Be e ko tindo kọdetọn dagbe ya? Mí sọgan dọ lala, e yin mí doayi nuhe ko jọ to owhe fọtọ́n susu he wayi lẹ mẹ go! Yẹwhehodọtọ 8:9 dọmọ: “Mẹde to gandu do omẹ awetọ ji . . . na awugble etọn.” Kandai awubla tọn heyin gandudu mẹdetiti gbẹtọvi tọn do nugbo-yinyin Jẹlemia 10:23 tọn hia dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewlọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.” Whenuho ko dohia dọ gbẹtọvi lẹ ma tindo nugopipe nado dugán po kọdetọn dagbe po matin Mẹdatọ yetọn gba.

Jesu kọngbedopọ mlẹnmlẹn. Mẹdekannujẹ sọn Jiwheyẹwhe dè yin osùnú de na ẹn. “Yẹn ma wà nude na dee,” wẹ e dọ. “Yẹn to onú he yin homẹhun hlan [Jiwheyẹwhe] lẹ wà to whepoponu.” (Johanu 4:34; 8:28, 29) Enẹwutu, na e ma mọ gbedenamẹ yí sọn Jiwheyẹwhe dè nado kẹalọyi ahọlu-yinyin sọn gbẹtọ lẹ dè wutu, Jesu ma tlẹ lẹnnupọndeji nado kẹalọyi i. Ṣigba, ehe ma zẹẹmẹdo dọ e nọ whleawu nado gọalọna gbẹtọ lẹ gba. To vogbingbọn mẹ, e wà nuhe go e pé lẹpo nado gọalọna gbẹtọ lẹ nado mọ ayajẹ he klo hugan to whenẹnu podọ to sọgodo. E tlẹ ze ogbẹ̀ etọn dai na gbẹtọvi lẹ. (Matiu 5:3-11; 7:24-27; Johanu 3:16) Ṣigba Jesu yọnẹn dọ “onú dopodopo wẹ ojlẹ de tin na,” gọna ojlẹ Jiwheyẹwhe tọn nado yí nupojipetọ-yinyin etọn zan do gbẹtọvi ji. (Yẹwhehodọtọ 3:1; Matiu 24:14, 21, 22, 36-39) Nalete, flindọ to Edẹni mẹ, mẹjitọ tintan mítọn lẹ joawuna ojlo nudida gbigbọnọ ylankan de he dọho gbọn odàn yinukundomọ de dali. Ehe hẹn mí wá whẹwhinwhẹ́n awetọ he wutu Jesu ma do tindo mahẹ to tonudidọ mẹ ji.

Ogán Aihọn Tọn He Ma Yin Yinyọnẹn

Biblu dọna mí dọ Satani ze “ahọlu yigba aihọn tọn lẹpo, po gigo yetọn po” donukọnna Jesu, he na yin etọn eyin e sọgan litai whladopo poun. (Matiu 4:8-10) Na taun tọn, ahọlu-yinyin aihọn tọn yin zizedonukọnna Jesu—ṣigba sinai do nujinọtedo Lẹgba tọn lẹ ji. Jesu ma joawuna whlepọn ehe gba. Nalete, be whlepọn de wẹ eyin na nugbo tọn ya? Be Satani sọgan basi nuzedonukọnnamẹ daho mọnkọtọn na taun tọn ya? Mọwẹ, na Jesu lọsu ylọ Lẹgba dọ “ahọvi aihọn tọn,” podọ apọsteli Paulu basi zẹẹmẹ etọn taidi “yẹwhe owhenu he tọn.”—Johanu 14:30; 2 Kọlintinu lẹ 4:4; Efesunu lẹ 6:12.

Na taun tọn, Jesu yọnẹn dọ Lẹgba ma tindo dagbe gbẹtọvi lẹ tọn to ahun mẹ gba. E basi zẹẹmẹ Satani tọn taidi “hlọnhutọ” podọ taidi “otọ́ lalo lẹ tọn gọna onú he yin lalo lẹpo tọn.” (Johanu 8:44, The Amplified Bible) E họnwun dọ, aihọn de he “mlọnai to huhlọn” nudida gbigbọnọ ylankan mọnkọtọn tọn mẹ ma sọgan tindo ayajẹ na taun tọn gba. (1 Johanu 5:19) Ṣigba Lẹgba ma na tindo aṣẹpipa ehe kakadoi gba. Jesu, he yin nudida gbigbọnọ huhlọnnọ de todin, na de Satani po nuyiwadomẹji etọn lẹ po sẹ mlẹnmlẹn to madẹnmẹ.—Heblu lẹ 2:14; Osọhia 20:1-3.

Satani lọsu yọnẹn dọ azán etọn lẹ taidi ogán aihọn tọn to jujuyi po awuyiya po. Enẹwutu, e to nuhe go e pé lẹpo wà nado hẹn gbẹtọvi lẹ gblezọn zẹ̀ obá he yọ́n na vọjlado go, kẹdẹdile e basi do jẹnukọnna Osingigọ azán Noa gbè tọn. (Gẹnẹsisi 6:1-5; Juda 6) “Dindọ̀n hlan aihọnmẹnu lẹ, podọ hlan yé he tin to ohù mẹ lẹ,” wẹ Osọhia 12:12 dọ, “na Lẹgba lọ ko jẹte wá mì dè, po homẹgble daho po wutu, na e yọnẹn dọ whenu gli de wẹ e tindo.” Dọdai Biblu tọn po nujijọ aihọn tọn lẹ po dohia dọ mí to gbẹnọ sẹpọ vivọnu “whenu gli” ehe tọn. (2 Timoti 3:1-5) Pọngbọ ko tin to yakẹ todin.

Gandudu de He na Hẹn Ayajẹ Wá

Whẹwhinwhẹ́n atọ̀ntọ he wutu Jesu do nọ kada na tonudidọ wẹ yindọ e yọnẹn dọ to sọgodo he to yakẹ de mẹ, Jiwheyẹwhe na ze gandudu olọn mẹ tọn de dai he na dugán do aigba ji. Biblu ylọ gandudu ehe dọ Ahọluduta Jiwheyẹwhe tọn, podọ enẹ wẹ yin hosọ tangan yẹwhehodidọ Jesu tọn. (Luku 4:43; Osọhia 11:15) Jesu plọn devi etọn lẹ nado hodẹ̀ dọ Ahọluduta enẹ ni wá, na to gandudu etọn glọ kẹdẹ wẹ ‘ojlo Jiwheyẹwhe tọn na yin wiwà to aigba ji dile e yin do to olọn mẹ.’ (Matiu 6:9, 10) Hiẹ sọgan kanse dọ, ‘Eyin Ahọluduta ehe na dugán do aigba blebu ji, etẹwẹ na jọ do gandudu gbẹtọ tọn lẹ go?’

Gblọndo lọ yin mimọ to Daniẹli 2:44 mẹ dọmọ: ‘To azán ahọlu nẹlẹ tọn [he to gandu to titonu egbehe tọn mẹ] lẹ mẹ wẹ Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jó ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu gbẹtọ tọn he lẹpo do, ewọ bo nasọ nọte kakadoi.’ Etẹwutu wẹ Ahọluduta Jiwheyẹwhe tọn dona “gbà” gandudu aigba ji tọn lẹ sudo? Na yé nọgodona gbigbọ nukundiọsọ Jiwheyẹwhe tọn heyin nudide mẹdetiti tọn bibasi he Satani fọndote to jipa Edẹni tọn mẹ wutu. To yidogọmẹ na azọ́nwiwa jẹagọdo dagbenu gbẹtọvi lẹ tọn, mẹhe to kanván nado dike na gbigbọ enẹ ni gbọṣi aimẹ lẹ na yin vivasudo gbọn Mẹdatọ lọ dali. (Psalm 2:6-12; Osọhia 16:14, 16) Enẹwutu, mí dona kanse míde dọ, ‘Be mí tin to kọndopọmẹ hẹ gandudu gbọn Jiwheyẹwhe dali kavi mí jẹagọdo e wẹ ya?’

Nupojipetọ-Yinyin Mẹnu Tọn Wẹ Hiẹ na De?

Nado sọgan gọalọna gbẹtọ lẹ nado basi nudide he sinai do oyọnẹn he pegan ji, Jesu degbena devi etọn lẹ nado dọ yẹwheho “wẹndagbe ahọludu tọn . . . to aigba fininọ lẹpo mẹ na okunnu de hlan akọta lẹpo” whẹpo opodo titonu egbehe tọn nido wá. (Matiu 24:14) Mẹnu lẹ to egbehe wẹ yin yinyọnẹn lẹdo aihọn pé na yẹwhehodidọ Ahọluduta Jiwheyẹwhe tọn? Kunnudetọ Jehovah tọn lẹ wẹ. Linlinnamẹwe ehe ko tindo hogbe ehelẹ “He to Ahọluduta Jehovah Tọn lá” to wepa etọn ji na whenu dindẹn. To egbehe, Kunnudetọ hugan livi ṣidopo to aigba 230 lẹ ji wẹ to alọgọna gbẹtọ lẹ nado tindo oyọnẹn he pegan Ahọluduta enẹ tọn.a

Dona lẹ na Mẹjidugando Ahọluduta Tọn Lẹ

Jesu nọ saba wà onú lẹ to aliho Jiwheyẹwhe tọn mẹ. Enẹwutu, kakati nado de aliho mẹdekannujẹ tọn de bosọ tẹnpọn nado nọgodona kavi hẹn titonu he tin-to-aimẹ lọ pọnte gbọn mahẹ tintindo to tonudidọ mẹ dali, e wazọ́n sinsinyẹn nado hẹn dagbe Ahọluduta Jiwheyẹwhe tọn gblodeji, heyin pọngbọ dopo kẹdẹ lọ na nuhahun aihọn tọn lẹ. Na nugbonọ-yinyin etọn wutu, eyin didona po ofìn gigonọ de po to olọn mẹ taidi Ahọlu Ahọluduta enẹ tọn. Ale jiawu nankọtọn die na e litaina Jiwheyẹwhe wutu!—Daniẹli 7:13, 14.

Gbẹtọ livi susu he hodo apajlẹ Jesu tọn to Ahọluduta Jiwheyẹwhe tọn zizedo otẹn tintan mẹ bosọ litai hlan ojlo Jiwheyẹwhe tọn to egbehe lẹ nasọ duvivi nunina jiawu de tọn—yèdọ lẹblanulọkẹyi lọ nado yin mẹjidugando Ahọluduta Jiwheyẹwhe tọn lẹ to aigba ji. (Matiu 6:33) To gandudu owanyinọ etọn glọ, yé na yin hinhẹnwa pipé gbẹtọ tọn kọ̀n, po nukundido ogbẹ̀ madopodo tọn po. (Osọhia 21:3, 4) 1 Johanu 2:17 dọmọ: “Aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.” To whenuena Satani po hodotọ etọn lẹ po ko yin didesẹ bọ aigba ko yin didiọzun paladisi globu tọn de he vò sọn kinklan akọta tọn, titonu he gblezọn ajọwiwa tọn, po sinsẹ̀n lalo po tọn mẹ, ayajẹ susugege nankọtọn die nado gbọṣi aigba ji kakadoi!—Psalm 37:29; 72:16.

Mọwẹ, Ahọluduta Jiwheyẹwhe tọn wẹ yin họ̀nhungàn nujọnu tọn lọ na aihọn he tindo ayajẹ, podọ owẹ̀n he to nulila etọn basi yin zẹẹmẹ basina po gbesisọ po taidi wẹndagbe. Eyin hiẹ ma ko wàmọ, whedepopenu he dopo to Kunnudetọ Jehovah tọn lẹ mẹ dla we pọ́n, naegbọn hiẹ ma nado dotoai hlan wẹndagbe ehe to whenuena eyin hinhẹnwa owhé towe gbè?

[Nudọnamẹ Odò Tọn]

[Yẹdide to weda 5]

Whenuho dohia dọ gbẹtọvi lẹ ma sọgan dugán po kọdetọn dagbe po matin Jiwheyẹwhe

[Yẹdide to weda 5]

Na e to gandu do ‘titonu’ egbehe tọn ji wutu, Satani sọgan ze “ahọludu aihọn tọn lẹpo” donukọnna Jesu

[Yẹdide to weda 7]

Jesu plọnmẹ dọ to tito Ahọluduta Jiwheyẹwhe tọn glọ, aihọn na yin nọtẹn whanpẹnọ de