Mẹmẹsunnu Jọja lẹ Emi, Be Mì to Vivẹnudo Ya?
1. Whetẹnu wẹ mẹmẹsunnu jọja de sọgan jẹ anademẹ he tin to 1 Timoti 3:1 mẹ yí do yizan mẹ ji?
1 “Eyin mẹde to vivẹnudo . . ., azọ́n dagbe de wẹ ewọ jlo.” (1 Tim. 3:1) Ohó gbọdo enẹlẹ to tulina mẹmẹsunnu lẹ nado dovivẹnu nado sọgan pegan na lẹblanulọkẹyi sinsẹ̀nzọn tọn lẹ to agun mẹ. Be a dona whẹ́n whẹpo do wàmọ wẹ ya? Na nugbo tọn, e na yọ́n taun dọ hiẹ ni jẹ vivẹnudo ji to whenue hiẹ gbẹ́ pò to jọja mẹ. Gbọnmọ dali, hiẹ sọgan mọ azọ́nplọnmẹ yí bo na dohia dọ a pegan nado yin pipà taidi devizọnwatọ lizọnyizọnwiwa tọn to whenue hiẹ na whẹ́n. (1 Tim. 3:10) Eyin jọja he ko yí baptẹm de wẹ a yin, nawẹ a sọgan dovivẹnu gbọn?
2. Nawẹ a sọgan wleawuna gbigbọ mẹde-yido-sanvọ́ tọn bosọ nọ do e hia gbọn?
2 Gbigbọ Mẹde-Yido-Sanvọ́ Tọn: Flindọ azọ́n dagbe de wẹ a to vivẹnudo na, e ma yin na ogántẹn. Enẹwutu, wleawuna ojlo lọ nado gọalọna mẹmẹsunnu po mẹmẹyọnnu towe lẹ po. Dopo to nuhe na gọalọna we lẹ mẹ wẹ nado nọ lẹnayihamẹpọn do apajlẹ dagbe Jesu tọn ji. (Mat. 20:28; Joh. 4:6, 7; 13:4, 5) Biọ to Jehovah si nado gọalọna we na a nido nọ tindo ojlo to mẹdevo lẹ mẹ. (1 Kọl. 10:24) Be a sọgan nọ gọalọna mẹhomẹ kavi madogánnọ he to agun towe mẹ lẹ to aliho tangan de mẹ ya? Be a nọ ze dewe jo nado hò ogbé lẹ, húsinna vounvoun lẹ, kavi penukundo adà wiwejininọ Plitẹnhọ Ahọluduta lọ tọn devo lẹ go ya? Be a sọgan nọ ze dewe jo nado nọ pọ́n tẹnmẹ na mẹdevo lẹ to Wehọmẹ Lizọnyizọn Yẹwhehọluduta tọn mẹ ya? Hiẹ na mọdọ dewe yiyizan do mẹdevo lẹ tamẹ na hẹn ayajẹ wá na we.—Owalọ 20:35.
3. Nawẹ gbigbọnọ-yinyin họakuẹ sọ, podọ nawẹ a sọgan wleawuna ẹn gbọn?
3 Gbigbọnọ-Yinyin: To agun mẹ, gbigbọnọ-yinyin devizọnwatọ de tọn yin nujọnu taun hugan jẹhẹnu vonọtaun kavi nugopipe jọwamọ tọn etọn lẹ. Mẹmẹsunnu gbigbọnọ de nọ tẹnpọn nado pọ́n nulẹ hlan dile Jehovah po Jesu po nọ wà do. (1 Kọl. 2:15, 16) E nọ do “sinsẹ́n gbigbọ tọn” hia. (Gal. 5:22, 23) E nọ yin wẹnlatọ zohunhunnọ de he nọ ze Ahọluduta lọ do otẹn tintan mẹ. (Mat. 6:33) Hiẹ sọgan wleawuna jẹhẹnu gbigbọmẹ tọn lẹ gbọn nupinplọn to gbesisọ mẹ dali. Ehe na biọ dọ hiẹ ni nọ hia Biblu egbesọegbesọ, nọ hia zinjẹgbonu Atọ̀họ̀-Nuhihọ́ lọ Tọn po Réveillez-vous! po tọn dopodopo, nọ wleawuna opli agun tọn lẹ bosọ nọ yì yé. (Ps. 1:1, 2; Heb. 10:24, 25) To whenue Paulu to tulina jọja Timoti nado yinukọn to gbigbọ-liho, e wlan dọmọ: ‘Nọ payi mẹpinplọn towe go to whepoponu.’ (1 Tim. 4:15, 16) Enẹwutu, nọ wleawuna azọ́ndenamẹ he yin didena we to Wehọmẹ Lizọnyizọn Yẹwhehọluduta tọn mẹ lẹ ganji. Nọ wleawu whẹpo do tọ́n na lizọnyizọn lọ bo nọ tindo mahẹ gbesisọ tọn to e mẹ. Nọ ze yanwle gbigbọmẹ tọn lẹ donukọnna dewe taidi gbehosọnalitọ bibasi, sinsẹ̀nzọn Bẹtẹli tọn kavi nado yì Wehọmẹ Biblu Pinplọn Tọn Na Mẹmẹsunnu Tlẹnnọ lẹ, bosọ nọ dovivẹnu nado jẹ yanwle enẹlẹ kọ̀n. Gbigbọnọ-yinyin na gọalọna we nado “nọ họ̀nna ojlo jọja whenu tọn lẹ.”—2 Tim. 2:22.
4. Etẹwutu e do yin nujọnu nado yin nugbonọ podọ mẹhe go yè sọgan dejido?
4 Yin Nugbonọ Podọ Mẹhe Go Yè Sọgan Dejido: Mẹmẹsunnu he yin dide to owhe kanweko tintan whenu nado má núdùdù na Klistiani wamọnọ lẹ “pegan” bo yin yinyọnẹn taidi mẹhe go yè sọgan dejido podọ nugbonọ lẹ, enẹwutu apọsteli lẹ ma hanú eyin vlavo azọ́n lọ na yin wiwà kavi lala. Enẹ hẹn ẹn yọnbasi na apọsteli lọ lẹ nado na ayidonugo whẹho titengbe devo lẹ. (Owalọ 6:1-4) Enẹwutu, eyin azọngban de yin didena we to agun mẹ, nọ wà nuhe go a pé lẹpo nado hẹn ẹn di. Hodo apajlẹ Noa tọn, mẹhe yí sọwhiwhe do hodo anademẹ he yin nina ẹn lẹ gando aki lọ whiwhè go. (Gẹn. 6:22) Nugbonọ-yinyin họakuẹ to Jehovah dè bosọ nọ dohia dọ mẹde whèwhín to gbigbọ-liho.—1 Kọl. 4:2; pọ́n apotin lọ “Ale Azọ́nplọnmẹ Tọn Lẹ.”
5. Naegbọn e jẹ dọ mẹmẹsunnu jọja lẹ ni nọ dovivẹnu?
5 Dile e yin didọdai do, Jehovah to gbẹtọ lẹ bẹpli po awuyiya po. (Isa. 60:22) To gbẹtọ livi dopo ji, mado-ẹnẹ wẹ nọ yí baptẹm to whemẹwhemẹ. Po mẹyọyọ susu he to nugbo lọ mẹ wá lẹ po, nuhudo mẹmẹsunnu gbigbọnọ he pegan lẹ tọn tin nado penukundo azọngban agun tọn lẹ go. Azọ́n susu tin nado wà to sinsẹ̀nzọn Jehovah tọn mẹ todin hugan gbede pọ́n. (1 Kọl. 15:58) Mẹmẹsunnu jọja lẹ emi, be mì to vivẹnudo ya? Eyin mọ wẹ, be azọ́n dagbe tlala de jlo wẹ mì te!
[Nudọnamẹ tangan lẹ to weda 2]
Po mẹyọyọ susu he to nugbo lọ mẹ wá lẹ po, nuhudo mẹmẹsunnu gbigbọnọ he pegan lẹ tọn tin nado penukundo azọngban agun tọn lẹ go
[Apotin to weda 3]
Ale Azọ́nplọnmẹ Tọn Lẹ
Alemọyinu wẹ e nọ yin na mẹmẹsunnu jọja he pegan lẹ to whenue mẹho lẹ deazọ́nna yé bosọ plọnazọ́n yé. Nugopọntọ lẹdo tọn de sinai to oplò ji bo to tulina wẹnlatọ de to opli de godo. E doayi e go dọ mẹmẹsunnu jọja de to ote to yakẹ, enẹwutu e kanse jọja lọ eyin e jlo na dọho hẹ emi wẹ. Mẹmẹsunnu jọja lọ gblọn dọ azọngban emitọn wẹ nado nọ penukundo wiwejininọ oplò lọ tọn go to opli lẹ godo. Mẹjitọ etọn lẹ ko wleawufo nado yì whégbè, ṣogan e jlo na hẹn azọngban etọn di whẹpo do yì. Po homẹhunhun po wẹ nugopọntọ lọ jotẹnna ẹn. E dọmọ: “Mẹho agun enẹ tọn lẹ nọ to gbesisọ mẹ nado plọnazọ́n mẹmẹsunnu jọja he pegan lẹ gbọn azọngban lẹ didena yé to agun mẹ dali. Enẹwutu, mẹmẹsunnu jọja lẹ nọ saba yin pipà taidi devizọnwatọ lizọnyizọnwiwa tọn to ojlẹ he mẹ n’gbẹ́ nọ dla agun lọ pọ́n te.”